خُروج 18:12 - الكتاب المقدس بالعربي الدارجي هنا تشاد

¹² خَلَاصْ، يَسْرُونْ نَسِيبْ مُوسَى قَدَّمْ ضَحِيَّةْ مُحَرَّقَةْ وَ ضَحَايَا آخَرِينْ لِلرَّبّ. وَ هَارُونْ وَ كُلَّ شُيُوخْ بَنِي إِسْرَائِيلْ جَوْا لِيَاكُلُوا مَعَ نَسِيبْ مُوسَى قِدَّامْ الرَّبّ.

خُروج 18:12 Referenca të Kryqëzuara

تَثْنِية 12:7

وَ فِي الْبَكَانْ دَا، تَاكُلُوا قِدَّامْ اللّٰهْ إِلٰـهْكُو. إِنْتُو وَ عَايِلَاتْكُو تَفْرَحَوْا بِكُلَّ شَيّءْ السَّوَّيْتُوهْ وَ بَيَّهْ اللّٰهْ إِلٰـهْكُو بَارَكَاكُو.

تكوين 31:54

وَ خَلَاصْ، دَبَحْ ضَحِيَّةْ لِلرَّبّ فِي رَاسْ الْجَبَلْ. وَ عَزَمْ أَخْوَانَهْ لِلْعَشَاءْ وَ هُمَّنْ أَكَلَوْا سَوَا وَ نَامَوْا فِي رَاسْ الْجَبَلْ.

خُروج 24:11

وَ لَاكِنْ الرَّبّ مَا مَدَّ إِيدَهْ لِيَهْلِكْ كُبَارَاتْ بَنِي إِسْرَائِيلْ. هُمَّنْ شَافَوْا الرَّبّ وَ بَعَدْ دَا، أَكَلَوْا وَ شِرْبَوْا قِدَّامَهْ.

خُروج 24:5

وَ مُوسَى رَسَّلْ صُبْيَانْ مِنْ بَنِي إِسْرَائِيلْ وَ هُمَّنْ قَدَّمَوْا لِلّٰهْ ضَحِيَّةْ مُحَرَّقَةْ وَ دَبَحَوْا تِيرَانْ ضَحَايَا سَلَامَةْ.

1 كُرُنْتُس 10:31

وَ خَلَاصْ، فِي كُلِّ شَيّءْ التَّاكُلُوهْ وَ تَشَرْبَوْه وَ تِسَوُّوهْ، مَجُّدُوا اللّٰهْ. مَجُّدُوهْ فِي كُلِّ شَيّءْ.

1 كُرُنْتُس 10:21

مَا وَاجِبْ تَشَرْبَوْا مِنْ كَاسْ رَبِّنَا الْمَسِيحْ وَ بَتَّانْ مِنْ كَاسْ الشَّوَاطِينْ كُلَ. مَا وَاجِبْ تِشْتَرُكُوا فِي عَشَاءْ رَبِّنَا الْمَسِيحْ وَ بَتَّانْ فِي عَشَاءْ الشَّوَاطِينْ كُلَ.

1 كُرُنْتُس 10:18

فَكُّرُوا فِي عِبَادَةْ هَنَا بَنِي إِسْرَائِيلْ. النَّاسْ الْيَاكُلُوا مِنْ لَحَمْ الضَّحِيَّةْ الْقَدَّمَوْهَا فِي الْمَدْبَحْ مُشْتَرِكِينْ فِي الضَّحِيَّةْ دِي.

لُوقا 14:15

وَ نَادُمْ وَاحِدْ الْقَاعِدْ يَاكُلْ مَعَايَهْ سِمِعْ الْكَلَامْ دَا وَ حَجَّى لِعِيسَى وَ قَالْ: «مَبْرُوكْ لِلنَّاسْ الْيِلْعَشَّوْا فِي عَازُومَةْ هَنَا مَمْلَكَةْ اللّٰهْ!»

لُوقا 14:1

وَ يَوْم وَاحِدْ، نَادُمْ مِنْ كُبَارَاتْ الْفَرِيزِيِّينْ عَزَمْ عِيسَى أَشَانْ يَاكُلْ مَعَايَهْ وَ عِيسَى مَشَى لَيَّهْ فِي بَيْتَهْ. وَ دَا يَوْم السَّبْت وَ الضِّيفَانْ الْآخَرِينْ خَطَّوْا بَالْهُمْ فِي عِيسَى أَشَانْ يِشِيفُوا شُنُو الشَّيّءْ الْيِسَوِّيهْ.

دَنْيال 10:3

وَ أَنَا مَا أَكَلْت أَكِلْ حَلُو وَ لَا لَحَمْ وَ لَا شِرِبْت خَمَرْ. وَ عِطِرْ كُلَ مَا صَبَّيْتَهْ فِي جِسْمِي لَحَدِّي التَّلَاتَةْ أُسْبُوعْ دَوْل كَمَّلَوْا.

