هُوشَع 4:1 - الكتاب المقدس بالعربي الدارجي هنا تشاد

¹ يَا بَنِي إِسْرَائِيلْ، أَسْمَعَوْا كَلَامْ اللّٰهْ! هُو قَالْ: «أَنَا اللّٰهْ نَشْكِي سُكَّانْ الْبَلَدْ دِي أَشَانْ مَا فِي أَمَانْ وَ مَا فِي رَحْمَةْ وَ مَا فِي مَعْرَفَةْ اللّٰهْ فِي الْبَلَدْ.

هُوشَع 4:1 Referenca të Kryqëzuara

إرْمِيا 4:22

وَ اللّٰهْ قَالْ: «أَيْوَى، شَعَبِي مُنَافِقِينْ، هُمَّنْ مَا يَعَرْفُونِي. هُمَّنْ مِثِلْ عِيَالْ فِكِرْهُمْ مَحْدُودْ، مَا يَقْدَرَوْا يَفْهَمَوْا شَيّءْ. هُمَّنْ نَشِيطِينْ لِسَوِّيِّنْ الْفَسِلْ لَاكِنْ لِسَوِّيِّنْ الْخَيْر، مَا يَعَرْفُوهْ.»

مِيخا 6:2

يَا الْجِبَالْ! أَسْمَعَوْا شَكْوَةْ اللّٰهْ! إِنْتُو يَا أَسَاسْ الْأَرْض الْقَوِي، خُطُّوا بَالْكُو! اللّٰهْ يِجِيبْ شَعَبَهْ فِي الشَّرِيعَةْ وَ يُلُومْ بَنِي إِسْرَائِيلْ.»

1 كُرُنْتُس 15:34

قَبُّلُوا فِي الدَّرِبْ الْعَدِيلْ التَّعَرْفُوهْ وَ خَلُّوا مِنْكُو الذُّنُوبْ. قُلْت الْكَلَامْ دَا أَشَانْ نَاسْ وَاحِدِينْ مِنْكُو مَا يَعَرْفُوا اللّٰهْ. وَ دَا عَيْب لَيْكُو.

رَوْمَا 1:28

النَّاسْ أَبَوْا مَا يَعَرْفُوا اللّٰهْ وَ أَشَانْ دَا، اللّٰهْ سَلَّمَاهُمْ لِعُقُولْهُمْ الْفَاسْدِينْ وَ قَمَّوْا يِسَوُّوا الشَّيّءْ الْمَا وَاجِبْ يِسَوُّوهْ.

هُوشَع 12:2

اللّٰهْ يِجِيبْ بَنِي يَهُوذَا فِي الشَّرِيعَةْ أَشَانْ يِعَاقِبْ ذُرِّيَّةْ يَعْقُوبْ حَسَبْ دَرِبْهُمْ وَ يِكَافِيهُمْ حَسَبْ عَمَلْهُمْ.

إرْمِيا 25:31

وَ حِسَّهْ دَا، يِنْسَمِعْ لَحَدِّي فِي آخِرْ الْأَرْض أَشَانْ اللّٰهْ يِجِيبْ الْأُمَمْ فِي الشَّرِيعَةْ. يِشَارِعْ كُلَّ النَّاسْ وَ يِسَلِّمْ الْعَاصِيِينْ لِلْحَرِبْ.›» وَ دَا كَلَامْ اللّٰهْ.

إرْمِيا 5:4

وَ أَنَا قُلْت: «هُمَّنْ مَسَاكِينْ وَ مَا عِنْدُهُمْ رَاسْ. وَ مَا يَعَرْفُوا دَرِبْ اللّٰهْ وَ لَا شَرِيعَةْ إِلٰـهُّمْ.

إشَعْيا 34:1

قَرُّبُوا، يَا أُمَمْ وَ أَسْمَعَوْا! يَا شَعَبْ، خُطُّوا أَدَانْكُو! الْأَرْض وَ كُلَّ شَيّءْ الْفَوْقهَا، أَيْوَى، الدُّنْيَا وَ كُلَّ شَيّءْ الْفِيهَا، أَسْمَعَوْا.

