إشَعْيا 43:7 - الكتاب المقدس بالعربي الدارجي هنا تشاد

⁷ جِيبْ كُلَّ النَّاسْ النَّادَوْهُمْ بِأُسْمِي الْأَنَا خَلَقْتُهُمْ وَ كَوَّنْتُهُمْ وَ سَوَّيْتهُمْ فِي شَانْ مَجْدِي.›»

إشَعْيا 43:7 Referenca të Kryqëzuara

أفَسُس 2:10

وَ خَلَاصْ أَنِحْنَ بِقِينَا خَلِيقَةْ اللّٰهْ. هُو سَوَّانَا خَلِيقَةْ جَدِيدَةْ فِي الْمَسِيحْ عِيسَى أَشَانْ نِسَوُّوا عَمَلْ الْخَيْر الْمِنْ أَوَّلْ هُو جَهَّزَهْ لَيْنَا أَشَانْ نِسَوُّوهْ.

إشَعْيا 43:21

وَ هُمَّنْ الشَّعَبْ الْأَنَا خَلَقْتُهُمْ لَيِّ لِيِبَلُّغُوا حَمْدِي.»

أفَسُس 1:12

وَ اللّٰهْ عَزَلَانَا أَنِحْنَ الْبِقِينَا الْأَوَّلَانِيِّينْ الْخَطَّيْنَا عَشَمْنَا فِي الْمَسِيحْ لِنَشْكُرُوهْ وَ نِمَجُّدُوهْ.

1 بُطْرُس 2:9

لَاكِنْ كَنْ لَيْكُو إِنْتُو، بِقِيتُوا الْقَبِيلَةْ الْاللّٰهْ عَزَلَاهَا وَ رُجَالْ دِينْ هَنَا الْمَلِكْ الْكَبِيرْ وَ أُمَّةْ مُخَصَّصَةْ لِلّٰهْ وَ شَعَبْ اللّٰهْ ذَاتَهْ. هُو نَادَاكُو أَشَانْ تَمُرْقُوا مِنْ الضَّلَامْ وَ تَدْخُلُوا فِي نُورَهْ الْعَجِيبْ وَ خَلَاصْ تِبَلُّغُوا خَبَرْ هَنَا أَعْمَالْ اللّٰهْ الْكُبَارْ.

رَوْمَا 9:23

وَ اللّٰهْ حِمِلَاهُمْ طَوَّلْ أَشَانْ دَوَّرْ يِبَيِّنْ كُتُرْ خَيْرَهْ الْمَجِيدْ لِمَوَاعِينْ آخَرِينْ الْهُو يِدَوْر يَرْحَمْهُمْ وَ جَهَّزَاهُمْ لِيَدْخُلُوا فِي مَجْدَهْ.

يُوحَنَّا 15:8

وَ مَجْد أَبُويِ يِبِينْ زِيَادَةْ وَكِتْ إِنْتُو تَبْقَوْا مِثِلْ فُرُوعْ الْيَلْدَوْا عِيَالْ كَتِيرْ. وَ بَيْدَا، تِوَصُّفُوا نُفُوسْكُو كَدَرْ إِنْتُو تَلَامِيذِي.

إشَعْيا 56:5

هُمَّنْ دَوْل، أَنَا نَنْطِيهُمْ فِي بَيْتِي وَ فِي دَرَادِرِي عَلَامَةْ هَنَا ذِكْرَةْ أَحْسَنْ مِنْ الْوُلَادْ وَ الْبَنَاتْ. وَ نَنْطِيهُمْ أُسُمْ دَايِمْ الْأَبَداً مَا يِنْقَشَّ.

إشَعْيا 48:11

وَ دَا، فِي شَانِي أَنَا. أَيْوَى، فِي شَانِي أَنَا بَسْ أَنَا قَمَّيْت وَ سَوَّيْت مِثِلْ دَا! أَشَانْ كِكَّيْف نِخَلِّي أُسْمِي مَا يِحْتَرُمُوا؟ لَا! مَجْدِي مَا نَنْطِيهْ لِلْآخَرْ.

إشَعْيا 43:1

وَ لَاكِنْ اللّٰهْ خَلَقَاكْ، يَا يَعْقُوبْ وَ كَوَّنَاكْ، يَا إِسْرَائِيلْ. وَ دَاهُو اللّٰهْ قَالْ: «مَا تَخَافْ أَشَانْ أَنَا فَدَيْتَكْ. أَنَا نَادَيْتَكْ بِأُسْمَكْ وَ إِنْتَ بِقِيتْ هَنَايِ.

زَبُور 100:3

أَعَرْفُوا كَدَرْ اللّٰهْ هُو الرَّبّ. هُو خَلَقَانَا وَ أَنِحْنَ هِنَيْه. أَنِحْنَ شَعَبَهْ وَ غَنَمَهْ الْيَسْرَحْ بَيْنَا.

