إشَعْيا 24:5 - الكتاب المقدس بالعربي الدارجي هنا تشاد

⁵ وَ الْأَرْض، سُكَّانْهَا يِنَجُّسُوهَا أَشَانْ هُمَّنْ مَا طَبَّقَوْا الْوَصَايَا وَ خَالَفَوْا الْقَوَانِينْ وَ قَطَعَوْا الْمُعَاهَدَةْ الدَّايْمَةْ.

إشَعْيا 24:5 Referenca të Kryqëzuara

عِبْرَانِيِّين 13:20

وَ خَلَاصْ، اللّٰهْ رَبّ السَّلَامْ بَعَثْ مِنْ أُسْط الْمَيْتِينْ رَبِّنَا عِيسَى الْبِقِي رَاعِي كَبِيرْ هَنَا غَنَمْ اللّٰهْ بِسَبَبْ دَمّ الْمُعَاهَدَةْ الْأَبَدِيَّةْ.

عِبْرَانِيِّين 9:1

وَ تَعَرْفُوا كَدَرْ فِي الْمُعَاهَدَةْ الْأَوَّلْ، عِنْدَهَا شُرُوطْ الْبَيْهُمْ النَّاسْ وَاجِبْ يَعَبُدُوا اللّٰهْ وَ عِنْدَهَا بَكَانْ مُقَدَّسْ فِي الْأَرْض.

دَنْيال 7:25

وَ هُو يُقُولْ كَلَامْ ضِدّ اللّٰهْ الْعَالِي وَ يِضَايِقْ نَاسَهْ الصَّالِحِينْ وَ يِدَوْر يِغَيِّرْ أَيَّامْ الْأَعْيَادْ وَ تَوْرَاةْ اللّٰهْ. وَ الصَّالِحِينْ يَقَعَوْا فِي إِيدَيْنَهْ مُدَّةْ تَلَاتَةْ سَنَةْ وَ نُصّ.

لُوقا 1:6

وَ هُمَّنْ صَالِحِينْ قِدَّامْ اللّٰهْ وَ قَاعِدِينْ يِطَبُّقُوا عَدِيلْ كُلَّ وَصِيَّاتَهْ وَ شُرُوطَهْ.

مِيخا 2:10

يَلَّا قُمُّوا أَمْشُوا! الْبَلَدْ دِي بَتَّانْ مَا عِنْدَهَا لَيْكُو رَاحَةْ أَشَانْ بِنَجَاسِتْكُو، جِبْتُوا فَوْقهَا الدَّمَارْ وَ دَا دَمَارْ كَامِلْ مَرَّةْ وَاحِدْ!

دَنْيال 9:10

وَ أَنِحْنَ مَا سِمِعْنَا كَلَامَكْ، إِنْتَ اللّٰهْ إِلٰـهْنَا. وَ مَا تَابَعْنَا شُرُوطْ التَّوْرَاةْ الْكَلَّمْتِنَا بَيْهُمْ بِوَاسِطَةْ عَبِيدَكْ الْأَنْبِيَاء.

حِزْقِيال 20:24

أَشَانْ هُمَّنْ مَا طَبَّقَوْا قَوَانِينِي وَ أَبَوْا شُرُوطِي وَ مَا أَحْتَرَمَوْا يَوْمِي هَنَا السَّبْت أَشَانْ خَطَّوْا عُيُونْهُمْ فِي أَصْنَامْ أَبَّهَاتْهُمْ.

حِزْقِيال 20:13

وَ لَاكِنْ بَنِي إِسْرَائِيلْ عِصَوْنِي فِي الصَّحَرَاءْ. وَ هُمَّنْ مَا تَابَعَوْا شُرُوطِي وَ أَبَوْا قَوَانِينِي الْبَيْهُمْ يَلْقَوْا الْحَيَاةْ كَنْ يِطَبُّقُوهُمْ. وَ دَايْماً مَا أَحْتَرَمَوْا يَوْمِي هَنَا السَّبْت. وَ بَتَّانْ أَنَا قُلْت: ”نِنَزِّلْ فَوْقهُمْ غَضَبِي فِي الصَّحَرَاءْ وَ نِكَمِّلْهُمْ.“

إرْمِيا 50:5

هُمَّنْ يَسْأَلَوْا مِنْ دَرِبْ جَبَلْ صَهْيُون وَ يِوَجُّهُوا عَلَيْهَا. وَ يُقُولُوا: ‹يَلَّا! نِنْرَبْطُوا مَعَ اللّٰهْ بِمُعَاهَدَةْ دَايْمَةْ الْأَبَداً مَا تِنَّسِي.›»

إشَعْيا 50:1

وَ دَاهُو اللّٰهْ قَالْ: «صَحِيحْ أَنَا طَرَدْت أَمُّكُو. وَيْن مَكْتُوبْ الطَّلَاقْ؟ وَ لِيَاتُو أَنَا بِعْتُكُو لِنِكَفِّي دَيْنِي؟ أَعَرْفُوا! بِسَبَبْ خَطَاكُو بَسْ، بَاعَوْكُو وَ بِسَبَبْ عِصْيَانْكُو، طَلَّقَوْا أَمُّكُو.