إشَعْيا 1:18

اللّٰهْ قَالْ: «تَعَالُوا نِنَاقُشُوا. كَنْ ذُنُوبْكُو حُمُرْ كُلَ، يَبْقَوْا بُيُضْ كَرّ مِثِلْ اللَّبَنْ. وَ كَنْ حُمُرْ تُشْو مِثِلْ الدَّمّ كُلَ، يَبْقَوْا بُيُضْ كَرّ مِثِلْ الْقُطُنْ.

رُؤية 2:29

أَيِّ نَادُمْ الْعِنْدَهْ أَدَانْ، خَلِّي يَسْمَعْ الْكَلَامْ الْيُقُولَهْ الرُّوحْ الْقُدُّوسْ لِجَمَاعَاتْ الْمُؤمِنِينْ.

رُؤية 2:11

أَيِّ نَادُمْ الْعِنْدَهْ أَدَانْ، خَلِّي يَسْمَعْ الْكَلَامْ الْيُقُولَهْ الرُّوحْ الْقُدُّوسْ لِجَمَاعَاتْ الْمُؤمِنِينْ. وَ أَيِّ نَادُمْ الْيِنَّصِرْ، مَا يَخَافْ مِنْ الْمَوْت التَّانِي.

يُوحَنَّا 8:55

وَ لَاكِنْ إِنْتُو أَبَداً مَا عِرِفْتُوهْ. أَنَا نَعَرْفَهْ. كَنْ نُقُولْ أَنَا مَا نَعَرْفَهْ، أَنَا نَبْقَى كَدَّابْ مِثِلْكُو. وَ لَاكِنْ أَنَا نَعَرْفَهْ وَ نِتَابِعْ كَلَامَهْ.

عَمُوس 7:16

وَ هَسَّعْ دَا، يَا أَمَصْيَا، أَسْمَعْ كَلَامْ اللّٰهْ. إِنْتَ قُلْت لَيِّ أَنَا مَا نِتْنَبَّأْ فِي بَنِي إِسْرَائِيلْ وَ لَا نِحَجِّي لِذُرِّيَّةْ إِسْحَاقْ.

هُوشَع 5:1

«يَا رُجَالْ الدِّينْ، أَسْمَعَوْا الْكَلَامْ دَا! يَا بَنِي إِسْرَائِيلْ، خُطُّوا بَالْكُو! يَا نَاسْ بَيْت الْمَلِكْ، خُطُّوا أَدَانْكُو! الشَّرِيعَةْ دِي مُوَجِّهَةْ لَيْكُو إِنْتُو أَشَانْ فِي مِصْفَةْ، كَجَّيْتُوا شَرَكْ لِشَعَبِي وَ فِي جَبَلْ تَابُورْ، خَطَّيْتُوا لَيْهُمْ أَمْ كَجَّامَةْ.

إرْمِيا 34:4

يَا صِدْقِيَّا مَلِكْ يَهُوذَا، كَنْ تَسْمَعْ كَلَامِي أَنَا اللّٰهْ الْقُلْتَهْ لَيْك، إِنْتَ أَبَداً مَا تُمُوتْ فِي الْحَرِبْ.

إرْمِيا 19:3

«وَ قُولْ: ‹يَا مُلُوكْ بَلَدْ يَهُوذَا وَ يَا سُكَّانْ مَدِينَةْ الْقُدُسْ، أَسْمَعَوْا كَلَامْ اللّٰهْ. دَاهُو اللّٰهْ الْقَادِرْ إِلٰـهْ بَنِي إِسْرَائِيلْ قَالْ: ”أَنَا نِجِيبْ فِي الْبَكَانْ دَا فَسَالَةْ وَ أَيِّ نَادُمْ الْيَسْمَعْ بَيْهَا يِنْبَهِتْ.

إرْمِيا 9:20

يَا الْعَوِينْ النَّوَّاحَاتْ، أَسْمَعَنْ كَلَامْ اللّٰهْ وَ دِسَّنْ فِي قَلِبْكَنْ الْكَلَامْ الْمَرَقْ مِنَّهْ. وَ عَلِّمَنْ الْبَكِي لِبَنَاتْكَنْ وَ النُّوَاحْ لِرَفِيقَاتْكَنْ.