زَبُور 50:23

الْيِقَدِّمْ ضَحِيَّةْ الشُّكُرْ يِمَجِّدْنِي وَ الْيِفَكِّرْ فِي دَرْبَهْ، نِشَوِّفَهْ نَجَاتِي أَنَا الرَّبّ.

إشَعْيا 29:23

أَشَانْ وَكِتْ ذُرِّيَّةْ يَعْقُوبْ يِشِيفُوا الْعَمَلْ الْأَنَا سَوَّيْتَهْ فِي أُسُطْهُمْ، خَلَاصْ يِقَدُّسُوا أُسْمِي. أَيْوَى، يِقَدُّسُونِي أَنَا قُدُّوسْ يَعْقُوبْ وَ يَرْجُفُوا قِدَّامِي أَنَا إِلٰـهْ بَنِي إِسْرَائِيلْ.

رُؤية 3:12

وَ أَيِّ نَادُمْ الْيِنَّصِرْ، أَنَا نَجْعَلَهْ مِثِلْ عَمُودْ فِي بَيْت اللّٰهْ رَبِّي. وَ هُو يَقْعُدْ فِي الْبَيْت دَا وَ أَبَداً مَا يَمْرُقْ مِنَّهْ وَ أَنَا نَكْتِبْ فَوْقَهْ أُسُمْ اللّٰهْ وَ أُسُمْ مَدِينَةْ اللّٰهْ وَ هِي مَدِينَةْ الْقُدُسْ الْجَدِيدَةْ الْاللّٰهْ رَبِّي يِنَزِّلْهَا مِنْ السَّمَاوَاتْ. وَ نَكْتِبْ فَوْقَهْ أُسْمِي الْجَدِيدْ.

إرْمِيا 33:16

وَ فِي الْوَكِتْ دَا، نَاسْ بَلَدْ يَهُوذَا يَلْقَوْا النَّجَاةْ وَ مَدِينَةْ الْقُدُسْ تَقْعُدْ بِأَمَانْ. وَ دَاهُو الْأُسُمْ الْيِسَمُّوهَا بَيَّهْ، اللّٰهْ هُو بَسْ الْيِجِيبْ لَيْنَا الْعَدَالَةْ.»

يَعْقُوب 2:7

دَوْل هُمَّنْ بَسْ الْيِعَيُّرُوا الْأُسُمْ الْكَرِيمْ هَنَا رَبُّكُو.

أفَسُس 1:6

خَلِّي نَشْكُرُوهْ فِي شَانْ نِعْمَتَهْ الْمَجِيدَةْ النَّزَّلَاهَا فَوْقنَا بِإِبْنَهْ الْيِحِبَّهْ.

غَلاطِية 6:15

أَشَانْ كَنْ نَادُمْ مُطَهَّرْ وَلَّا مَا مُطَهَّرْ كُلَ، دَا مَا مُهِمّ. الشَّيّءْ الْمُهِمّ دَا، أَيِّ نَادُمْ وَاجِبْ يَدْخُلْ فِي الْخَلِيقَةْ الْجَدِيدَةْ.

أعمال الرُسُل 11:26

وَ لِقِيهْ وَ قَبَّلْ بَيَّهْ فِي أَنْطَاكِيَةْ. وَ مُدَّةْ سَنَةْ كَامِلَةْ، بَرْنَابَا وَ شَاوُولْ قَاعِدِينْ يِلِمُّوا مَعَ جَمَاعَةْ الْمُؤمِنِينْ وَ يِعَلُّمُوا نَاسْ كَتِيرِينْ. وَ أَوَّلْ مَرَّةْ فِي أَنْطَاكِيَةْ بَسْ النَّاسْ خَطَّوْا لِتَلَامِيذ عِيسَى، أُسُمْ الْمَسِيحِيِّينْ.

إشَعْيا 63:19

مِنْ مُدَّةْ طَوِيلَةْ، أَنِحْنَ بِقِينَا مِثِلْ نَاسْ الْإِنْتَ مَا حَكَمْت فَوْقنَا وَ مِثِلْ نَاسْ الْمَا نَادَوْنَا بِأُسْمَكْ.

1 بُطْرُس 4:14

كَنْ النَّاسْ يِعَيُّرُوكُو أَشَانْ إِنْتُو نَاسْ الْمَسِيحْ، خَلَاصْ عِنْدُكُو بَرَكَةْ أَشَانْ رُوحْ اللّٰهْ الْمَجِيدْ قَاعِدْ فَوْقكُو.

2 كُرُنْتُس 5:17

وَ كَنْ أَيِّ نَادُمْ عِنْدَهْ عَلَاقَةْ مَعَ الْمَسِيحْ، هُو بِقِي خَلِيقَةْ جَدِيدَةْ. حَيَاتَهْ الْقَدِيمَةْ فَاتَتْ وَ حَيَاتَهْ الْجَدِيدَةْ بَدَتْ خَلَاصْ.

