أفَسُس 1:13 - الكتاب المقدس بالعربي الدارجي هنا تشاد

¹³ وَ إِنْتُو كُلَ، سِمِعْتُوا كَلَامْ الْحَقّ فِي بِشَارَةْ الْمَسِيحْ الْبَيْهَا نِجِيتُوا وَ بِقِيتُوا مُؤمِنِينْ بِالْمَسِيحْ. وَ بِسَبَبْ عَلَاقِتْكُو مَعَ الْمَسِيحْ، اللّٰهْ نَزَّلْ فَوْقكُو الرُّوحْ الْقُدُّوسْ الْوَاعَدَانَا بَيَّهْ وَ هُو مِثِلْ الْوَسِمْ الْاللّٰهْ خَطَّاهْ فَوْقكُو.

أفَسُس 1:13 Referenca të Kryqëzuara

2 كُرُنْتُس 1:22

وَ هُو خَطَّ فَوْقنَا خِتْمَهْ وَ نَزَّلْ فِي قُلُوبْنَا الرُّوحْ الْقُدُّوسْ أَشَانْ يَبْقَى الضَّمَانْ الْيِوَصِّفْنَا كَدَرْ اللّٰهْ يِسَوِّي كُلِّ شَيّءْ الْوَاعَدْ بَيَّهْ.

أفَسُس 4:30

مَا تِحَجُّوا بِكَلَامْ فَسِلْ أَشَانْ الْكَلَامْ الْفَسِلْ يِزَعِّلْ الرُّوحْ الْقُدُّوسْ الْاللّٰهْ نَزَّلَهْ فَوْقكُو. هُو الْوَسِمْ الْاللّٰهْ يِأَكِّدْ بَيَّهْ كَدَرْ يَفْدَاكُو مَرَّةْ وَاحِدْ فِي الْيَوْم الْأَخِيرْ.

2 تِمُوتَاوُس 2:19

لَاكِنْ الْأَسَاسْ الْقَوِي الْاللّٰهْ خَطَّاهْ قَاعِدْ ثَابِتْ وَ هُو خَطَّ فَوْقَهْ خِتِمْ وَ دَا الْكَلَامْ الْمَكْتُوبْ فِي الْكِتَابْ الْبُقُولْ: <اللّٰهْ يَعَرِفْ نَاسَهْ> وَ بَتَّانْ: <وَاجِبْ أَيِّ نَادُمْ الْيِكَرِّمْ أُسُمْ اللّٰهْ يِخَلِّي مِنَّهْ الْفَسَالَةْ مَرَّةْ وَاحِدْ.>

1 تَسَلونِيكِي 2:13

وَ فِي شَانْ دَا، نَشْكُرُوا اللّٰهْ دَايْماً أَشَانْ وَكِتْ سِمِعْتُوا مِنِّنَا كَلَامْ اللّٰهْ، إِنْتُو كَرَبْتُوهْ قَوِي. قِبِلْتُوهْ مَا مِثِلْ كَلَامْ إِنْسَانِي بَسْ لَاكِنْ قِبِلْتُوهْ مِثِلْ كَلَامْ اللّٰهْ. وَ بِالصَّحِيحْ، هُو كَلَامْ اللّٰهْ وَ قَاعِدْ يِسَوِّي خِدِمْتَهْ فِي قُلُوبْكُو إِنْتُو الْمُؤمِنِينْ.

رَوْمَا 4:11

وَ اللّٰهْ أَنْطَى عَلَامَةْ الطَّهُورَةْ لِإِبْرَاهِيمْ أَشَانْ يِوَصِّفْ كَدَرْ قُبَّالْ مَا يِطَهُّرُوهْ، هُو بِقِي صَالِحْ بِسَبَبْ إِيمَانَهْ. وَ بِمِثِلْ دَا، إِبْرَاهِيمْ بِقِي أَبُو كُلَّ النَّاسْ الْاللّٰهْ جَعَلَاهُمْ صَالِحِينْ بِسَبَبْ إِيمَانْهُمْ حَتَّى كَانْ هُمَّنْ مَا مُطَهَّرِينْ كُلَ.

تِيطُس 2:11

أَكِيدْ، نِعْمَةْ اللّٰهْ بَانَتْ فِي الْمَسِيحْ أَشَانْ تِنَجِّي كُلَّ النَّاسْ.

غَلاطِية 3:14

وَ بِقِي مِثِلْ دَا، أَشَانْ بِالْمَسِيحْ عِيسَى الْبَرَكَةْ الْاللّٰهْ وَاعَدْ بَيْهَا إِبْرَاهِيمْ تَجِي فِي النَّاسْ الْمَا يَهُودْ كُلَ. وَ خَلَاصْ بِسَبَبْ الْإِيمَانْ، اللّٰهْ يِنَزِّلْ فَوْقنَا كُلِّنَا الرُّوحْ الْقُدُّوسْ الْهُو وَاعَدْ بَيَّهْ النَّاسْ.

