خُروج 24:12 - الكتاب المقدس بالعربي الدارجي هنا تشاد

¹² وَ اللّٰهْ قَالْ لِمُوسَى: «أَطْلَعْ لَيِّ فِي رَاسْ الْجَبَلْ وَ أَقْعُدْ فِي الْبَكَانْ دَا. وَ نَنْطِيكْ لِيحَانْ إِتْنَيْن هَنَا حَجَرْ الْأَنَا كَتَبْت فَوْقهُمْ الْوَصَايَا وَ الْقَوَانِينْ لِلنَّاسْ يِلْعَلَّمَوْهُمْ.»

خُروج 24:12 Referenca të Kryqëzuara

تَثْنِية 5:22

وَ الْكَلَامْ دَا، اللّٰهْ قَالَهْ لِكُلَّ الشَّعَبْ فِي الْجَبَلْ، مِنْ أُسْط النَّارْ وَ السَّحَابْ وَ غَمَامْ أَزْرَقْ كُرُمْ. وَ كَلَّمَاهُمْ بِصَوْت عَالِي وَ مَا زَادْ فَوْقَهْ شَيّءْ. وَ الْكَلَامْ دَا، هُو كَتَبَهْ فِي لِيحَانْ إِتْنَيْن هَنَا حَجَرْ وَ أَنْطَاهُمْ لَيِّ أَنَا مُوسَى.

خُروج 31:18

وَ وَكِتْ اللّٰهْ كَمَّلْ كَلَامَهْ مَعَ مُوسَى فِي جَبَلْ سِينَاء، أَنْطَاهْ لِيحَانْ الْمُعَاهَدَةْ. وَ هُمَّنْ لِيحَانْ إِتْنَيْن هَنَا حَجَرْ الْاللّٰهْ ذَاتَهْ كَتَبْ فَوْقهُمْ كَلَامَهْ.

عِبْرَانِيِّين 9:4

وَ دَا الْبَكَانْ الْقَاعِدْ فَوْقَهْ الْمُخْبَرْ هَنَا دَهَبْ وَ صَنْدُوقْ الْمُعَاهَدَةْ الْمَمْسُوحْ بِدَهَبْ دَاخَلْ وَ بَرَّا. وَ الصَّنْدُوقْ دَا، عِنْدَهْ جَرّ هَنَا دَهَبْ الْفِي لُبَّهْ الْمَنَّةْ. وَ عَصَاةْ هَارُونْ السَّوَّتْ نُوَّارْ وَ لِيحَانْ الْمُعَاهَدَةْ كُلَ قَاعِدِينْ فِي لُبَّهْ.

2 كُرُنْتُس 3:3

أَيْوَى، إِنْتُو بَسْ جَوَابْ الْمَسِيحْ وَ هُو رَسَّلَهْ بِوَاسِطَتْنَا وَ دَا وَاضِحْ لِأَيِّ نَادُمْ. وَ الْجَوَابْ دَا مَا مَكْتُوبْ بِقَلَمْ لَاكِنْ بِرُوحْ اللّٰهْ الْحَيّ. وَ هُو مَا مَكْتُوبْ فِي لَوْح هَنَا حَجَرْ لَاكِنْ مَكْتُوبْ فِي قُلُوبْ النَّاسْ.

إرْمِيا 31:33

وَ دِي هِي الْمُعَاهَدَةْ الْجَدِيدَةْ النِّسَوِّيهَا مَعَ بَنِي إِسْرَائِيلْ بَعَدْ الْيَوْم دَا. أَنَا نُخُطّ وَصِيَّاتِي فِي فِكِرْهُمْ وَ نَكْتِبْهُمْ فِي قُلُوبْهُمْ. وَ أَنَا نَبْقَى إِلٰـهُّمْ وَ هُمَّنْ يَبْقَوْا شَعَبِي. وَ دَا كَلَامْ اللّٰهْ.

2 كُرُنْتُس 3:7

شُرُوطْ التَّوْرَاةْ كَتَبَوْهُمْ فِي لِيحَانْ هَنَا حَجَرْ وَ نُورْ اللّٰهْ الْمَجِيدْ بَانْ وَكِتْ هُو نَزَّلَاهُمْ. وَ النُّورْ الْمَجِيدْ دَا شَدِيدْ لَحَدِّي بَنِي إِسْرَائِيلْ مَا قِدْرَوْا يِشِيفُوا النُّورْ الْقَاعِدْ فِي وِجِهْ مُوسَى. وَ النُّورْ دَا مَا طَوَّلْ. وَ كَنْ كَلَامْ اللّٰهْ الْحَكَمْ النَّاسْ بِالْمَوْت دَا نَزَلْ بِنُورْ مَجِيدْ،

تَثْنِية 4:14

وَ فِي الْوَكِتْ دَا، اللّٰهْ أَمَرَانِي نِعَلِّمْكُو الْقَوَانِينْ وَ الشُّرُوطْ أَشَانْ تِطَبُّقُوهُمْ فِي الْبَلَدْ التَّدْخُلُوا فَوْقهَا وَ تِشِيلُوهَا وَرَثَةْ.

خُروج 24:18

وَ مُوسَى دَخَلْ فِي أُسْط السَّحَابَايْ وَ طَلَعْ بَتَّانْ فَوْق فِي الْجَبَلْ. وَ قَعَدْ فِي رَاسْ الْجَبَلْ 40 نَهَارْ وَ 40 لَيْلَةْ.

خُروج 24:15

وَ خَلَاصْ، مُوسَى طَلَعْ الْجَبَلْ وَ السَّحَابَايْ سَدَّتْ الْجَبَلْ مَرَّةْ وَاحِدْ.

خُروج 24:2

وَ خَلِّي إِنْتَ مُوسَى وِحَيْدَكْ بَسْ تَجِي لَيِّ أَنَا اللّٰهْ. وَ كَنْ لِلْآخَرِينْ كَمَانْ، مَا يَجُوا قَرِيبْ. وَ خَلِّي الشَّعَبْ مَا يَطْلَعَوْا مَعَاكْ.»

مَتَّى 5:19

«وَ أَيِّ نَادُمْ الْيِخَالِفْ وَصِيَّةْ مِنْ الْوَصَايَا دَوْل، كَنْ هِي صَغَيْرَةْ كُلَ، كَنْ يِعَلِّمْ أَخْوَانَهْ يِسَوُّوا نَفْس الشَّيّءْ، خَلَاصْ يَجْعَلَوْا النَّادُمْ دَا صَغَيَّرْ فِي مَمْلَكَةْ اللّٰهْ. وَ لَاكِنْ النَّادُمْ الْيِطَبِّقْ الْوَصَايَا دَوْل وَ يِعَلِّمْهُمْ لِأَخْوَانَهْ، يَجْعَلَوْه كَبِيرْ فِي مَمْلَكَةْ اللّٰهْ.

نَحَمْيا 9:13

«وَ إِنْتَ نَزَلْت لَيْهُمْ فِي رَاسْ جَبَلْ سِينَاء وَ حَجَّيْت لَيْهُمْ مِنْ السَّمَاءْ وَ أَنْطَيْتهُمْ قَوَانِينْ عَدِيلِينْ وَ التَّوْرَاةْ الْمُكَرَّمْ وَ شُرُوطْ وَ وَصَايَا زَيْنِينْ.

عَزْرا 7:10

وَ عَزْرَا شَالْ نِيَّةْ مُخْلِصَةْ أَشَانْ يَقْرِي تَوْرَاةْ اللّٰهْ وَ يِطَبِّقَهْ فِي نَفْسَهْ وَ يِعَلِّمْ قَوَانِينَهْ وَ شُرُوطَهْ لِبَنِي إِسْرَائِيلْ.

خُروج 34:1

وَ بَتَّانْ اللّٰهْ قَالْ لِمُوسَى: «سَوِّي لِيحَانْ إِتْنَيْن هَنَا حَجَرْ مِثِلْ اللِّيحَانْ الْأَوَّلْ. وَ أَنَا نَكْتِبْ فَوْقهُمْ الْوَصَايَا الْأَوَّلْ كَتَبْتُهُمْ فِي اللِّيحَانْ الْإِتْنَيْن الْإِنْتَ كَسَّرْتُهُمْ.

تَثْنِية 5:31

وَ إِنْتَ كَمَانْ، يَا مُوسَى، أَقْعُدْ قِدَّامِي هِنِي وَ أَنَا نِكَلِّمَكْ كُلَّ الْوَصَايَا وَ الشُّرُوطْ وَ الْقَوَانِينْ. وَ عَلِّمْهُمْ لِشَعَبِي وَ هُمَّنْ يِطَبُّقُوهُمْ فِي الْبَلَدْ الْأَنَا نَنْطِيهَا لَيْهُمْ وَرَثَةْ.»

1 مُلوك 19:11

وَ اللّٰهْ قَالْ لَيَّهْ: «أَمْرُقْ وَ أَقِيفْ فِي الْحَجَرْ فِي قِدَّامِي أَنَا اللّٰهْ. وَ أَنَا نُفُوتْ قِدَّامَكْ.» وَ رِيحْ شَدِيدَةْ قَمَّتْ قِدَّامْ اللّٰهْ وَ شَقَّقَتْ الْجِبَالْ وَ كَسَّرَتْ الْحُجَارْ. وَ لَاكِنْ اللّٰهْ مَا قَاعِدْ فِي الرِّيحْ دِي. وَ بَعَدْ الرِّيحْ، جَاءْ زِلْزَالْ. وَ لَاكِنْ اللّٰهْ مَا قَاعِدْ فِي الزِّلْزَالْ دَا.

خُروج 19:3

وَ فِي الْبَكَانْ دَا، مُوسَى طَلَعْ فِي الْجَبَلْ لِيِقَابِلْ الرَّبّ. وَ هُو نَادَاهْ مِنْ رَاسْ الْجَبَلْ وَ قَالْ لَيَّهْ: «قُولْ الْكَلَامْ دَا لِذُرِّيَّةْ يَعْقُوبْ. خَبِّرْ بَنِي إِسْرَائِيلْ وَ قُولْ لَيْهُمْ:

خُروج 32:1

وَ وَكِتْ الشَّعَبْ شَافَوْا مُوسَى مَا نَزَلْ لَيْهُمْ عَجَلَةْ مِنْ الْجَبَلْ، هُمَّنْ جَوْا لِهَارُونْ وَ قَالَوْا لَيَّهْ: «قُمّ سَوِّي لَيْنَا صَنَمْ نَعَبُدُوهْ. وَ يُقُودْنَا فِي مَشِينَا أَشَانْ النَّادُمْ الْيُقُولُوا لَيَّهْ مُوسَى دَا، هُو بَسْ الْمَرَقَانَا مِنْ بَلَدْ مَصِرْ وَ لَاكِنْ هَسَّعْ دَا، مَا نَعَرْفُوا شُنُو الْبِقِي لَيَّهْ.»

نَحَمْيا 9:14

وَ عَلَّمْتُهُمْ كَدَرْ يَوْم السَّبْت دَا يَوْم خَاصّ لَيْك إِنْتَ. وَ أَنْطَيْتهُمْ وَصَايَا وَ قَوَانِينْ وَ شُرُوطْ التَّوْرَاةْ بِوَاسِطَةْ عَبْدَكْ مُوسَى.

زَبُور 19:12

يَاتُو يَقْدَرْ يَعَرِفْ خَطَايَهْ السَّوَّاهْ بَلَا رَايْه؟ بَرِّينِي مِنْ الذَّنِبْ الْمُلَبَّدْ لَيِّ.