إشَعْيا 44:9 - الكتاب المقدس بالعربي الدارجي هنا تشاد

⁹ الْيَصْنَعَوْا الْأَصْنَامْ، كُلُّهُمْ مَا يَنْفَعَوْا. عَمَلْهُمْ الْغَالِي لَيْهُمْ كُلَ مَا عِنْدَهْ فَايْدَةْ. شُهُودْهُمْ عَمْيَانِينْ وَ مَا يَعَرْفُوا شَيّءْ. وَ فِي شَانْ دَا، يَلْقَوْا الْعَيْب.

إشَعْيا 44:9 Referenca të Kryqëzuara

إشَعْيا 41:24

وَ لَاكِنْ إِنْتُو مَا تِسَاوُوا شَيّءْ وَ عَمَلْكُو كُلَ مَا يَنْفَعْ وَ الْيِتَابِعْكُو إِنْتُو، يِسَوِّي الْحَرَامْ.

إشَعْيا 41:29

هُمَّنْ ظَالِمِينْ، مَا يِسَاوُوا شَيّءْ وَ خِدْمِتْهُمْ مَا تَنْفَعْ شَيّءْ! وَ إِلٰـهَاتْ الْأُمَمْ مِثِلْ رِيحْ بَسْ!»

زَبُور 97:7

الْعَيْب لِكُلَّ عَابِدِينْ الْأَصْنَامْ، هُمَّنْ الْيَشْكُرُوا إِلٰـهَاتْهُمْ. وَ إِنْتُو كُلُّكُو الْإِلٰـهَاتْ، أَسْجُدُوا لِلّٰهْ!

أفَسُس 5:8

أَوَّلْ، إِنْتُو بَسْ الضَّلَامْ وَ لَاكِنْ هَسَّعْ، بِقِيتُوا نُورْ بِعَلَاقِتْكُو مَعَ الرَّبّ. عِيشُوا بِالْحَالْ الْوَاجْبَةْ لِأَهَلْ النُّورْ.

2 كُرُنْتُس 4:4

النَّاسْ الْمَا مُؤمِنِينْ دَوْل قُلُوبْهُمْ عَمْيَانِينْ أَشَانْ إِبْلِيسْ عِنْدَهْ سُلْطَةْ فِي الدُّنْيَا دِي وَ هُو عَمَاهُمْ. هُو يِدَوْر يَدْحَرْهُمْ مَا يِشِيفُوا النُّورْ الْمَجِيدْ هَنَا الْمَسِيحْ النِّبَلُّغُوا بَيَّهْ الْبِشَارَةْ. الْمَسِيحْ هُو صُورَةْ اللّٰهْ.

1 كُرُنْتُس 8:4

وَ فِي الشَّيّءْ الْبُخُصّ أَكِلْ اللَّحَمْ الْقَدَّمَوْه ضَحِيَّةْ لِلْأَصْنَامْ، أَكِيدْ أَنِحْنَ نَعَرْفُوا كَدَرْ الصَّنَمْ، هُو يِمَثِّلْ إِلٰـهْ الْمَا مَوْجُودْ فِي الدُّنْيَا. وَ نَعَرْفُوا كَدَرْ مَا فِي إِلٰـهْ إِلَّا اللّٰهْ الْوَاحِدْ.

رَوْمَا 1:22

حَسَبَوْا نُفُوسْهُمْ حَكِيمِينْ وَ لَاكِنْ بِالصَّحِيحْ، بِقَوْا مَطَامِيسْ.

دَنْيال 11:38

وَ فِي بَدَلْهُمْ، هُو يَعَبُدْ الْإِلٰـهْ الْيَحْمِي الْمُدُنْ الْقَوِيِّينْ وَ دَا إِلٰـهْ الْجُدُودَهْ أَبَداً مَا يَعَرْفُوهْ. وَ هُو يِقَدِّمْ لِلْإِلٰـهْ دَا دَهَبْ وَ فُضَّةْ وَ حُجَارْ غَالِيِّينْ وَ أَشْيَاءْ آخَرِينْ غَالِيِّينْ.

دَنْيال 5:23

إِنْتَ قَمَّيْت ضِدّ اللّٰهْ رَبّ السَّمَاوَاتْ وَ جَابَوْا لَيْك مَوَاعِينْ بَيْتَهْ وَ شِرِبْتُوا بَيْهُمْ الْخَمَرْ، إِنْتَ وَ مُوَظَّفِينَكْ وَ عَوِينَكْ وَ سِرِّيَّاتَكْ. وَ غَنَّيْت لِإِلٰـهَاتَكْ الْمِنْ دَهَبْ وَ فُضَّةْ وَ نَحَاسْ وَ حَدِيدْ وَ خَشَبْ وَ حُجَارْ. وَ هُمَّنْ إِلٰـهَاتْ الْمَا يِشِيفُوا وَ لَا يَسْمَعَوْا وَ لَا يَعَرْفُوا شَيّءْ. وَ بَيْدَا كُلَ، إِنْتَ أَبَيْت مَا تِمَجِّدْ اللّٰهْ الْأَنْطَاكْ الْحَيَاةْ وَ قَاعِدْ يِرَاقِبْ دَرْبَكْ.

