أفَسُس 6:9 - الكتاب المقدس بالعربي الدارجي هنا تشاد

⁹ أَسْمَعَوْا، يَا سِيَادْ الْعَبِيدْ، طَبُّقُوا نَفْس التَّعْلِيمْ. وَ مَا تِهَدُّدُوا عَبِيدْكُو. مَا تَنْسَوْا كَدَرْ إِنْتُو وَ عَبِيدْكُو كُلُّكُو عَبِيدْ هَنَا سِيدْ وَاحِدْ. وَ هُو الْقَاعِدْ فِي السَّمَاوَاتْ وَ مَا يِشِيفْ نَادُمْ أَخَيْر مِنْ نَادُمْ.

أفَسُس 6:9 Referenca të Kryqëzuara

كُلُوسِي 3:25

وَ أَيِّ نَادُمْ الْيِسَوِّي شَيّءْ فَسِلْ، الرَّبّ يِعَاقِبَهْ فِي شَانْ فَسَالْتَهْ. رَبِّنَا مَا يِشِيفْ نَادُمْ أَخَيْر مِنْ الْآخَرْ.

أعمال الرُسُل 10:34

وَ بُطْرُسْ قَمَّ يِكَلِّمْ لَيْهُمْ وَ قَالْ: «خَلَاصْ دَهَابَ أَنَا فِهِمْت كَدَرْ صَحِيحْ كَيْ، اللّٰهْ مَا يِشِيفْ قَبِيلَةْ وَاحِدَةْ أَخَيْر مِنْ قَبَايِلْ آخَرِينْ.

رَوْمَا 2:11

أَشَانْ اللّٰهْ يِشِيفْ كُلَّ الْقَبَايِلْ سَوَا سَوَا.

لُوقا 6:31

وَ سَوُّوا لِلنَّاسْ الشَّيّءْ الْإِنْتُو ذَاتْكُو تِدَوْرُوا النَّاسْ يِسَوُّوهْ لَيْكُو.

مَتَّى 7:12

«وَ خَلَاصْ، الشَّيّءْ التِّدَوْرُوا النَّاسْ يِسَوُّوهْ لَيْكُو، دَا بَسْ الشَّيّءْ الْوَاجِبْ تِسَوُّوهْ لِلنَّاسْ. وَ دِي بَسْ زِبْدَةْ كَلَامْ التَّوْرَاةْ وَ الْأَنْبِيَاء.

تَثْنِية 10:17

أَشَانْ اللّٰهْ إِلٰـهْكُو، هُو إِلٰـهْ الْإِلٰـهَاتْ وَ رَبّ الْأَرْبَابْ. وَ هُو الْإِلٰـهْ الْعَظِيمْ وَ الْقَادِرْ وَ الْمُخِيفْ. وَ هُو عَادِلْ وَ مَا يَرْضَى بِالرَّشْوَةْ.

يَعْقُوب 2:13

كَنْ نَادُمْ مَا يَرْحَمْ النَّاسْ، اللّٰهْ كُلَ مَا يَرْحَمَهْ فِي يَوْم الْحِسَابْ. وَ لَاكِنْ النَّادُمْ الْيَرْحَمْ النَّاسْ، مَا يَخَافْ مِنْ يَوْم الْحِسَابْ.

يَعْقُوب 2:8

بِالصَّحِيحْ، دَا عَدِيلْ كَنْ إِنْتُو قَاعِدِينْ تِتَابُعُوا شُرُوطْ التَّوْرَاةْ هَنَا مَمْلَكَةْ اللّٰهْ الْقَاعِدِينْ فِي الْكِتَابْ الْبُقُولُوا: <حِبّ أَخُوكْ مِثِلْ تِحِبّ نَفْسَكْ.>

1 كُرُنْتُس 1:2

وَ نِسَلُّمُوكُو إِنْتُو جَمَاعَةْ الْمُؤمِنِينْ هَنَا اللّٰهْ الْقَاعِدِينْ فِي حِلَّةْ كُرُنْتُسْ، إِنْتُو الْاللّٰهْ خَصَّصَاكُو بِعَلَاقِتْكُو مَعَ الْمَسِيحْ عِيسَى. اللّٰهْ نَادَاكُو فِي دَرْبَهْ أَشَانْ تَبْقَوْا خَاصِّينْ سَوَا مَعَ كُلَّ النَّاسْ الْيَدْعُوا فِي أَيِّ بَكَانْ بِأُسُمْ رَبِّنَا عِيسَى الْمَسِيحْ وَ هُو رَبُّهُمْ وَ رَبِّنَا.

