يَعْقُوب 2:6 - الكتاب المقدس بالعربي الدارجي هنا تشاد

⁶ لَاكِنْ إِنْتُو حَقَرْتُوا الْمِسْكِينْ دَا. يَاتُمَّنْ الْيَظُلْمُوكُو؟ يَاتُمَّنْ الْيَكُرْبُوكُو وَ يَتْهَمَوْكُو قِدَّامْ الشَّرِيعَةْ؟ مَا سِيَادْ الْمَالْ وَلَّا؟

يَعْقُوب 2:6 Referenca të Kryqëzuara

أمْثال 17:5

الْيِشَّمَّتْ لِلْمَسَاكِينْ يَحْقِرْ خَالِقْهُمْ وَ الْيَفْرَحْ بِدَمَارْ الْآخَرِينْ، مَا يَجْعَلَوْه بَرِي.

1 كُرُنْتُس 11:22

وَ دَا كِكَّيْف؟ مَا تَاكُلُوا وَ تَشَرْبَوْا فِي بُيُوتْكُو وَلَّا؟ أَوْ تَحْقُرُوا جَمَاعَةْ الْمُؤمِنِينْ هَنَا اللّٰهْ وَ تِدَوْرُوا تِعَيُّبُوا النَّاسْ الْمَا عِنْدُهُمْ شَيّءْ؟ وَ نُقُولْ لَيْكُو شُنُو؟ وَ بَيْدَا، نَشْكُرْكُو وَلَّا؟ لَا، أَبَداً.

أمْثال 14:31

الْيَظْلُمْ الْمِسْكِينْ يَحْقِرْ خَالِقَهْ وَ لَاكِنْ الْيِحِنّ فِي الْمِسْكِينْ يِمَجِّدَهْ.

زَبُور 14:6

إِنْتُو تِشَّمَّتَوْا لِشَوْرَةْ الْمَسَاكِينْ وَ لَاكِنْ اللّٰهْ هُو مَلْجَئْهُمْ.

يَعْقُوب 5:4

وَ لَاكِنْ إِنْتُو مَا كَفَّيْتُوا أُجْرَةْ الْخَدَّامِينْ الْخَدَمَوْا فِي زِرَاعِتْكُو. دَاهُو قَاعِدِينْ يَشْكُوا مِنْكُو! وَ النَّاسْ الْقَطَعَوْا زِرَاعِتْكُو قَاعِدِينْ يَصْرَخَوْا وَ اللّٰهْ الْقَادِرْ سِمِعْ صِرَاخْهُمْ.

يَعْقُوب 2:3

وَ إِنْتُو تِكَرُّمُوا سِيدْ الْمَالْ الْخُلْقَانَهْ سَمْحِينْ وَ تُقُولُوا لَيَّهْ: «أَلْفَضَّلْ قِدَّامْ، يَا السَّيِّدْ» وَ تُقُولُوا لِلْمِسْكِينْ: «هَايْ إِنْتَ دَا، يَلَّا أَقْعُدْ تِحِتْ هِنَاكْ!»

أعمال الرُسُل 17:6

وَ وَكِتْ مَا لِقَوْهُمْ، كَرَبَوْا يَاسُونْ وَ وَاحِدِينْ مِنْ الْأَخْوَانْ. وَ النَّاسْ كَرَّوْهُمْ مِنْ الْبَيْت وَ وَدَّوْهُمْ قِدَّامْ حُكَّامْ الْحِلَّةْ. وَ عَاطَوْا بِحِسّ عَالِي وَ قَالَوْا: «النَّاسْ دَوْل قَاعِدِينْ يِسَوُّوا مَشَاكِلْ فِي أَيِّ بَكَانْ وَ هَسَّعْ جَوْا هِنِي فِي حِلِّتْنَا كُلَ!

أعمال الرُسُل 13:50

وَ لَاكِنْ الْيَهُودْ حَرَّشَوْا كُبَارَاتْ الْحِلَّةْ وَ الْعَوِينْ الْعَابِدَاتْ اللّٰهْ أَشَانْ يِتَعُّبُوا بُولُسْ وَ بَرْنَابَا. وَ طَرَدَوْهُمْ مِنْ الْبَلَدْ.

أعمال الرُسُل 8:3

وَ لَاكِنْ شَاوُولْ دَوَّرْ يِدَمِّرْ أُمَّةْ الْمَسِيحْ مَرَّةْ وَاحِدْ وَ قَمَّ أَنْدَسَّ بَيْت لِبَيْت أَشَانْ يَكْرُبْ رُجَالْ وَ عَوِينْ وَ يِدِسُّهُمْ فِي السِّجِنْ.

زَكَرِيَّا 7:10

مَا تَظُلْمُوا الْأَرْمَلَةْ وَ لَا الْأَتِيمْ وَ لَا الْأَجْنَبِي وَ لَا الْمِسْكِينْ. وَ خَلِّي نَادُمْ مَا يِشِيلْ نِيَّةْ لِيِسَوِّي الْفَسَالَةْ لِأَخُوهْ.›»

عَمُوس 5:11

إِنْتُو تِتَعُّبُوا الضَّعِيفْ وَ بِقُوءْ، تِشِيلُوا قَمَحَهْ. وَ أَشَانْ دَا، الْبُيُوتْ السَّمْحِينْ هَنَا الْحَجَرْ الْبَنَيْتُوهُمْ أَبَداً مَا تَسْكُنُوا فَوْقهُمْ. وَ شَدَرْ الْعِنَبْ الزَّرَعْتُوهْ أَبَداً مَا تَشَرْبَوْا مِنْ خَمَرَهْ.