إشَعْيا 10:6

أَنَا نِرَسِّلْ مَلِكْ بَلَدْ أَشُورْ ضِدّ الْأُمَّةْ الْكَافْرَةْ وَ نُقُودَهْ ضِدّ الشَّعَبْ الْيِقَوُّمُوا غَضَبِي أَشَانْ مَلِكْ أَشُورْ يَنْهَبْهُمْ وَ يَكْسَبْهُمْ وَ يِفَجِّقْهُمْ تِحِتْ رِجِلَيْنَهْ مِثِلْ الطِّينَةْ فِي الشَّوَارِعْ.

زَبُور 105:10

هُو ثَبَّتْ شَرْط لِذُرِّيَّةْ يَعْقُوبْ وَ سَوَّى مُعَاهَدَةْ دَايْمَةْ مَعَ بَنِي إِسْرَائِيلْ.

زَبُور 55:5

الْخَوْف وَ الرَّجَفَانْ كَرَبَوْنِي وَ بَهِيتَةْ شَدِيدَةْ كَرَبَتْنِي.

2 أخبار 33:9

وَ لَاكِنْ مَنَسَّى لَزَّاهُمْ لِنَاسْ بَلَدْ يَهُوذَا وَ سُكَّانْ مَدِينَةْ الْقُدُسْ لِيِسَوُّوا الْفَسَالَةْ زِيَادَةْ مِنْ الْأُمَمْ الدَّمَّرَاهُمْ اللّٰهْ قِدَّامْ بَنِي إِسْرَائِيلْ.

2 صَمُوِيل 23:5

«وَ دَاهُو الشَّيّءْ الرَّبّ سَوَّاهْ مَعَايِ أَنَا وَ مَعَ ذُرِّيّتِي، هُو سَوَّى مَعَايِ مُعَاهَدَةْ دَايْمَةْ وَ كَامِلَةْ وَ مَضْمُونَةْ. وَ فِي أَيِّ شَيّءْ، هُو يِنَجِّينِي وَ يِحَقِّقْ مُنَى قَلْبِي.

يَشُوع 24:25

وَ خَلَاصْ فِي الْيَوْم دَا فِي شَكِيمْ، يَشُوعْ سَوَّى مُعَاهَدَةْ بَيْن الشَّعَبْ وَ اللّٰهْ وَ سَوَّى لَيْهُمْ قَوَانِينْ وَ شُرُوطْ.

تَثْنِية 32:20

وَ قَالْ: «بَتَّانْ مَا نِوَجِّهْ عَلَيْهُمْ وَ نِشِيفْ شُنُو يُكُونْ لَيْهُمْ فِي الأَخِيرْ أَشَانْ هُمَّنْ ذُرِّيَّةْ مُفْسِدَةْ وَ عِيَالْ الْمَا عِنْدُهُمْ أَمَانْ.

تَثْنِية 32:15

وَ بَنِي إِسْرَائِيلْ سِمْنَوْا وَ عِصَوْا. أَيْوَى، هُمَّنْ سِمْنَوْا وَ قَرْقَطَوْا وَ تِخْنَوْا. وَ خَلَاصْ أَبَوْا اللّٰهْ الْخَلَقَاهُمْ وَ حَقَرَوْا مَلْجَئْهُمْ وَ مُنَجِّيهُمْ.

لاوِيِّين 20:22

«وَ أَحْفَضَوْا كُلَّ شُرُوطِي وَ كُلَّ قَوَانِينِي وَ طَبُّقُوهُمْ وَ بَيْدَا، الْبَلَدْ النِّوَدِّيكُو لَيْهَا وَ نِسَكِّنْكُو فَوْقهَا مَا تَطْرُدْكُو.

دَنْيال 9:5

أَنِحْنَ أَذْنَبْنَا وَ خِطِينَا وَ سَوَّيْنَا الشَّرّ وَ عِصِينَاكْ وَ خَلَّيْنَا وَصِيَّاتَكْ وَ شَرِيعْتَكْ.

حِزْقِيال 37:26

وَ أَنَا نِسَوِّي مَعَاهُمْ مُعَاهَدَةْ هِنْت سَلَامْ وَ دِي تَبْقَى مُعَاهَدَةْ دَايْمَةْ مَعَاهُمْ. وَ نِثَبِّتْهُمْ وَ نِكَتِّرْهُمْ وَ نُخُطّ بَيْتِي الْمُقَدَّسْ فِي أُسُطْهُمْ إِلَى الْأَبَدْ.

