أسْتِير 4:3 - الكتاب المقدس بالعربي الدارجي هنا تشاد

³ وَ فِي أَيِّ وُلَايَةْ الْوَصَّلْ فَوْقهَا قَرَارْ الْمَلِكْ وَ قَانُونَهْ، بِقِي حِزِنْ كَبِيرْ لِلْيَهُودْ وَ هُمَّنْ صَامَوْا وَ بَكَوْا وَ نَاحَوْا وَ كَتِيرِينْ مِنْهُمْ رَقَدَوْا فِي الشُّوَالَاتْ وَ فِي الرُّمَادْ.

أسْتِير 4:3 Referenca të Kryqëzuara

إشَعْيا 22:12

وَ دَا الْيَوْم الْفَوْقَهْ اللّٰهْ الرَّبّ الْقَادِرْ نَادَاكُو لِتَبْكُوا وَ تُنُوحُوا وَ لِتِزَيُّنُوا رُوسَيْكُو وَ تَلْبَسَوْا خُلْقَانْ التَّوْبَةْ.

دَنْيال 9:3

وَ فِي الْبَكَانْ دَا، طَوَّالِي أَنَا وَجَّهْت لِلرَّبّ إِلٰـهِي وَ شَحَدْتَهْ بِالصَّلَاةْ وَ الصِّيَامْ. وَ لِبِسْت خَلَقْ التَّوْبَةْ وَ صَبَّيْت رُمَادْ فِي رَاسِي.

إشَعْيا 58:5

وَ الصِّيَامْ الْأَنَا نَرْضَى بَيَّهْ، هُو مِثِلْ دَا وَلَّا؟ إِلَّا يَوْم وَاحِدْ بَسْ، الْفَوْقَهْ الْإِنْسَانْ يِمَسْكِنْ نَفْسَهْ وَلَّا؟ وَ يَرْخِي رَاسَهْ مِثِلْ عَقَيْقَايْ الْمَرْضَانَةْ وَ يَلْبَسْ خَلَقْ التَّوْبَةْ وَ يَرْقُدْ فِي رُمَادْ وَلَّا؟ دَا بَسْ تِنَادُوهْ صِيَامْ وَلَّا؟ وَ يَوْم صِيَامْ مِثِلْ دَا، أَنَا اللّٰهْ نَرْضَى بَيَّهْ وَلَّا؟

إشَعْيا 22:4

وَ فِي شَانْ دَا، أَنَا قُلْت: «مَا تِشِيفُونِي! خَلُّونِي نَبْكِي بِحُرْقَةْ. وَ مَا تِحَاوُلُوا تِحَنُّسُونِي أَشَانْ أُمَّتِي الْمِثِلْ بِنْت أَمِّي أَدَّمَّرَتْ.»

مَتَّى 25:30

وَ لَاكِنْ الْخَدَّامْ الْمَا يَنْفَعْ دَا، أَزْقُلُوهْ فِي الضَّلَامْ الْبَرَّانِي. هِنَاكْ نَاسْ يَبْكُوا وَ يِعَضُّوا سُنُونْهُمْ مِنْ الْعَذَابْ.›

مَتَّى 22:13

وَ الْمَلِكْ أَمَرْ عَبِيدَهْ وَ قَالْ: ‹أَرْبُطُوا رِجِلَيْنَهْ وَ إِيدَيْنَهْ وَ أَزْقُلُوهْ فِي الضَّلَامْ الْبَرَّانِي. هِنَاكْ نَاسْ يَبْكُوا وَ يِعَضُّوا سُنُونْهُمْ مِنْ الْعَذَابْ.›

مَتَّى 13:42

وَ يَزْقُلُوهُمْ فِي نَارْ جَهَنَّمْ. هِنَاكْ يَبْكُوا وَ يِعَضُّوا سُنُونْهُمْ مِنْ الْعَذَابْ.

أسْتِير 4:16

«أَمْشِي لِمّ كُلَّ الْيَهُودْ الْقَاعِدِينْ فِي مَدِينَةْ شُوشَةْ وَ صُومُوا فِي شَانِي. مَا تَاكُلُوا وَ لَا تَشَرْبَوْا وَ لَا بِالنَّهَارْ وَ لَا بِاللَّيْل لِمُدَّةْ تَلَاتَةْ يَوْم. وَ أَنَا كُلَ نُصُومْ وَ بَنَاتِي الْخَدَّامَاتْ كُلَ يُصُومَنْ كُلَ مِثِلْكُو. وَ بَعَدْ دَا، أَنَا نَمْشِي نِقَابِلْ الْمَلِكْ حَتَّى كَانْ دَا ضِدّ الْقَانُونْ كُلَ. وَ كَنْ وَاجِبْ لَيِّ الْمَوْت، نُمُوتْ.»

