إشَعْيا 27:8 - الكتاب المقدس بالعربي الدارجي هنا تشاد

⁸ وَ لَاكِنْ وَكِتْ اللّٰهْ عَاقَبَاهُمْ، هُو طَرَدَاهُمْ وَ مَرَقَاهُمْ وَ قَشَّاهُمْ بِنَفْخَةْ شَدِيدَةْ فِي يَوْم هَنَا رِيحْ الْجَايَةْ مِنْ صَبَاحْ.

إشَعْيا 27:8 Referenca të Kryqëzuara

هُوشَع 4:1

يَا بَنِي إِسْرَائِيلْ، أَسْمَعَوْا كَلَامْ اللّٰهْ! هُو قَالْ: «أَنَا اللّٰهْ نَشْكِي سُكَّانْ الْبَلَدْ دِي أَشَانْ مَا فِي أَمَانْ وَ مَا فِي رَحْمَةْ وَ مَا فِي مَعْرَفَةْ اللّٰهْ فِي الْبَلَدْ.

حِزْقِيال 19:12

لَاكِنْ هِي مَلَّطَوْهَا بِغَضَبْ وَ رَمَوْهَا فِي الْأَرْض. وَ رِيحْ الصَّبَاحْ يَبَّسَتْ فَوَاكِهَّا وَ هُمَّنْ دَفَّقَوْا. وَ فُرُوعْهَا الْعِنْدُهُمْ قُدْرَةْ يِبْسَوْا وَ النَّارْ أَكَلَتْهُمْ.

إرْمِيا 10:24

يَا اللّٰهْ! أَدِّبْنَا بِرَحْمَةْ مَا بِغَضَبْ وَ دَا أَشَانْ مَا تِصَغِّرْنَا مَرَّةْ وَاحِدْ.

إرْمِيا 4:11

وَ فِي الْوَكِتْ دَاكْ، الرَّبّ يُقُولْ لِشَعَبْ مَدِينَةْ الْقُدُسْ: «فِيَّهْ رِيحْ حَامِيَةْ جَايَةْ مِنْ رُوسَيْ الْجِبَالْ الْمُلُسْ هَنَا الصَّحَرَاء وَ جَايَةْ لِأُمَّتِي الْمِثِلْ بِنْت أَمِّي وَ الرِّيحْ دِي جَايَةْ وَ لَا تِضَرِّي وَ لَا تِغَرْبِلْ.

1 بُطْرُس 1:6

وَ أَشَانْ دَا، تَفْرَحَوْا فَرْحَةْ كَبِيرَةْ، حَتَّى كَانْ إِنْتُو قَاعِدِينْ تَتْعَبَوْا لِمُدَّةْ قِصَيْرَةْ كُلَ وَ تَحْزَنَوْا بِسَبَبْ الصُّعُوبَاتْ الشِّقْ شِقْ.

هُوشَع 13:15

وَ كَنْ نَاسْ أَفْرَايِمْ زَادَوْا فِي أُسْط أَخْوَانْهُمْ، رِيحْ الصَّبَاحْ تَجِي وَ رِيحْ مِنْ اللّٰهْ تُقُمّ مِنْ الصَّحَرَاءْ. هِي تِيَبِّسْ وُدْيَانْهُمْ وَ تِجَفِّفْ عَيْن أَلْمِيهُمْ. الْمَخَازِنْ، يَنْهَبَوْهُمْ وَ خُمَامْهُمْ الْغَالِي، يِشِيلُوهْ.

إرْمِيا 46:28

وَ إِنْتُو، يَا ذُرِّيَّةْ عَبْدِي يَعْقُوبْ، مَا تَخَافَوْا أَشَانْ أَنَا دَايْماً نُكُونْ مَعَاكُو. وَ أَنَا نِدَمِّرْ مَرَّةْ وَاحِدْ كُلَّ الْأُمَمْ الْأَنَا شَتَّتُّكُو فِي لُبُّهُمْ. وَ لَاكِنْ إِنْتُو، مَا نِدَمِّرْكُو مَرَّةْ وَاحِدْ. أَكِيدْ مَا نَجْعَلْكُو بَرِيِّينْ وَ لَاكِنْ نِأَدِّبْكُو بِمِيزْ.» وَ دَا كَلَامْ اللّٰهْ.

إرْمِيا 30:11

أَنَا ذَاتِي دَايْماً نُكُونْ مَعَاكُو لِنِنَجِّيكُو. وَ أَنَا نِدَمِّرْ مَرَّةْ وَاحِدْ كُلَّ الْأُمَمْ الْأَنَا شَتَّتُّكُو فِي لُبُّهُمْ. وَ لَاكِنْ إِنْتُو، مَا نِدَمِّرْكُو مَرَّةْ وَاحِدْ. أَكِيدْ مَا نَجْعَلْكُو بَرِيِّينْ وَ لَاكِنْ نِأَدِّبْكُو بِمِيزْ.» وَ دَا كَلَامْ اللّٰهْ.

إرْمِيا 4:27

وَ دَاهُو اللّٰهْ قَالْ: «كُلَّ الْأَرْض تَخْرَبْ وَ لَاكِنْ بَيْدَا كُلَ، أَنَا مَا نِدَمِّرْهَا مَرَّةْ وَاحِدْ.