إشَعْيا 9:17

وَ فِي شَانْ دَا، الرَّبّ مَا يَفْرَحْ بِصُبْيَانْهُمْ وَ مَا يِحِنّ فِي أَتَامَاهُمْ وَ أَرَامِلْهُمْ. أَشَانْ هُمَّنْ كُلُّهُمْ كُفَّارْ وَ فَسْلِينْ وَ كُلَّ خُشُومْهُمْ يِكَلُّمُوا بِكَلَامْ الطَّمَاسَةْ. وَ بَيْدَا كُلَ، زَعَلَهْ مَا يَقِيفْ وَ إِيدَهْ قَاعِدَةْ مَرْفُوعَةْ لِلْعِقَابْ.

إشَعْيا 30:9

أَشَانْ الشَّعَبْ دَوْل عَاصِيِينْ وَ عِيَالْ غَشَّاشِينْ! أَيْوَى، مَا يِدَوْرُوا يَسْمَعَوْنِي، مَا يَسْمَعَوْا شُرُوطْ تَوْرَاةْ اللّٰهْ.

إشَعْيا 33:8

وَ الشَّوَارِعْ فَاضِيِينْ وَ مَا فِي نَادُمْ مَاشِي فِي الدُّرُوبْ. الْمُخَرِّبْ قَطَعْ الْمُعَاهَدَةْ وَ لِلشُّهُودْ، أَبَاهُمْ وَ مَا فَكَّرْ فِي أَيِّ نَادُمْ.

حِزْقِيال 16:59

وَ دَاهُو اللّٰهْ الرَّبّ قَالْ: «إِنْتِ قَطَعْتِ حَلِيفِتْكِ وَ نَقَضْتِ مُعَاهَدَتْكِ مَعَايِ. وَ هَسَّعْ، أَنَا نِسَوِّي فَوْقكِ مِثِلْ إِنْتِ سَوَّيْتِ فَوْقِي.

لاوِيِّين 26:35

وَ فِي مُدَّةْ كُلَّ أَيَّامْ خَرَابْهَا، هِي تِنْجَمَّ وَ تِلْكَفَّى أَيَّامْ السَّبْت الْهِي مَا أَنْجَمَّتْ فَوْقهُمْ وَكِتْ إِنْتُو سَاكْنِينْ فَوْقهَا.

يَشُوع 23:16

وَ كَنْ نَقَضْتُوا مُعَاهَدَةْ اللّٰهْ إِلٰـهْكُو الْهُو أَمَرَاكُو بَيْهَا وَ كَنْ عَبَدْتُوا إِلٰـهَاتْ آخَرِينْ وَ سَجَدْتُوا قِدَّامْهُمْ، خَلَاصْ غَضَبْ اللّٰهْ يَنْزِلْ فَوْقكُو وَ طَوَّالِي تِكَمُّلُوا فِي الْبَلَدْ الْعَدِيلَةْ الْهُو أَنْطَاهَا لَيْكُو.»

2 مُلوك 21:12

وَ فِي شَانْ دَا، دَاهُو اللّٰهْ إِلٰـهْ بَنِي إِسْرَائِيلْ قَالْ: «أَنَا نِنَزِّلْ فِي مَدِينَةْ الْقُدُسْ وَ فِي بَلَدْ يَهُوذَا مَصِيبَةْ التَّبْهَتْ كُلَّ النَّاسْ الْيَسْمَعَوْا بَيْهَا.

2 مُلوك 21:15

أَشَانْ شَعَبِي قَاعِدِينْ يِسَوُّوا دَايْماً الْفَسَالَةْ قِدَّامِي. وَ هُمَّنْ قَاعِدِينْ دَايْماً يِغَضُّبُونِي مِنْ يَوْم الْجُدُودْهُمْ مَرَقَوْا مِنْ مَصِرْ لَحَدِّي الْيَوْم.»

إرْمِيا 11:10

أَشَانْ هُمَّنْ قَبَّلَوْا فِي خَطَا جُدُودْهُمْ الْأَبَوْا مَا يَسْمَعَوْا كَلَامِي وَ هُمَّنْ جَرَوْا وَرَاءْ إِلٰـهَاتْ آخَرِينْ لِيَعَبُدُوهُمْ. وَ بَيْدَا، بَنِي إِسْرَائِيلْ وَ بَنِي يَهُوذَا قَطَعَوْا الْمُعَاهَدَةْ الْأَنَا سَوَّيْتهَا مَعَ جُدُودْهُمْ.»

هُوشَع 6:7

«نَقَضَوْا الْمُعَاهَدَةْ فِي حِلَّةْ آدَمْ أَشَانْ فِي الْبَكَانْ دَا، خَانَوْنِي.