أيُّوب 42:11

وَ كُلَّ أَخْوَانَهْ وَ أَخْوَاتَهْ وَ نَاسْ مَعْرَفَتَهْ الزَّمَانْ جَوْا زَارَوْه. هُمَّنْ أَكَلَوْا مَعَايَهْ فِي بَيْتَهْ وَ حَنَّوْا فَوْقَهْ وَ كَفَّرَوْا لَيَّهْ مِنْ كُلَّ الْبَلَاءْ النَّزَّلَهْ فَوْقَهْ اللّٰهْ. وَ أَيِّ وَاحِدْ مِنْهُمْ أَنْطَاهْ لِأَيُّوبْ حَجَرْ فُضَّةْ وَ خَاتِمْ هَنَا دَهَبْ.

أيُّوب 42:8

وَ بِسَبَبْ دَا، شِيلُوا سَبْعَةْ تَوْر وَ سَبْعَةْ كَبِشْ وَ أَمْشُوا أَلْقَوْه لِعَبْدِي أَيُّوبْ وَ قَدُّمُوا الْبَهَايِمْ دَوْل ضَحِيَّةْ مُحَرَّقَةْ. وَ عَبْدِي أَيُّوبْ يَسْأَلْ لَيْكُو. وَ فِي شَانَهْ هُو بَسْ، أَنَا مَا نِسَوِّي فَوْقكُو حَسَبْ طَمَاسِتْكُو. وَ إِنْتُو مَا حَجَّيْتُوا بَيِّ بِكَلَامْ صَحِيحْ مِثِلْ كَلَامْ عَبْدِي أَيُّوبْ.»

أيُّوب 1:5

وَ وَكِتْ أَيَّامْ الْعَازُومَةْ يِكَمُّلُوا، أَيُّوبْ يُقُمّ بِفَجُرْ بَدْرِي وَ يِقَدِّمْ ضَحِيَّةْ مُحَرَّقَةْ لِأَيِّ وَاحِدْ مِنْ عِيَالَهْ لِيِسَوِّيهُمْ طَاهِرِينْ. أَشَانْ هُو يُقُولْ: «أَكُونْ عِيَالِي سَوَّوْا ذَنِبْ وَ كَفَرَوْا بِالرَّبّ!» وَ أَيُّوبْ يِسَوِّي مِثِلْ دَا فِي كُلِّ مَرَّةْ.

2 أخبار 30:22

وَ حِزْقِيَّا شَجَّعْ كُلَّ اللَّاوِيِّينْ الْعِنْدُهُمْ إِكْرَامْ عَدِيلْ لِلّٰهْ. وَ فِي مُدَّةْ سَبْعَةْ يَوْم، هُمَّنْ أَكَلَوْا أَكِلْ الْعِيدْ وَ قَدَّمَوْا ضَحَايَا سَلَامَةْ وَ ضَحَايَا آخَرِينْ وَ شَكَرَوْا اللّٰهْ رَبّ جُدُودْهُمْ.

2 صَمُوِيل 9:7

وَ دَاوُدْ قَالْ لَيَّهْ: «مَا تَخَافْ. أَنَا نِسَوِّي لَيْك خَيْر فِي شَانْ الْأَمَانْ الْعِنْدِي لِأَبُوكْ يُونَتَانْ. وَ نَنْطِيكْ كُلَّ زِرَاعَةْ هَنَا جِدَّكْ شَاوُولْ. وَ إِنْتَ تَاكُلْ مَعَايِ دَايْماً فِي بَيْتِي.»

تَثْنِية 27:7

وَ قَدُّمُوا ضَحَايَا السَّلَامَةْ وَ آكُلُوا فِي الْبَكَانْ دَا وَ أَفْرَحَوْا قِدَّامْ اللّٰهْ إِلٰـهْكُو.

خُروج 2:20

وَ هُو قَالْ لَيْهِنْ: «وَيْن الرَّاجِلْ دَا؟ مَالَا جِيتَنْ خَلَّيْتَنَّهْ؟ أَمْشَنْ نَّادَنَّهْ لِيَجِي يَاكُلْ مَعَانَا.» وَ هِنَّ مَشَنْ نَّادَنَّهْ.

تكوين 43:25

مِنْ سِمْعَوْا كَدَرْ هُمَّنْ يِغَدُّوا مَعَ يُوسُفْ، مَرَقَوْا الْهَدِيَّةْ الدَّايْرِينْ يَنْطُوهَا لَيَّهْ فِي وَكْت الْغَدَاءْ.