إرْمِيا 14:22

هَلْ مِنْ الْإِلٰـهَاتْ الزَّايْلِينْ هَنَا الْأُمَمْ دَوْل فِي وَاحِدْ الْيَقْدَرْ يِنَزِّلْ الْأَلْمِي وَلَّا؟ هَلْ السَّمَاءْ ذَاتْهَا تِنَزِّلْ الْمَطَرْ وَلَّا؟ لَا! إِلَّا بَيْك إِنْتَ اللّٰهْ إِلٰـهْنَا. وَ أَنِحْنَ نَرْجَوْك بِعَشَمْ أَشَانْ إِنْتَ بَسْ التِّسَوِّي كُلَّ شَيّءْ.»

إرْمِيا 2:11

هَلْ فِي أُمَّةْ بَدَّلَتْ إِلٰـهَّا بِإِلٰـهْ آخَرْ؟ وَ دَوْل مَا إِلٰـهَاتْ صَحِيحْ كُلَ. وَ لَاكِنْ شَعَبِي بَدَّلَوْنِي أَنَا مَجْدُهُمْ بِشَيّءْ مَا يَنْفَعْ.

إشَعْيا 45:20

لِمُّوا وَ تَعَالُوا! قَرُّبُوا سَوَا، إِنْتُو الْفَضَّلْتُوا مِنْ الْأُمَمْ! إِنْتُو مَا تَعَرْفُوا شَيّءْ، إِنْتُو الشَّايْلِينْ أَصْنَامْكُو هَنَا حَطَبْ وَ تَسْأَلَوْا إِلٰـهَاتْكُو الْمَا يِنَجُّوكُو.

إشَعْيا 44:20

هُو يِنْرَبِطْ فِي رُمَادْ وَ قَلْبَهْ الْمَغْشُوشْ يِوَدِّرَهْ. هُو مَا يِنَجِّي نَفْسَهْ وَ لَا يُقُولْ: «الْفِي إِيدِي الزَّيْنَةْ مَا غَشّ وَلَّا؟»

إشَعْيا 44:18

وَ النَّاسْ دَوْل وَ لَا يَعَرْفُوا وَ لَا يَفْهَمَوْا. أَشَانْ عُيُونْهُمْ مِسْدُودِينْ، مَا يِشِيفُوا وَ هُمَّنْ مُقَفَّلِينْ، مَا يَفْهَمَوْا.

إشَعْيا 43:8

وَ اللّٰهْ قَالْ: «خَلِّي يَمْرُقْ الشَّعَبْ الْعَمْيَانِينْ حَتَّى كَنْ عِنْدُهُمْ عُيُونْ كُلَ، هُمَّنْ الطَّرْشَانِينْ حَتَّى كَنْ عِنْدُهُمْ أُدْنَيْ كُلَ.

إشَعْيا 42:18

«إِنْتُو الطُّرُشْ، أَسْمَعَوْا! وَ إِنْتُو الْعَمْيَانِينْ، شِيفُوا وَ أَنْظُرُوا!

زَبُور 135:18

خَلِّي الصَّنَعَوْهُمْ وَ كُلَّ الْيِتْوَكَّلَوْا عَلَيْهُمْ يَبْقَوْا مِثِلْهُمْ.

زَبُور 115:8

خَلِّي الصَّنَعَوْهُمْ وَ كُلَّ الْيِتْوَكَّلَوْا عَلَيْهُمْ يَبْقَوْا مِثِلْهُمْ!

أفَسُس 4:18

وَ قَاعِدِينْ فِي الضَّلَامْ وَ مَا فَاهِمِينْ الْحَقّ. وَ مَا يَعَرْفُوا الْحَيَاةْ الْاللّٰهْ يِدَوْر يَنْطِيهَا لَيْهُمْ أَشَانْ الْجَهَلْ قَاعِدْ فَوْقهُمْ وَ رَاسْهُمْ بِقِي قَوِي.

قُضياء 10:14

يَلَّا! أَمْشُوا أَصْرَخَوْا لِإِلٰـهَاتْكُو الْإِنْتُو عَزَلْتُوهُمْ. خَلِّي هُمَّنْ بَسْ يَفْزَعَوْكُو وَكِتْ تَتْعَبَوْا!»

تَثْنِية 27:15

«مَلْعُونْ الْيِسَوِّي صَنَمْ هَنَا حَدِيدْ أَوْ صُورَةْ وَ يِلَبِّدْهَا فِي بَكَانْ سِرِّي. وَ اللّٰهْ حَرَّمْ الصَّنَمْ خِدْمَةْ إِيدْ الصِّنَاعِي.» وَ كُلَّ الشَّعَبْ يُقُولُوا: «آمِينْ!»

