إرْمِيا 14:22 - الكتاب المقدس بالعربي الدارجي هنا تشاد

²² هَلْ مِنْ الْإِلٰـهَاتْ الزَّايْلِينْ هَنَا الْأُمَمْ دَوْل فِي وَاحِدْ الْيَقْدَرْ يِنَزِّلْ الْأَلْمِي وَلَّا؟ هَلْ السَّمَاءْ ذَاتْهَا تِنَزِّلْ الْمَطَرْ وَلَّا؟ لَا! إِلَّا بَيْك إِنْتَ اللّٰهْ إِلٰـهْنَا. وَ أَنِحْنَ نَرْجَوْك بِعَشَمْ أَشَانْ إِنْتَ بَسْ التِّسَوِّي كُلَّ شَيّءْ.»

إرْمِيا 14:22 Referenca të Kryqëzuara

يُوِيل 2:23

يَا نَاسْ صَهْيُون، أَفْرَحَوْا وَ أَنْبَسْطُوا بِاللّٰهْ إِلٰـهْكُو. أَشَانْ يِنَزِّلْ مَطَرْ أَوَّلْ الْخَرِيفْ الْوَاجِبْ لَيْكُو وَ يِنَزِّلْ لَيْكُو مَطَرْ الرِّشَاشْ وَ مَطَرْ الْخَرِيفْ مِثِلْ زَمَانْ.

إرْمِيا 5:24

وَ مَا قُلْتُوا فِي نُفُوسْكُو: ”خَلِّي نَخَافَوْا مِنْ اللّٰهْ إِلٰـهْنَا الْيَنْطِينَا الْخَرِيفْ فِي وَكْتَهْ. وَ يَنْطِينَا مَطَرْ الرِّشَاشْ وَ أَلْمِي الْخَرِيفْ وَ يَضْمَنْ لَيْنَا وَكْت الْقَطِعْ.“

زَبُور 135:7

مِنْ طَرَفْ الْأَرْض، هُو يِقَوِّمْ السَّحَابْ وَ يِرَسِّلْ الْبَرَّاقَةْ لِلْمَطَرَةْ تُصُبّ وَ يَمْرُقْ الرِّيحْ مِنْ مَخَازِنَهْ.

إشَعْيا 30:23

وَ هُو يِنَزِّلْ مَطَرَةْ فِي الْحَبّ الْإِنْتُو تِتَيْرُبُوهْ. وَ الْمَعَاشْ التَّنْتِجَهْ الْأَرْض يَبْقَى كَتِيرْ وَ حَلُو. وَ فِي الْيَوْم دَا، بَهَايِمْكُو يَسْرَحَوْا فِي مَرْعَى وَسِيعْ.

تَثْنِية 32:21

وَ أَنَا بَسْ اللّٰهْ وَ هُمَّنْ قَوَّمَوْا غِيرْتِي بِإِلٰـهُّمْ وَ غَضَّبَوْنِي بِأَصْنَامْهُمْ الزَّايْلِينْ. وَ لَاكِنْ أَنَا كَمَانْ نِقَوِّمْ غِيرِتْهُمْ بِالشَّعَبْ الْمَا تَمَّوْا أُمَّةْ وَ نِزَعِّلْهُمْ بِأُمَّةْ مَطْمُوسَةْ.

إرْمِيا 51:16

وَ وَكِتْ يَامُرْ، الْأَلْمِي يِلِمّ بَكَانْ وَاحِدْ فِي السَّمَاءْ وَ السَّحَابْ يَطْلَعْ مِنْ آخِرْ الْأَرْض وَ الْبَرَّاقَةْ تَشْلَعْ وَ الْمَطَرْ يَنْزِلْ وَ مَخَازِنْ الرِّيحْ يِنْفَتْحُوا.

إرْمِيا 16:19

يَا اللّٰهْ! إِنْتَ قُدُرْتِي وَ بَكَانِي الْقَوِي وَ إِنْتَ مَلْجَئِي فِي يَوْم الضِّيقَةْ. لَيْك إِنْتَ يَجُوا الْأُمَمْ مِنْ آخِرْ الْأَرْض وَ يُقُولُوا: «جُدُودْنَا وَرَثَوْا إِلَّا إِلٰـهَاتْ غَشَّاشِينْ وَ هُمَّنْ الزَّايْلِينْ الْمَا عِنْدُهُمْ فَايْدَةْ.

إرْمِيا 10:15

الْأَصْنَامْ زَايْلِينْ وَ هُمَّنْ عَمَلْ الْيِجِيبْ الشَّمَاتَةْ. وَ وَكِتْ الْعِقَابْ يَجِي، هُمَّنْ يِدَّمَّرَوْا.