1 كُرُنْتُس 10:13

مَا فِي تَجْرِبَةْ جَاتْ فَوْقكُو الْمَا جَاتْ فِي كُلَّ النَّاسْ. وَ اللّٰهْ هُو صَادِقْ وَ بِالتَّجْرِبَةْ دِي، هُو يَفْتَحْ لَيْكُو دَرِبْ أَشَانْ تَمُرْقُوا بَيَّهْ وَ يَنْطِيكُو الْقُدْرَةْ أَشَانْ تَصْبُرُوا فِي التَّجْرِبَةْ دِي.

إشَعْيا 57:16

أَشَانْ أَنَا مَا نَهْرِجْ دَايْماً وَ مَا نَغْضَبْ إِلَى الْأَبَدْ. لَا! مَا نِدَوْر يَغْمَرْ قِدَّامِي كُلِّ مَخْلُوقْ حَيّ الْأَنَا خَلَقْتَهْ.

إشَعْيا 54:7

لِمُدَّةْ قِصَيْرَةْ بَسْ، أَنَا خَلَّيْتكِ وَ لَاكِنْ بِرَحْمَتِي الْوَسِيعَةْ، نِقَبِّلْكِ بَتَّانْ.

إشَعْيا 50:1

وَ دَاهُو اللّٰهْ قَالْ: «صَحِيحْ أَنَا طَرَدْت أَمُّكُو. وَيْن مَكْتُوبْ الطَّلَاقْ؟ وَ لِيَاتُو أَنَا بِعْتُكُو لِنِكَفِّي دَيْنِي؟ أَعَرْفُوا! بِسَبَبْ خَطَاكُو بَسْ، بَاعَوْكُو وَ بِسَبَبْ عِصْيَانْكُو، طَلَّقَوْا أَمُّكُو.

إشَعْيا 10:12

وَ وَكِتْ الرَّبّ يِكَمِّلْ كُلَّ خِدِمْتَهْ فِي جَبَلْ صَهْيُون وَ فِي مَدِينَةْ الْقُدُسْ، هُو يُقُولْ: «نُقُمّ ضِدّ أَفْكَارْ الْإِسْتِكْبَارْ هَنَا مَلِكْ بَلَدْ أَشُورْ وَ شَوْفَهْ هَنَا الْبُغُضْ.

إشَعْيا 1:5

اللّٰهْ يَضْرُبْكُو وَيْن بَتَّانْ؟ أَشَانْ إِنْتُو قَاعِدِينْ تِزِيدُوا فِي عِصْيَانْكُو. رَاسْكُو كُلَّ مَلَانْ عَوَاوِيرْ وَ قَلِبْكُو كُلَّ تَعْبَانْ.

زَبُور 103:14

أَشَانْ هُو يَعَرِفْ كِكَّيْف هُو خَلَقَانَا وَ يَعَرِفْ تَمَامْ كَدَرْ أَنِحْنَ مِنْ التُّرَابْ.

زَبُور 78:38

وَ لَاكِنْ هُو الرَّحِيمْ غَفَرْ خَطَاهُمْ وَ مَا دَمَّرَاهُمْ وَ عِدَّةْ مَرَّاتْ، هُو مَا غِضِبْ لَيْهُمْ وَ مَا قَوَّمْ كُلَّ زَعَلَهْ.

زَبُور 76:10

حَتَّى زَعَلْ الْإِنْسَانْ يِوَصِّفْ مَجْدَكْ وَ الْمَا يِخَلُّوا زَعَلْهُمْ يَقْعُدُوا حَزْنَانِينْ.

زَبُور 38:1

يَا اللّٰهْ، عَاقِبْنِي بَلَا غَضَبْ وَ أَدِّبْنِي بَلَا زَعَلْ.

زَبُور 6:1

يَا اللّٰهْ! أَهْدِينِي بَلَا زَعَلْ وَ أَدِّبْنِي بَلَا غَضَبْ!

أيُّوب 23:6

هَلْ يِحَاكِمْنِي بِكُلَّ قُدُرْتَهْ وَلَّا؟ لَا! يَسْمَعْنِي.

زَبُور 103:9

هُو مَا يِحَاكِمْ دَايْماً وَ مَا يَغْضَبْ إِلَى الْأَبَدْ.

إشَعْيا 64:5

إِنْتَ تِلَاقِي الْيَفْرَحَوْا بِسَوِّيِّنْ الْعَدَالَةْ وَ الْيِذَّكَّرَوْا دُرُوبَكْ. وَ إِنْتَ غِضِبْت لَيْنَا أَشَانْ أَنِحْنَ أَذْنَبْنَا. لَاكِنْ دَايْماً بِدُرُوبَكْ دَوْل، أَنِحْنَ نَلْقَوْا النَّجَاةْ.

مَراثِي إرْمِيا 3:31

أَشَانْ الرَّبّ مَا يَابَى الْإِنْسَانْ إِلَى الْأَبَدْ.

مَراثِي إرْمِيا 3:32

حَتَّى كَانْ عَاقَبْ كُلَ، يَرْحَمْ وَ دَا حَسَبْ خَيْرَهْ الْكَبِيرْ.