أفَسُس 3:5 - الكتاب المقدس بالعربي الدارجي هنا تشاد

⁵ فِي كُلَّ الْوَكِتْ الْفَاتْ، اللّٰهْ مَا بَيَّنْ الْكَلَامْ دَا لِبَنِي آدَم لَاكِنْ فِي الْوَكِتْ الْحَاضِرْ، بَيَّنَهْ بِالرُّوحْ الْقُدُّوسْ لِلرُّسُلْ وَ الْأَنْبِيَاء الصَّالِحِينْ الرَّسَّلَاهُمْ.

أفَسُس 3:5 Referenca të Kryqëzuara

يَهُوذَا 1:17

يَا أَخْوَانِي النِّحِبُّكُو، فَكُّرُوا فِي كَلَامْ الرُّسُلْ هَنَا رَبِّنَا عِيسَى الْمَسِيحْ الْقَالَوْه مِنْ أَوَّلْ.

2 بُطْرُس 3:2

فَكُّرُوا فِي كَلَامْ الْأَنْبِيَاء الصَّالِحِينْ الْقَالَوْه مِنْ زَمَانْ. وَ فَكُّرُوا فِي وَصِيَّةْ عِيسَى رَبِّنَا وَ مُنَجِّينَا السِّمِعْتُوهَا بِوَاسِطَةْ الرُّسُلْ الْمَشَوْا لَيْكُو.

أفَسُس 2:20

وَلَّا بِمَثَلْ آخَرْ، اللّٰهْ جَعَلَاكُو الْبَيْت الْهُو سَاكِنْ فَوْقَهْ. وَ الْأَسَاسْ الْاللّٰهْ بَنَاكُو فَوْقَهْ، هُو كَلَامْ الرُّسُلْ وَ الْأَنْبِيَاء. وَ عِيسَى الْمَسِيحْ، هُو حَجَرْ الزَّاوِيَةْ الْيَرْبُطْ الْأَسَاسْ.

أفَسُس 3:9

وَ رَسَّلَانِي أَشَانْ نِفَسِّرْ لِكُلَّ النَّاسْ مَعَنَى سِرّ اللّٰهْ. وَ اللّٰهْ الْخَالِقْ كُلَّ شَيّءْ حَفَضْ السِّرّ دَا لِنَفْسَهْ فِي كُلَّ الزَّمَنْ الْفَاتْ.

أعمال الرُسُل 10:28

وَ قَالْ لَيْهُمْ: «إِنْتُو تَعَرْفُوا فِي دِينْ الْيَهُودْ حَرَامْ لِيَهُودِي يِلِمّ مَعَ نَادُمْ مَا يَهُودِي. وَ لَا يِسَلِّمَهْ فِي بَيْتَهْ كُلَ. وَ لَاكِنْ اللّٰهْ أَوْرَانِي مَا وَاجِبْ نُقُولْ أَيِّ نَادُمْ نِجِسْ وَلَّا مَا طَاهِرْ بِسَبَبْ قَبِيلْتَهْ.

لُوقا 10:24

أَشَانْ نُقُولْ لَيْكُو نَاسْ كَتِيرِينْ مِنْ الْأَنْبِيَاء وَ الْمُلُوكْ دَوَّرَوْا بِلْحَيْن يِشِيفُوا الشَّيّءْ الْإِنْتُو قَاعِدِينْ تِشِيفُوهْ، لَاكِنْ مَا شَافَوْه. وَ دَوَّرَوْا يَسْمَعَوْا الْكَلَامْ الْإِنْتُو قَاعِدِينْ تَسْمَعَوْه وَ مَا سِمْعَوْه.»

يُوحَنَّا 14:26

لَاكِنْ الْمُعَاوِنْ يَجِي وَ هُو الرُّوحْ الْقُدُّوسْ. وَ أَبُويِ يِرَسِّلَهْ لَيْكُو بِأُسْمِي. وَ هُو يِعَلِّمْكُو كُلَّ شَيّءْ وَ يِفَكِّرْكُو كُلَّ الْكَلَامْ الْأَنَا قُلْتَهْ لَيْكُو.