يُوِيل 2:28

«وَ بَعَدْ دَا، أَنَا نِنَزِّلْ رُوحِي فِي كُلَّ النَّاسْ. أَوْلَادْكُو وَ بَنَاتْكُو يِتْنَبَّأَوْا وَ شِيَّابْكُو يَحْلَمَوْا بِحِلِمْ وَ صُبْيَانْكُو يِشِيفُوا رُؤْيَةْ.

رَوْمَا 1:16

أَشَانْ وَكِتْ أَنَا نِبَشِّرْ بِشَارَةْ الْمَسِيحْ، دَا مَا عِنْدَهْ لَيِّ عَيْب. وَ بِشَارَةْ الْمَسِيحْ، هِي قُدْرَةْ اللّٰهْ الْبَيْهَا يِنَجِّي كُلَّ النَّاسْ الْيِآمُنُوا بَيَّهْ، أَوَّلْ كَيْ الْيَهُودْ وَ بَتَّانْ الْمَا يَهُودْ.

أعمال الرُسُل 2:33

وَ اللّٰهْ رَفَعْ عِيسَى وَ قَعَّدَهْ فِي جَنْبَهْ فِي نُصَّهْ الزَّيْنَايْ. هَسَّعْ اللّٰهْ أَبُوهْ أَنْطَاهْ الرُّوحْ الْقُدُّوسْ الْوَاعَدَانَا بَيَّهْ مِنْ زَمَانْ وَ عِيسَى نَزَّلَهْ فَوْقنَا. وَ بِمِثِلْ دَا بَسْ، الشَّيّءْ الْإِنْتُو قَاعِدِينْ تِشِيفُوهْ وَ تَسْمَعَوْه بِقِي.

يُوحَنَّا 14:26

لَاكِنْ الْمُعَاوِنْ يَجِي وَ هُو الرُّوحْ الْقُدُّوسْ. وَ أَبُويِ يِرَسِّلَهْ لَيْكُو بِأُسْمِي. وَ هُو يِعَلِّمْكُو كُلَّ شَيّءْ وَ يِفَكِّرْكُو كُلَّ الْكَلَامْ الْأَنَا قُلْتَهْ لَيْكُو.

يُوحَنَّا 1:17

اللّٰهْ نَزَّلْ شُرُوطْ التَّوْرَاةْ بِوَاسِطَةْ مُوسَى وَ لَاكِنْ اللّٰهْ نَزَّلْ الرَّحْمَةْ وَ الْحَقّ بِوَاسِطَةْ عِيسَى الْمَسِيحْ.

لُوقا 24:49

وَ أَنَا نِنَزِّلْ فَوْقكُو الْبَرَكَةْ الْأَبُويِ اللّٰهْ قَالْ وَاعَدَاكُو بَيْهَا. وَ هَسَّعْ دَا، وَاجِبْ تَقْعُدُوا هِنِي فِي الْمَدِينَةْ لَحَدِّي قُدْرَةْ اللّٰهْ تَنْزِلْ فَوْقكُو مِنْ السَّمَاءْ.»

زَبُور 119:43

مَا تِخَلِّي لِسَانِي يِبَارِي بَعِيدْ مِنْ كَلَامْ الْحَقّ أَشَانْ أَنَا نُخُطّ عَشَمِي فِي شَرِيعْتَكْ.

1 بُطْرُس 2:10

وَ مَكْتُوبْ فِي الْكِتَابْ: <أَوَّلْ إِنْتُو مَا شَعَبْ اللّٰهْ لَاكِنْ هَسَّعْ إِنْتُو بِقِيتُوا شَعَبَهْ. أَوَّلْ رَحْمَةْ اللّٰهْ مَا جَاتْ فَوْقكُو لَاكِنْ هَسَّعْ رَحْمَتَهْ جَاتْ فَوْقكُو خَلَاصْ.>

رَوْمَا 6:17

وَ الْحَمْدُ للّٰهْ، أَوَّلْ إِنْتُو بِقِيتُوا عَبِيدْ لِلذَّنِبْ لَاكِنْ هَسَّعْ تِتَابُعُوا بِكُلَّ قُلُوبْكُو التَّعْلِيمْ الْاللّٰهْ نَزَّلَهْ لَيْكُو.

أعمال الرُسُل 1:4

وَ وَكِتْ هُو قَاعِدْ مَعَاهُمْ هُو قَالْ: «مَا تَمُرْقُوا مِنْ مَدِينَةْ الْقُدُسْ. أَرْجَوْا لَحَدِّي أَبُوكُو اللّٰهْ يَنْطِيكُو الْبَرَكَةْ الْهُو وَاعَدَاكُو بَيْهَا وَ أَنَا ذَاتِي أَوْرَيْتكُو بَيْهَا.

يُوحَنَّا 15:26

«لَاكِنْ الْمُعَاوِنْ يَجِي. أَنَا نِرَسِّلَهْ لَيْكُو مِنْ بَكَانْ أَبُويِ وَ هُو رُوحْ الْحَقّ النَّازِلْ مِنْ اللّٰهْ. وَ وَكِتْ هُو يَجِي، هُو يَشْهَدْ لَيِّ

أعمال الرُسُل 13:26

وَ بُولُسْ قَالْ: «يَا الْأَخْوَانْ، يَا عِيَالْ جِدِّنَا إِبْرَاهِيمْ وَ كُلَّ النَّاسْ اللَّامِّينْ مَعَانَا وَ خَايْفِينْ مِنْ اللّٰهْ، هُو رَسَّلْ خَبَرْ النَّجَاةْ دِي لَيْنَا كُلِّنَا.