إشَعْيا 41:29

هُمَّنْ ظَالِمِينْ، مَا يِسَاوُوا شَيّءْ وَ خِدْمِتْهُمْ مَا تَنْفَعْ شَيّءْ! وَ إِلٰـهَاتْ الْأُمَمْ مِثِلْ رِيحْ بَسْ!»

زَبُور 130:5

أَنَا نَرْجَى اللّٰهْ، نَرْجَاهْ بِكُلَّ قَلْبِي وَ نِآمِنْ بِكَلَامَهْ.

زَبُور 25:21

خَلِّي كَمَالَكْ وَ عَدَالْتَكْ يَحْفَضَوْنِي أَشَانْ أَنَا خَطَّيْت عَشَمِي فَوْقَكْ.

1 مُلوك 17:14

أَشَانْ دَاهُو اللّٰهْ إِلٰـهْ بَنِي إِسْرَائِيلْ قَالْ: ‹الدَّقِيقْ مَا يِكَمِّلْ مِنْ الْعُمْرَةْ وَ الدِّهِنْ مَا يِكَمِّلْ مِنْ الْكَرْيَوْ لَحَدِّي الْيَوْم الْاللّٰهْ يِجِيبْ الْمَطَرَةْ فِي الْأَرْض.›»

1 مُلوك 17:1

وَ فِيَّهْ رَاجِلْ وَاحِدْ أُسْمَهْ إِلِيَاسْ سَاكِنْ فِي حِلَّةْ تِشْبِي فِي تُرَابْ قِلْعَادْ. وَ هُو قَالْ لِلْمَلِكْ أَخَابْ: «نَحْلِفْ بِاللّٰهْ الْحَيّ، إِلٰـهْ بَنِي إِسْرَائِيلْ الْأَنَا قَاعِدْ نَعَبُدَهْ، فِي السِّنِينْ الْجَايِينْ مَا فِي كَرَنْج وَ لَا مَطَرَةْ إِلَّا كَنْ أَنَا شَحَدْتَهْ.»

تَثْنِية 28:12

وَ اللّٰهْ يَفْتَحْ لَيْكُو خَزَّانْ السَّمَاءْ. وَ دَا الْخَزَّانْ الْعَدِيلْ الْيُصُبّ أَلْمِي فِي بَلَدْكُو فِي وَكْتَهْ وَ يِبَارِكْ خِدْمَةْ إِيدَيْكُو. وَ إِنْتُو تِدَيُّنُوا أُمَمْ كَتِيرِينْ وَ لَاكِنْ إِنْتُو مَا تِدَّيَّنَوْا مِنْهُمْ.

مِيخا 7:7

وَ لَاكِنْ أَنَا كَمَانْ نِوَجِّهْ لِلّٰهْ وَ نَرْجَى الْإِلٰـهْ الْيِنَجِّينِي وَ هُو إِلٰـهِي الْيَسْمَعْنِي.

عَمُوس 4:7

«وَ فِي وَكْت الْعِينَةْ بَسْ، أَنَا مَنَعْت مِنْكُو الْمَطَرْ. وَ نَزَّلْت الْمَطَرَةْ فِي حِلَّةْ وَاحِدَةْ وَ فِي حِلَّةْ آخَرَةْ كَمَانْ، أَنَا مَا نَزَّلْتَهَا. وَ نَزَّلْت الْمَطَرَةْ فِي زَرَعْ وَاحِدْ وَ زَرَعْ آخَرْ يِبِسْ.

إرْمِيا 10:13

وَ وَكِتْ يَامُرْ، الْأَلْمِي يِلِمّ بَكَانْ وَاحِدْ فِي السَّمَاءْ وَ السَّحَابْ يَطْلَعْ مِنْ آخِرْ الْأَرْض. وَ الْبَرَّاقَةْ تَشْلَعْ وَ الْمَطَرْ يَنْزِلْ وَ مَخَازِنْ الرِّيحْ يِنْفَتْحُوا.

إشَعْيا 30:18

وَ فِي شَانْ دَا، اللّٰهْ يَرْجَى الْوَكِتْ الْمُنَاسِبْ لِيِحِنّ فَوْقكُو وَ يَرْحَمْكُو أَشَانْ اللّٰهْ الرَّبّ هُو عَادِلْ. مَبْرُوكْ لِكُلَّ النَّاسْ الْيُخُطُّوا عَشَمْهُمْ فَوْقَهْ!

زَبُور 147:8

دَا هُو الْيَمْلَا السَّمَاءْ بِالسَّحَابْ وَ يِجَهِّزْ الْمَطَرَةْ وَ يِنَزِّلْهَا فِي التُّرَابْ وَ يِقَوِّمْ الْقَشّ فِي الْجِبَالْ.

زَبُور 27:14

خُطّ عَشَمَكْ فِي اللّٰهْ وَ أَبْقَى شَدِيدْ وَ فَحَلْ. أَيْوَى، خُطّ عَشَمَكْ فِي اللّٰهْ.

زَبُور 25:3

الْيُخُطّ عَشَمَهْ فَوْقَكْ مَا يَلْقَى عَيْب وَ لَاكِنْ الْعَيْب لِلْيُخُونُوا بَلَا سَبَبْ.

أيُّوب 5:10

هُو بَسْ الْيِنَزِّلْ مَطَرَةْ فِي وِجْه الْأَرْض وَ يَزْقِي بَيْهَا الزِّرَاعَةْ.

1 مُلوك 18:1

وَ بَعَدْ مُدَّةْ أَيَّامْ كَتِيرِينْ، اللّٰهْ حَجَّى لِإِلِيَاسْ فِي السَّنَةْ التَّالْتَةْ هَنَا جَفَافْ وَ قَالْ: «أَمْشِي قَدِّمْ نَفْسَكْ لِلْمَلِكْ أَخَابْ وَ أَنَا نِنَزِّلْ مَطَرَةْ فِي وِجْه الْأَرْض.»

1 مُلوك 8:36

خَلَاصْ مِنْ السَّمَاءْ أَسْمَعْهُمْ وَ أَغْفِرْ لِعَبِيدَكْ وَ لِشَعَبَكْ بَنِي إِسْرَائِيلْ ذُنُوبْهُمْ. وَ وَصِّفْ لَيْهُمْ الدَّرِبْ الْعَدِيلْ الْوَاجِبْ يِشِيلُوهْ. وَ نَزِّلْ لَيْهُمْ مَطَرْ فِي الْأَرْض الْإِنْتَ أَنْطَيْتهَا وَرَثَةْ لِشَعَبَكْ.

مَتَّى 5:45

وَ كَنْ تِسَوُّوا مِثِلْ دَا، إِنْتُو تَبْقَوْا عِيَالْ أَبُوكُو اللّٰهْ. أَشَانْ هُو يَمْرُقْ الْحَرَّايْ لِلنَّاسْ الْفَسْلِينْ وَ لِلنَّاسْ الصَّالِحِينْ كُلَ. وَ يِخَلِّي الْمَطَرْ يُصُبّ لِلنَّاسْ الْعَدِيلِينْ وَ لِلنَّاسْ الْمَا عَدِيلِينْ كُلَ.

إرْمِيا 5:12

النَّاسْ دَوْل كَدَبَوْا اللّٰهْ وَ قَالَوْا: «هُو مَا يَقْدَرْ يِسَوِّي شَيّءْ. وَ الْفَسَالَةْ كُلَ مَا تَجِي فَوْقنَا، وَ لَا دُوَاسْ وَ لَا جُوعْ.

إرْمِيا 10:3

أَشَانْ عَادَاتْ الشَّعَبْ دَوْل زَايْلِينْ. هُمَّنْ يَمْشُوا فِي الْغَابَةْ وَ يَقْطَعَوْا شَدَرْ وَ النَّجَّارْ يَنْجُرَهْ بِقَدُّومْ.

هُوشَع 2:7

هِي تَجْرِي وَرَاءْ صُدْقَانْهَا وَ لَاكِنْ مَا تَلْحَقْهُمْ. هِي تِفَتِّشْهُمْ وَ مَا تَلْقَاهُمْ. وَ هِي تُقُولْ: ‹أَنَا نِقَبِّلْ لِرَاجْلِي الْأَوَّلْ أَشَانْ أَنَا مُرْتَاحَةْ مَعَايَهْ زِيَادَةْ مِنْ هَسَّعْ.›

أيُّوب 28:26

وَ وَكِتْ أَنْطَى أَمُرْ لِلْمَطَرْ، وَ سَوَّى دَرِبْ لِلْبَرَّاقَةْ وَ الرَّعَدْ،

إرْمِيا 10:12

اللّٰهْ خَلَقْ الْأَرْض بِقُدُرْتَهْ وَ ثَبَّتْ الْعَالَمْ بِحِكْمَتَهْ وَ فَلَّ السَّمَاوَاتْ بِعِلْمَهْ.

مِيخا 5:6

وَ هُمَّنْ يَحْكُمُوا بَلَدْ أَشُورْ بِالْسَّيْف وَ بَلَدْ نِمْرُودْ بِالْحُرَابْ. وَ الْحَاكِمْ الْاللّٰهْ يِرَسِّلَهْ يِنَجِّينَا مِنْ إِيدْ الْأَشُورِيِّينْ وَكِتْ يَهْجُمُوا بَلَدْنَا وَ يَدْخُلُوا أَرْضِنَا.