مَتَّى 13:17

وَ نُقُولْ لَيْكُو الْحَقّ، كَتِيرِينْ مِنْ الْأَنْبِيَاء وَ النَّاسْ الصَّالِحِينْ دَوَّرَوْا بِلْحَيْن يِشِيفُوا الشَّيّءْ الْإِنْتُو قَاعِدِينْ تِشِيفُوهْ وَ لَاكِنْ مَا شَافَوْه. وَ دَوَّرَوْا يَسْمَعَوْا الْكَلَامْ الْإِنْتُو قَاعِدِينْ تَسْمَعَوْه وَ مَا سِمْعَوْه.

رَوْمَا 16:25

وَ خَلَاصْ نَشْكُرُوا اللّٰهْ! أَشَانْ هُو يَقْدَرْ يِقَوِّيكُو فِي الْإِيمَانْ بِبِشَارَةْ الْمَسِيحْ النِّجِيبْهَا لَيْكُو وَكِتْ نِبَلِّغْ بِعِيسَى الْمَسِيحْ. وَ بِالْبِشَارَةْ دِي، اللّٰهْ يِعَرِّفْ السِّرّ الْمُلَبَّدْ مِنْ الزَّمَنْ الْفَاتْ.

يُوحَنَّا 16:13

وَكِتْ رُوحْ الْحَقّ يَجِيكُو، هُو يُقُودْكُو فِي الْحَقّ الْكَامِلْ. الْكَلَامْ الْيُقُولَهْ مَا جَايِ مِنَّهْ بَسْ لَاكِنْ هُو يُقُولْ كُلَّ شَيّءْ الْيَسْمَعَهْ وَ يِأَوْرِيكُو بِالشَّيّءْ اللِّسَّاعْ مَا بِقِي.

مَتَّى 23:34

«وَ خَلَاصْ نِرَسِّلْ لَيْكُو أَنْبِيَاء وَ عُلَمَاءْ حَكِيمِينْ وَ مُعَلِّمِينْ. وَ وَاحِدِينْ مِنْهُمْ تَكْتُلُوهُمْ فِي صَلِيبْ وَ آخَرِينْ تَفُرْشُوهُمْ فِي بُيُوتْ الصَّلَاةْ وَ تَطُرْدُوهُمْ مِنْ حِلَّةْ وَاحِدَةْ لِحِلَّةْ آخَرَةْ.

لُوقا 11:49

وَ فِي شَانْ دَا، اللّٰهْ وَصَّفْ حِكْمَتَهْ وَكِتْ قَالْ: ‹نِرَسِّلْ لَيْهُمْ أَنْبِيَاء وَ رُسُلْ. وَاحِدِينْ مِنْهُمْ يَكْتُلُوهُمْ وَ وَاحِدِينْ مِنْهُمْ يِتَعُّبُوهُمْ.›

إشَعْيا 52:15

وَ لَاكِنْ هَسَّعْ، أُمَمْ كَتِيرِينْ يِلْعَجَّبَوْا مِنَّهْ وَ مُلُوكْ يَسْكُتُوا. أَشَانْ يِشِيفُوا الْمَا حَجَّوْهُمْ بَيَّهْ وَ يَنْظُرُوا الْمَا سِمْعَوْا بَيَّهْ.»

1 كُرُنْتُس 2:10

لَاكِنْ الشَّيّءْ دَا، اللّٰهْ وَصَّفَهْ لَيْنَا بِالرُّوحْ الْقُدُّوسْ. أَشَانْ الرُّوحْ الْقُدُّوسْ يِشِيفْ كُلَّ شَيّءْ وَ يَعَرِفْ فِكِرْ اللّٰهْ وَ أَسْرَارَهْ.

مَتَّى 20:7

وَ رَدَّوْا لَيَّهْ وَ قَالَوْا: ‹مَا فِي نَادُمْ خَدَّمَانَا.› وَ قَالْ لَيْهُمْ: ‹إِنْتُو كُلَ أَمْشُوا أَخْدُمُوا فِي جِنَيْنِتِي.›