2 مُلوك 19:18

وَ زَقَلَوْا إِلٰـهَاتْهُمْ فِي النَّارْ أَشَانْ هُمَّنْ أَصْنَامْ بَسْ السَّوَّوْهُمْ النَّاسْ بِإِيدَيْهُمْ مِنْ حَطَبْ وَ حَجَرْ. وَ مُلُوكْ أَشُورْ دَمَّرَوْهُمْ.

إشَعْيا 26:11

يَا اللّٰهْ! إِيدَكْ مَرْفُوعَةْ فَوْق وَ هُمَّنْ مَا شَافَوْهَا. يِشِيفُوا مَحَبِّتَكْ الشَّدِيدَةْ لِشَعَبَكْ وَ الْعَيْب يَكْرُبْهُمْ وَ النَّارْ الْجَهَّزْتَهَا لِعُدْوَانَكْ تَاكُلْهُمْ.

إشَعْيا 42:17

لَاكِنْ الْيِتْوَكَّلَوْا عَلَيْ الْأَصْنَامْ وَ الْيُقُولُوا لِلصُّوَرْ هَنَا الْحَدِيدْ: ‹إِنْتُو بَسْ إِلٰـهَاتْنَا›، هُمَّنْ دَوْل يِقَبُّلُوا وَرَاءْ وَ يَلْقَوْا الْعَيْب.»

إشَعْيا 43:9

وَ خَلِّي كُلَّ الْأُمَمْ يَجْمَعَوْا سَوَا وَ الشُّعُوبْ يِلِمُّوا. يَاتُو مِنْهُمْ الْخَبَّرْنَا بَيْدَا؟ وَ يَاتُو الْأَوْرَانَا بِالشَّيّءْ الْبِقِي أَوَّلْ؟ خَلِّي يِجِيبُوا شُهُودْهُمْ لِيِوَصُّفُوا كَدَرْ عِنْدُهُمْ حَقّ. وَ خَلِّي النَّاسْ يَسْمَعَوْهُمْ وَ يُقُولُوا: ‹دَا صَحِيحْ!›»

إشَعْيا 44:11

وَ دَاهُو كُلَّ الْيَعَبُدُوهُمْ يَلْقَوْا الْعَيْب وَ الْيَصْنَعَوْهُمْ، هُمَّنْ نَاسْ بَسْ! خَلِّي كُلُّهُمْ يِلِمُّوا وَ يَجُوا وَ كُلُّهُمْ سَوَا يَرْجُفُوا وَ يَلْقَوْا الْعَيْب.

إشَعْيا 45:16

وَ الْيَصْنَعَوْا الْأَصْنَامْ، كُلُّهُمْ عَايْبِينْ وَ خَجْلَانِينْ وَ كُلُّهُمْ سَوَا مَاشِينْ فِي الْخَجْلَةْ.

إشَعْيا 65:13

وَ فِي شَانْ دَا، دَاهُو اللّٰهْ الرَّبّ قَالْ: «عَبِيدِي يَاكُلُوا وَ لَاكِنْ إِنْتُو تُجُوعُوا. عَبِيدِي يَشَرْبَوْا وَ لَاكِنْ إِنْتُو تَعْطَشَوْا. عَبِيدِي يَفْرَحَوْا وَ لَاكِنْ إِنْتُو تَخْجَلَوْا.

تَثْنِية 4:28

وَ هِنَاكْ تَعَبُدُوا إِلٰـهَاتْ هَنَا حَطَبْ وَ حَجَرْ الصَّنَعَاهُمْ إِنْسَانْ بِإِيدَهْ، الْأَبَداً مَا شَافَوْا وَ لَا سِمْعَوْا وَ لَا أَكَلَوْا وَ لَا شَمَّوْا.

زَبُور 115:4

وَ لَاكِنْ أَصْنَامْهُمْ مِنْ فُضَّةْ وَ دَهَبْ الصَّنَعَوْهُمْ النَّاسْ بِإِيدَيْهُمْ.

إشَعْيا 57:12

إِنْتِ تَحْسِبِي نَفِسْكِ عَدِيلَةْ وَ لَاكِنْ أَنَا نِخَبِّرْ بِكُلَّ أَعْمَالْكِ وَ بَيْدَا، مَا تَلْقَيْ مِنْهُمْ أَيِّ فَايْدَةْ.

إرْمِيا 2:26

وَ اللّٰهْ قَالْ: «إِنْتُو يَا بَنِي إِسْرَائِيلْ، الْعَيْب يَكْرُبْكُو، إِنْتُو وَ مُلُوكُّو وَ كُبَارَاتْكُو وَ رُجَالْ دِينْكُو وَ أَنْبِيَائْكُو، مِثِلْ عَيْب السَّرَّاقْ الْكَرَبَوْه قَاعِدْ يَسْرِقْ.