هُوشَع 3:4 - الكتاب المقدس بالعربي الدارجي هنا تشاد

⁴ وَ مِثِلْ دَا، بَنِي إِسْرَائِيلْ يَقْعُدُوا مُدَّةْ طَوِيلَةْ بَلَا مَلِكْ وَ بَلَا كَبِيرْ وَ بَلَا ضَحِيَّةْ وَ بَلَا حُجَارْ الْغَزَّوْهُمْ لِلْعِبَادَةْ وَ بَلَا فَرْمَلَةْ هَنَا رَاجِلْ الدِّينْ وَ بَلَا أَصْنَامْ.

هُوشَع 3:4 Referenca të Kryqëzuara

قُضياء 17:5

وَ مِيكَا عِنْدَهْ بَيْت هَنَا إِلٰـهَهْ. هُو صَنَعْ فَرْمَلَةْ هَنَا رَاجِلْ الدِّينْ وَ تَمَاثِيلْ وَ دَرَّجْ وَاحِدْ مِنْ أَوْلَادَهْ لِيَبْقَى لَيَّهْ رَاجِلْ دِينْ.

2 أخبار 15:2

وَ مَشَى بَكَانْ آسَا وَ قَالْ لَيَّهْ: «أَسْمَعَوْنِي، يَا آسَا وَ نَاسْ قَبَايِلْ يَهُوذَا وَ بَنْيَامِينْ. اللّٰهْ مَعَاكُو كَنْ إِنْتُو مَعَايَهْ. وَ كَنْ إِنْتُو تِفَتُّشُوهْ، هُو يِخَلِّيكُو تَلْقَوْه. وَ لَاكِنْ كَنْ إِنْتُو تَابَوْه، هُو كُلَ يَابَاكُو.

تكوين 31:19

وَ فِي الْوَكِتْ دَاكْ، لَابَانْ مَا فِيهْ، مَشَى يَقْطَعْ صُوفْ غَنَمَهْ. وَ وَكِتْ هُمَّنْ مَاشِينْ، رَاحِيلْ سِرْقَتْ أَصْنَامْ أَبُوهَا.

عِبْرَانِيِّين 10:26

كَنْ عِرِفْنَا كَلَامْ الْحَقّ وَ بَعَدَيْن نُقُمُّوا نِتَابُعُوا الذُّنُوبْ، مَا يِفَضِّلْ لَيْنَا ضَحِيَّةْ بَتَّانْ التَّمْحَا الذُّنُوبْ.

دَنْيال 12:11

وَ مِنْ وَكِتْ مَنَعَوْا الضَّحِيَّةْ الْيِقَدُّمُوهَا كُلَّ يَوْم وَ قَمَّوْا سَوَّوْا الْحَرَامْ الْيِجِيبْ الْخَرَابْ، عِنْدُهُمْ 1 290 يَوْم.

دَنْيال 9:27

وَ الْمَلِكْ دَا يَجْبُرْ نَاسْ كَتِيرِينْ لِيِسَوُّوا مَعَايَهْ مُعَاهَدَةْ لِمُدَّةْ 7 سَنَةْ. وَ بَعَدْ نُصّ الْمُدَّةْ دِي، الضَّحَايَا وَ الْهَدَايَا الْيِقَدُّمُوهُمْ دَايْماً، هُو يَمْنَعْهُمْ. وَ عَجَلَةْ بَسْ، الْمُخَرِّبْ دَا يِسَوِّي الْحَرَامْ الْيِجِيبْ الْخَرَابْ. وَ فِي الأَخِيرْ، هُو ذَاتَهْ يِدَّمَّرْ مِثِلْ مُقَرَّرْ.»

1 صَمُوِيل 23:9

وَ دَاوُدْ سِمِعْ كَدَرْ شَاوُولْ خَطَّطْ الْفَسَالَةْ ضِدَّهْ وَ قَالْ لِرَاجِلْ الدِّينْ أَبِيَاتَرْ: «جِيبْ الصِّدَيْرِيَّةْ أَشَانْ نَسْأَلَوْا اللّٰهْ.»

قُضياء 8:27

وَ قِدْعُونْ شَالْ الدَّهَبْ دَا وَ دَقَّهْ فَرْمَلَةْ وَ خَطَّاهْ فِي حِلِّتَهْ عُفْرَةْ. وَ كُلَّ بَنِي إِسْرَائِيلْ يَجُوا يَعَبُدُوا الْفَرْمَلَةْ دِي وَ دَا بِقِي شَرَكْ لِقِدْعُونْ وَ لِكُلَّ عَايِلْتَهْ.