أسْتِير 3:12

وَ فِي يَوْم 13 هَنَا الشَّهَرْ الْأَوَّلْ، نَادَوْا كُلَّ كُتَّابْ الْمَلِكْ وَ كَتَبَوْا كُلَّ أَمُرْ هَمَانْ فِي مَكْتُوبْ لِمُحَافِظِينْ الْمَمْلَكَةْ وَ لِلْحُكَّامْ هَنَا أَيِّ وُلَايَةْ وَ لِلْمَسَائِيلْ هَنَا أَيِّ شَعَبْ وَ كَتَبَوْا لِأَيِّ وُلَايَةْ حَسَبْ كِتَابِتْهَا وَ لُغِّتَهْ. وَ هُمَّنْ كَتَبَوْا الْجَوَابَاتْ دَوْل بِأُسُمْ الْمَلِكْ أَشَوِرُوشْ وَ خَتَمَوْهُمْ بِخِتِمْ الْمَلِكْ.

أسْتِير 1:1

التَّارِيخْ دَا بِقِي فِي وَكِتْ الْمَلِكْ أَشَوِرُوشْ. وَ أَشَوِرُوشْ دَا حَكَمْ فِي 127 وُلَايَةْ مِنْ بَلَدْ الْهِنْد لَحَدِّي بَلَدْ الْحَبَشَةْ.

1 صَمُوِيل 11:4

وَ وَكِتْ الْمُرَسَّلِينْ وَصَّلَوْا فِي حِلَّةْ شَاوُولْ الْأُسُمْهَا قِبَيْعَةْ، حَجَّوْا بِالْكَلَامْ دَا لِكُلَّ الشَّعَبْ وَ الشَّعَبْ قَمَّوْا يَبْكُوا بِحِسّ عَالِي.

أسْتِير 4:2

وَ مَشَى لَحَدِّي خَشُمْ بَابْ قَصِرْ الْمَلِكْ وَ وَقَفْ هِنَاكْ أَشَانْ نَادُمْ مَا يَقْدَرْ يَدْخُلْ فِي قَصِرْ الْمَلِكْ كَنْ لَابِسْ خُلْقَانْ الْحِزِنْ.

أسْتِير 4:4

وَ الْبَنَاتْ الْخَدَّامَاتْ الْقَاعِدَاتْ مَعَ الْمَلِكَةْ أَسْتِيرْ وَ خَدَّامِينْهَا جَوْا وَ خَبَّرَوْهَا بِحِزِنْ مَرْدَكَايْ وَ هِي بَرْجَلَتْ مَرَّةْ وَاحِدْ. وَ هِي رَسَّلَتْ خُلْقَانْ لِمَرْدَكَايْ أَشَانْ يَلْبَسْهُمْ وَ يَمْرُقْ مِنَّهْ خُلْقَانْ الْحِزِنْ وَ لَاكِنْ هُو أَبَى.

أسْتِير 9:31

وَ الْجَوَابَاتْ دَوْل يَطُلْبُوا مِنْ الْيَهُودْ يِعَيُّدُوا عِيدْ الْفُورِيمْ فِي الْوَكِتْ الْمُحَدَّدْ لَيَّهْ حَسَبْ الْأَمُرْ الْأَنْطَوْه مَرْدَكَايْ الْيَهُودِي وَ الْمَلِكَةْ أَسْتِيرْ لِكُلَّ الْيَهُودْ وَ ذُرِّيِّتْهُمْ. وَ دَا بُخُصّ قَرَارْ الصِّيَامْ وَ الْحِزِنْ كُلَ.

يَشُوع 7:6

وَ فِي الْبَكَانْ دَا، يَشُوعْ وَ شُيُوخْ بَنِي إِسْرَائِيلْ شَرَّطَوْا خُلْقَانْهُمْ مِنْ الْحِزِنْ وَ صَبَّوْا تُرَابْ فِي رُوسَيْهُمْ. وَ وَقَعَوْا بِوُجُوهُّمْ فِي التُّرَابْ وَ سَجَدَوْا قِدَّامْ صَنْدُوقْ اللّٰهْ لَحَدِّي الْعَشِيَّةْ.

أيُّوب 2:8

وَ خَلَاصْ، أَيُّوبْ شَالْ شِقْفَةْ وَ قَاعِدْ يُحُكّ بَيْهَا وَ قَعَدْ فِي الرُّمَادْ.

حِزْقِيال 27:30

وَ يَبْكُوا لَيْكِ وَ يَصْرَخَوْا بِحِزِنْ. وَ يُصُبُّوا تُرَابْ فِي رُوسَيْهُمْ وَ يِلْمَرْمَغَوْا فِي الرُّمَادْ.

يُونُس 3:6

وَ الْمَلِكْ، مِنْ سِمِعْ الْخَبَرْ دَا، طَوَّالِي قَمَّ مِنْ كُرْسِي حَقَّهْ وَ سَلَّ خَلَقَهْ هَنَا الْمُلُوكْ وَ لِبِسْ خَلَقْ التَّوْبَةْ وَ قَعَدْ فِي الرُّمَادْ.