غَلاطِية 6:3 - الكتاب المقدس بالعربي الدارجي هنا تشاد

³ وَ كَنْ نَادُمْ سَوَّى نَفْسَهْ عَالِي مِنْ أَخْوَانَهْ لَحَدِّي مَا يِسَاعِدْهُمْ، بِالصَّحِيحْ هُو مَا يِسَاوِي شَيّءْ وَ غَشَّ نَفْسَهْ.

غَلاطِية 6:3 Referenca të Kryqëzuara

أمْثال 26:12

أَخَيْر تُخُطّ عَشَمَكْ فِي الْمَطْمُوسْ مِنْ تُخُطّ عَشَمَكْ فِي الْيَحْسِبْ نَفْسَهْ حَكِيمْ.

1 كُرُنْتُس 3:18

خَلِّي نَادُمْ مَا يُغُشّ نَفْسَهْ. أَيِّ نَادُمْ مِنْكُو الْيُقُولْ هُو عِنْدَهْ حِكْمَةْ عَدِيلَةْ وَ حِكْمَتَهْ هِي حِكْمَةْ نَاسْ الدُّنْيَا، خَلِّي يَبْقَى جَاهِلْ أَشَانْ يَلْقَى الْحِكْمَةْ الصَّحِيحَةْ.

1 كُرُنْتُس 8:2

كَنْ نَادُمْ عَارِفْ هُو عَارِفْ، هُو لِسَّاعْ مَا عِرِفْ مِثِلْ وَاجِبْ يَعَرِفْ.

رَوْمَا 12:3

وَ بِالنِّعْمَةْ الْاللّٰهْ أَنْطَاهَا لَيِّ، نِوَصِّي أَيِّ وَاحِدْ مِنْكُو مَا يِسْتَكْبَرْ. خَلِّي أَيِّ وَاحِدْ مَا يِنْغَشَّ لَاكِنْ يِشِيفْ نَفْسَهْ حَسَبْ قُدْرَةْ الْإِيمَانْ الْاللّٰهْ أَنْطَاهْ لَيَّهْ.

2 كُرُنْتُس 3:5

أَنِحْنَ بِنُفُوسْنَا مَا عِنْدِنَا الْقُدْرَةْ الْوَاجْبَةْ لِنِسَوُّوا الْخِدْمَةْ دِي. نَقْدَرَوْا نِسَوُّوا الْخِدْمَةْ دِي إِلَّا كَنْ اللّٰهْ أَنْطَانَا الْقُدْرَةْ الْوَاجْبَةْ.

1 كُرُنْتُس 13:2

وَ كَنْ نِتْنَبَّأْ بِكَلَامْ جَايِ مِنْ اللّٰهْ وَ نَفْهَمْ كُلَّ الْأَسْرَارْ وَ كُلِّ شَيّءْ هَنَا عِلِمْ وَ كَنْ عِنْدِي إِيمَانْ قَوِي مَرَّةْ وَاحِدْ لَحَدِّي نِحَوِّلْ الْجِبَالْ مِنْ بَكَانَاتْهُمْ كُلَ وَ كَنْ مَا عِنْدِي الْمَحَبَّةْ، أَنَا مَا شَيّءْ.

1 يُوحَنَّا 1:8

وَ كَنْ نَادُمْ مِنِّنَا يُقُولْ هُو مَا عِنْدَهْ ذُنُوبْ، هُو غَشَّ نَفْسَهْ وَ الْحَقّ أَبَداً مَا قَاعِدْ فَوْقَهْ.

رَوْمَا 12:16

أَسْتَفُقُوا أَمْبَيْنَاتْكُو وَ خَلِّي أَيِّ وَاحِدْ مَا يَجْعَلْ نَفْسَهْ كَبِيرْ لَاكِنْ خَلِّي يَجْعَلْ نَفْسَهْ صَغَيَّرْ. مَا تِسَوُّوا نُفُوسْكُو عِنْدُكُو عِرْفَةْ كَتِيرَةْ.

لُوقا 18:11

وَ الْفَرِيزِي وَقَفْ بِطُولَهْ وَ صَلَّى وِحَيْدَهْ وَ قَالْ: ‹يَا اللّٰهْ، نُقُولْ لَيْك شُكْراً أَشَانْ أَنَا مَا بِقِيتْ مِثِلْ النَّاسْ الْآخَرِينْ. هُمَّنْ سَرَارِيقْ وَ فَسْلِينْ وَ زَنَّايِينْ. أَيْوَى، أَنَا مَا مِثِلْ نَادُمْ الْجَمَارِكْ دَا.

