إشَعْيا 3:26 - الكتاب المقدس بالعربي الدارجي هنا تشاد

²⁶ وَ سُكَّانْكِ يَبْكُوا وَ يَحْزَنَوْا مِثِلْ مَرَةْ الْوَدَّرَتْ كُلَّ شَيّءْ وَ قَعَدَتْ فِي التُّرَابْ.

إشَعْيا 3:26 Referenca të Kryqëzuara

مَراثِي إرْمِيا 2:10

وَ مَدِينَةْ صَهْيُون الْمِثِلْ بِنَيَّةْ، شُيُوخْهَا قَعَدَوْا تِحِتْ بَلَا كَلَامْ وَ صَبَّوْا التُّرَابْ فِي رُوسَيْهُمْ وَ لِبْسَوْا خُلْقَانْ الْحِزِنْ. وَ بَنَاتْ مَدِينَةْ الْقُدُسْ الْعُدْرِيَّاتْ دَنْقَرَنْ رُوسَيْهِنْ عَلَيْ الْأَرْض مِنْ الْحِزِنْ.

إرْمِيا 14:2

وَ هُو قَالْ: «بَلَدْ يَهُوذَا يِبْسَتْ وَ مُدُنْهَا بِقَوْا مِثِلْ الْعَقَيْق الْعِطِشْ وَ جَفَّ وَ دَفَّقْ. وَ سُكَّانْهُمْ، الْحِزِنْ كَرَبْهُمْ وَ وَقَعَوْا فِي التُّرَابْ وَ كُرَوْرَاكْ نَاسْ مَدِينَةْ الْقُدُسْ أَنْسَمَعْ.

مَراثِي إرْمِيا 1:4

وَ شَوَارِعْ صَهْيُون حِزْنَوْا وَ مَا فِي نَاسْ مَاشِينْ لِلْعِيدْ وَ كُلَّ بِيبَانْ الْمَدِينَةْ دَفَّقَوْا. وَ رُجَالْ الدِّينْ هِنَيْهَا يَقُنْتُوا وَ بَنَاتْهَا الْعُدْرِيَّاتْ حَزْنَانَاتْ وَ مَدِينَةْ صَهْيُون قَاعِدَةْ فِي الْمُرّ.

أيُّوب 2:13

وَ هُمَّنْ قَعَدَوْا مَعَايَهْ فِي التُّرَابْ سَبْعَةْ نَهَارْ وَ سَبْعَةْ لَيْل. وَ نَادُمْ قَالْ كِلْمَةْ كَيْ، مَا فِيهْ. أَشَانْ هُمَّنْ شَافَوْا تَعَبَهْ دَا شَدِيدْ بِلْحَيْن.

لُوقا 19:44

وَ يِدَمُّرُوكِ مَعَ نَاسْكِ الْفِي لُبِّكِ. وَ مَا يِخَلُّوا حَجَرْ يَقْعُدْ فَوْق حَجَرْ. وَ دَا يَبْقَى أَشَانْ إِنْتِ مَا عِرِفْتِ الْوَكِتْ الْاللّٰهْ جَاءْ فَوْقَهْ لِيِنَجِّيكِ.»

حِزْقِيال 26:16

كُلَّ مُلُوكْ هَنَا خَشُمْ الْبَحَرْ يَنْزُلُوا مِنْ كَرَاسِيهُمْ وَ يِسِلُّوا لُبَاسْهُمْ هَنَا الْمُلُوكْ وَ خُلْقَانْهُمْ الْمُكَلَّفِينْ. الْخَوْف يَكْرُبْهُمْ وَ يَقْعُدُوا فِي التُّرَابْ وَ يَرْجُفُوا فِي كُلَّ وَكِتْ وَ يِنْبَهْتُوا بِسَبَبْكِ.

أيُّوب 2:8

وَ خَلَاصْ، أَيُّوبْ شَالْ شِقْفَةْ وَ قَاعِدْ يُحُكّ بَيْهَا وَ قَعَدْ فِي الرُّمَادْ.

إشَعْيا 47:1

«أَنْزِلِي وَ أَقْعُدِي تِحِتْ فِي الرُّمَادْ، يَا مَدِينَةْ بَابِلْ الْمِثِلْ بِنَيَّةْ عُدْرِيَّةْ! أَقْعُدِي فِي التُّرَابْ بَلَا كُرْسِي، يَا بِنَيَّةْ الْبَابِلِيِّينْ! أَشَانْ بَتَّانْ مَا يِنَادُوكِ جَمِيلَةْ وَ اللَّطِيفَةْ.

