خُروج 24:16 - الكتاب المقدس بالعربي الدارجي هنا تشاد

¹⁶ وَ مَجْد اللّٰهْ قَعَدْ فِي جَبَلْ سِينَاء. فِي مُدَّةْ سِتَّةْ يَوْم، السَّحَابَايْ سَدَّتْ الْجَبَلْ. وَ فِي الْيَوْم السَّابِعْ، اللّٰهْ نَادَى مُوسَى مِنْ أُسْط السَّحَابَايْ.

خُروج 24:16 Referenca të Kryqëzuara

خُروج 16:10

وَ وَكِتْ هَارُونْ بَدَا يِكَلِّمْ لَيْهُمْ بِالْكَلَامْ دَا، هُمَّنْ كُلُّهُمْ أَنْلَفَتَوْا عَلَيْ الصَّحَرَاء وَ شَافَوْا مَجْد اللّٰهْ بَانْ لَيْهُمْ فِي السَّحَابْ.

عَدد 16:42

وَ لَاكِنْ وَكِتْ كُلَّ مُجْتَمَعْ بَنِي إِسْرَائِيلْ لَمَّوْا وَ قَمَّوْا ضِدّ مُوسَى وَ هَارُونْ وَ هُمَّنْ مُوَجِّهِينْ عَلَيْ خَيْمَةْ الْإِجْتِمَاعْ، طَوَّالِي شَافَوْا السَّحَابَايْ غَطَّتْ الْخَيْمَةْ وَ مَجْد اللّٰهْ بَانْ.

حِزْقِيال 1:28

وَ الضَّيّ الْمُحَوِّقَهْ يِشَابِهْ حَجَّازْ الْمَطَرْ الْيِبِينْ فِي السَّحَابْ فِي يَوْم الْمَطَرْ. وَ مَجْد اللّٰهْ هُو مِثِلْ كَيْ. وَ وَكِتْ أَنَا شِفْتَهْ، وَقَعْت بِوِجْهِي فِي الْأَرْض وَ سِمِعْت حِسّ قَاعِدْ يِحَجِّي.

زَبُور 99:7

فِي عَمُودْ السَّحَابْ، هُو حَجَّى لَيْهُمْ وَ هُمَّنْ حَفَضَوْا مُعَاهَدَتَهْ وَ شُرُوطَهْ الْأَنْطَاهُمْ لَيْهُمْ.

عَدد 14:10

وَ بِسَبَبْ دَا، كُلَّ الْمُجْتَمَعْ دَوَّرَوْا يَرْجُمُوهُمْ. وَ طَوَّالِي، مَجْد اللّٰهْ بَانْ فِي خَيْمَةْ الْإِجْتِمَاعْ قِدَّامْ كُلَّ بَنِي إِسْرَائِيلْ.

لاوِيِّين 9:23

وَ مُوسَى وَ هَارُونْ دَخَلَوْا فِي خَيْمَةْ الْإِجْتِمَاعْ وَ بَعَدْ مَرَقَوْا، بَارَكَوْا الشَّعَبْ بَتَّانْ. وَ مَجْد اللّٰهْ بَانْ لِكُلَّ الشَّعَبْ.

رُؤية 1:10

وَ فِي يَوْم الرَّبّ، رُوحْ اللّٰهْ نَزَلْ فَوْقِي وَ سِمِعْت وَرَايِ حِسّ هَنَا نَادُمْ قَاعِدْ يِكَلِّمْ. حِسَّهْ شَدِيدْ مِثِلْ حِسّ الْبُرُنْجِي.

2 كُرُنْتُس 4:6

وَ زَمَانْ اللّٰهْ قَالْ: «خَلِّي النُّورْ يِضَوِّي فِي أُسْط الضَّلَامْ.» وَ هُو بَسْ النَّوَّرْ قُلُوبْنَا أَشَانْ نَعَرْفُوا نُورْ اللّٰهْ الْمَجِيدْ الْقَاعِدْ فِي وِجِهْ عِيسَى الْمَسِيحْ.

خُروج 24:17

وَ فِي عُيُونْ بَنِي إِسْرَائِيلْ، مَجْد اللّٰهْ أَنْشَافْ مِثِلْ النَّارْ الْقَاعِدَةْ تَاكُلْ فِي رَاسْ الْجَبَلْ.

خُروج 20:10

وَ لَاكِنْ الْيَوْم السَّابِعْ هُو سَبْت لَيِّ أَنَا اللّٰهْ إِلٰـهَكْ. فِي الْيَوْم دَا، مَا تَخْدِمْ أَيِّ شَيّءْ وَ لَا إِنْتَ وَ لَا أَوْلَادَكْ وَ لَا بَنَاتَكْ وَ لَا عَبِيدَكْ وَ لَا خَدِيمَكْ وَ لَا بَهَايْمَكْ وَ لَا الْأَجَانِبْ الْقَاعِدِينْ مَعَاكْ فِي حِلِّتَكْ.

خُروج 19:11

وَ يُكُونُوا جَاهِزِينْ لِلْيَوْم التَّالِتْ أَشَانْ فِي الْيَوْم دَا، أَنَا اللّٰهْ نَنْزِلْ فِي جَبَلْ سِينَاء قِدَّامْ كُلَّ الشَّعَبْ.

خُروج 19:9

وَ اللّٰهْ قَالْ لِمُوسَى: «دَاهُو أَنَا نِقَابِلَكْ فِي سَحَابَايْ مُضَلِّمَةْ أَشَانْ كُلَّ الشَّعَبْ يَسْمَعَوْنِي وَكِتْ أَنَا نِكَلِّمْ مَعَاكْ. وَ بِمِثِلْ دَا، هُمَّنْ يِآمُنُوا بَيْك دَايْماً.» وَ فِي الْوَكِتْ دَا، مُوسَى حَجَّى كَلَامْ الشَّعَبْ لِلّٰهْ.

لاوِيِّين 9:6

وَ مُوسَى قَالْ: «دَا بَسْ الشَّيّءْ الْأَمَرَاكُو بَيَّهْ اللّٰهْ. سَوُّوهْ وَ مَجْد اللّٰهْ يِبِينْ لَيْكُو.»

إشَعْيا 4:5

اللّٰهْ يَخْلِقْ فِي كُلَّ بَكَانْ فِي جَبَلْ صَهْيُون وَ فِي كُلَّ الْبَكَانَاتْ الْيِلِمُّوا فَوْقهُمْ سَحَابَايْ وَ دُخَّانْ بِالنَّهَارْ. وَ ضَيّ هَنَا نَارْ أَمْ بَلْبَالَةْ بِاللَّيْل وَ مَجْد اللّٰهْ يِغَطِّي كُلَّ شَيّءْ.