إرْمِيا 13:17 - الكتاب المقدس بالعربي الدارجي هنا تشاد

¹⁷ وَ كَنْ مَا تَسْمَعَوْا الْكَلَامْ دَا، أَنَا نَحْزَنْ فِي قَلْبِي دَاخَلْ بِسَبَبْ إِسْتِكْبَارْكُو. وَ نَبْكِي دَايْماً وَ دُمُوعِي يِسِيلُوا أَشَانْ غَنَمْ اللّٰهْ الْهُمَّنْ بَنِي إِسْرَائِيلْ كَرَبَوْهُمْ مَسَاجِينْ.»

إرْمِيا 13:17 Referenca të Kryqëzuara

مَلاخِـي 2:2

وَ كَنْ مَا تَسْمَعَوْنِي وَ لَا تِذَّكَّرَوْنِي فِي قُلُوبْكُو لِتِمَجُّدُوا أُسْمِي، أَنَا نَلْعَنْكُو وَ نَجْعَلْ بَرَكَاتْكُو لَعَنَةْ. أَيْوَى، نَجْعَلْ بَرَكَاتْكُو لَعَنَةْ أَشَانْ إِنْتُو مَا كَرَّمْتُونِي فِي قُلُوبْكُو. وَ دَا، اللّٰهْ الْقَادِرْ بَسْ قَالَهْ.

إرْمِيا 14:17

وَ اللّٰهْ أَمَرْ إِرْمِيَا يِكَلِّمْ لِلشَّعَبْ. «دُمُوعِي يِسِيلُوا لَيْل وَ نَهَارْ وَ مَا يَقِيفُوا. أَشَانْ دَمَارْ كَبِيرْ جَاءْ لِأُمَّتِي الْمِثِلْ بِنْت أَمِّي الْعُدْرِيَّةْ وَ دَمَارْهَا مِثِلْ الْجِرَاحْ الْمَا بِدَّاوَى.

إرْمِيا 9:1

خَلِّي رَاسِي يَبْقَى خَزَّانْ هَنَا دُمُوعْ وَ دُمُوعْ عُيُونِي يِسِيلُوا مِثِلْ عُيُونْ أَلْمِي أَشَانْ نَبْكِي لَيْل وَ نَهَارْ لِضَحَايَا أُمَّتِي الْمِثِلْ بِنْت أَمِّي.

زَبُور 80:1

يَا إِنْتَ التُّقُودْ ذُرِّيَّةْ يُوسُفْ مِثِلْ غَنَمْ، يَا رَاعِي إِسْرَائِيلْ، أَسْمَعْ! يَا إِنْتَ الْقَاعِدْ فَوْق الْمَخْلُوقِينْ السَّمَاوِيِّينْ، بَيِّنْ نَفْسَكْ!

حِزْقِيال 34:31

وَ إِنْتُو شَعَبِي الْمِثِلْ غَنَمِي الْأَنَا نَسْرَحْ بَيْكُو وَ أَنَا إِلٰـهْكُو.» وَ دَا كَلَامْ اللّٰهْ الرَّبّ.

مَراثِي إرْمِيا 2:18

سُكَّانْ الْمَدِينَةْ صَرَخَوْا لِلرَّبّ مِنْ دَاخَلْ قُلُوبْهُمْ. يَا دَرَادِرْ صَهْيُون! يَا مَدِينَةْ صَهْيُون الْمِثِلْ بِنَيَّةْ! دُمُوعْكِ سَالَوْا لَيْل وَ نَهَارْ وَ بِقَوْا مِثِلْ الْوُدْيَانْ. مَا تَنْطِي نَفِسْكِ رَاحَةْ وَ عُيُونْكِ كُلَ مَا يِنْجَمَّوْا.

مَراثِي إرْمِيا 1:16

وَ فِي شَانْ دَا، أَنَا بَكَيْت وَ دُمُوعِي جَرَوْا وُدْيَانْ أَشَانْ الْيِصَبِّرْنِي وَ الْيِحَيِّينِي بِقِي بَعِيدْ مِنِّي. وَ عِيَالِي هِلْكَوْا أَشَانْ الْعَدُو أَنَّصَرْ فَوْقِي.»

زَبُور 119:136

مِنْ عُيُونِي، دُمُوعِي نَزَلَوْا مِثِلْ وُدْيَانْ أَشَانْ النَّاسْ مَا حَفَضَوْا تَوْرَاتَكْ.

1 صَمُوِيل 15:35

وَ صَمُوِيلْ حِزِنْ بِلْحَيْن مِنْ شَاوُولْ وَ مَا مَشَى شَافَهْ لَحَدِّي مَاتْ. وَ اللّٰهْ نِدِمْ أَشَانْ دَرَّجْ شَاوُولْ مَلِكْ فِي بَنِي إِسْرَائِيلْ.

حِزْقِيال 36:38

الْمُدُنْ الْمُكَسَّرِينْ يِنْمَلُوا بِنَاسْ مِثِلْ الْغَنَمْ الْكَتِيرِينْ هَنَا الْبَيْت الْمُقَدَّسْ وَ هَنَا مَدِينَةْ الْقُدُسْ فِي وَكِتْ أَعْيَادْهَا. وَ بَيْدَا، يَعَرْفُوا كَدَرْ أَنَا بَسْ اللّٰهْ.»

