غَلاطِية 2:2 - الكتاب المقدس بالعربي الدارجي هنا تشاد

² مَشَيْت بِسَبَبْ رُؤْيَةْ مِنْ اللّٰهْ. وَ مَشَيْت لِكُبَارَاتْ الْمُؤمِنِينْ الْمَعْرُوفِينْ وَ لَمَّيْت مَعَاهُمْ فِي مَلَمَّةْ وِحَيْدنَا. وَ قَدَّمْت لَيْهُمْ الْبِشَارَةْ الْبَلَّغْتَهَا فِي أُسْط النَّاسْ الْمَا يَهُودْ. دَوَّرْت نِأَكِّدْ كَدَرْ الْخِدْمَةْ الْأَوَّلْ سَوَّيْتهَا وَ الْهَسَّعْ قَاعِدْ نِسَوِّيهَا مَا تَبْقَى بَاطْلَةْ.

غَلاطِية 2:2 Referenca të Kryqëzuara

غَلاطِية 2:6

وَ حَجَّيْنَا مَعَ النَّاسْ الْأَخْوَانَّا جَعَلَوْهُمْ كُبَارَاتْ. وَ مِنْ زَمَانْ كَنْ هُمَّنْ كُبَارَاتْ وَلَّا مَا كُبَارَاتْ كُلَ، دَا مَا لَمَّانِي. قِدَّامْ اللّٰهْ كُلَّ النَّاسْ سَوَا سَوَا. وَ هُمَّنْ مَا زَادَوْا شَيّءْ وَاحِدْ لِكَلَامِي.

فِلِبِّي 2:16

أَشَانْ إِنْتُو مُنْكَرِبِينْ فِي كَلَامْ الْحَيَاةْ. وَ كَنْ تَبْقَوْا مِثِلْ دَا، نَقْدَرْ نَرْفَعْ رَاسِي فَوْق فِي يَوْم جَيَّةْ الْمَسِيحْ. وَ نَعَرِفْ تَعَبِي وَ خِدِمْتِي الْخَدَمْتَهَا لَيَّهْ مَا فَشَلَتْ.

1 تَسَلونِيكِي 3:5

أَشَانْ دَا، وَكِتْ فَقَدْت الصَّبُرْ مَرَّةْ وَاحِدْ، رَسَّلْت لَيْكُو تِمُوتَاوُسْ أَشَانْ نِدَوْر نَعَرِفْ كَنْ إِنْتُو ثَابْتِينْ فِي إِيمَانْكُو وَلَّا لَا. وَ فِي الْوَكِتْ دَاكْ، أَنَا قَاعِدْ نِهِمّ لَيْكُو. فِي فِكْرِي، أَكُونْ إِبْلِيسْ الْيِجَرِّبْ النَّاسْ أَنَّصَرْ فَوْقكُو وَ التَّعَبْ الْأَنَا تِعِبْتَهْ فَوْقكُو مَشَى فِي الرِّيحْ سَاكِتْ.

غَلاطِية 2:9

وَ الْكُبَارَاتْ الْمَعْرُوفِينْ مِثِلْ عَمَدْ الْمُؤمِنِينْ، هُمَّنْ يَعْقُوبْ وَ بُطْرُسْ وَ يُوحَنَّا، بِقِي لَيْهُمْ وَاضِحْ كَدَرْ اللّٰهْ أَنْطَانِي النِّعْمَةْ دِي. وَ خَلَاصْ، كَرَبَوْنَا بِالْإِيدْ الزَّيْنَةْ أَنَا وَ بَرْنَابَا أَشَانْ يِوَصُّفُوا كَدَرْ كُلِّنَا مُشْتَرِكِينْ فِي الْخِدْمَةْ. وَ أَسْتَفَقَوْا كَدَرْ أَنِحْنَ نَخْدُمُوا فِي أُسْط النَّاسْ الْمَا يَهُودْ وَ هُمَّنْ يَخْدُمُوا فِي أُسْط الْيَهُودْ.

1 كُرُنْتُس 9:26

أَشَانْ دَا، فِي دَرِبْ الْإِيمَانْ أَنَا جَارِي قِدَّامْ بِنِيَّةْ وَاحِدَةْ. نِسَوِّي نَفْسِي مِثِلْ الْمُلَاكِمْ الشَّدِيدْ وَ مَا نَضْرُبْ فِي الرِّيحْ سَاكِتْ.

