إرْمِيا 11:17 - الكتاب المقدس بالعربي الدارجي هنا تشاد

¹⁷ «وَ أَنَا اللّٰهْ الْقَادِرْ بَسْ مَقَّنْتَهَا وَ قَرَّرْت نِسَوِّي لَيْهَا الْفَسَالَةْ، بِسَبَبْ الْفَسَالَةْ السَّوَّوْهَا بَنِي إِسْرَائِيلْ وَ بَنِي يَهُوذَا. وَ هُمَّنْ غَضَّبَوْنِي وَكِتْ حَرَّقَوْا بَخُورْ لِإِلٰـهْ بَعَلْ.»

إرْمِيا 11:17 Referenca të Kryqëzuara

إشَعْيا 5:2

هُو حَرَتْ الْأَرْض وَ مَرَقْ حُجَارْهَا وَ شَالْ أَحْسَنْ مَقَنْ وَ مَقَّنَهْ. وَ بَنَى بَيْت طَوِيلْ لِلْمُرَاقَبَةْ فِي لُبّ الْجِنَيْنَةْ وَ فِي الْحَجَرْ، سَوَّى عَصَّارَةْ. عِنْدَهْ عَشَمْ يَلْقَى عِنَبْ عَدِيلْ وَ لَاكِنْ جِنَيْنِتَهْ أَنْتَجَتْ إِلَّا عِنَبْ تَلْفَانْ.

إرْمِيا 12:2

إِنْتَ بَسْ مَقَّنْتُهُمْ مِثِلْ شَدَرَةْ وَ دَسَّوْا عُرُوقْهُمْ فِي التُّرَابْ وَ كِبْرَوْا لَحَدِّي سَوَّوْا عِيَالْ. خُشُومْهُمْ يِنَادُوا أُسْمَكْ وَ لَاكِنْ قُلُوبْهُمْ مَا مَعَاكْ.

إرْمِيا 2:21

أَنَا مَقَّنْتُكُو مِثِلْ شَدَرَةْ عِنَبْ الْمَعْزُولَةْ مِنْ النَّوْع الْعَدِيلْ. كِكَّيْف قِدِرْتُوا أَلْغَيَّرْتُوا لِشَدَرَةْ عِنَبْ الْمَا مَعْرُوفَةْ؟

إرْمِيا 19:15

«دَاهُو اللّٰهْ الْقَادِرْ إِلٰـهْ بَنِي إِسْرَائِيلْ قَالْ: ‹أَكِيدْ أَنَا نِجِيبْ فِي الْمَدِينَةْ دِي وَ فِي كُلَّ الْحِلَّالْ التَّابْعِينْ لَيْهَا الْفَسَالَةْ الْقُلْت نِجِيبْهَا فَوْقهُمْ. أَشَانْ سُكَّانْهُمْ قَوَّوْا رُوسَيْهُمْ وَ مَا دَوَّرَوْا يَسْمَعَوْا كَلَامِي.›»

حِزْقِيال 17:5

وَ شَالْ حَبَّةْ وَاحِدَةْ مِنْ الْبَلَدْ كُلَ وَ تَيْرَبْهَا فِي زَرَعْ لِتُقُمّ مِثِلْ شَدَرَةْ قَنَ جَنْب أَلْمِي الْكَتِيرْ.

إرْمِيا 45:4

«دَاهُو كَلَامْ اللّٰهْ الْحَجَّاهْ لَيِّ لِنُقُولَهْ لَيْك. هُو قَالْ: ‹أَنَا نَخْرِبْ الْبَنَيْتَهْ وَ نَمْرُقْ الثَّبَّتَّهْ. وَ دَا نِسَوِّيهْ فِي كُلَّ الْأَرْض.

إرْمِيا 42:10

‹كَنْ بَتَّانْ تَسْكُنُوا فِي الْبَلَدْ دِي، أَنَا نَبْنِيكُو وَ مَا نَخْرِبْكُو وَ نِثَبِّتْكُو فَوْقهَا وَ مَا نَمْرُقْكُو مِنْهَا. أَشَانْ أَنَا حِزِنْت لِلْفَسَالَةْ السَّوَّيْتهَا فَوْقكُو.

إرْمِيا 40:2

وَ قَبُلْ مَا يُفُوتْ مِنْ الرَّامَةْ، نَبُوزَرَدَانْ قَالْ لَيَّهْ: «اللّٰهْ إِلٰـهَكْ بَسْ قَرَّرْ الْفَسَالَةْ دِي ضِدّ الْبَكَانْ دَا.

إرْمِيا 36:7

وَ بَيْدَا، أَكُونْ يَشْحَدَوْا اللّٰهْ وَ يُتُوبُوا وَ أَيِّ وَاحِدْ يِقَبِّلْ مِنْ دَرْبَهْ الْفَسِلْ أَشَانْ غَضَبْ اللّٰهْ وَ زَعَلَهْ الْقَرَّرَهْ ضِدّ الْأُمَّةْ دِي شَدِيدْ.»

إرْمِيا 35:17

وَ فِي شَانْ دَا، دَاهُو اللّٰهْ الْإِلٰـهْ الْقَادِرْ إِلٰـهْ بَنِي إِسْرَائِيلْ قَالْ: «أَكِيدْ أَنَا نِجِيبْ فَوْقكُو إِنْتُو بَنِي يَهُوذَا وَ فِي كُلَّ سُكَّانْ مَدِينَةْ الْقُدُسْ كُلَّ الْفَسَالَةْ الْأَنَا قَرَّرْتَهَا ضِدُّكُو. أَشَانْ أَنَا كَلَّمْت لَيْكُو وَ إِنْتُو مَا سِمِعْتُونِي وَ نَادَيْتكُو وَ مَا رَدَّيْتُوا لَيِّ.»

إرْمِيا 26:19

وَ الشُّيُوخْ قَالَوْا بَتَّانْ: «هَلْ حِزْقِيَّا مَلِكْ يَهُوذَا وَ شَعَبَهْ كَتَلَوْه وَلَّا؟ لَا! هُمَّنْ خَافَوْا مِنْ اللّٰهْ وَ قَمَّوْا شَحَدَوْه. وَ اللّٰهْ خَلَّى قَرَارْ الْفَسَالَةْ الْقَالْ يِسَوِّيهْ لَيْهُمْ. وَ هَسَّعْ دَا، كَنْ كَتَلْنَا النَّادُمْ دَا، نِسَوُّوا الْفَسَالَةْ لِنُفُوسْنَا.»

إرْمِيا 26:13

وَ لَاكِنْ هَسَّعْ دَا، صَلُّحُوا حَالْكُو وَ عَمَلْكُو وَ أَسْمَعَوْا كَلَامْ اللّٰهْ إِلٰـهْكُو. وَ بَيْدَا، اللّٰهْ يِخَلِّي الْفَسَالَةْ الْقَرَّرْ يِسَوِّيهَا لَيْكُو.

إرْمِيا 24:6

وَ أَنَا نِرَاقِبْهُمْ بِرَحْمَةْ لَحَدِّي نِقَبِّلْهُمْ فِي بَلَدْهُمْ وَ نَبْنِيهُمْ مِثِلْ بَيْت وَ أَبَداً مَا نَخْرِبْهُمْ. وَ نِثَبِّتْهُمْ وَ أَبَداً مَا نَمْرُقْهُمْ.

إرْمِيا 18:8

وَ لَاكِنْ كَنْ الْأُمَّةْ دِي خَلَّتْ عَمَلْهَا الْفَسِلْ الْبِسَبَبَهْ أَنَا شِلْت الْقَرَارْ ضِدَّهَا، خَلَاصْ أَنَا نِخَلِّي الْفَسَالَةْ الْأَوَّلْ قَرَّرْت نِسَوِّيهَا فَوْقهَا.

إرْمِيا 11:11

وَ فِي شَانْ دَا، دَاهُو اللّٰهْ قَالْ: «أَنَا نِنَزِّلْ فَوْقهُمْ الْفَسَالَةْ وَ مَا يَقْدَرَوْا يَمُرْقُوا مِنْهَا. هُمَّنْ يِكَوْرُكُوا لِنَفْزَعْهُمْ وَ لَاكِنْ أَنَا مَا نَسْمَعْهُمْ.

إرْمِيا 7:9

إِنْتُو تَسُرْقُوا وَ تَكْتُلُوا وَ تَزْنَوْا وَ تَحَلْفُوا بِكِدِبْ وَ تِحَرُّقُوا بَخُورْ لِإِلٰـهْ بَعَلْ وَ تَجْرُوا وَرَاءْ إِلٰـهَاتْ آخَرِينْ الْأَوَّلْ مَا تَعَرْفُوهُمْ.

إشَعْيا 61:3

هُو رَسَّلَانِي لِنَاسْ صَهْيُون الْقَاعِدِينْ فِي الْحِزِنْ أَشَانْ نَنْطِيهُمْ كَدْمُولْ جَمِيلْ بَدَلْ الرُّمَادْ الْفِي رَاسْهُمْ وَ دِهِنْ السُّرُورْ بَدَلْ الْحِزِنْ وَ لُبَاسْ الشُّكُرْ بَدَلْ الرُّوحْ الضَّعِيفَةْ. وَ يِسَمُّوهُمْ شَدَرْ الْعَدَالَةْ الْاللّٰهْ مَقَنَهْ لِيِوَصِّفْ مَجْدَهْ.

زَبُور 80:15

أَحْمِي الْمَقَّنَتْهَا إِيدَكْ الزَّيْنَةْ أَيْوَى، أَحْفَضْ الْمَقَنْ الْعَدَّلْتَهْ لِنَفْسَكْ.

زَبُور 80:8

مِنْ بَلَدْ مَصِرْ، إِنْتَ مَرَقْت شَدَرَةْ الْعِنَبْ. وَ طَرَدْت الْأُمَمْ وَ مَقَّنْت شَدَرَةْ الْعِنَبْ دِي.

زَبُور 44:2

لِتِمَكِّنْهُمْ، إِنْتَ قَلَعْت أَرْض الْأُمَمْ بِقُدُرْتَكْ. وَ لِتِسَكِّنْهُمْ، إِنْتَ ضَرَبْت الشُّعُوبْ.

2 صَمُوِيل 7:10

وَ أَنَا نَنْطِي بَكَانْ لِشَعَبِي بَنِي إِسْرَائِيلْ وَ نِمَكِّنْهُمْ. وَ هُمَّنْ يَسْكُنُوا فِي الْبَكَانْ دَا بَلَا خَوْف. وَ نَاسْ فَسْلِينْ مَا يَظُلْمُوهُمْ بَتَّانْ مِثِلْ أَوَّلْ.

إرْمِيا 1:14

وَ اللّٰهْ قَالْ لَيِّ: «مِنْ مُنْشَاقْ بَسْ تِمَيِّلْ الْفَسَالَةْ فِي كُلَّ سُكَّانْ الْبَلَدْ دِي.

إرْمِيا 7:18

الْعِيَالْ يِلَقُّطُوا حَطَبْ وَ الْأَبَّهَاتْ يِقَبُّضُوا نَارْ وَ الْعَوِينْ يِعَجِّنَنْ دَقِيقْ لِيِسَوَّنْ كَعَكْ الْيِقَدُّمُوهْ لِصَنَمْ الْأُسْمَهْ مَلِكَةْ السَّمَاءْ. هُمَّنْ قَاعِدِينْ يِقَدُّمُوا هَدِيَّةْ شَرَابْ لِإِلٰـهَاتْ آخَرِينْ وَ بَيْدَا، يِغَضُّبُونِي أَنَا.

إرْمِيا 11:13

«يَا بَنِي يَهُوذَا، إِلٰـهَاتْكُو أَكْتَرْ مِنْ حِلَّالْكُو. يَا سُكَّانْ مَدِينَةْ الْقُدُسْ، مَدَابِحْكُو أَكْتَرْ مِنْ شَوَارِعْكُو. وَ دَوْل الْمَدَابِحْ الْبَنَيْتُوهُمْ لِلْعَيْب وَ هُو إِلٰـهْ بَعَلْ التِّحَرُّقُوا لَيَّهْ الْبَخُورْ.

إرْمِيا 32:29

وَ الْبَابِلِيِّينْ الْيِحَاصُرُوا الْمَدِينَةْ دِي يَدْخُلُوا فَوْقهَا وَ يُتُشُّوهَا. وَ يُتُشُّوا الْبُيُوتْ الْفِي رَاسْهُمْ حَرَّقَوْا بَخُورْ لِإِلٰـهْ بَعَلْ وَ قَدَّمَوْا هَدَايَا شَرَابْ لِإِلٰـهَاتْ آخَرِينْ وَ دَا غَضَّبَوْنِي أَنَا.

إرْمِيا 32:30

أَيْوَى! مِنْ زَمَانْ، بَنِي إِسْرَائِيلْ وَ بَنِي يَهُوذَا يِسَوُّوا إِلَّا الْفَسَالَةْ قِدَّامِي. وَ بَنِي إِسْرَائِيلْ إِلَّا يِغَضُّبُونِي بِعَمَلْهُمْ. وَ دَا كَلَامْ اللّٰهْ.

إرْمِيا 44:8

وَ غَضَّبْتُونِي بِخِدْمَةْ إِيدَيْكُو وَكِتْ حَرَّقْتُوا بَخُورْ لِإِلٰـهَاتْ آخَرِينْ فِي بَلَدْ مَصِرْ الْإِنْتُو جِيتُوا وَ سَكَنْتُوا فَوْقهَا. وَ بَيْدَا، دَمَّرْتُوا نُفُوسْكُو وَ بِقِيتُوا مَلْعُونِينْ وَ عَايْبِينْ فِي أُسْط كُلَّ أُمَمْ الْأَرْض.

2 أخبار 28:25

وَ بَنَى بَكَانَاتْ عَالِيِينْ فِي كُلَّ حِلَّالْ بَلَدْ يَهُوذَا لِيِحَرُّقُوا فَوْقهُمْ الْبَخُورْ لِإِلٰـهَاتْ آخَرِينْ. وَ بِمِثِلْ دَا، هُو غَضَّبْ اللّٰهْ رَبّ جُدُودَهْ.

إرْمِيا 18:15

وَ لَاكِنْ شَعَبِي نِسَوْنِي وَ حَرَّقَوْا بَخُورْ لِإِلٰـهَاتْ الْمَا يَنْفَعَوْا، الْيِتَرْتُعُوهُمْ فِي دَرِبْهُمْ. وَ فِي شَانْ الْإِلٰـهَاتْ دَوْل، هُمَّنْ أَبَوْا دَرِبْهُمْ الْعَدِيلْ هَنَا زَمَانْ لِيَمْشُوا فِي دَبَالِيْ الْكَدَادَةْ.

إرْمِيا 40:3

وَ هَسَّعْ، اللّٰهْ حَقَّقْ كَلَامَهْ الْقَالَهْ أَشَانْ إِنْتُو بَنِي إِسْرَائِيلْ أَذْنَبْتُوا وَ قَمَّيْتُوا ضِدّ اللّٰهْ وَ مَا سِمِعْتُوا كَلَامَهْ. وَ فِي شَانْ دَا بَسْ، كُلَّ الشَّيّءْ دَا بِقِي.

إرْمِيا 44:5

وَ لَاكِنْ هُمَّنْ مَا خَطَّوْا أَدَانْهُمْ وَ مَا سِمْعَوْنِي وَ مَا تَابَوْا مِنْ الْفَسَالَةْ الْقَاعِدِينْ يِسَوُّوهَا. وَ مَا وَقَّفَوْا حَرِقِينْ الْبَخُورْ لِلْإِلٰـهَاتْ الْآخَرِينْ.

هُوشَع 10:1

بَنِي إِسْرَائِيلْ وِلْدَوْا زِيَادَةْ مِثِلْ شَدَرَةْ عِنَبْ التَّلْدَ كَتِيرْ. وَ لَاكِنْ وَكِتْ عِيَالْهُمْ كِتْرَوْا، هُمَّنْ كَتَّرَوْا مَدَابِحْ لِإِلٰـهَاتْهُمْ. وَ وَكِتْ أَرْضُهُمْ بِقَتْ جَمِيلَةْ، جَمَّلَوْا الْحُجَارْ الْغَزَّوْهُمْ لِلْعِبَادَةْ.