يُوحَنَّا 13:13

إِنْتُو تُقُولُوا أَنَا مُعَلِّمْكُو وَ سَيِّدْكُو وَ كَلَامْكُو صَحِيحْ.

يَعْقُوب 5:4

وَ لَاكِنْ إِنْتُو مَا كَفَّيْتُوا أُجْرَةْ الْخَدَّامِينْ الْخَدَمَوْا فِي زِرَاعِتْكُو. دَاهُو قَاعِدِينْ يَشْكُوا مِنْكُو! وَ النَّاسْ الْقَطَعَوْا زِرَاعِتْكُو قَاعِدِينْ يَصْرَخَوْا وَ اللّٰهْ الْقَادِرْ سِمِعْ صِرَاخْهُمْ.

1 كُرُنْتُس 7:22

وَ أَنَا قُلْت لَيْك مَا تَزْعَلْ أَشَانْ الْعَبِدْ الْاللّٰهْ نَادَاهْ فِي دَرِبْ رَبِّنَا بِقِي خَدَّامْ حُرّ هَنَا رَبِّنَا. وَ نَفْس الشَّيّءْ لِلنَّادُمْ الْأَوَّلْ حُرّ قُبَّالْ اللّٰهْ مَا نَادَاهْ، هُو بِقِي عَبْد الْمَسِيحْ.

مَتَّى 24:51

وَ سِيدَهْ يِعَاقِبَهْ وَ يُخُطَّهْ مَعَ الْمُنَافِقِينْ. هِنَاكْ يَبْكُوا وَ يِعَضُّوا سُنُونْهُمْ مِنْ الْعَذَابْ.»

مَتَّى 24:48

وَ لَاكِنْ كَنْ الْعَبِدْ فَسِلْ، وَ يُقُولْ فِي قَلْبَهْ: ‹سِيدِي يِطَوِّلْ وَ مَا يَجِي عَجَلَةْ.›

مَتَّى 22:10

وَ الْعَبِيدْ مَرَقَوْا وَ مَشَوْا فِي الشَّوَارِعْ وَ لَمَّوْا كُلَّ النَّاسْ اللِّقَوْهُمْ. وَ لَمَّوْا الْفَسْلِينْ مَعَ الْعَدِيلِينْ سَوَا وَ بَيْت الْعِرِسْ أَنْمَلَى ضِيفَانْ.

مَتَّى 22:8

«وَ قَالْ لِعَبِيدَهْ: ‹أَكِلْ الْعَازُومَةْ حَاصِلْ وَ لَاكِنْ النَّاسْ الْعَزَمْتُهُمْ مَا وَاجِبْ لَيْهُمْ.

مَلاخِـي 3:5

«وَ أَنَا نِقَرِّبْ لَيْكُو لِلشَّرِيعَةْ. وَ طَوَّالِي، نَشْهَدْ فِي السَّحَّارِينْ وَ الزَّنَّايِينْ وَ الْيَحَلْفُوا بِكِدِبْ وَ الْيَظُلْمُوا الْخَدَّامْ وَ الْأَرْمَلَةْ وَ الْأَتِيمْ وَ الْيَخْطَوْا فِي الْأَجْنَبِي. وَ هُمَّنْ دَوْل كُلُّهُمْ مَا يَخَافَوْا مِنِّي.» وَ دَا، اللّٰهْ الْقَادِرْ بَسْ قَالَهْ.

دَنْيال 3:15

وَ هَسَّعْ دَا كَنْ إِنْتُو جَاهِزِينْ، مِنْ سِمِعْتُوا حِسّ الْبُوقْ وَ الصُّفَّارَةْ وَ الْجِقِنْدِيَّةْ وَ أَمْ سِبَيْبَةْ وَ الْقِتَارْ وَ كُلَّ نَفَرْ هَنَا آلَاتْ الْمُسِيقَى، طَوَّالِي دَنْقُرُوا وَ أَسْجُدُوا لِلصَّنَمْ هَنَا الدَّهَبْ الْأَنَا الْمَلِكْ نَبُوخَدْنَصَرْ خَطَّيْتَهْ. وَ كَنْ أَبَيْتُوا مَا تَعَبُدُوهْ كَمَانْ، طَوَّالِي يِشِيلُوكُو وَ يَرْمُوكُو فِي النَّارْ أَمْ لَهِيبْ الشَّدِيدَةْ دِي. وَ نِشِيفْ الْإِلٰـهْ الْيَقْدَرْ يَمْرُقْكُو مِنْ إِيدِي أَنَا!»