إرْمِيا 7:28

وَ خَلَاصْ قُولْ لَيْهُمْ: ‹إِنْتُو بَسْ الْأُمَّةْ الْمَا تَسْمَعْ كَلَامْ اللّٰهْ إِلٰـهَّا وَ مَا تَقْبَلْ وَصِيّتَهْ. وَ الصَّحِيحْ أَنْقَشَّ مِنْ لِسَانْكُو وَ بِقِي مَا فِيهْ.›»

إرْمِيا 6:13

مِنْ الضَّعِيفْ لَحَدِّي الْقَادِرْ، كُلُّهُمْ جَارِيِينْ وَرَاءْ مَالْ الْحَرَامْ. وَ الْأَنْبِيَاء وَ رُجَالْ الدِّينْ كُلُّهُمْ غَشَّاشِينْ.

إرْمِيا 4:28

وَ بِسَبَبْ دَا، الْأَرْض تَيْبَسْ وَ السَّمَاءْ فَوْق تِضَلِّمْ. أَشَانْ الْخَرَابْ دَا، أَنَا بَسْ قَرَّرْتَهْ، مَا نِخَلِّيهْ وَ مَا نِقَبِّلْ مِنَّهْ.»

إرْمِيا 2:4

وَ أَنَا إِرْمِيَا قُلْت: «إِنْتُو ذُرِّيَّةْ يَعْقُوبْ مَعَ كُلَّ عَايِلَةْ بَنِي إِسْرَائِيلْ، أَسْمَعَوْا كَلَامْ اللّٰهْ.

إشَعْيا 66:5

أَسْمَعَوْا كَلَامْ اللّٰهْ، إِنْتُو التَّرْجُفُوا مِنْ كَلَامَهْ: «أَخْوَانْكُو يَكْرَهَوْكُو وَ يِبَعُّدُوكُو فِي شَانْ أُسْمِي أَنَا اللّٰهْ. وَ يِشَّمَّتَوْا فَوْقكُو وَ يُقُولُوا: ‹خَلِّي اللّٰهْ يِوَصِّفْ مَجْدَهْ وَ نِشِيفُوا فَرَحْكُو!› وَ لَاكِنْ هُمَّنْ بَسْ يَلْقَوْا الْعَيْب.»

إشَعْيا 34:8

وَ دَا يَوْم تَارْ اللّٰهْ وَ دِي سَنِةْ حِسَابْ فِي شَانْ صَهْيُون.

إشَعْيا 28:14

وَ فِي شَانْ دَا، أَسْمَعَوْا كَلَامْ اللّٰهْ، يَا الشَّمَّاتِينْ، إِنْتُو الْقَاعِدِينْ تَحْكُمُوا فِي الشَّعَبْ دَا فِي مَدِينَةْ الْقُدُسْ.

إشَعْيا 5:3

خَلَاصْ، قَالْ: «هَسَّعْ دَا، يَا سُكَّانْ مَدِينَةْ الْقُدُسْ! وَ يَا نَاسْ يَهُوذَا! أَحْكُمُوا بَيْنِي أَنَا وَ بَيْن جِنَيْنِتِي هَنَا الْعِنَبْ.

إشَعْيا 1:10

يَا بَنِي يَهُوذَا، قُيَّادْكُو فَسْلِينْ مِثِلْ قُيَّادْ سَدُومْ. أَسْمَعَوْا كَلَامْ اللّٰهْ الْيُقُولَهْ لَيْكُو! يَا بَنِي يَهُوذَا، شَعَبْكُو فَسْلِينْ مِثِلْ نَاسْ عَمُورَةْ. خُطُّوا أَدَانْكُو لِوَصَايَا إِلٰـهْنَا!

1 مُلوك 22:19

وَ خَلَاصْ، مِيكَا قَالْ لَيَّهْ: «هَسَّعْ دَا، أَسْمَعْ كَلَامْ اللّٰهْ! أَنَا شِفْت اللّٰهْ قَاعِدْ فِي عَرْشَهْ وَ كُلَّ قُوَّاتْ السَّمَاءْ وَاقْفِينْ جَنْبَهْ بِنُصَّهْ الزَّيْنَايْ وَ الْإِسْرَايْ.

إشَعْيا 59:4

مَا فِي نَادُمْ يَشْكِي بِعَدَالَةْ وَ مَا فِي نَادُمْ الْيَحْكِمْ بِالْحَقّ. لَاكِنْ يِتْوَكَّلَوْا عَلَيْ الْفَاضِي وَ يِحَجُّوا بِكِدِبْ وَ يَحْمَلَوْا بِالْفَسَالَةْ وَ يَلْدَوْا الشَّرّ.

