إشَعْيا 12:2 - الكتاب المقدس بالعربي الدارجي هنا تشاد

² دَاهُو الْإِلٰـهْ الْمُنَجِّي! أَنَا أَتْوَكَّلْت عَلَيَّهْ وَ بَتَّانْ مَا نَخَافْ. أَشَانْ قُدُرْتِي وَ قُوِّتِي، هُو اللّٰهْ وَ هُو بَسْ النَّجَّانِي.»

إشَعْيا 12:2 Referenca të Kryqëzuara

خُروج 15:2

اللّٰهْ هُو قُدُرْتِي وَ فِيَّهْ هُو، أَنَا نِغَنِّي. هُو بَسْ النَّجَّانِي وَ هُو رَبِّي الْأَنَا نِمَجِّدَهْ. هُو الرَّبّ الْأَبُويِ عَبَدَهْ. أَنَا نِعَظِّمَهْ!

زَبُور 27:1

اللّٰهْ هُو نُورِي وَ نَجَاتِي، أَنَا نَخَافْ مِنْ يَاتُو؟ اللّٰهْ هُو مَلْجَأْ لِحَيَاتِي، قِدَّامْ يَاتُو أَنَا نَرْجِفْ؟

زَبُور 118:14

قُدُرْتِي هُو اللّٰهْ وَ فِيَّهْ هُو، أَنَا نِغَنِّي. هُو بَسْ النَّجَّانِي.

رُؤية 7:10

وَ كُلُّهُمْ صَرَخَوْا بِحِسّ شَدِيدْ وَ قَالَوْا: «النَّجَاةْ جَايَةْ مِنْ رَبِّنَا الْقَاعِدْ فِي الْعَرْش وَ الْحَمَلْ!»

يُونُس 2:9

وَ كَنْ لَيِّ أَنَا، نَشْكُرَكْ وَ نِقَدِّمْ لَيْك ضَحِيَّةْ وَ نِتِمّ نَذْرِي الْعَاهَدْتَكْ بَيَّهْ. يَا اللّٰهْ! إِنْتَ بَسْ التِّنَجِّي النَّاسْ.»

إشَعْيا 45:17

لَاكِنْ كَنْ لِبَنِي إِسْرَائِيلْ، اللّٰهْ يِنَجِّيهُمْ وَ النَّجَاةْ دِي إِلَى الْأَبَدْ. وَ بَتَّانْ إِنْتُو مَا تَبْقَوْا عَايْبِينْ وَ لَا خَجْلَانِينْ، دَايْماً وَ إِلَى الْأَبَدْ.

إرْمِيا 23:6

وَ فِي وَكِتْ حُكْمَهْ، بَنِي يَهُوذَا يَلْقَوْا النَّجَاةْ وَ بَنِي إِسْرَائِيلْ يَسْكُنُوا بِأَمَانْ. وَ دَاهُو الْأُسُمْ الْيِسَمُّوهْ بَيَّهْ، اللّٰهْ هُو بَسْ الْيِجِيبْ لَيْنَا الْعَدَالَةْ.»

إرْمِيا 3:23

أَكِيدْ الْعِبَادَةْ فِي رُوسَيْ الْحُجَارْ، كِدِبْ سَاكِتْ وَ فِي الْجِبَالْ، تِنْسَمِعْ إِلَّا الْحَرَكَةْ. وَ أَكِيدْ أَنِحْنَ نَلْقَوْا النَّجَاةْ فِي اللّٰهْ إِلٰـهْنَا بَسْ.

زَبُور 83:18

وَ خَلَاصْ، يَعَرْفُوا كَدَرْ إِنْتَ وِحَيْدَكْ بَسْ أُسْمَكْ اللّٰهْ وَ إِنْتَ بَسْ الْعَالِي فِي كُلَّ الْأَرْض.

1 تِمُوتَاوُس 3:16

وَ بَلَا شَكَكْ، دَرِبْ التَّقْوَى الْاللّٰهْ بَيَّنَهْ لَيْنَا، هُو عَظِيمْ. الْمَسِيحْ بِقِي إِنْسَانْ وَ بَانْ فِي الدُّنْيَا وَ الرُّوحْ الْقُدُّوسْ شَهَدْ لَيَّهْ. الْمَلَائِكَةْ شَافَوْه فِي السَّمَاءْ وَ نَاسَهْ بَشَّرَوْا بَيَّهْ الْأُمَمْ. نَاسْ آمَنَوْا بَيَّهْ فِي الدُّنْيَا وَ اللّٰهْ رَفَعَهْ فَوْق فِي مَجْدَهْ.

رَوْمَا 1:16

أَشَانْ وَكِتْ أَنَا نِبَشِّرْ بِشَارَةْ الْمَسِيحْ، دَا مَا عِنْدَهْ لَيِّ عَيْب. وَ بِشَارَةْ الْمَسِيحْ، هِي قُدْرَةْ اللّٰهْ الْبَيْهَا يِنَجِّي كُلَّ النَّاسْ الْيِآمُنُوا بَيَّهْ، أَوَّلْ كَيْ الْيَهُودْ وَ بَتَّانْ الْمَا يَهُودْ.

