أفَسُس 1:18 - الكتاب المقدس بالعربي الدارجي هنا تشاد

¹⁸ خَلِّي نُورْ اللّٰهْ يَدْخُلْ فِي قُلُوبْكُو أَشَانْ تَفْهَمَوْا تَمَامْ الْعَشَمْ الْاللّٰهْ نَادَاكُو لِتَلْقَوْه وَ بَتَّانْ تَفْهَمَوْا كُبُرْ الْوَرَثَةْ الْمَجِيدَةْ الْقَاعِدَةْ فِي أُسْط الصَّالِحِينْ.

أفَسُس 1:18 Referenca të Kryqëzuara

أعمال الرُسُل 26:18

لِتَفْتَحْ عُيُونْهُمْ أَشَانْ يَمُرْقُوا مِنْ الضَّلَامْ وَ يَدْخُلُوا فِي النُّورْ وَ يَمُرْقُوا مِنْ حُكُمْ إِبْلِيسْ وَ يُتُوبُوا لِلّٰهْ. وَ اللّٰهْ يَغْفِرْ لَيْهُمْ ذُنُوبْهُمْ وَ هُمَّنْ يَوْرُثُوا بَكَانْ فِي لُبّ النَّاسْ الْخَاصِّيْن بِسَبَبْ إِيمَانْهُمْ بَيِّ.›

2 كُرُنْتُس 4:6

وَ زَمَانْ اللّٰهْ قَالْ: «خَلِّي النُّورْ يِضَوِّي فِي أُسْط الضَّلَامْ.» وَ هُو بَسْ النَّوَّرْ قُلُوبْنَا أَشَانْ نَعَرْفُوا نُورْ اللّٰهْ الْمَجِيدْ الْقَاعِدْ فِي وِجِهْ عِيسَى الْمَسِيحْ.

لُوقا 24:45

وَ فَتَحْ لَيْهُمْ عُقُولْهُمْ أَشَانْ يَفْهَمَوْا الْكُتُبْ.

أفَسُس 1:7

إِبْنَهْ فَدَانَا بِدَمَّهْ وَ بَيَّهْ هُو، اللّٰهْ غَفَرْ لَيْنَا خَطَايَانَا. دِي بَسْ نِعْمَتَهْ الْعَظِيمَةْ

أفَسُس 5:8

أَوَّلْ، إِنْتُو بَسْ الضَّلَامْ وَ لَاكِنْ هَسَّعْ، بِقِيتُوا نُورْ بِعَلَاقِتْكُو مَعَ الرَّبّ. عِيشُوا بِالْحَالْ الْوَاجْبَةْ لِأَهَلْ النُّورْ.

أفَسُس 3:16

وَ نَسْأَلَهْ أَشَانْ يَنْطِيكُو بَرَكَةْ مِنْ الْغُنَى الْعِنْدَهْ فِي الْمَجْد وَ يَنْطِيكُو قُدْرَةْ وَ يِثَبِّتْ قُلُوبْكُو بِالرُّوحْ الْقُدُّوسْ.

أفَسُس 4:4

جِسِمْ الْمَسِيحْ وَاحِدْ بَسْ وَ الرُّوحْ الْقُدُّوسْ، هُو كُلَ وَاحِدْ بَسْ. وَ مِثِلْ دَا، الْعَشَمْ الْاللّٰهْ نَادَاكُو لِتَلْقَوْه كُلَ وَاحِدْ.

زَبُور 119:18

أَفْتَحْ عُيُونِي أَشَانْ نِشِيفْ عَجَايِبْ تَوْرَاتَكْ.

تِيطُس 3:7

وَ مِثِلْ دَا، بِقِينَا صَالِحِينْ بِنِعْمَتَهْ وَ أَنِحْنَ عَشْمَانِينْ فَوْق رَبِّنَا كَدَرْ نَوْرُثُوا الْحَيَاةْ الْأَبَدِيَّةْ.

إشَعْيا 42:7

إِنْتَ تَفْتَحْ عُيُونْ الْعَمْيَانِينْ وَ تَمْرُقْ الْمَسَاجِينْ مِنْ السِّجِنْ وَ تَطْلِقْ السَّاكْنِينْ فِي ضَلَامْ السُّلُولُو.