تكوين 26:25

وَ فِي الْبَكَانْ دَا، إِسْحَاقْ بَنَى مَدْبَحْ وَ سَأَلْ بِأُسُمْ اللّٰهْ. وَ بَنَى فَرِيقَهْ وَ خَدَّامِينَهْ حَفَرَوْا بِيرْ.

تكوين 12:7

وَ اللّٰهْ بَانْ لِأَبْرَامْ وَ قَالْ: «الْبَلَدْ دِي نَنْطِيهَا لِذُرِّيّتَكْ.» وَ فِي الْبَكَانْ دَا، أَبْرَامْ بَنَى مَدْبَحْ لِيِقَدِّمْ فَوْقَهْ ضَحَايَا لِلّٰهْ الْبَانْ لَيَّهْ.

تكوين 8:20

وَ بَعَدْ دَا، نُوحْ بَنَى مَدْبَحْ لِيِقَدِّمْ فَوْقَهْ ضَحَايَا لِلّٰهْ. وَ شَالْ مِنْ كُلَّ الْبَهَايِمْ وَ الطُّيُورْ الْأَكِلْهُمْ حَلَالْ وَ حَرَّقَاهُمْ فِي الْمَدْبَحْ الْهُو بَنَاهْ.

تكوين 4:4

وَ هَابِيلْ كُلَ قَدَّمْ هَدِيَّةْ خُرْفَانْ أَوْلَادْ الْبِكِرْ مِنْ غَنَمَهْ بِشَحَمْهُمْ. وَ اللّٰهْ قِبِلْ هَدِيَّةْ هَابِيلْ

خُروج 2:16

وَ فِيَّهْ رَاجِلْ دِينْ وَاحِدْ أُسْمَهْ رَعُوِيلْ فِي بَلَدْ مِدْيَانْ عِنْدَهْ سَبْعَةْ بَنَاتْ. وَ هِنَّ جِنْ لِيِسِلَّنْ أَلْمِي مِنْ الْبِيرْ وَ يَمْلَنْ الْحِيطَانْ لِيَزْقَنْ غَنَمْ أَبُوهِنْ.

خُروج 3:1

وَ مُوسَى قَاعِدْ يَسْرَحْ بِغَنَمْ هَنَا نَسِيبَهْ يَسْرُونْ وَ هُو بَسْ رَاجِلْ الدِّينْ هَنَا بَلَدْ مِدْيَانْ. وَ يَوْم وَاحِدْ، مُوسَى سَاقْ الْغَنَمْ غَادِي لِلصَّحَرَاء وَ وِصِلْ فِي جَبَلْ اللّٰهْ الْأُسْمَهْ حُورِيبْ.

خُروج 18:13

وَ فِي الْيَوْم التَّانِي، مُوسَى قَاعِدْ يِشَارِعْ الشَّعَبْ وَ هُمَّنْ وَاقْفِينْ قِدَّامَهْ مِنْ الْفَجُرْ لَحَدِّي الْعَشِيَّةْ.

خُروج 20:24

أَبْنُوا لَيِّ مَدْبَحْ مِنْ تُرَابْ لِتِقَدُّمُوا لَيِّ فَوْقَهْ ضَحَايَا مُحَرَّقِينْ وَ ضَحَايَا سَلَامَةْ مِنْ غَنَمْكُو وَ بَقَرْكُو. وَ أَنَا نَجِي نِبَارِكُّو فِي كُلَّ بَكَانْ التِّنَادُوا فَوْقَهْ أُسْمِي.

خُروج 33:7

وَ أَيِّ وَكِتْ كَنْ الشَّعَبْ نَزَلَوْا فِي بَكَانْ، مُوسَى يِشِيلْ الْخَيْمَةْ وَ يَبْنِيهَا بَرَّا بَعِيدْ مِنْ الْفَرِيقْ. وَ مُوسَى سَمَّاهَا خَيْمَةْ الْإِجْتِمَاعْ. وَ أَيِّ نَادُمْ كَنْ دَوَّرْ يَسْأَلْ اللّٰهْ، يَمْشِي لَيْهَا بَرَّا مِنْ الْفَرِيقْ.

عَدد 10:29

وَ مُوسَى قَالْ لِحُبَابْ وِلَيْد نَسِيبَهْ رَعُوِيلْ الْمِدْيَانِي: «أَنِحْنَ سَايْرِينْ لِلْبَكَانْ الْاللّٰهْ قَالْ يَنْطِيهْ لَيْنَا. تَعَالْ نَمْشُوا سَوَا وَ نِسَوُّوا لَيْك الْخَيْر أَشَانْ اللّٰهْ قَالْ يِسَوِّي لِبَنِي إِسْرَائِيلْ الْخَيْر.»

تكوين 26:30

وَ خَلَاصْ، إِسْحَاقْ سَوَّى لَيْهُمْ عَازُومَةْ وَ هُمَّنْ أَكَلَوْا وَ شِرْبَوْا.