1 بُطْرُس 4:11

مَثَلاً، أَيِّ نَادُمْ الْيِكَلِّمْ لِلْأَخْوَانْ فِي الْمَلَمَّةْ، خَلِّي يِكَلِّمْ لَيْهُمْ بِكَلَامْ اللّٰهْ. وَ أَيِّ نَادُمْ الْيَخْدِمْ لِلْأَخْوَانْ، خَلِّي يَخْدِمْ بِالْقُدْرَةْ الْاللّٰهْ أَنْطَاهَا لَيَّهْ. أَشَانْ كُلَّ شَيّءْ التِّسَوُّوهْ يِمَجِّدْ اللّٰهْ بِوَاسِطَةْ عِيسَى الْمَسِيحْ. وَ لَيَّهْ هُو الْمَجْد وَ الْمُلُكْ دَايْماً وَ إِلَى الْأَبَدْ. آمِينْ.

إشَعْيا 27:11

وَ وَكِتْ الْفُرُوعْ يَبْقَوْا يَابْسِينْ، الْعَوِينْ يِكَسِّرَنْهُمْ وَ يِأَوْقِدَنْهُمْ نَارْ. أَشَانْ الشَّعَبْ دَوْل مَا عِنْدُهُمْ مَعْرَفَةْ وَ الْخَلَقَاهُمْ مَا رَحَمَاهُمْ وَ الْكَوَّنَاهُمْ مَا حَنَّ فَوْقهُمْ.

إشَعْيا 44:23

يَا السَّمَاوَاتْ، زَغْرُطُوا أَشَانْ اللّٰهْ سَوَّى الشَّيّءْ دَا! أَفْرَحَيْ، يَا أَرْض التِّحِتْ! وَ يَا جِبَالْ وَ إِنْتُو الْغَابَاتْ وَ كُلَّ شَدَرْكُو، غَنُّوا بِالْفَرَحْ! أَشَانْ اللّٰهْ فَدَى يَعْقُوبْ وَ يِوَصِّفْ مَجْدَهْ فِي إِسْرَائِيلْ.

إشَعْيا 46:13

وَ أَنَا نِقَرِّبْ عَدَالْتِي الْهِي مَا بَعِيدَةْ وَ نِنَجِّيكُو بَلَا تَأخِيرْ. وَ فِي صَهْيُون، نِجِيبْ النَّجَاةْ وَ فِي إِسْرَائِيلْ، نِجِيبْ مَجْدِي.»

عَمُوس 9:12

وَ بَنِي إِسْرَائِيلْ يِشِيلُوا الْفَضَّلْ مِنْ أَرْض أَدَوْم وَ مِنْ كُلَّ الْأُمَمْ الْأَنَا نَادَيْتهُمْ بِأُسْمِي.» وَ دَا كَلَامْ اللّٰهْ وَ هُو يِحَقِّقْ كَلَامَهْ.

1 صَمُوِيل 12:22

«وَ فِي شَانْ أُسْمَهْ الْعَظِيمْ، اللّٰهْ مَا يِخَلِّي شَعَبَهْ. أَشَانْ دَوَّرْ يِسَوِّيكُو إِنْتُو شَعَبَهْ حَلَالَهْ.

إشَعْيا 60:21

أَيْوَى، شَعَبْكِ كُلُّهُمْ يَبْقَوْا صَالِحِينْ وَ يَوْرُثُوا الْأَرْض إِلَى الْأَبَدْ. هُمَّنْ بِذِرْتِي الْأَنَا مَقَّنْتَهَا وَ خِدْمَةْ إِيدَيْنِي الْيِوَصُّفُوا مَجْدِي.

إرْمِيا 14:9

وَ مَالَا تَبْقَى مِثِلْ نَادُمْ عَيَّانْ أَوْ مِثِلْ فَارِسْ الْمَا يَقْدَرْ يِنَجِّي؟ يَا اللّٰهْ! بَيْدَا كُلَ، إِنْتَ قَاعِدْ فِي أُسُطْنَا وَ أُسْمَكْ قَاعِدْ فَوْقنَا. مَا تِخَلِّينَا!»

دَنْيال 9:18

يَا إِلٰـهِي، أَسْمَعْ وَ شِيفْ الْخَرَابْ الْجَاءْ فِي مَدِينْتَكْ الْفَوْقهَا أُسْمَكْ. وَ أَنِحْنَ مَا شَحَدْنَاكْ بِسَبَبْ أَنِحْنَ صَالِحِينْ لَاكِنْ أَشَانْ رَحْمَتَكْ إِنْتَ وَسِيعَةْ.

دَنْيال 9:19

يَا رَبّ، أَسْمَعْنِي! يَا رَبّ، أَغْفِرْ لَيْنَا! يَا رَبّ، أَسْمَعْ دُعَايِ وَ أَفْزَعْنَا بَلَا تَأخِيرْ فِي شَانْ أُسْمَكْ، يَا إِلٰـهِي! أَشَانْ إِنْتَ خَصَّصْت الْمَدِينَةْ دِي لِتَبْقَى مَدِينْتَكْ وَ الشَّعَبْ كُلَ لِيَبْقَى شَعَبَكْ.»