إرْمِيا 17:2 - الكتاب المقدس بالعربي الدارجي هنا تشاد

² وَ مِثِلْ يِذَّكَّرَوْا عِيَالْهُمْ، هُمَّنْ يِذَّكَّرَوْا مَدَابِحْ إِلٰـهَاتْهُمْ وَ الْعِيدَانْ الْغَزَّوْهُمْ لِعِبَادَةْ أَشِيرَةْ. وَ دَوْل تِحِتْ أَيِّ شَدَرَةْ خَضْرَةْ وَ فِي رَاسْ أَيِّ جَبَلْ عَالِي.

إرْمِيا 17:2 Referenca të Kryqëzuara

2 أخبار 24:18

وَ فِي شَانْ وَصِيِّتْهُمْ، نَاسْ مَمْلَكَةْ يَهُوذَا خَلَّوْا بَيْت اللّٰهْ رَبّ جُدُودْهُمْ وَ غَزَّوْا عِيدَانْ لِعِبَادَةْ أَشِيرَةْ وَ لِإِلٰـهَاتْ آخَرِينْ وَ عَبَدَوْهُمْ. وَ خَلَاصْ، اللّٰهْ نَزَّلْ غَضَبَهْ فِي بَلَدْ يَهُوذَا وَ مَدِينَةْ الْقُدُسْ بِسَبَبْ خَطَاهُمْ دَا.

إرْمِيا 2:20

وَ اللّٰهْ قَالْ: «يَا بَنِي إِسْرَائِيلْ! مِنْ وَكِتْ طَوِيلْ إِنْتُو دَلَّيْتُوا التَّقَلَةْ مِنْ رَقَبَتْكُو وَ قَطَّعْتُوا قُيُودْكُو وَ قُلْتُوا: ‹أَبَداً مَا نَعَبُدُوكْ.› وَ فِي رَاسْ أَيِّ جَبَلْ عَالِي وَ تِحِتْ أَيِّ شَدَرَةْ خَضْرَةْ، إِنْتُو رَاقْدِينْ مِثِلْ الشَّرْمُوطَةْ.

إشَعْيا 17:8

وَ بَتَّانْ مَا يِنْتَكِلْ عَلَيْ الْمَدَابِحْ السَّوَّتْهُمْ إِيدَهْ وَ مَا يِوَجِّهْ بِأَمَانْ فِي السَّوَّاهْ بِأَصَابْعَهْ. وَ دَوْل الْعِيدَانْ الْغَزَّاهُمْ لِعِبَادَةْ أَشِيرَةْ وَ الْمَخَابِرْ هَنَا الْبَخُورْ.

إشَعْيا 1:29

أَيْوَى، إِنْتُو تَلْقَوْا عَيْب مِنْ شَدَرْكُو الْكُبَارْ الْقَاعِدِينْ تِتْمَنَّوْه. وَ تَبْقَوْا خَجْلَانِينْ فِي شَانْ الْجِنَيْنَاتْ الْعَزَلْتُوهُمْ لِعِبَادَةْ أَصْنَامْكُو.

2 أخبار 33:3

وَ هُو بَنَى بَتَّانْ الْبَكَانَاتْ الْعَالِيِينْ هَنَا الْعِبَادَةْ الْأَبُوهْ حِزْقِيَّا هَدَّمَاهُمْ. وَ بَنَى مَدَابِحْ لِإِلٰـهْ بَعَلْ وَ غَزَّ عِيدَانْ لِعِبَادَةْ أَشِيرَةْ وَ سَجَدْ قِدَّامْ كُلَّ قُوَّاتْ السَّمَاءْ وَ عَبَدْهُمْ.

قُضياء 3:7

وَ بَنِي إِسْرَائِيلْ سَوَّوْا الْفَسَالَةْ قِدَّامْ اللّٰهْ. هُمَّنْ نِسَوْا اللّٰهْ إِلٰـهُّمْ وَ عَبَدَوْا أَصْنَامْ بَعَلْ وَ أَشِيرَةْ.