يَعْقُوب 1:22

طَبُّقُوا كَلَامْ اللّٰهْ وَ مَا تَسْمَعَوْه بَسْ. كَنْ تَسْمَعَوْه وَ مَا تِطَبُّقُوهْ، تُغُشُّوا نُفُوسْكُو.

أمْثال 25:14

الْقَالْ كَلَامْ وَ مَا تَمَّاهْ مِثِلْ الْمَطَرْ الشَّالْ وَ مَا صَبَّ.

يَعْقُوب 1:26

النَّادُمْ الْيِفَكِّرْ هُو يِتَابِعْ الدِّينْ عَدِيلْ وَ لَاكِنْ مَا يَلْزَمْ لِسَانَهْ، هُو دَا قَاعِدْ يُغُشّ نَفْسَهْ وَ دِينَهْ مَا يَنْفَعْ.

2 تِمُوتَاوُس 3:13

وَ لَاكِنْ النَّاسْ الْفَسْلِينْ وَ الْكَدَّابِينْ، فَسَالِتْهُمْ تِزِيدْ بِزِيَادَةْ وَ يَبْقَوْا غَشَّاشِينْ وَ مَغْشُوشِينْ.

2 كُرُنْتُس 12:11

خَلَاصْ، أَنَا حَجَّيْت لَيْكُو مِثِلْ نَادُمْ الْمَا عِنْدَهْ فِكِرْ. إِنْتُو لَزَّيْتُونِي أَشَانْ نُقُولْ الْكَلَامْ دَا. وَ إِنْتُو بَسْ النَّاسْ الْوَاجِبْ يِكَرُّمُونِي أَشَانْ أَنَا مَا صَغَيَّرْ بِأَيِّ شَيّءْ مِنْ الرُّسُلْ الْإِنْتُو تُقُولُوا هُمَّنْ كُبَارْ، كَنْ أَنَا نَادُمْ مَا نَافِعْ كُلَ.

غَلاطِية 2:6

وَ حَجَّيْنَا مَعَ النَّاسْ الْأَخْوَانَّا جَعَلَوْهُمْ كُبَارَاتْ. وَ مِنْ زَمَانْ كَنْ هُمَّنْ كُبَارَاتْ وَلَّا مَا كُبَارَاتْ كُلَ، دَا مَا لَمَّانِي. قِدَّامْ اللّٰهْ كُلَّ النَّاسْ سَوَا سَوَا. وَ هُمَّنْ مَا زَادَوْا شَيّءْ وَاحِدْ لِكَلَامِي.

أعمال الرُسُل 5:36

فَكُّرُوا، مِنْ سِنِينْ، ثُودَاسْ قَمَّ وَ سَوَّى نَفْسَهْ نَادُمْ كَبِيرْ وَ قَرِيبْ 400 رُجَالْ تَابَعَوْه. لَاكِنْ نَادُمْ وَاحِدْ كَتَلَهْ وَ النَّاسْ الْمَعَايَهْ شَتَّوْا وَ الْحَرَكَةْ وَقَفَتْ.

غَلاطِية 2:9

وَ الْكُبَارَاتْ الْمَعْرُوفِينْ مِثِلْ عَمَدْ الْمُؤمِنِينْ، هُمَّنْ يَعْقُوبْ وَ بُطْرُسْ وَ يُوحَنَّا، بِقِي لَيْهُمْ وَاضِحْ كَدَرْ اللّٰهْ أَنْطَانِي النِّعْمَةْ دِي. وَ خَلَاصْ، كَرَبَوْنَا بِالْإِيدْ الزَّيْنَةْ أَنَا وَ بَرْنَابَا أَشَانْ يِوَصُّفُوا كَدَرْ كُلِّنَا مُشْتَرِكِينْ فِي الْخِدْمَةْ. وَ أَسْتَفَقَوْا كَدَرْ أَنِحْنَ نَخْدُمُوا فِي أُسْط النَّاسْ الْمَا يَهُودْ وَ هُمَّنْ يَخْدُمُوا فِي أُسْط الْيَهُودْ.