هُوشَع 1:7

لَاكِنْ نَرْحَمْ بَنِي يَهُوذَا وَ أَنَا اللّٰهْ إِلٰـهُّمْ، نِنَجِّيهُمْ. أَيْوَى، نِنَجِّيهُمْ بَلَا نُبَّالْ وَ لَا سَيْف وَ لَا حَرِبْ وَ بَلَا خَيْل وَ لَا سِيَادْ خَيْل.»

إشَعْيا 62:11

وَ دَاهُو اللّٰهْ خَبَّرْ لَحَدِّي آخِرْ الْأَرْض وَ قَالْ: «قُولُوا لِسُكَّانْ صَهْيُون الْمِثِلْ بِنَيَّةْ: ‹دَاهُو مُنَجِّيكُو جَايِ وَ مَاحِيّتَهْ مَعَايَهْ وَ قِدَّامَهْ مُكَافَاتَهْ.›»

إشَعْيا 32:2

وَ أَيِّ وَاحِدْ مِنْهُمْ يَبْقَى مِثِلْ بَكَانْ الْيِلَّبَّدَوْا فَوْقَهْ مِنْ الرِّيحْ وَ مِثِلْ بَكَانْ الْيَحْمِي مِنْ الْمَطَرَةْ الشَّدِيدَةْ. وَ يَبْقَى مِثِلْ مَجَارِي أَلْمِي فِي بَكَانْ الْيَابِسْ وَ مِثِلْ ضُلّ الْجَبَلْ فِي أَرْض جَفَافْ.

إشَعْيا 7:14

وَ فِي شَانْ دَا، الرَّبّ هُو ذَاتَهْ يَنْطِيكُو عَلَامَةْ. دَاهُو الْبِنَيَّةْ غَلْبَانَةْ وَ تَلْدَ وِلَيْد وَ تِسَمِّيهْ عِمَّانُوِيل (مَعَنَاتَهْ اللّٰهْ مَعَانَا).

1 صَمُوِيل 2:1

وَ حِنَّةْ صَلَّتْ وَ قَالَتْ: «نِعْمَةْ اللّٰهْ مَلَتْ قَلْبِي بِالْفَرَحْ، اللّٰهْ رَفَعْ رَاسِي وَ أَنْطَانِي قُدْرَةْ. قِدَّامْ عُدْوَانِي، ضِحِكْت بِحِسّ عَالِي وَ بِنَجَاتَكْ أَنَا فِرِحْت، يَا رَبِّي.

أيُّوب 13:16

وَ دَا بَسْ الْيَقْدَرْ يِنَجِّينِي أَشَانْ الْكَافِرْ مَا يَجِي قِدَّامَهْ.

زَبُور 112:8

قَلْبَهْ قَوِي، هُو مَا يَخَافْ لَحَدِّي هَزِيمَةْ خُصْمَانَهْ تِنْشَافْ.

إشَعْيا 10:24

وَ فِي شَانْ دَا، دَاهُو اللّٰهْ الرَّبّ الْقَادِرْ قَالْ: «يَا شَعَبِي السَّاكْنِينْ فِي مَدِينَةْ صَهْيُون، مَا تَخَافَوْا مِنْ مَلِكْ بَلَدْ أَشُورْ. هُو قَاعِدْ يَضْرُبْكُو بِعَصَاتَهْ وَ يَرْفَعْ عَصَاتَهْ ضِدُّكُو مِثِلْ سَوَّوْه الْمَصْرِيِّينْ زَمَانْ.

إشَعْيا 17:10

أَشَانْ إِنْتُو نِسِيتُوا إِلٰـهْكُو النَّجَّاكُو وَ مَا فَكَّرْتُوا فَوْقَهْ هُو، جَبَلْ مَلْجَئْكُو. وَ فِي شَانْ دَا، مَقَّنْتُوا شَدَرْ لَذِيذْ وَ تَيْرَبْتُوا تَيْرَابْ أَجْنَبِي.

إشَعْيا 27:5

كَنْ يِدَوْرُوا يِسَوُّونِي مَلْجَئْهُمْ، خَلِّي يِسَوُّوا مَعَايِ سَلَامْ أَيْوَى، يِسَوُّوا مَعَايِ سَلَامْ.

إشَعْيا 49:5

وَ هَسَّعْ اللّٰهْ كَلَّمْ، هُو الْكَوَّنَانِي فِي بَطُنْ أَمِّي لِنَبْقَى عَبْدَهْ وَ لِنِقَبِّلْ عَلَيَّهْ ذُرِّيَّةْ يَعْقُوبْ، أَيْوَى، نِلِمّ قِدَّامَهْ بَنِي إِسْرَائِيلْ. وَ نَلْقَى شَرَفْ قِدَّامْ اللّٰهْ أَشَانْ إِلٰـهِي هُو قُدُرْتِي.

إشَعْيا 50:10

يَاتُو مِنْكُو يَخَافْ مِنْ اللّٰهْ وَ يَسْمَعْ كَلَامْ عَبْدَهْ؟ أَيِّ نَادُمْ الْيَمْشِي فِي الضَّلَامْ بَلَا ضَيّ، خَلِّي يِتْوَكَّلْ عَلَيْ اللّٰهْ وَ يِنْتَكِلْ عَلَيْ إِلٰـهَهْ.