خُروج 28:4

الْخُلْقَانْ الْيِسَوُّوهُمْ هُمَّنْ الصِّدَيْرِيَّةْ وَ الْفَرْمَلَةْ وَ الْجَلَّابِيَّةْ وَ الْجَوَّانِيَّةْ وَ الْكَدْمُولْ وَ الْحِزَامْ. يِسَوُّوا خُلْقَانْ خَاصِّينْ لِهَارُونْ أَخُوكْ وَ لِعِيَالَهْ لِيَبْقَوْا لَيِّ رُجَالْ دِينْ.

يُوحَنَّا 19:15

وَ عَاطَوْا وَ قَالَوْا: «أَكْتُلَهْ! أَكْتُلَهْ! أَكْتُلَهْ فِي الصَّلِيبْ!» وَ بِلَاطُسْ سَأَلَاهُمْ وَ قَالْ: «تِدَوْرُوا أَنَا نَكْتُلْ مَلِكُّو فِي صَلِيبْ وَلَّا؟» وَ كُبَارَاتْ رُجَالْ الدِّينْ رَدَّوْا لَيَّهْ وَ قَالَوْا: «مَا عِنْدِنَا مَلِكْ إِلَّا سُلْطَانْ الرَّوْمَانِيِّينْ.»

لُوقا 21:24

يُمُوتُوا بِالْسَّيْف وَ يِوَدُّوهُمْ مَسَاجِينْ فِي أُسْط كُلَّ الْأُمَمْ. وَ نَاسْ الْأُمَمْ يَمُلْكُوا مَدِينَةْ الْقُدُسْ وَ يِفَجُّقُوهَا لَحَدِّي وَكِتْهُمْ يِكَمِّلْ.

زَكَرِيَّا 13:2

وَ دَاهُو كَلَامْ اللّٰهْ الْقَادِرْ: «فِي الْيَوْم دَا، أَنَا نُقُشّ مِنْ الْبَلَدْ أَسَامَيْ الْأَصْنَامْ وَ بَتَّانْ مَا يِحَجُّوا بَيْهُمْ أَبَداً. وَ نَطْرُدْ مِنْ الْبَلَدْ الْأَنْبِيَاء الْيِحَجُّوا بِغَشّ وَ رُوحْ الْمُنَجَّسَةْ.

هُوشَع 13:11

فِي زَعَلِي، أَنَا دَرَّجْت لَيْكُو مَلِكْ وَ فِي غَضَبِي، أَنَا نَزَّلْتَهْ.

هُوشَع 2:11

وَ نِوَقِّفْ فَرَحْهَا هَنَا أَيِّ عِيدْ وَ هَنَا أَوَّلْ يَوْم فِي كُلِّ شَهَرْ وَ هَنَا كُلِّ يَوْم سَبْت وَ هَنَا كُلِّ عَازُومَةْ.

دَنْيال 11:31

هُو يِرَسِّلْ عَسْكَرَهْ وَ هُمَّنْ مَا يِحْتَرُمُوا الْبَيْت الْمُقَدَّسْ الْقَوِي. يَمْنَعَوْا الضَّحِيَّةْ الْيِقَدُّمُوهَا كُلَّ يَوْم وَ يِسَوُّوا الْحَرَامْ الْيِجِيبْ الْخَرَابْ.

حِزْقِيال 21:21

أَشَانْ مَلِكْ بَابِلْ قَاعِدْ فِي مَشْبَكْ الدُّرُوبْ الْإِتْنَيْن دَوْل لِيِشَوِّفْ. وَ يِهِزّ النَّشَاشِيبْ وَ يَسْأَلْ الْأَصْنَامْ وَ يَكْشِفْ الْكِبْدَةْ.

حِزْقِيال 20:32

«‹إِنْتُو فَكَّرْتُوا وَ قُلْتُوا: ”أَنِحْنَ نِدَوْرُوا نَبْقَوْا مِثِلْ أُمَمْ وَ قَبَايِلْ هَنَا بُلْدَانْ آخَرِينْ. نِدَوْرُوا نَعَبُدُوا لَيْنَا أَصْنَامْ هَنَا حَطَبْ وَ حَجَرْ مِثِلْهُمْ.“ وَ لَاكِنْ دَا مَا يَبْقَى!

2 مُلوك 23:24

وَ يُوشِيَّا كَتَلْ الْيِكَلُّمُوا مَعَ الْمَيْتِينْ وَ الْجَنَّانِيِّينْ وَ دَمَّرْ الْأَصْنَامْ وَ التَّمَاثِيلْ وَ كُلَّ الْمُحَرَّمَاتْ الْقَاعِدِينْ فِي بَلَدْ يَهُوذَا وَ مَدِينَةْ الْقُدُسْ. وَ دَا أَشَانْ يِحَقِّقْ كَلَامْ التَّوْرَاةْ الْمَكْتُوبْ فِي الْكِتَابْ اللِّقَاهْ حِلْقِيَّا كَبِيرْ رُجَالْ الدِّينْ فِي بَيْت اللّٰهْ.