جامِعة 5:8

وَ كَنْ إِنْتَ شِفْت فِي بَلَدْ وَاحِدَةْ يَظُلْمُوا الْمِسْكِينْ وَ يَدْحَرَوْه مِنْ الْحَقّ وَ الْعَدَالَةْ، مَا تِلْعَجَّبْ مِنْ الشَّيّءْ دَا. أَشَانْ الْمَسْؤُولْ يَحْمِي الْمَسْؤُولْ وَ فِي مَسَائِيلْ آخَرِينْ كُبَارْ مِنْهُمْ.

أمْثال 22:16

الْيَظْلُمْ الْفَقْرَانْ لِيَغْنَى أَوْ يَنْطِي هَدَايَا لِلْغَنِيْ، النَّادُمْ دَا يِفَقِّرْ نَفْسَهْ.

زَبُور 12:5

لَاكِنْ اللّٰهْ قَالْ: «هَسَّعْ نُقُمّ وَ نِجِيبْ النَّجَاةْ لِلنَّاسْ الْمَحْقُورِينْ. أَشَانْ الْمَسَاكِينْ، ظَلَمَوْهُمْ وَ الضَّعِيفِينْ يَقُنْتُوا.»

زَبُور 10:14

وَ لَاكِنْ، يَا رَبّ، إِنْتَ شِفْت وَ قَاعِدْ تِشِيفْ التَّعْبَانِينْ وَ الْحَزْنَانِينْ لِتِدَافِعْ لَيْهُمْ. الضَّعِيفْ يِتْوَكَّلْ عَلَيْك وَ إِنْتَ بَسْ التَّفْزَعْ الْأَتِيمْ.

يَعْقُوب 5:6

إِنْتُو بَسْ حَاكَمْتُوا وَ كَتَلْتُوا عَبْد اللّٰهْ الصَّالِحْ. وَ هُو مَا يُقُمّ ضِدُّكُو وَلَّا؟

أعمال الرُسُل 18:12

وَ وَكِتْ غَالِيُونْ بِقِي حَاكِمْ فِي بَلَدْ أَخَايَةْ، الْيَهُودْ أَسْتَفَقَوْا أَمْبَيْنَاتْهُمْ أَشَانْ يِخَالُفُوا بُولُسْ. وَ قَمَّوْا وَدَّوْا بُولُسْ فِي الْمَحْكَمَةْ.

حَبَقُوق 3:14

وَ إِنْتَ طَعَّنْت كُبَارَاتْ الْعَدُو بِنَشَاشِيبْهُمْ حَلَالْهُمْ فِي رُوسَيْهُمْ وَكِتْ هُمَّنْ جَايِينْ بِسُرْعَةْ مِثِلْ الرِّيحْ لِيِشَتُّتُونَا بِكُرَوْرَاكْ هَنَا فَرَحْ. وَ دَا مِثِلْ يَاكُلُونَا بِعَشِيرْ، أَنِحْنَ الْمَسَاكِينْ.

عَمُوس 4:1

أَسْمَعَنْ، يَا الْعَوِينْ الْقَاعِدَاتْ فِي جِبَالْ مَدِينَةْ السَّامِرَةْ! إِنْتَنْ مِثِلْ بَقَرْ الْيَسْرَحَوْا فِي مَرْعَى بَاشَانْ. إِنْتَنْ تَظُلْمَنْ الْمَسَاكِينْ وَ تِتَعِّبَنْ الْفَقْرَانِينْ. وَ تَامُرَنْ سِيَادْ بُيُوتْكَنْ وَ تُقُولَنْ: «جِيبْ لَيِّ نَشْرَبْ!»

إشَعْيا 53:3

النَّاسْ أَبَوْه وَ حَقَرَوْه وَ هُو رَاجِلْ الْوَجَعْ وَ مُوَالِفْ بِالتَّعَبْ. هُو مِثِلْ نَادُمْ النَّاسْ أَنْلَفَتَوْا مِنَّهْ، هُو الْحَقَرَوْه وَ أَنِحْنَ مَا جَعَلْنَاهْ.

زَبُور 10:10

هُو مِثِلْ دُودْ، يَبْرُكْ وَ يَحْبِي. وَ الْمِسْكِينْ يَقَعْ تِحِتْ خَنَافْرَهْ الْقَوِيِّينْ.

زَبُور 10:8

هُو كَارِسْ جَنْب الْحِلَّةْ وَ بِعَشِيرْ، يَكْتُلْ الْبَرِي وَ يُخُطّ عُيُونَهْ فِي الضَّعِيفْ.

زَبُور 10:2

بِإِسْتِكْبَارَهْ، الْعَاصِي يِدَمِّرْ الْمِسْكِينْ. الْمِسْكِينْ يَقَعْ فِي خِطِّتَهْ الْفَسْلَةْ.

أيُّوب 20:19

أَشَانْ هُو رِحِكْ وَ أَبَى الْمَسَاكِينْ وَ نَهَبْ بُيُوتْ بَدَلْ يَبْنِيهُمْ.

يُوحَنَّا 8:49

وَ عِيسَى رَدَّ لَيْهُمْ وَ قَالْ: «لَا، أَنَا مَا مُشَوْطِنْ. أَنَا قَاعِدْ نِكَرِّمْ أَبُويِ وَ لَاكِنْ إِنْتُو قَاعِدِينْ تِعَيُّبُونِي.

أمْثال 18:23

الْفَقْرِي يَشْحَدْ بِكَلَامْ لَيِّنْ وَ لَاكِنْ الْغَنِيْ يُرُدّ بِكَلَامْ جَفِي.

أمْثال 22:7

الْغَنِيْ يَحْكِمْ فِي الْمَسَاكِينْ وَ الْيِشِيلْ الدَّيْن يَبْقَى عَبِدْ لِلْيِدَيِّنَهْ.