مَتَّى 11:17

‹أَنِحْنَ ضَرَبْنَا لَيْكُو الصُّفَّارَةْ لَاكِنْ إِنْتُو مَا لِعِبْتُوا. أَنِحْنَ غَنَّيْنَا غِنَيْ هَنَا مَوْت وَ إِنْتُو مَا بَكَيْتُوا!›

إشَعْيا 6:11

وَ أَنَا قُلْت: «دَا لِمَتَى، يَا رَبِّي؟» وَ هُو قَالْ: «لَحَدِّي كُلَّ الْمُدُنْ يِدَّمَّرَوْا وَ يَبْقَوْا فَاضِيِينْ مِنْ سُكَّانْهُمْ وَ الْبُيُوتْ يَبْقَوْا بَلَا نَاسْ وَ الْأَرْض تِدَّمَّرْ وَ تَخْرَبْ.

إشَعْيا 14:31

نُوحُوا، يَا بِيبَانْ! وَ كَوْرُكُوا، يَا مُدُنْ! كُلَّ الْفِلِسْطِيِّينْ بَرْجَلَوْا. أَشَانْ الْعَدُو يَجِي مِثِلْ دُخَّانْ مِنْ الْمُنْشَاقْ وَ عَسْكَرِي وَاحِدْ كُلَ مَا يَمْرُقْ مِنْ الصَّفّ.

إشَعْيا 29:2

نِضَايِقْ أَرِيِيلْ. وَ يُكُونْ فَوْقهَا الشَّكْوَةْ وَ الْقَنِتِينْ وَ أَرِيِيلْ تَبْقَى لَيِّ مِثِلْ مَدْبَحْ الْيِحَرُّقُوا فَوْقَهْ ضَحَايَا.

إشَعْيا 33:9

الْبَلَدْ جَفَّتْ وَ يِبْسَتْ أَيْوَى، لُبْنَانْ يِبْسَتْ وَ الْعَيْب كَرَبْهَا. سَهَلَةْ شَارُونْ بِقَتْ مِثِلْ الصَّحَرَاء وَ تُرَابْ بَاشَانْ وَ جَبَلْ الْكَرْمَلْ وَدَّرَوْا خَضَارْهُمْ.

إرْمِيا 15:8

أَنَا سَوَّيْت أَرَامِلْهُمْ كَتِيرَاتْ زِيَادَةْ مِنْ رَمْلَةْ هَنَا خَشُمْ الْبَحَرْ. وَ بِنَهَارْ بَسْ، أَنَا جِبْت الْمُدَمِّرْ فِي أَمَّهَاتْ الصُّبْيَانْ لِيِدَمِّرْ صُبْيَانْهِنْ وَ فَجْأَةً جِبْت فَوْقهِنْ الْخَوْف الشَّدِيدْ.

مَراثِي إرْمِيا 1:1

يَا السَّلَامْ! الْمَدِينَةْ أَمْ شَعَباً كَتِيرْ بِقَتْ مَعْزُولَةْ مِثِلْ أَرْمَلَةْ مَا عِنْدَهَا مُسَاعَدَةْ. أَوَّلْ، هِي فِي الْأُمَمْ سَيِّدَةْ وَ الْيَوْم، بِقَتْ خَادِمْ مَمْلُوكَةْ.

مَراثِي إرْمِيا 2:8

وَ اللّٰهْ قَرَّرْ يِدَمِّرْ دَرَادِرْ مَدِينَةْ صَهْيُون الْمِثِلْ بِنَيَّةْ. هُو مَا وَقَّفْ إِيدَهْ مِنْ الدَّمَارْ لَحَدِّي كُلَّ شَيّءْ خَلَاصْ أَدَّمَّرْ. وَ هُو ضَرَبْ الْبَكَانْ الْقَوِي وَ الدَّرَادِرْ وَ كُلُّهُمْ دَفَّقَوْا قِدَّامَهْ.

حِزْقِيال 12:20

وَ الْمُدُنْ الْمَسْكُونِينْ يَخْرَبَوْا وَ الْبَلَدْ كُلَ تَبْقَى خَرَابْ. وَ بَيْدَا، إِنْتُو تَعَرْفُوا كَدَرْ أَنَا بَسْ اللّٰهْ.“›»

مِيخا 1:9

مَرَضْ السَّامِرَةْ مَا عِنْدَهْ عِلَاجْ وَ هُو لِحِقْ لَحَدِّي بَلَدْ يَهُوذَا. وَ لِحِقْ بِيبَانْ مَدِينَةْ شَعَبِي أَيْوَى، لِحِقْ أُسُطْ مَدِينَةْ الْقُدُسْ.

إشَعْيا 32:14

أَشَانْ قَصِرْ الْمَلِكْ خَلَّوْه وَ الْمَدِينَةْ السِّيَادْهَا كَتِيرِينْ، أَبَوْهَا. حَارَةْ عُفَلْ وَ قَصِرْ الْمُرَاقَبَةْ يَبْقَوْا مِثِلْ كَرَاكِيرْ إِلَى الْأَبَدْ. وَ حَمِيرْ الْكَدَادَةْ يِنَطُّطُوا فَوْقهُمْ مِنْ الْفَرَحْ وَ الْبَهَايِمْ يَسْرَحَوْا فَوْقهُمْ