إشَعْيا 10:22 - الكتاب المقدس بالعربي الدارجي هنا تشاد

²² يَا بَنِي إِسْرَائِيلْ، كَنْ شَعَبْكُو بِقَوْا كَتِيرِينْ مِثِلْ رَمْلَةْ هَنَا خَشُمْ الْبَحَرْ كُلَ، الْيِقَبُّلُوا مِنْكُو شِيَّةْ بَسْ. قَرَارْ الدَّمَارْ مَرَقْ وَ هُو قَرَارْ مَلَانْ بِالْعَدَالَةْ.

إشَعْيا 10:22 Referenca të Kryqëzuara

إشَعْيا 6:13

وَ حَتَّى كَنْ فَضَّلَوْا عُشُرْ مِنْ السُّكَّانْ كُلَ، بَتَّانْ يَحْرَقَوْا بِنَارْ. وَ هُمَّنْ يَبْقَوْا مِثِلْ شَدَرْ الْبُطُمْ أَوْ الْبَلُّوطْ الْقَطَعَوْه. يِفَضِّلْ إِلَّا دُنْبُرَهْ لَاكِنْ دُنْبُرَهْ يِجِيبْ ذُرِّيَّةْ مُقَدَّسَةْ.»

رُؤية 20:8

وَ يَمْرُقْ مِنَّهْ أَشَانْ يَمْشِي لَحَدِّي آخِرْ الْأَرْض وَ يُغُشّ كُلَّ الْأُمَمْ وَ هُمَّنْ يَبْقَوْا مِثِلْ جُوجْ وَ مَاجُوجْ. وَ الشَّيْطَانْ يِلِمُّوهُمْ وَ يُخُطُّهُمْ جَاهِزِينْ لِلدُّوَاسْ. وَ عَدَدْهُمْ يَبْقَى كَتِيرْ مِثِلْ رَمْلَةْ هَنَا خَشُمْ الْبَحَرْ.

دَنْيال 9:27

وَ الْمَلِكْ دَا يَجْبُرْ نَاسْ كَتِيرِينْ لِيِسَوُّوا مَعَايَهْ مُعَاهَدَةْ لِمُدَّةْ 7 سَنَةْ. وَ بَعَدْ نُصّ الْمُدَّةْ دِي، الضَّحَايَا وَ الْهَدَايَا الْيِقَدُّمُوهُمْ دَايْماً، هُو يَمْنَعْهُمْ. وَ عَجَلَةْ بَسْ، الْمُخَرِّبْ دَا يِسَوِّي الْحَرَامْ الْيِجِيبْ الْخَرَابْ. وَ فِي الأَخِيرْ، هُو ذَاتَهْ يِدَّمَّرْ مِثِلْ مُقَرَّرْ.»

رَوْمَا 2:5

لَاكِنْ رَاسَكْ قَوِي وَ فِي قَلْبَكْ مَا تِدَوْر تُتُوبْ. وَ بَيْدَا، إِنْتَ قَاعِدْ تِزِيدْ الْعِقَابْ الْيَجِي فَوْقَكْ فِي يَوْم غَضَبْ اللّٰهْ. وَ دَا الْيَوْم الْاللّٰهْ يِحَاسِبْ فَوْقَهْ النَّاسْ بِالْحَقّ.

أعمال الرُسُل 17:31

وَ اللّٰهْ قَطَعْ لَيْنَا يَوْم أَشَانْ يِحَاسِبْ فَوْقَهْ كُلَّ نَاسْ الدُّنْيَا بِالْعَدَالَةْ. وَ اللّٰهْ كَلَّفْ الْحِسَابْ دَا لِلرَّاجِلْ الْهُو عَزَلَهْ. وَ الرَّاجِلْ دَا، اللّٰهْ بَعَثَهْ مِنْ أُسْط الْمَيْتِينْ أَشَانْ كُلَّ النَّاسْ يَعَرْفُوا دَا بَسْ الرَّاجِلْ الْهُو عَزَلَهْ.»

إشَعْيا 8:8

وَ يَاكُلْ بَلَدْ يَهُوذَا وَ يِسِيلْ وَ يِنَيِّلْ وَ يَلْحَقْ لَحَدِّي الرَّقَبَةْ. وَ رُجُولَهْ يَمْلَوْا عُرْض بَلَدَكْ، يَا عِمَّانُوِيل.»

إشَعْيا 6:11

وَ أَنَا قُلْت: «دَا لِمَتَى، يَا رَبِّي؟» وَ هُو قَالْ: «لَحَدِّي كُلَّ الْمُدُنْ يِدَّمَّرَوْا وَ يَبْقَوْا فَاضِيِينْ مِنْ سُكَّانْهُمْ وَ الْبُيُوتْ يَبْقَوْا بَلَا نَاسْ وَ الْأَرْض تِدَّمَّرْ وَ تَخْرَبْ.

1 مُلوك 4:20

وَ بَنِي يَهُوذَا وَ بَنِي إِسْرَائِيلْ هُمَّنْ كَتِيرِينْ مِثِلْ رَمْلَةْ هَنَا خَشُمْ الْبَحَرْ. وَ هُمَّنْ عِنْدُهُمْ أَكِلْ وَ شَرَابْ وَ عَايْشِينْ فِي رَاحَةْ.