2 تَسَلونِيكِي 1:11

وَ أَشَانْ دَا، نَسْأَلَوْا لَيْكُو اللّٰهْ دَايْماً أَشَانْ هُو يَجْعَلْكُو نَاسْ الْعِنْدُكُو حَقّ لِمُنَادَاتَهْ. وَ نَسْأَلَوْه لَيْكُو أَشَانْ أَيِّ نِيَّةْ الصَّالْحَةْ الشِّلْتُوهَا وَ أَيِّ خِدْمَةْ الْبَدَيْتُوهَا بِسَبَبْ إِيمَانْكُو، اللّٰهْ يِتَمِّمْهَا بِقُدُرْتَهْ.

أفَسُس 4:1

أَشَانْ كُلَّ الْكَلَامْ دَا، أَنَا الْمَسْجُونْ هِنِي فِي شَانْ رَبِّنَا، نِوَصِّيكُو. عِيشُوا بِالْحَالْ الْمُوَافْقَةْ لِلنَّاسْ الْاللّٰهْ نَادَاهُمْ.

إشَعْيا 6:10

قَوِّي قُلُوبْ الشَّعَبْ دَوْل وَ سِدّ أُدْنَيْهُمْ وَ أَعَمِي عُيُونْهُمْ أَشَانْ مَا يِشِيفُوا وَ لَا يَسْمَعَوْا وَ لَا يَفْهَمَوْا. وَ بَيْدَا، مَا يُتُوبُوا لِيَلْقَوْا الشِّفَاءْ.»

1 تِمُوتَاوُس 6:12

جَاهِدْ جِهَادْ عَدِيلْ فِي دَرِبْ الْإِيمَانْ. أَكْرُبْ قَوِي الْحَيَاةْ الْأَبَدِيَّةْ الْاللّٰهْ نَادَاكْ لِتَدْخُلْ فَوْقهَا وَ إِنْتَ كُلَ شَهَدْت لَيْهَا بِشَهَادَةْ الْحَقّ قِدَّامْ شُهُودْ كَتِيرِينْ.

إشَعْيا 29:10

أَشَانْ اللّٰهْ نَزَّلْ فَوْقكُو رُوحْ هَنَا نَوْم. هُو سَدَّ عُيُونْ أَنْبِيَائْكُو وَ غَطَّى وُجُوهْ نَاسْكُو الْيِشِيفُوا رُؤْيَةْ.

1 بُطْرُس 5:10

تَعَبْكُو يَقْعُدْ بَتَّانْ وَكِتْ شِيَّةْ. وَ لَاكِنْ اللّٰهْ عِنْدَهْ رَحْمَةْ كَبِيرَةْ وَ هُو نَادَاكُو أَشَانْ تِشَارُكُوا فِي مَجْدَهْ الْأَبَدِي بِعَلَاقِتْكُو مَعَ عِيسَى الْمَسِيحْ. وَ اللّٰهْ هُو ذَاتَهْ يِثَبِّتْكُو وَ يِقَوِّيكُو وَ يَنْطِيكُو قُدْرَةْ وَ مَا تَقَعَوْا بَتَّانْ.

أفَسُس 1:11

وَ بِعَلَاقِتْنَا مَعَ الْمَسِيحْ، اللّٰهْ جَعَلَانَا شَعَبَهْ الْيَلْقَوْا الْوَرَثَةْ. اللّٰهْ عَزَلَانَا مِنْ أَوَّلْ حَسَبْ نِظَامَهْ. هُو يِسَوِّي كُلَّ شَيّءْ حَسَبْ نِيّتَهْ وَ مُرَادْتَهْ.

عِبْرَانِيِّين 10:32

فَكُّرُوا فِي الْوَكِتْ الْفَاتْ وَكِتْ أَوَّلْ مَرَّةْ دَخَلْتُوا فِي نُورْ اللّٰهْ. فِي الْوَكِتْ دَاكْ، إِنْتُو جَاهَدْتُوا وَ صَبَرْتُوا صَبُرْ قَوِي فِي الضِّيقَةْ.

1 تَسَلونِيكِي 2:12

وَ أَنِحْنَ دَايْماً شَجَّعْنَاكُو وَ صَبَّرْنَاكُو وَ وَصَّيْنَاكُو بِشِدَّةْ أَشَانْ تِعِيشُوا بِالْحَالْ الْوَاجْبَةْ لِلنَّاسْ الْاللّٰهْ نَادَاهُمْ لِيَدْخُلُوا فِي مَمْلَكَتَهْ وَ مَجْدَهْ.