دَنْيال 3:6

وَ أَيِّ نَادُمْ الْأَبَى مَا يِدَنْقِرْ وَ يَسْجُدْ لِلصَّنَمْ دَا، طَوَّالِي يِشِيلُوهْ وَ يَرْمُوهْ فِي نَارْ أَمْ لَهِيبْ الشَّدِيدَةْ.›»

إشَعْيا 47:6

أَنَا غِضِبْت ضِدّ شَعَبِي وَ مَا أَحْتَرَمْت وَرَثَتِي وَ سَلَّمْتُهُمْ لَيْكِ فِي إِيدْكِ. لَاكِنْ إِنْتِ عَامَلْتِيهُمْ بَلَا رَحْمَةْ وَ فِي الشَّايِبْ، خَطَّيْتِ حِمِلْكِ التَّقِيلْ زِيَادَةْ.

جامِعة 5:8

وَ كَنْ إِنْتَ شِفْت فِي بَلَدْ وَاحِدَةْ يَظُلْمُوا الْمِسْكِينْ وَ يَدْحَرَوْه مِنْ الْحَقّ وَ الْعَدَالَةْ، مَا تِلْعَجَّبْ مِنْ الشَّيّءْ دَا. أَشَانْ الْمَسْؤُولْ يَحْمِي الْمَسْؤُولْ وَ فِي مَسَائِيلْ آخَرِينْ كُبَارْ مِنْهُمْ.

زَبُور 140:12

يَا اللّٰهْ! أَنَا نَعَرِفْ كَدَرْ تِحَاكِمْ بِالْعَدِلْ لِلْمَظْلُومْ وَ تِدَافِعْ لِحُقُوقْ الْمَسَاكِينْ.

نَحَمْيا 5:5

لَاكِنْ أَنِحْنَ كُلَ مِثِلْ أَخْوَانَّا الْآخَرِينْ، عِيَالْنَا كُلَ مِثِلْ عِيَالْهُمْ. الْقُوءْ بَسْ خَلَّانَا نِبِيعُوا أَوْلَادْنَا وَ بَنَاتْنَا أَشَانْ يِسَوُّوهُمْ عَبِيدْ. وَ وَاحِدَاتْ مِنْ بَنَاتْنَا هَسَّعْ كُلَ قَاعِدَاتْ خَدِيمْ وَ مَا نَقْدَرَوْا نِسَوُّوا شَيّءْ أَشَانْ زِرَاعِتْنَا وَ جِنَيْنَاتْنَا بِعْنَاهُمْ خَلَاصْ.»

1 صَمُوِيل 15:17

وَ صَمُوِيلْ قَالْ: «إِنْتَ تَعَرِفْ نَفْسَكْ كَدَرْ إِنْتَ مَا تِسَاوِي شَيّءْ وَ لَاكِنْ هَسَّعْ بِقِيتْ كَبِيرْ فِي قَبَايِلْ بَنِي إِسْرَائِيلْ. وَ اللّٰهْ بَسْ مَسَحَكْ وَ دَرَّجَكْ فَوْقهُمْ مَلِكْ.

لاوِيِّين 19:13

«مَا تَظُلْمُوا جِيرَانْكُو وَ لَا تَسُرْقُوا. وَ مَا تَكُرْبُوا أُجْرَةْ الْخَدَّامْ لَحَدِّي أَمْبَاكِرْ.

أيُّوب 34:19

الرَّبّ مَا يِشِيفْ الْمَسَائِيلْ وَ مَا يِفَرِّقْ الْغَنِيْ مِنْ الْفَقْرِي أَشَانْ كُلُّهُمْ، هُو بَسْ خَلَقَاهُمْ.

كُلُوسِي 4:1

يَا سِيَادْ الْعَبِيدْ، سَوُّوا دَايْماً لِعَبِيدْكُو الْعَدِلْ وَ الْمُسَاوَةْ. مَا تَنْسَوْا كَدَرْ إِنْتُو كُلَ عَبِيدْ وَ سِيدْكُو هُو الْقَاعِدْ فِي السَّمَاءْ.