مَراثِي إرْمِيا 1:2

هِي تَبْكِي، تَبْكِي طُولْ اللَّيْل بِكُلَّ قُدْرِتْهَا وَ مِنْ صُدْقَانْهَا، مَا فِي صَدِيقْ الْيِصَبِّرْهَا. كُلَّ رُفْقَانْهَا خَانَوْهَا وَ بِقَوْا عُدْوَانْهَا.

إرْمِيا 23:1

وَ دَاهُو كَلَامْ اللّٰهْ: «الْعَذَابْ لِكُبَارَاتْ شَعَبِي الْمِثِلْ رُعْيَانْ هَوَانِينْ. يِشَتُّتُوا وَ يِدَمُّرُوا شَعَبِي الْمِثِلْ غَنَمْ.»

إرْمِيا 22:5

وَ لَاكِنْ كَنْ مَا تَسْمَعَوْا الْكَلَامْ دَا، أَنَا اللّٰهْ نَحْلِفْ بِنَفْسِي كَدَرْ الْقَصِرْ دَا يَبْقَى كَوْم هَنَا تُرَابْ.“›» وَ دَا كَلَامْ اللّٰهْ.

إرْمِيا 17:16

أَنَا مَا طَلَبْت تِنَزِّلْ فَوْقهُمْ الْفَسَالَةْ وَ لَا أَتْمَنَّيْت يَوْم الضِّيقَةْ يَنْزِلْ فَوْقهُمْ. الْيَمْرُقْ مِنْ خَشْمِي دَايْماً إِنْتَ تَسْمَعَهْ وَ تَعَرْفَهْ، يَا اللّٰهْ!

إشَعْيا 63:11

بَعَدْ دَا، شَعَبَهْ أَذَّكَّرَوْا الْوَكِتْ الْفَاتْ، الْوَكِتْ هَنَا مُوسَى. وَ قَالَوْا: «وَيْن هُو الْمَرَقْ شَعَبَهْ مِنْ الْبَحَرْ مَعَ رُعْيَانْ غَنَمَهْ؟ وَ وَيْن هُو الْخَطَّ فَوْقهُمْ رُوحَهْ الْمُقَدَّسْ؟

1 صَمُوِيل 15:11

«أَوَّلْ أَنَا دَرَّجْت شَاوُولْ مَلِكْ. وَ لَاكِنْ هَسَّعْ، أَنَا نِدِمْت أَشَانْ هُو أَبَانِي وَ مَا تَابَعْ كَلَامِي.» وَ الْكَلَامْ دَا بِقِي لِصَمُوِيلْ قَاسِي بِلْحَيْن وَ طُولْ اللَّيْل هُو قَاعِدْ يَسْأَلْ اللّٰهْ.

إرْمِيا 15:17

أَنَا مَا قَعَدْت مَعَ النَّاسْ الْيَلْعَبَوْا وَ لَا فِرِحْت مَعَاهُمْ. وَ بِسَبَبْ إِيدَكْ كَانَتْ فَوْقِي، أَنَا قَعَدْت طَرَفْ أَشَانْ إِنْتَ مَلَيْتنِي بِحِزِنْ.

إرْمِيا 23:2

وَ فِي شَانْ دَا، دَاهُو اللّٰهْ إِلٰـهْ بَنِي إِسْرَائِيلْ حَجَّى كَلَامْ بُخُصّ كُبَارَاتْ شَعَبَهْ الْيَسْرَحَوْا بَيْهُمْ. هُو قَالْ: «يَا الْكُبَارَاتْ! إِنْتُو بَسْ طَرَدْتُوا شَعَبِي وَ شَتَّتُّوهُمْ وَ مَا خَطَّيْتُوا بَالْكُو فَوْقهُمْ. وَ فِي شَانْ دَا، أَنَا نُخُطّ بَالِي فَوْقكُو وَ نِعَاقِبْكُو بِعَمَلْكُو الْفَسِلْ. وَ دَا كَلَامْ اللّٰهْ.

مَراثِي إرْمِيا 1:9

وَ بِنَجَاسِتْهَا فِي سُرْوَالْهَا، هِي مَا فَكَّرَتْ فِي مُسْتَقْبَلْهَا. وَ وَقَعَانْهَا بِقِي عَجِيبْ وَ مَا فِي نَادُمْ الْيِصَبِّرْهَا. وَ مَدِينَةْ الْقُدُسْ قَالَتْ: «يَا اللّٰهْ، شِيفْ تَعَبِي أَشَانْ الْعَدُو أَنَّصَرْ فَوْقِي!»

حِزْقِيال 9:4

وَ اللّٰهْ قَالْ لَيَّهْ: «أَمْشِي فِي أُسْط مَدِينَةْ الْقُدُسْ وَ سَوِّي عَلَامَةْ فِي جَبْهَاتْ النَّاسْ الْقَاعِدِينْ يَقُنْتُوا وَ يَشْكُوا بِسَبَبْ كُلَّ الْمُحَرَّمَاتْ الْقَاعِدِينْ يِسَوُّوهُمْ فِي لُبَّهَا.»

حِزْقِيال 24:16

«يَا إِبْن آدَمْ، دَاهُو فَجْأَةً نِشِيلْ حَيَاةْ مَرْتَكْ الْهِي فَرَحْ قَلْبَكْ. وَ إِنْتَ مَا تَحْزَنْ وَ لَا تَبْكِي وَ لَا دُمُوعَكْ يِدَفُّقُوا.

مَراثِي إرْمِيا 3:48

دُمُوعِي يَجْرُوا وُدْيَانْ فِي شَانْ خَرَابْ أُمَّتِي الْمِثِلْ بِنْت أَمِّي.