2 كُرُنْتُس 4:4

النَّاسْ الْمَا مُؤمِنِينْ دَوْل قُلُوبْهُمْ عَمْيَانِينْ أَشَانْ إِبْلِيسْ عِنْدَهْ سُلْطَةْ فِي الدُّنْيَا دِي وَ هُو عَمَاهُمْ. هُو يِدَوْر يَدْحَرْهُمْ مَا يِشِيفُوا النُّورْ الْمَجِيدْ هَنَا الْمَسِيحْ النِّبَلُّغُوا بَيَّهْ الْبِشَارَةْ. الْمَسِيحْ هُو صُورَةْ اللّٰهْ.

إشَعْيا 32:3

وَ عُيُونْ النَّاسْ الْيِشِيفُوا أَبَداً مَا يِغَمُّضُوا. وَ أُدْنَيْ النَّاسْ الْيَسْمَعَوْا يِنْفَتْحُوا مَرَّةْ وَاحِدْ.

تِيطُس 2:13

وَ نَرْجَوْا بِعَشَمْ الْيَوْم الْمُبَارَكْ الْيِبِينْ فَوْقَهْ مَجْد إِلٰـهْنَا وَ مُنَجِّينَا الْعَظِيمْ، عِيسَى الْمَسِيحْ.

2 تَسَلونِيكِي 2:16

وَ خَلَاصْ، نَسْأَلَوْا لَيْكُو رَبِّنَا عِيسَى الْمَسِيحْ ذَاتَهْ وَ اللّٰهْ أَبُونَا الْحَبَّانَا وَ بِرَحْمَتَهْ، أَنْطَانَا شَجَاعَةْ أَبَدِيَّةْ وَ عَشَمْ كَبِيرْ.

1 تَسَلونِيكِي 5:8

وَ لَاكِنْ أَنِحْنَ نَاسْ النَّهَارْ وَ أَشَانْ دَا، خَلِّي نُخُطُّوا بَالْنَا. وَ خَلِّي الْإِيمَانْ وَ الْمَحَبَّةْ يَبْقَوْا لَيْنَا مِثِلْ خَلَقْنَا هَنَا الْحَرِبْ. وَ خَلِّي الْعَشَمْ الْعِنْدِنَا فِي رَبِّنَا الْيِنَجِّينَا، دَا يَبْقَى طَاقِيِّتْنَا.

أفَسُس 3:8

وَ مِنْ كُلَّ الصَّالِحِينْ، أَنَا بَسْ الصَّغَيَّرْ وَ لَاكِنْ اللّٰهْ أَنْطَانِي رَحْمَةْ وَ كَلَّفَانِي أَنَا بِبَلِّغِينْ الْبِشَارَةْ لِلْأُمَمْ وَ نِبَشِّرْهُمْ بِبَرَكَةْ الْمَسِيحْ الْمَا عِنْدَهَا حَدّ.

مَتَّى 13:15

قُلُوبْ الشَّعَبْ دَوْل بِقَوْا قَوِيِّينْ وَ أُدْنَيْهُمْ مَا يَسْمَعَوْا وَ سَدَّوْا عُيُونْهُمْ. وَ كَنْ مَا مِثِلْ دَا، عُيُونْهُمْ يِشِيفُوا وَ أُدْنَيْهُمْ يَسْمَعَوْا وَ يَفْهَمَوْا عَدِيلْ وَ يُتُوبُوا وَ أَنَا نَشْفِيهُمْ.>»

1 بُطْرُس 3:9

كَنْ النَّاسْ يِسَوُّوا فَوْقكُو شُغُلْ فَسِلْ، مَا تُرُدُّوا لَيْهُمْ بِشُغُلْ فَسِلْ. وَ كَنْ يِعَيُّرُوكُو، مَا تُرُدُّوا لَيْهُمْ بِمُعْيَارْ. لَاكِنْ بَارُكُوهُمْ، أَشَانْ اللّٰهْ نَادَاكُو فِي دَرْبَهْ لِتِبَارُكُوا النَّاسْ وَ تَوْرُثُوا بَرَكَةْ مِنْ اللّٰهْ.