إشَعْيا 59:8

وَ مَا يَعَرْفُوا دَرِبْ السَّلَامْ وَ عَمَلْهُمْ مَا عَدِيلْ. دُرُوبْهُمْ السَّوَّوْهُمْ عُوُجْ وَ أَيِّ نَادُمْ الْيَمْشِي فَوْقهُمْ مَا يَعَرِفْ السَّلَامْ.

إرْمِيا 9:3

وَ دَاهُو كَلَامْ اللّٰهْ: «لِسَانْهُمْ طَرِينْ مِثِلْ النُّشَّابْ وَ يُغُشُّوا وَ قُدْرِتْهُمْ فِي الْبَلَدْ دِي، مَا لِقَوْهَا بِصَحِيحْ. لَاكِنْ هُمَّنْ مَاشِينْ مِنْ فَسِلْ لِأَفْسَلْ وَ مَا يَعَرْفُونِي.

إرْمِيا 51:5

أَشَانْ اللّٰهْ الْإِلٰـهْ الْقَادِرْ كَانْ مَعَ بَنِي إِسْرَائِيلْ وَ بَنِي يَهُوذَا حَتَّى كَنْ هُمَّنْ مَلَوْا بَلَدْهُمْ بِشَرّ ضِدّ قُدُّوسْ إِسْرَائِيلْ كُلَ.

يُوِيل 1:2

أَسْمَعَوْا، يَا الشُّيُوخْ، خُطُّوا أَدَانْكُو كُلُّكُو، يَا سُكَّانْ الْبَلَدْ! شَيّءْ مِثِلْ دَا أَوَّلْ كَانْ فِي زَمَنْكُو وَلَّا؟ أَوْ كَانْ فِي وَكِتْ أَبَّهَاتْكُو؟

زَبُور 81:9

خَلِّي مَا يِنْلَقِي فِي بَكَانْكُو إِلٰـهْ أَجْنَبِي وَ مَا تَسْجُدُوا قِدَّامْ إِلٰـهْ آخَرْ.

إرْمِيا 2:9

وَ فِي شَانْ دَا، دَايْماً أَنَا نَشْكِيكُو فِي الشَّرِيعَةْ وَ نَشْكِي بَتَّانْ عِيَالْكُو وَ عِيَالْ عِيَالْكُو. وَ دَا كَلَامْ اللّٰهْ.

إرْمِيا 9:7

وَ فِي شَانْ دَا، دَاهُو اللّٰهْ الْقَادِرْ قَالْ: «أَنَا نَكْشِفْهُمْ مِثِلْ الدَّهَبْ وَ نَقْطَعْهُمْ وَ دَا الشَّيّءْ النِّسَوِّيهْ لِأُمَّتِي الْمِثِلْ بِنْت أَمِّي.

إرْمِيا 11:7

أَنَا اللّٰهْ حَذَّرْت جُدُودْكُو دَايْماً وَ دَا مِنْ يَوْم مَرَقْتُهُمْ مِنْ بَلَدْ مَصِرْ لَحَدِّي الْيَوْم. وَ قُلْت لَيْهُمْ: ”أَسْمَعَوْا كَلَامِي!“

حِزْقِيال 16:35

وَ فِي شَانْ دَا، أَسْمَعَيْ كَلَامْ اللّٰهْ، يَا الشَّرْمُوطَةْ!

هُوشَع 5:4

وَ عَمَلْهُمْ الْهَوَانْ مَا يِخَلِّيهُمْ يِقَبُّلُوا لِإِلٰـهُّمْ أَشَانْ رُوحْ الشَّرْمَطَةْ قَاعِدَةْ فِي قُلُوبْهُمْ وَ هُمَّنْ مَا يَعَرْفُوا اللّٰهْ.

هُوشَع 12:3

حَتَّى فِي بَطُنْ أَمَّهْ كُلَ، يَعْقُوبْ غَشَّ شِقْ تَوْمَهْ. وَ وَكِتْ بِقِي رَاجِلْ، هُو صَارَعْ مَعَ الرَّبّ.

عَمُوس 3:1

يَا بَنِي إِسْرَائِيلْ، أَسْمَعَوْا كَلَامْ اللّٰهْ الْقَالَهْ ضِدُّكُو، ضِدُّكُو إِنْتُو الْقَبَايِلْ الْمَرَقَاكُو مِنْ بَلَدْ مَصِرْ: