خُروج 23:2 - الكتاب المقدس بالعربي الدارجي هنا تشاد

² مَا تِعَاوِنْ الْكَتِيرِينْ كَنْ هُمَّنْ يِدَوْرُوا يِسَوُّوا شَيّءْ فَسِلْ. وَ فِي الشَّرِيعَةْ، مَا تِتَلِّفْ شَهَادْتَكْ لِتِسْتَفِقْ مَعَ الْكَتِيرِينْ.

خُروج 23:2 Referenca të Kryqëzuara

أمْثال 1:15

يَا وِلَيْدِي، مَا تَمْشِي مَعَاهُمْ، أَمْشِي بَعِيدْ مِنْ دَرِبْهُمْ.

أيُّوب 31:34

وَ دَا أَشَانْ أَنَا خُفْت مِنْ كَلَامْ النَّاسْ وَ كَرَاهِيَّةْ الْقَبَايِلْ خَوَّفَتْنِي لَحَدِّي أَنَا سَكَتّْ وَ مَا مَرَقْت مِنْ بَيْتِي.

تَثْنِية 1:17

مَا تِمَيُّلُوا فِي الشَّرِيعَةْ، أَسْمَعَوْا الصَّغَيَّرْ وَ الْكَبِيرْ. مَا تَخَافَوْا مِنْ نَادُمْ أَشَانْ الشَّرِيعَةْ هِنْت الرَّبّ. وَ كَنْ الشَّرِيعَةْ بِقَتْ لَيْكُو قَوِيَّةْ كُلَ، جِيبُوهَا لَيِّ أَنَا نِشِيفْهَا.»

لُوقا 23:51

هُو مَا قَصَّدْ بِقَرَارْ الْمَجْلَسْ وَ لَا بِالْفِعِلْ الْكُبَارَاتْ سَوَّوْه. وَ هُو مِنْ حِلَّةْ وَاحِدَةْ هَنَا الْيَهُودْ الْأُسُمْهَا الرَّامَةْ وَ مُؤمِنْ بِمَمْلَكَةْ اللّٰهْ الْجَايَةْ.

مَرْخُوس 15:15

وَ بِلَاطُسْ دَوَّرْ النَّاسْ يَرْضَوْا بَيَّهْ وَ أَشَانْ دَا مَرَقْ لَيْهُمْ بَرَابَاسْ وَ عِيسَى جَلَدَوْه. وَ خَلَاصْ، سَلَّمَهْ لِلْعَسْكَرْ أَشَانْ يَكْتُلُوهْ فِي الصَّلِيبْ.

أمْثال 4:14

مَا تَمْشِي فِي طَرِيقْ الْعَاصِيِينْ وَ لَا تِشِيلْ دَرِبْ الْفَسْلِينْ.

1 مُلوك 19:10

وَ إِلِيَاسْ رَدَّ لَيَّهْ وَ قَالْ: «يَا اللّٰهْ الْإِلٰـهْ الْقَادِرْ، عِنْدِي مَحَبَّةْ شَدِيدَةْ لَيْك. وَ بَنِي إِسْرَائِيلْ نَقَضَوْا مُعَاهَدَتَكْ وَ كَسَّرَوْا كُلَّ مَدَابْحَكْ وَ كَتَلَوْا أَنْبِيَائَكْ بِالْسَّيْف. وَ أَنَا فَضَّلْت وِحَيْدِي وَ هُمَّنْ قَاعِدِينْ يِفَتُّشُونِي لِيَكْتُلُونِي.»

يَشُوع 24:15

وَ لَاكِنْ كَنْ مَا تِدَوْرُوا تَعَبُدُوا اللّٰهْ، أَعَزُلُوا الْيَوْم الْإِلٰـهْ التِّدَوْرُوا تَعَبُدُوهْ. مُمْكِنْ تِشِيلُوا إِلٰـهَاتْ الْعَبَدَوْهُمْ جُدُودْكُو غَادِي لِبَحَرْ الْفُرَاتْ، وَلَّا تِشِيلُوا إِلٰـهَاتْ الْأَمُورِيِّينْ مِنْ الْبَلَدْ الْإِنْتُو سَاكْنِينْ فَوْقهَا. وَ لَاكِنْ أَنَا وَ عَايِلْتِي كَمَانْ، أَنِحْنَ نَعَبُدُوا اللّٰهْ!»

أعمال الرُسُل 25:9

وَ لَاكِنْ فَسْتُسْ دَوَّرْ يِسَوِّي نَفْسَهْ زَيْن قِدَّامْ الْيَهُودْ أَشَانْ هُمَّنْ يَرْضَوْا بَيَّهْ. وَ أَشَانْ دَا، هُو سَأَلْ بُولُسْ وَ قَالْ: «تِدَوْر تَمْشِي فِي مَدِينَةْ الْقُدُسْ وَ نَقْطَعْ لَيْك الشَّرِيعَةْ هِنَاكْ وَلَّا؟»

أعمال الرُسُل 24:27

لَاكِنْ بَعَدْ سَنْتَيْن، فِيلِكْس حَوَّلَوْه وَ خَطَّوْا بُرْكِيُوسْ فَسْتُسْ وَالِي فِي بَدَلَهْ. وَ فِيلِكْس مَا طَلَقْ بُولُسْ مِنْ السِّجِنْ أَشَانْ دَوَّرْ الْيَهُودْ يَرْضَوْا بَيَّهْ.

إرْمِيا 38:9

«يَا سِيدِي الْمَلِكْ! النَّاسْ دَوْل سَوَّوْا الْفَسِلْ لِلنَّبِي إِرْمِيَا وَكِتْ زَقَلَوْه فِي النُّقْرَةْ. وَ فِي النُّقْرَةْ دِي أَكُونْ هُو يُمُوتْ بِالْجُوعْ أَشَانْ هَسَّعْ فِي الْمَدِينَةْ دِي كُلَ، مَا فِي خُبْزَةْ.»

إرْمِيا 37:21

وَ خَلَاصْ، الْمَلِكْ صِدْقِيَّا أَنْطَى أَمُرْ يُخُطُّوا إِرْمِيَا فِي فَضَايَةْ الْحُرَّاسْ وَ كُلَّ يَوْم يِجِيبُوا لَيَّهْ خُبْزَةْ مِنْ شَارِعْ الْخَبَّازِينْ لَحَدِّي كُلَّ الْخُبْزَةْ هِنْت الْمَدِينَةْ تِكَمِّلْ. وَ بِمِثِلْ دَا، إِرْمِيَا قَعَدْ فِي فَضَايَةْ الْحُرَّاسْ.

إرْمِيا 37:15

وَ الْكُبَارَاتْ زِعِلَوْا زَعَلْ شَدِيدْ ضِدّ إِرْمِيَا وَ قَمَّوْا فَرَشَوْه وَ جَنْزَرَوْه فِي بَيْت يُونَتَانْ الْكَاتِبْ أَشَانْ هُمَّنْ سَوَّوْا فِي الْبَكَانْ دَا سِجِنْ.

زَبُور 72:2

هُو يِشَارِعْ شَعَبَكْ بِالْعَدَالَةْ وَ مَسَاكِينَكْ حَسَبْ الشَّرِيعَةْ.

لاوِيِّين 19:15

«وَ فِي الشَّرِيعَةْ، مَا تِمَيُّلُوا وَ لَا تَنْصُرُوا الْقَادِرْ وَ لَا الضَّعِيفْ وَ لَاكِنْ أَحْكُمُوا أَمْبَيْن أَخْوَانْكُو بِالْعَدِلْ.

تكوين 19:4

وَ لِسَّاعْ مَا نَامَوْا كَيْ بَسْ، كُلَّ الرُّجَالْ هَنَا مَدِينَةْ سَدُومْ مِنْ صُبْيَانْهُمْ لَحَدِّي شِيَّابْهُمْ جَوْا وَ حَوَّقَوْا الْبَيْت.

تكوين 6:12

وَ الرَّبّ شَافْ الْأَرْض مَلَانَةْ بِظُلُمْ وَ كُلَّ النَّاسْ قَاعِدِينْ يِسَوُّوا الظُّلُمْ.

رَوْمَا 1:32

هُمَّنْ عِرْفَوْا قَرَارْ اللّٰهْ الْبُقُولْ الْمَوْت وَاجِبْ لِأَيِّ نَادُمْ الْيِسَوِّي الْعَمَلْ الْمِثِلْ دَا. وَ لَاكِنْ مَا خَلَّوْا مِنْهُمْ الذُّنُوبْ دَوْل وَ هُمَّنْ رَضْيَانِينْ بِالنَّاسْ الْيِسَوُّوهُمْ كُلَ.

حِزْقِيال 9:9

وَ هُو قَالْ لَيِّ: «خَطَا بَنِي إِسْرَائِيلْ وَ بَنِي يَهُوذَا دَا كَبِيرْ مَرَّةْ وَاحِدْ! الْبَلَدْ أَنْمَلَتْ بِالدَّمّ وَ الْمَدِينَةْ أَنْمَلَتْ بِالظُّلُمْ. أَشَانْ هُمَّنْ قَالَوْا: ‹اللّٰهْ خَلَّى بَلَدْنَا! هُو مَا يَقْدَرْ يِشِيفْنَا!›

تَثْنِية 24:17

وَ مَا تِدَنْقُسُوا الشَّرِيعَةْ لِلْأَجْنَبِي وَ الْأَتِيمْ وَ مَا تَكُرْبُوا فِي الضَّمَانَةْ فَرْدَةْ هَنَا مَرَةْ أَرْمَلَةْ.

تَثْنِية 16:19

وَ أَبَداً مَا تِدَنْقُسُوا الشَّرِيعَةْ وَ مَا تِشِيفُوا نَادُمْ أَحْسَنْ مِنْ نَادُمْ وَ مَا تَقْبَلْ رَشْوَةْ أَشَانْ هِي تَعَمِي عُيُونْ الْحَكِيمْ وَ تِعَوِّجْ كَلَامْ الصَّالِحِينْ.

تكوين 7:1

وَ اللّٰهْ قَالْ لِنُوحْ: «أَدْخُلْ فِي السَّفِينَةْ، إِنْتَ وَ أَهَلْ بَيْتَكْ أَشَانْ أَنَا شِفْت إِنْتَ وِحَيْدَكْ بَسْ صَالِحْ قِدَّامِي فِي لُبّ كُلَّ النَّاسْ الْعَايْشِينْ فِي زَمَنَكْ دَا.

حَقَّاي 1:4

«هَسَّعْ، إِنْتُو تَسْكُنُوا فِي بُيُوتْ الْجَمَّلْتُوهُمْ بِحَطَبْ وَ لَاكِنْ بَيْت اللّٰهْ قَاعِدْ مُدَمَّرْ. دَا عَدِيلْ وَلَّا؟»

1 صَمُوِيل 15:9

وَ شَاوُولْ وَ عَسْكَرَهْ خَلَّوْا مَا دَمَّرَوْا الْمَلِكْ أَقَاقْ وَ كُلَّ الْبَهَايِمْ السَّمْحِينْ وَ سُمَانْ مِثِلْ الْغَنَمْ وَ الْبَقَرْ وَ الْحُمْلَانْ. وَ كُلَّ شَيّءْ سَمَحْ وَ عِنْدَهْ فَايْدَةْ مَا دَمَّرَوْه وَ لَاكِنْ دَمَّرَوْا كُلَّ شَيّءْ الضَّعِيفْ وَ الْمَا عِنْدَهْ فَايْدَةْ.

أمْثال 18:5

مَا عَدِيلْ تَنْصُرْ الْعَاصِي وَ لَا تَظْلُمْ الصَّالِحْ فِي الشَّرِيعَةْ.

1 صَمُوِيل 15:24

وَ خَلَاصْ، شَاوُولْ قَالْ لِصَمُوِيلْ: «أَنَا أَذْنَبْت! أَشَانْ خَالَفْت أَوَامِرْ اللّٰهْ وَ وَصِيّتَكْ إِنْتَ. أَنَا خُفْت مِنْ الرُّجَالْ الْمَعَايِ وَ تَابَعْت كَلَامْهُمْ.