1 كُرُنْتُس 1:23

لَاكِنْ أَنِحْنَ نِبَلُّغُوا لِكُلَّ النَّاسْ بِالْمَسِيحْ الْكَتَلَوْه فِي الصَّلِيبْ. وَ الْكَلَامْ دَا يِزَعِّلْ الْيَهُودْ وَ هُو كَلامْ بَاطِلْ لِلْيُونَانِيِّينْ.

1 كُرُنْتُس 9:24

تَعَرْفُوا كَدَرْ فِي السَّبَقْ، كُلَّ النَّاسْ يَجْرُوا لَاكِنْ وَاحِدْ مِنْهُمْ بَسْ يَلْقَى الْجَائِزَةْ. شِيلُوا الْمَثَلْ دَا وَ جَاهُدُوا فِي دَرِبْ الْإِيمَانْ أَشَانْ تَلْقَوْا جَائِزَةْ.

1 كُرُنْتُس 2:2

وَ شِلْت نِيَّةْ أَشَانْ نِكَلِّمْ لَيْكُو مِثِلْ مَا نَعَرِفْ شَيّءْ إِلَّا عِيسَى الْمَسِيحْ وَ مَوْتَهْ فِي الصَّلِيبْ.

أعمال الرُسُل 15:12

وَ خَلَاصْ، كُلَّ النَّاسْ اللَّامِّينْ سَكَتَوْا وَ بَدَوْا يَسْمَعَوْا كَلَامْ بَرْنَابَا وَ بُولُسْ. وَ هُمَّنْ أَوْرَوْهُمْ بِالْعَلَامَاتْ وَ الْعَجَايِبْ الْاللّٰهْ سَوَّاهُمْ بِوَاسِطَتْهُمْ فِي أُسْط النَّاسْ الْمَا يَهُودْ.

أعمال الرُسُل 15:4

وَ وَكِتْ وِصْلَوْا فِي مَدِينَةْ الْقُدُسْ، كُلَّ جَمَاعَةْ الْمُؤمِنِينْ وَ الرُّسُلْ وَ الْكُبَارَاتْ لَاقَوْهُمْ عَدِيلْ. وَ الْأَخْوَانْ أَوْرَوْهُمْ بِكُلَّ شَيّءْ الْاللّٰهْ سَوَّاهْ بَيْهُمْ.

فِلِبِّي 2:29

وَ خَلَاصْ، أَكُرْبُوهْ بِأُسُمْ الرَّبّ بِفَرْحَةْ كَبِيرَةْ. وَ نُقُولْ لَيْكُو وَاجِبْ تِكَرُّمُوا بِزِيَادَةْ أَيِّ نَادُمْ مِثْلَهْ هُو.

غَلاطِية 1:16

هُو بَيَّنْ إِبْنَهْ فِي قَلْبِي أَشَانْ نِبَشِّرْ بَيَّهْ فِي بُلْدَانْ هَنَا نَاسْ الْمَا يَهُودْ. وَ أَنَا مَا شَاوَرْت أَيِّ إِنْسَانْ.

أعمال الرُسُل 23:11

وَ بِاللَّيْل، الرَّبّ عِيسَى بَانْ لِبُولُسْ وَ حَجَّى لَيَّهْ وَ قَالْ: «شِدّ حَيْلَكْ! إِنْتَ شَهَدْت لَيِّ فِي مَدِينَةْ الْقُدُسْ وَ وَاجِبْ تَشْهَدْ لَيِّ فِي مَدِينَةْ رَوْمَا كُلَ.»

أعمال الرُسُل 18:9

وَ يَوْم وَاحِدْ بِاللَّيْل، الرَّبّ عِيسَى جَاءْ لِبُولُسْ فِي رُؤْيَةْ وَ قَالْ لَيَّهْ: «مَا تَخَافْ. كَلِّمْ وَ مَا تَسْكُتْ.

أعمال الرُسُل 5:34

وَ لَاكِنْ نَادُمْ وَاحِدْ مِنْ الْمَجْلَسْ قَمَّ فَوْق أَشَانْ يِكَلِّمْ لَيْهُمْ. أُسْمَهْ قَمَلِيِيلْ وَ هُو فَرِيزِي وَ مُعَلِّمْ فِي التَّوْرَاةْ وَ كُلَّ النَّاسْ يِكَرُّمُوهْ. وَ أَمَرْ يَمُرْقُوا الرُّسُلْ مِنْ الْمَجْلَسْ لِوَكِتْ شِيَّةْ.