2 صَمُوِيل 6:14

وَ دَاوُدْ قَاعِدْ يَلْعَبْ بِكُلَّ قُدُرْتَهْ قِدَّامْ اللّٰهْ وَ لَابِسْ خَلَقْ قِصَيِّرْ مِثِلْ رُجَالْ الدِّينْ.

1 صَمُوِيل 30:7

وَ دَاوُدْ قَالْ لِرَاجِلْ الدِّينْ أَبِيَاتَرْ وِلَيْد أَخِيمَلِكْ: «مِنْ فَضْلَكْ، جِيبْ لَيِّ صِدَيْرِيَّةْ الْقَرَارْ.» وَ أَبِيَاتَرْ جَابَهْ لَيَّهْ.

1 صَمُوِيل 23:6

وَ قَبُلْ دَا، وَكِتْ أَبِيَاتَرْ وِلَيْد أَخِيمَلِكْ عَرَّدْ وَ مَشَى لِحِقْ دَاوُدْ فِي حِلَّةْ قَعِيلَةْ، شَالْ صِدَيْرِيَّةْ الْقَرَارْ وَ وَدَّاهَا مَعَايَهْ.

1 صَمُوِيل 22:18

وَ فِي الْبَكَانْ دَا، الْمَلِكْ قَالْ لِدُوَاقْ: «يَلَّا! إِنْتَ بَسْ أَكْتُلْ رُجَالْ الدِّينْ دَوْل!» وَ دُوَاقْ الْأَدَوْمِي قَمَّ كَتَلَاهُمْ. وَ فِي الْيَوْم دَا، كَتَلْ 85 رُجَالْ الدِّينْ كُلُّهُمْ لَابْسِينْ خُلْقَانْ رُجَالْ الدِّينْ.

1 صَمُوِيل 21:9

وَ رَاجِلْ الدِّينْ قَالْ: «إِلَّا السَّيْف هَنَا جَالُوتْ الْفِلِسْطِي الْإِنْتَ كَتَلْتَهْ فِي وَادِي الْبُطُمْ. دَا قَاعِدْ مُلَوْلَوْ بِقِطْعَةْ وَرَاءْ الْفَرْمَلَةْ. شِيلَهْ كَنْ تِدَوْرَهْ أَشَانْ مَا فِي سَيْف آخَرْ هِنِي.» وَ دَاوُدْ قَالْ: «سَيْف مِثِلْ هُو دَا مَا فِيهْ. جِيبَهْ لَيِّ!»

1 صَمُوِيل 14:3

وَ فِيَّهْ رَاجِلْ وَاحِدْ أُسْمَهْ أَخِيَّا وِلَيْد أَخِطُوبْ أَخُو إِكَبُودْ وِلَيْد فِينْحَاسْ وِلَيْد عَالِي الْهُو رَاجِلْ الدِّينْ هَنَا اللّٰهْ فِي حِلَّةْ شِيلَوْه. وَ أَخِيَّا دَا، هُو بَسْ كَبِيرْ رُجَالْ الدِّينْ وَ لَابِسْ الْفَرْمَلَةْ. وَ كُلَّ الْعَسْكَرْ مَا عِرْفَوْا كَدَرْ يُونَتَانْ مَا فِيهْ.

1 صَمُوِيل 2:18

وَ لَاكِنْ فِي الْوَكِتْ دَا، صَمُوِيلْ قَاعِدْ يَخْدِمْ لِلّٰهْ. وَ هُو لِسَّاعْ صَغَيَّرْ وَ لَابِسْ خَلَقْ هَنَا رُجَالْ الدِّينْ.

لاوِيِّين 8:7

وَ لَبَّسْ الْخَلَقْ لِهَارُونْ وَ حَزَّمَهْ بِالْحِزَامْ وَ لَبَّسَهْ الْجَلَّابِيَّةْ وَ الْفَرْمَلَةْ وَ هُو شَالْ حِزَامْ الْفَرْمَلَةْ وَ حَزَّمَهْ بَيَّهْ.

تكوين 49:10

عَصَاةْ الْمُلُكْ تَقْعُدْ فِي عَايِلَةْ يَهُوذَا وَ عَصَاةْ الْحُكُمْ كُلَ مَا تَمْرُقْ مِنْ إِيدَيْهُمْ لَحَدِّي يَجِي النَّادُمْ الْوَاجِبْ لَيَّهْ الْمُلُكْ. وَ كُلَّ الشُّعُوبْ يِكَرُّمُوهْ.