حِزْقِيال 20:28

أَنَا وَدَّيْتهُمْ فِي الْبَلَدْ الْحَلَفْت وَ قُلْت نَنْطِيهَا لَيْهُمْ. وَ وَكِتْ هُمَّنْ شَافَوْا أَيِّ جَبَلْ عَالِي وَ أَيِّ شَدَرَةْ خَضْرَةْ، قَدَّمَوْا فِي الْبَكَانْ دَا ضَحَايَاهُمْ. وَ غَضَّبَوْنِي بِهَدَايَاهُمْ وَ بِالْبَخُورْ الرِّيحْتَهْ تَعَجِبْ وَ بِهَدَايَاهُمْ هَنَا الشَّرَابْ الْقَدَّمَوْهُمْ فِي الْبَكَانْ دَا.

إرْمِيا 7:18

الْعِيَالْ يِلَقُّطُوا حَطَبْ وَ الْأَبَّهَاتْ يِقَبُّضُوا نَارْ وَ الْعَوِينْ يِعَجِّنَنْ دَقِيقْ لِيِسَوَّنْ كَعَكْ الْيِقَدُّمُوهْ لِصَنَمْ الْأُسْمَهْ مَلِكَةْ السَّمَاءْ. هُمَّنْ قَاعِدِينْ يِقَدُّمُوا هَدِيَّةْ شَرَابْ لِإِلٰـهَاتْ آخَرِينْ وَ بَيْدَا، يِغَضُّبُونِي أَنَا.

زَبُور 78:58

هُمَّنْ غَضَّبَوْه بِبَكَانَاتْهُمْ الْعَالِيِينْ هَنَا الْعِبَادَةْ وَ بِأَصْنَامْهُمْ، قَوَّمَوْا غِيرْتَهْ.

2 أخبار 33:19

وَ صَلَاتَهْ الْقِبِلْهَا اللّٰهْ وَ ذُنُوبَهْ وَ عِصْيَانَهْ وَ الْبُنَى هَنَا الْبَكَانَاتْ الْعَالِيِينْ الْغَزَّ فَوْقهُمْ عِيدَانْ لِعِبَادَةْ أَشِيرَةْ وَ الْأَصْنَامْ، دَوْل كُلَّ مَكْتُوبِينْ فِي كِتَابْ الْأَنْبِيَاء الْيِشِيفُوا بِرُؤْيَةْ.

خُروج 34:13

وَ لَاكِنْ هَدُّمُوا مَدَابِحْهُمْ وَ أَرْمُوا حُجَارْهُمْ الْغَزَّوْهُمْ وَ كَسُّرُوا عِيدَانْهُمْ الْغَزَّوْهُمْ لِعِبَادَةْ أَشِيرَةْ.

إرْمِيا 3:6

وَ فِي أَيَّامْ حُكُمْ الْمَلِكْ يُوشِيَّا، اللّٰهْ قَالْ لَيِّ أَنَا إِرْمِيَا: «إِنْتَ مَا شِفْت السَّوَّتَهْ إِسْرَائِيلْ الْكَافْرَةْ؟ هِي مَشَتْ فِي رَاسْ أَيِّ جَبَلْ عَالِي وَ تِحِتْ أَيِّ شَدَرَةْ خَضْرَةْ وَ أَشَّرْمَطَتْ هِنَاكْ وَرَاءْ الْأَصْنَامْ.

إرْمِيا 3:23

أَكِيدْ الْعِبَادَةْ فِي رُوسَيْ الْحُجَارْ، كِدِبْ سَاكِتْ وَ فِي الْجِبَالْ، تِنْسَمِعْ إِلَّا الْحَرَكَةْ. وَ أَكِيدْ أَنِحْنَ نَلْقَوْا النَّجَاةْ فِي اللّٰهْ إِلٰـهْنَا بَسْ.

تَثْنِية 12:2

دَمُّرُوا بِالْكَامِلْ كُلَّ الْبَكَانَاتْ التِّشِيلُوهُمْ الْفَوْقهُمْ الْأُمَمْ عَبَدَوْا إِلٰـهَاتْهُمْ فِي رُوسَيْ الْجِبَالْ وَ فِي الْحُجَارْ وَ فِي تِحِتْ أَيِّ شَدَرَةْ خَضْرَةْ.