إشَعْيا 61:10

أَيْوَى، أَنَا نَفْرَحْ زِيَادَةْ بِاللّٰهْ وَ نَفْسِي تَفْرَحْ بِإِلٰـهِي. أَشَانْ هُو لَبَّسَانِي خُلْقَانْ النَّجَاةْ وَ كَسَانِي بِجَلَّابِيَّةْ الْعَدَالَةْ. هُو جَمَّلَانِي بِكَدْمُولْ مِثِلْ عَرِيسْ أَيْوَى، مِثِلْ كَدْمُولْ رَاجِلْ الدِّينْ وَ مِثِلْ الْعَرُوسْ الْمُجَمَّلَةْ بِزِينِتْهَا.

إشَعْيا 65:18

لَاكِنْ أَفْرَحَوْا وَ أَنْبَسْطُوا إِلَى الْأَبَدْ فِي شَانْ الشَّيّءْ النَّخَلْقَهْ. دَاهُو نَخْلِقْ مَدِينَةْ الْقُدُسْ وَ تِنْمَلِي بِفَرَحْ وَ شَعَبْهَا يِنْبَسْطُوا.

دَنْيال 3:28

وَ نَبُوخَدْنَصَرْ قَالْ: «بَارَكْ اللّٰهْ إِلٰـهْ شَدْرَاكْ وَ مِشَاكْ وَ عَبْد الْنَغُو الرَّسَّلْ مَلَكَهْ أَشَانْ يِنَجِّي عَبِيدَهْ الْهُمَّنْ أَتْوَكَّلَوْا عَلَيَّهْ. وَ خَالَفَوْا أَمْرِي أَنَا الْمَلِكْ وَ قَصَّدَوْا بِالْمَوْت كُلَ أَخَيْر لَيْهُمْ مِنْ يَعَبُدُوا وَ يَسْجُدُوا لِإِلٰـهْ آخَرْ الْمَا إِلٰـهُّمْ.

يُوِيل 2:23

يَا نَاسْ صَهْيُون، أَفْرَحَوْا وَ أَنْبَسْطُوا بِاللّٰهْ إِلٰـهْكُو. أَشَانْ يِنَزِّلْ مَطَرْ أَوَّلْ الْخَرِيفْ الْوَاجِبْ لَيْكُو وَ يِنَزِّلْ لَيْكُو مَطَرْ الرِّشَاشْ وَ مَطَرْ الْخَرِيفْ مِثِلْ زَمَانْ.

حَبَقُوق 3:18

بَيْدَا كُلَ، أَنَا نِنْبَسِطْ بِاللّٰهْ وَ نَفْرَحْ بِإِلٰـهِي الْيِنَجِّينِي.

2 صَمُوِيل 7:24

وَ إِنْتَ ثَبَّتّْ شَعَبَكْ بَنِي إِسْرَائِيلْ لِيَبْقَوْا دَايْماً شَعَبَكْ حَلَالَكْ. يَا اللّٰهْ، إِنْتَ بِقِيتْ لَيْهُمْ إِلٰـهُّمْ.

زَبُور 65:6

إِنْتَ كَوَّنْت الْجِبَالْ بِقُوَّتَكْ وَ أَلْحَزَّمْت بِالْقُدْرَةْ.

زَبُور 68:20

إِلٰـهْنَا هُو الْإِلٰـهْ الْيِنَجِّينَا، اللّٰهْ الرَّبّ بَسْ يَحْفَضْنَا مِنْ الْمَوْت.

زَبُور 68:21

لَاكِنْ الرَّبّ يَكْسِرْ رُوسَيْ عُدْوَانَهْ وَ رُوسَيْ الْعِنْدُهُمْ صُوفْ الْعَايْشِينْ فِي خَطَاهُمْ.

زَبُور 118:21

يَا اللّٰهْ، أَنَا نَشْكُرَكْ أَشَانْ إِنْتَ رَدَّيْت لَيِّ وَ أَنْطَيْتنِي النَّجَاةْ.

إشَعْيا 33:22

أَشَانْ اللّٰهْ هُو قَاضِينَا وَ هُو الْحَاكِمْ فَوْقنَا. وَ هُو مَلِكْنَا وَ هُو الْيِنَجِّينَا.

إشَعْيا 38:20

اللّٰهْ نَجَّانِي. وَ أَنِحْنَ نَضُرْبُوا آلَاتْنَا هَنَا الْمُسِيقَى فِي كُلَّ مُدَّةْ حَيَاتْنَا فِي بَيْت اللّٰهْ.»

إشَعْيا 51:12

وَ اللّٰهْ قَالْ: «أَنَا! أَنَا بَسْ النِّصَبِّرْكُو. مَالَا إِنْتُو تَخَافَوْا مِنْ الْإِنْسَانْ الْيُمُوتْ؟ مَالَا تَخَافَوْا مِنْ بَنِي آدَم الْيَيْبَسْ مِثِلْ الْقَشّ؟