تكوين 31:34

وَ قَبُلْ دَا، رَاحِيلْ شَالَتْ الْأَصْنَامْ وَ خَطَّتْهُمْ تِحِتْ الْبَاصُورْ هَنَا الْجَمَلْ وَ قَعَدَتْ فَوْقَهْ. وَ لَابَانْ فَتَّشْ الْخَيْمَةْ كُلَّهَا كَيْ وَ مَا لِقِي شَيّءْ.

قُضياء 18:14

وَ الرُّجَالْ الْخَمْسَةْ الْمَشَوْا رَاغَوْا حِلَّةْ لَيِشْ قَالَوْا لِأَخْوَانْهُمْ: «هَلْ تَعَرْفُوا كَدَرْ فِي الْبُيُوتْ دَوْل فِي فَرْمَلَةْ هَنَا رَاجِلْ الدِّينْ وَ تَمَاثِيلْ وَ صَنَمْ وَ تِمْثَالْ هَنَا حَدِيدْ وَلَّا؟ وَ هَسَّعْ دَا، فَكُّرُوا فِي الشَّيّءْ الْوَاجِبْ تِسَوُّوهْ.»

1 صَمُوِيل 15:23

الْعِصْيَانْ، هُو خَطَا مِثِلْ الْحِجَيْ بِعِلِمْ الْغَيْب. وَ قُوءْ الرَّاسْ، هُو شَرّ مِثِلْ عِبَادَةْ الْأَصْنَامْ! وَ بِسَبَبْ إِنْتَ أَبَيْت كَلَامْ اللّٰهْ، هُو كُلَ أَبَاكْ وَ مَرَقَاكْ مِنْ الْمُلُكْ!»

مَراثِي إرْمِيا 2:9

وَ بِيبَانْ مَدِينَةْ صَهْيُون أَنْدَفَنَوْا فِي التُّرَابْ وَ هُو دَمَّرَاهُمْ وَ كَسَّرْ حَوَادِرْهُمْ. وَ الْمَلِكْ وَ كُبَارَاتَهْ أَنْكَرَبَوْا فِي إِيدَيْن الْأُمَمْ الْآخَرِينْ. وَ شُرُوطْ التَّوْرَاةْ وَدَّرَوْا وَ الْأَنْبِيَاء كُلَ مَا لِقَوْا رُؤْيَةْ مِنْ اللّٰهْ.

هُوشَع 13:10

وَ هَسَّعْ دَا، وَيْن مَلِكُّو؟ خَلِّي يَفْزَعْكُو فِي كُلَّ حِلَّالْكُو! وَ وَيْن حُكَّامْكُو الْبِسَبَبْهُمْ قُلْتُوا: ‹أَنْطِينَا مَلِكْ وَ مَسَائِيلْ.›

زَكَرِيَّا 10:2

لَاكِنْ كَنْ تَسْأَلَوْا الْأَصْنَامْ، يُرُدُّوا بِالْفَسَالَةْ وَ الشَّوَّافِينْ يِحَجُّوا بِكِدِبْ. حِلِمْهُمْ كُلَ مَا صَحِيحْ وَ يِصَبُّرُوكُو بِغَشّ. وَ فِي شَانْ دَا، الشَّعَبْ عَايْرِينْ مِثِلْ الْغَنَمْ وَ تِعِبَوْا بِسَبَبْ مَا عِنْدُهُمْ رَاعِي.

خُروج 28:6

«‹الْفَرْمَلَةْ يِسَوُّوهَا بِقُمَاشْ هَنَا كَتَّانْ مُخَيَّطْ عَدِيلْ اللَّوْنَهْ ظَهْرِي وَ قَرَضِي وَ أَحْمَرْ وَ مُجَمَّلَةْ بِدَهَبْ. وَ دَا بِخِيَاطَةْ خَيَّاطِي مَعْرُوفْ.

حِزْقِيال 19:14

مَرَقَتْ نَارْ مِنْ دُنْبُرْهَا وَ أَكَلَتْ الْفُرُوعْ وَ الْفَوَاكِهْ. وَ بَتَّانْ مَا فِي فُرُوعْ الْعِنْدُهُمْ قُدْرَةْ لِيَبْقَوْا عِصَيْ لِلْمُلُوكْ.» وَ دَا غِنَيْ يِغَنُّوهْ مِثِلْ نُوَاحْ الْحِزِنْ.

حِزْقِيال 21:31

وَ نِنَزِّلْ غَضَبِي فَوْقكُو وَ نَنْفُخْ فَوْقكُو نَارْ غَضَبِي وَ نِسَلِّمْكُو فِي إِيدْ النَّاسْ الْحَارِّينْ الْيَعَرْفُوا يِسَوُّوا الْخَرَابْ.