مَتَّى 10:16

«أَسْمَعَوْا! نِرَسِّلْكُو فِي أُسْط النَّاسْ وَ تَبْقَوْا مِثِلْ غَنَمْ فِي أُسْط الْمَرَافْعِينْ. أَشَانْ دَا، وَاجِبْ تَبْقَوْا حَضِيرِينْ مِثِلْ الدَّابِي وَ بَرِيِّينْ مِثِلْ الْحَمَامَةْ.

جامِعة 10:1

الدُّبَّانْ الْمَيِّتْ يِحَمِّضْ وَ يِعَفِّنْ الدِّهِنْ هَنَا سِيدْ الْعِطِرْ. وَ مِثِلْ دَا، شِيَّةْ مِنْ الطَّمَاسَةْ تِتَلِّفْ الْحِكْمَةْ وَ الشَّرَفْ.

أعمال الرُسُل 15:2

وَ بُولُسْ وَ بَرْنَابَا خَالَفَوْهُمْ بِشِدَّةْ. وَ أَشَانْ دَا، شَالَوْا نِيَّةْ لِيِرَسُّلُوا بُولُسْ وَ بَرْنَابَا وَ أَخْوَانْ وَاحِدِينْ يَمْشُوا فِي مَدِينَةْ الْقُدُسْ وَ يِشَّاوَرَوْا فِي الْكَلَامْ دَا مَعَ الرُّسُلْ وَ مَعَ الْكُبَارَاتْ.

رَوْمَا 9:16

وَ بِمِثِلْ دَا كَنْ اللّٰهْ عَزَلْ نَادُمْ، دَا مَا أَشَانْ نِيَّةْ النَّادُمْ وَ مَا أَشَانْ الشَّيّءْ النَّادُمْ سَوَّاهْ. اللّٰهْ عَزَلَهْ أَشَانْ هُو دَوَّرْ يَرْحَمَهْ بَسْ.

2 كُرُنْتُس 12:1

الْفَشَارْ دَا مَا عِنْدَهْ فَايْدَةْ لَاكِنْ كَنْ لَابُدَّ نِلْفَشَّرْ، نِحَجِّي بِالرُّؤْيَةْ وَ الْأَسْرَارْ الْاللّٰهْ كَشَفَاهُمْ لَيِّ.

غَلاطِية 1:6

أَنَا عَجَّبْت لَيْكُو بِلْحَيْن. اللّٰهْ نَادَاكُو أَشَانْ تِعِيشُوا بِنِعْمَةْ الْمَسِيحْ وَ طَوَّالِي إِنْتُو قَمَّيْتُوا خَلَّيْتُوهَا أَشَانْ تِدَوْرُوا تِتَابُعُوا بِشَارَةْ آخَرَةْ.

غَلاطِية 1:12

وَ نَادُمْ مَا أَنْطَاهَا لَيِّ وَ مَا فِي نَادُمْ قَرَّاهَا لَيِّ. لَاكِنْ عِيسَى الْمَسِيحْ بَسْ بَيَّنْهَا لَيِّ.

غَلاطِية 5:7

بَدَيْتُوا عَدِيلْ فِي دَرِبْ الْمَسِيحْ. كِكَّيْف خَلَّيْتُوا نَادُمْ يَمْرُقْكُو مِنْ الدَّرِبْ الصَّحِيحْ دَا؟

2 تِمُوتَاوُس 4:7

أَنَا جَاهَدْت جِهَادْ شَدِيدْ فِي الْحَقّ. وَ الْمُسَابَقَةْ الطَّوِيلَةْ كَمَّلْتَهَا وَ الْإِيمَانْ كَرَبْتَهْ قَوِي لَحَدِّي النِّهَايَةْ.

عِبْرَانِيِّين 12:1

وَ فِي الْكَلَامْ دَا، عِنْدِنَا شُهُودْ كَتِيرِينْ بِلْحَيْن الْيَشْهَدَوْا لَيْنَا مِنْ أَيِّ جِيهَةْ. أَشَانْ دَا، خَلِّي نِخَلُّوا مِنِّنَا كُلَّ شَيّءْ الْيِوَقِّفْنَا وَ كُلَّ ذَنِبْ الْيِدَوْر يَكْرُبْنَا. وَ خَلِّي نَمْشُوا قِدَّامْ بِجُهُدْ مِثِلْ نَاسْ فِي مُسَابَقَةْ وَ نَجْرُوا لَحَدِّي نِكَمُّلُوا الْمُسَابَقَةْ الْأَنِحْنَ قَاعِدِينْ فَوْقهَا.