عِبْرَانِيِّين 6:4

شُنُو يُكُونْ لِلنَّاسْ الْيِقَبُّلُوا فِي حَالْهُمْ الْقَدِيمَةْ؟ النَّاسْ دَوْل قِبْلَوْا نُورْ اللّٰهْ فِي قُلُوبْهُمْ وَ عِرْفَوْا الْبَرَكَةْ الْاللّٰهْ أَنْطَاهَا وَ شَارَكَوْا فِي الرُّوحْ الْقُدُّوسْ

كُلُوسِي 3:15

خَلُّوا سَلَامْ الْمَسِيحْ يَمْلُكْ فِي قُلُوبْكُو أَشَانْ اللّٰهْ نَادَاكُو لِتِعِيشُوا فِي السَّلَامْ وَ جَعَلَاكُو جِسِمْ وَاحِدْ. وَ أَبْقَوْا شَكُورِينْ.

كُلُوسِي 1:23

وَ دَا كُلَ يَبْقَى لَيْكُو كَنْ تَقْعُدُوا ثَابْتِينْ وَ قَوِيِّينْ فِي الْإِيمَانْ وَ مَا خَلَّيْتُوا عَشَمْكُو الْأَوَّلْ لِقِيتُوهْ وَكِتْ سِمِعْتُوا بِشَارَةْ الْمَسِيحْ. وَ الْبِشَارَةْ دِي، بَلَّغَوْهَا لِكُلَّ مَخْلُوقْ فِي الْأَرْض وَ أَنَا بُولُسْ بِقِيتْ خَدَّامَهْ أَشَانْ نِبَلِّغْ الْبِشَارَةْ لِلنَّاسْ.

كُلُوسِي 1:5

وَ إِنْتُو ثَابْتِينْ فِي إِيمَانْكُو وَ مَحَبِّتْكُو أَشَانْ إِنْتُو قَاعِدِينْ تَرْجَوْا بِعَشَمْ الْبَرَكَةْ الْاللّٰهْ حَفَضَاهَا لَيْكُو فِي السَّمَاءْ. وَ سِمِعْتُوا بَيْهَا فِي كَلَامْ الْحَقّ وَ هُو بِشَارَةْ الْمَسِيحْ الْبَلَّغَوْهَا لَيْكُو مِنْ أَوَّلْ.

أفَسُس 2:12

أَوَّلْ إِنْتُو مَا عِنْدُكُو عَلَاقَةْ مَعَ الْمَسِيحْ. إِنْتُو مِنْ قَبَايِلْ شِقْ، مَا مِنْ بَنِي إِسْرَائِيلْ الشَّعَبْ الْاللّٰهْ عَزَلَاهُمْ. الْمُعَاهَدَاتْ الْاللّٰهْ سَوَّاهُمْ مَعَ الْيَهُودْ، هُو مَا سَوَّاهُمْ مَعَاكُو. وَ الْوَعَدْ الْاللّٰهْ أَنْطَاهْ لَيْهُمْ، إِنْتُو مَا عِرِفْتُوهْ. إِنْتُو عَايْشِينْ فِي الدُّنْيَا لَاكِنْ مَا عِرِفْتُوا اللّٰهْ وَ مَا عِنْدُكُو عَشَمْ فَوْقَهْ.

غَلاطِية 5:5

لَاكِنْ بِقُدْرَةْ الرُّوحْ الْقُدُّوسْ، أَنِحْنَ نُخُطُّوا عَشَمْنَا فِي اللّٰهْ الْيِسَوِّينَا صَالِحِينْ بِسَبَبْ إِيمَانَّا الْقَاعِدِينْ نِتْمَنَّوْه بِزِيَادَةْ.

إشَعْيا 29:18

فِي الْيَوْم دَا، الطُّرُشْ يَسْمَعَوْا كَلَامْ الْكِتَابْ وَ الْعَمْيَانِينْ يَمُرْقُوا مِنْ الضَّلَامْ وَ السَّوَادْ وَ يِشِيفُوا.

1 بُطْرُس 1:3

خَلِّي نَشْكُرُوا اللّٰهْ أَبُو رَبِّنَا عِيسَى الْمَسِيحْ! هُو رَحَمَانَا بِرَحْمَةْ كَبِيرَةْ الْبَيْهَا بِقِينَا مَوْلُودِينْ مِنْ جَدِيدْ بِسَبَبْ بُعَاثْ عِيسَى الْمَسِيحْ مِنْ أُسْط الْمَيْتِينْ. وَ بَيْدَا، عِنْدِنَا عَشَمْ مُؤَكَّدْ

