تكوين 4:2 - الكتاب المقدس بالعربي الدارجي هنا تشاد

² وَ هِي وِلْدَتْ بَتَّانْ وِلَيْد أُسْمَهْ هَابِيلْ، أَخُوهْ لِقَابِيلْ. وَ هَابِيلْ بِقِي رَاعِي هَنَا غَنَمْ وَ قَابِيلْ بِقِي حَرَّاتِي.

تكوين 4:2 Referenca të Kryqëzuara

1 يُوحَنَّا 3:15

وَ أَيِّ نَادُمْ الْيَكْرَهْ أَخُوهْ، هُو كَتَّالْ دِمَمْ وَ تَعَرْفُوا كَدَرْ كَنْ نَادُمْ كَتَّالْ دِمَمْ، الْحَيَاةْ الْأَبَدِيَّةْ مَا تَثْبِتْ فَوْقَهْ.

1 يُوحَنَّا 3:12

وَ مَا وَاجِبْ نَبْقَوْا مِثِلْ قَابِيلْ. هُو نَادُمْ هَنَا إِبْلِيسْ الشَّرِيرْ وَ كَتَلْ أَخُوهْ. وَ مَالَا كَتَلَهْ؟ هُو كَتَلَهْ أَشَانْ هُو ذَاتَهْ قَاعِدْ يِسَوِّي الْفَسَالَةْ وَ لَاكِنْ أَخُوهْ قَاعِدْ يِسَوِّي الْعَدَالَةْ.

لُوقا 11:51

أَيْوَى، نُقُولْ لَيْكُو مِنْ دِمَّةْ هَابِيلْ وِلَيْد آدَمْ لَحَدِّي دِمَّةْ زَكَرِيَّا الْكَتَلَوْه بَيْن بَيْت اللّٰهْ وَ الْمَدْبَحْ، دِمِّتْهُمْ كُلُّهُمْ تَجِي فِي رَاسْ النَّاسْ الْفِي وَكِتْنَا دَا.

1 يُوحَنَّا 3:10

وَ نَعَرْفُوا يَاتُمَّنْ عِيَالْ اللّٰهْ وَ يَاتُمَّنْ عِيَالْ إِبْلِيسْ بِالشَّيّءْ الْيِسَوُّوهْ. كُلَّ النَّاسْ الْمَا يِتَابُعُوا الْحَالْ الصَّالْحَةْ، هُمَّنْ مَا عِيَالْ اللّٰهْ مِثِلْ النَّاسْ الْمَا يِحِبُّوا أَخْوَانْهُمْ.

يُوحَنَّا 8:44

أَبُوكُو هُو إِبْلِيسْ وَ إِنْتُو عِيَالَهْ وَ تِدَوْرُوا تِسَوُّوا الشَّيّءْ الْهُو يِدَوْرَهْ. هُو كَتَّالْ دِمَمْ مِنْ الْبِدَايَةْ وَ أَبَداً مَا دَوَّرْ الْحَقّ أَشَانْ فِي قَلْبَهْ، الْحَقّ مَا فِيهْ. كَلَامْ الْكِدِبْ بِقِي لَيَّهْ لُغِّتَهْ أَشَانْ هُو كَدَّابْ وَ كُلَّ الْكَلَامْ الْكِدِبْ، هُو أَبُوهْ.

تكوين 47:3

وَ الْمَلِكْ سَأَلَاهُمْ وَ قَالْ: «أَوَّلْ خِدْمِتْكُو شُنُو؟» وَ هُمَّنْ رَدَّوْا لَيَّهْ وَ قَالَوْا: «يَا سَيِّدْنَا، أَنِحْنَ سِيَادْ الْغَنَمْ، مِثِلْ جُدُودْنَا.»

خُروج 3:1

وَ مُوسَى قَاعِدْ يَسْرَحْ بِغَنَمْ هَنَا نَسِيبَهْ يَسْرُونْ وَ هُو بَسْ رَاجِلْ الدِّينْ هَنَا بَلَدْ مِدْيَانْ. وَ يَوْم وَاحِدْ، مُوسَى سَاقْ الْغَنَمْ غَادِي لِلصَّحَرَاء وَ وِصِلْ فِي جَبَلْ اللّٰهْ الْأُسْمَهْ حُورِيبْ.

عَمُوس 7:15

لَاكِنْ اللّٰهْ بَسْ نَادَانِي وَكِتْ أَنَا قَاعِدْ نَسْرَحْ بِغَنَمِي وَ قَالْ لَيِّ: ‹أَمْشِي أَتْنَبَّأْ لِشَعَبِي بَنِي إِسْرَائِيلْ.›

زَبُور 127:3

الْعِيَالْ وَرَثَةْ مِنْ اللّٰهْ وَ هُمَّنْ أَجُرْ مِنَّهْ.

تكوين 37:13

وَ يَعْقُوبْ السَّمَّوْه إِسْرَائِيلْ قَالْ لِيُوسُفْ: «أَسْمَعْ، أَخْوَانَكْ قَاعِدِينْ يَسْرَحَوْا بِالْغَنَمْ قَرِيبْ لِشَكِيمْ. أَمْشِي أَلْحَقْهُمْ.» وَ يُوسُفْ قَالْ: «تَمَامْ، نَمْشِي.»

تكوين 9:20

وَ نُوحْ هُو أَوَّلْ حَرَّاتِي الْمَقَّنْ جِنَيْنَةْ عِنَبْ.

تكوين 3:23

وَ خَلَاصْ، اللّٰهْ الرَّبّ طَرَدَهْ مِنْ جِنَيْنَةْ عَدِنْ وَ يَمْشِي يَحْرِتْ التُّرَابْ الْخَلَقَوْه مِنَّهْ.

لُوقا 11:50

وَ خَلَاصْ كُلَّ الْأَنْبِيَاء الْكَتَلَوْهُمْ فِي أَيِّ زَمَنْ، دِمِّتْهُمْ تَجِي فِي رَاسْ هَنَا النَّاسْ الْفِي وَكِتْنَا دَا.

تكوين 4:1

وَ آدَمْ لَمَّ مَعَ مَرْتَهْ حَوَّاء. وَ هِي بِقَتْ غَلْبَانَةْ وَ وِلْدَتْ وِلَيْد وَ سَمَّوْه قَابِيلْ. وَ قَالَتْ: «اللّٰهْ سَاعَدَانِي وَ رَزَقَانِي وِلَيْد.»

تكوين 4:3

وَ يَوْم وَاحِدْ، قَابِيلْ قَدَّمْ هَدِيَّةْ لِلّٰهْ مِنْ الْخَضَارْ الْحَرَتَهْ.