تكوين 18:25

أَبَداً مَا تَقْدَرْ تِسَوِّيهْ، يَا رَبّ! إِنْتَ مَا تِدَمِّرْ الْعَدِيلِينْ مَعَ الْفَسْلِينْ! أَشَانْ النَّاسْ الْعَدِيلِينْ مَا مِثِلْ النَّاسْ الْفَسْلِينْ! هَلْ الْحَاكِمْ هَنَا كُلَّ الْأَرْض مَا يِسَوِّي الْعَدَالَةْ وَلَّا؟»

هُوشَع 1:10

عَدَدْ بَنِي إِسْرَائِيلْ يَبْقَى مِثِلْ رَمْلَةْ هَنَا خَشُمْ الْبَحَرْ الْمَا تِنْوَزِنْ وَ لَا تِنْحَسِبْ. وَ فِي الْبَكَانْ الْأَوَّلْ اللّٰهْ قَالْ فَوْقَهْ: «إِنْتُو مَا شَعَبِي»، فِي نَفْس الْبَكَانْ، هُو يُقُولْ لَيْهُمْ: «إِنْتُو عِيَالِي أَنَا اللّٰهْ الْحَيّ.»

إشَعْيا 46:3

«أَسْمَعَوْنِي، يَا ذُرِّيَّةْ يَعْقُوبْ وَ كُلُّكُو الْفَضَّلْتُوا مِنْ بَنِي إِسْرَائِيلْ! أَنَا شِلْت مَسْؤُولِيِّتْكُو مِنْ إِنْتُو فِي بُطُونْ أَمَّهَاتْكُو. مِنْ وِلْدَوْكُو، أَنَا شِلْتُكُو.

إشَعْيا 48:19

وَ ذُرِّيِّتْكُو تَبْقَى كَتِيرَةْ مِثِلْ الرَّمْلَةْ وَ عِيَالْكُو مِثِلْ تُرَابْ الْأَرْض. وَ أُسُمْهُمْ وَ لَا يِنْقَطِعْ وَ لَا يِوَدِّرْ مِنْ قِدَّامِي.

إشَعْيا 60:22

الصَّغَيَّرْ مِنْهُمْ، ذُرِّيّتَهْ تَبْقَى أَلِفْ وَ الضَّعِيفْ مِنْهُمْ يَبْقَى أُمَّةْ قَوِيَّةْ! أَيْوَى! أَنَا اللّٰهْ نِجِيبْ الشَّيّءْ دَا عَجَلَةْ فِي وَكْتَهْ.»

إشَعْيا 65:8

دَاهُو اللّٰهْ قَالْ: «وَ دَا مِثِلْ لِقَوْا عَنْقُودْ الْفَوْقَهْ عِنَبْ كَتِيرْ تَلْفَانْ وَ يُقُولُوا: ‹مَا تَزْقُلُوهْ كُلَّ كَيْ أَشَانْ وَاحِدِينْ عِنْدُهُمْ بَرَكَةْ.› مِثِلْ دَا بَسْ، أَنَا نِسَوِّي مَعَ عَبِيدِي، مَا نِدَمِّرْهُمْ كُلُّهُمْ.

2 مُلوك 19:31

أَشَانْ مِنْ مَدِينَةْ الْقُدُسْ يَمُرْقُوا النَّاسْ الْفَضَّلَوْا أَيْوَى، مِنْ جَبَلْ صَهْيُون يَمُرْقُوا هُمَّنْ النِّجَوْا. وَ دَا، اللّٰهْ الْقَادِرْ يِسَوِّيهْ حَسَبْ مَحَبِّتَهْ الشَّدِيدَةْ.»

إشَعْيا 37:31

وَ النِّجَوْا مِنْ بَنِي يَهُوذَا وَ فَضَّلَوْا يَبْقَوْا مِثِلْ شَدَرَةْ التِّدِسّ عُرُوقْهَا مِنْ جَدِيدْ فِي الْأَرْض وَ فُرُوعْهَا يِنْمَلُوا بِفَوَاكِهْ.

إشَعْيا 59:20

«خَلَاصْ، الْيَفْدَاهُمْ يَجِي لِصَهْيُون، لِذُرِّيَّةْ يَعْقُوبْ الْيِقَبُّلُوا مِنْ عِصْيَانْهُمْ.» وَ دَا كَلَامْ اللّٰهْ.

إرْمِيا 3:14

وَ دَاهُو كَلَامْ اللّٰهْ: «قَبُّلُوا تَعَالُوا لَيِّ، يَا عِيَالْ الْكُفَّارْ، أَشَانْ أَنَا بَسْ سِيدْكُو. نِشِيلْكُو وَاحِدْ مِنْ أَيِّ مَدِينَةْ وَ إِتْنَيْن مِنْ أَيِّ قَبِيلَةْ وَ نِقَبِّلْكُو فِي صَهْيُون.

إرْمِيا 44:28

وَ نَاسْ شِيَّةْ بَسْ يِعَرُّدُوا مِنْ مَصِرْ فِي شَانْ الْحَرِبْ وَ يَمْشُوا لِبَلَدْ يَهُوذَا. وَ لَاكِنْ كُلَّ الْفَضَّلَوْا مِنْ بَنِي يَهُوذَا الْجَوْا فِي مَصِرْ لِيَسْكُنُوا فَوْقهَا يِشِيفُوا وَ يَعَرْفُوا الْكَلَامْ الْيِلْحَقَّقْ، دَا هَنَايِ أَنَا وَلَّا هَنَاهُمْ هُمَّنْ.›