أعمال الرُسُل 16:14

وَ بَيْن الْعَوِينْ فِي مَرَةْ وَاحِدَةْ تَاجْرِيَّةْ هَنَا قُمَاشْ غَالِي وَ هِي مِنْ حِلَّةْ ثِيَاتِيرَةْ. هِي مَا مِنْ بَنَاتْ الْيَهُودْ وَ لَاكِنْ قَاعِدَةْ تَعَبُدْ اللّٰهْ مَعَاهُمْ وَ أُسُمْهَا لِيدِيَةْ. وَكِتْ قَاعِدَةْ تَسْمَعْ كَلَامْ بُولُسْ، الرَّبّ فَتَحْ قَلِبْهَا أَشَانْ تُخُطّ بَالْهَا لِكَلَامَهْ وَ تِآمِنْ.

فِلِبِّي 3:14

وَ نِجَاهِدْ أَشَانْ نِتَمِّمْ الْمَقْصُودْ وَ نَلْقَى الْجَائِزَةْ وَ هِي الْبَرَكَةْ الْاللّٰهْ يِدَوْر يَنْطِيهَا لِلنَّاسْ النَّادَاهُمْ فِي مَجْدَهْ بِالْمَسِيحْ عِيسَى.

أيُّوب 42:5

أَنَا سِمِعْتَكْ بِأَدَانِي وَ شِفْتَكْ بِعَيْنِي.

إشَعْيا 11:2

وَ فِي النَّادُمْ دَا، يَنْزِلْ رُوحْ اللّٰهْ وَ دَا رُوحْ الْحِكْمَةْ وَ الْمَعْرَفَةْ وَ الشَّوْرَةْ وَ الْفَحَالِيَّةْ وَ الْعِلِمْ وَ الْخَوْف مِنْ اللّٰهْ.

مَرْخُوس 10:17

وَكِتْ عِيسَى قَمَّ مَاشِي فِي دَرْبَهْ، نَادُمْ وَاحِدْ جَرَى لَيَّهْ وَ سَجَدْ قِدَّامَهْ وَ سَأَلَهْ وَ قَالْ: «يَا الْمُعَلِّمْ الْعَدِيلْ! وَاجِبْ نِسَوِّي شُنُو أَشَانْ نَلْقَى الْحَيَاةْ الْأَبَدِيَّةْ؟»

رَوْمَا 2:4

تِدَوْر تَحْقِرْ خَيْر اللّٰهْ الْعَظِيمْ وَ صَبْرَهْ وَ طُولْ رُوحَهْ وَلَّا؟ مَا تَعَرِفْ كَدَرْ هُو قَاعِدْ يِسَوِّي لَيْك الْخَيْر أَشَانْ يِدَوْر يِوَدِّيكْ لِلتَّوْبَةْ وَلَّا؟

رَوْمَا 11:29

أَشَانْ كَنْ اللّٰهْ أَنْطَى نَادُمْ عَطِيَّةْ، هُو مَا يَنْدَمْ لَيْهَا. وَ كَنْ نَادَى نَادُمْ، مَا يِبَطِّلْ مُنَادَاتَهْ.

كُلُوسِي 1:12

وَ تَشْكُرُوا دَايْماً اللّٰهْ أَبُوكُو الْجَعَلَاكُو جَاهِزِينْ لِتِشَارُكُوا فِي وَرَثَةْ الصَّالِحِينْ فِي مَمْلَكَةْ النُّورْ.

كُلُوسِي 1:27

وَ اللّٰهْ شَالْ نِيَّةْ أَشَانْ يِأَوْرِيهُمْ كَدَرْ السِّرّ دَا يِجِيبْ بَرَكَةْ كَبِيرَةْ وَ مَجِيدَةْ بِلْحَيْن لِكُلَّ الْأُمَمْ. وَ سِرّ اللّٰهْ، هُو الْمَسِيحْ ذَاتَهْ يَقْعُدْ فِيكُو وَ دَا يَنْطِيكُو عَشَمْ تَدْخُلُوا فِي مَجْدَهْ.

كُلُوسِي 2:2

وَ نِجَاهِدْ أَشَانْ يَلْقَوْا شَجَاعَةْ فِي قُلُوبْهُمْ وَ وِحْدَةْ بِالْمَحَبَّةْ وَ فِهِمْ تَمَامْ مَلَانْ بِبَرَكَةْ. نِدَوْر كَدَرْ يَعَرْفُوا وَ يَفْهَمَوْا سِرّ اللّٰهْ يَعْنِي الْمَسِيحْ.