يُوحَنَّا 6:27

مَا تِجَاهُدُوا أَشَانْ تَلْقَوْا الْأَكِلْ الْيَتْلَفْ وَ لَاكِنْ جَاهُدُوا أَشَانْ تَلْقَوْا الْأَكِلْ الْمَا يَتْلَفْ وَ يَنْطِيكُو الْحَيَاةْ الْأَبَدِيَّةْ. دَا بَسْ الْأَكِلْ الْإِبْن الْإِنْسَانْ يَنْطِيهْ لَيْكُو. هُو النَّادُمْ الْاللّٰهْ أَبُوهْ شَهَدْ لَيَّهْ وَ أَكَّدْ هُو رَضْيَانْ بَيَّهْ خَلَاصْ.»

لُوقا 11:13

إِنْتُو الْمُذْنِبِينْ كُلَ تَعَرْفُوا كِكَّيْف تَنْطُوا شُغُلْ سَمَحْ لِعِيَالْكُو. وَ لَاكِنْ أَبُوكُو اللّٰهْ أَخَيْر زِيَادَةْ مِنْكُو. وَ هُو يَنْطِي الرُّوحْ الْقُدُّوسْ لِلنَّاسْ الْيَسْأَلَوْه.»

رُؤية 7:2

وَ فِي الْبَكَانْ دَا، أَنَا شِفْت مَلَكْ آخَرْ وَ هُو طَلَعْ مِنْ صَبَاحْ وَ عِنْدَهْ خِتِمْ هَنَا اللّٰهْ الْحَيّ فِي إِيدَهْ. وَ هُو كَلَّمْ بِحِسّ شَدِيدْ لِلْأَرْبَعَةْ مَلَائِكَةْ الْعِنْدُهُمْ إِذِنْ أَشَانْ يِتَلُّفُوا الْأَرْض وَ الْبَحَرْ

يَعْقُوب 1:18

بِوَاسِطَةْ كَلَامْ الْحَقّ، اللّٰهْ أَنْطَانَا الْحَيَاةْ الْجَدِيدَةْ بِنِيّتَهْ أَشَانْ أَنِحْنَ نَبْقَوْا مُهِمِّينْ مِنْ كُلَّ مَخْلُوقِينَهْ.

عِبْرَانِيِّين 2:3

وَ كِكَّيْف أَنِحْنَ نَنْجَوْا كَنْ مَا نِتَابُعُوا عَدِيلْ كَلَامْ هَنَا النَّجَاةْ الْمُهِمَّةْ دِي؟ الْأَوَّلْ بَلَّغَاهَا، هُو رَبِّنَا. وَ الشُّهُودْ السِّمْعَوْا كَلَامَهْ أَكَّدَوْهَا لَيْنَا.

2 تِمُوتَاوُس 3:15

مِنْ إِنْتَ صَغَيَّرْ، عِرِفْت كِتَابْ اللّٰهْ الْأَنْطَاكْ الْعِلِمْ الْيِوَدِّيكْ لِلنَّجَاةْ بِالْإِيمَانْ بِالْمَسِيحْ عِيسَى.

2 تِمُوتَاوُس 2:15

أَعَصِرْ قَلْبَكْ أَشَانْ تَبْقَى نَادُمْ الْاللّٰهْ يَرْضَى بَيَّهْ. أَبْقَى مِثِلْ خَدَّامْ الْخِدِمْتَهْ مَا تِسَبِّبْ لَيَّهْ عَيْب. فَسِّرْ كَلَامْ الْحَقّ بِتَفْسِيرْ عَدِيلْ.

أفَسُس 4:21

أَكِيدْ، كَلَامْ الْمَسِيحْ سِمِعْتُوهْ وَ بِعَلَاقِتْكُو مَعَايَهْ عَلَّمْتُوا الْحَقّ أَشَانْ الْحَقّ قَاعِدْ فِي عِيسَى.

2 كُرُنْتُس 6:7

كَلَامْنَا كَلَامْ الْحَقّ وَ نَخْدُمُوا بِقُدْرَةْ اللّٰهْ. الْحَالْ الصَّالْحَةْ بَسْ سِلَاحْنَا فِي إِيدْنَا الزَّيْنَةْ وَ فِي إِيدْنَا الْإِسْرَةْ.

يُوحَنَّا 3:33

وَ أَيِّ نَادُمْ الْقِبِلْ شَهَادْتَهْ أَكَّدْ كَدَرْ كَلَامْ اللّٰهْ صَحِيحْ.

يَعْقُوب 1:21

أَشَانْ دَا، خَلُّوا مِنْكُو كُلَّ شَيّءْ الْيِنَجِّسْكُو وَ كُلَّ شَيّءْ الْفَسِلْ وَ أَقْبَلَوْا بِمَسْكَنَةْ الْكَلَامْ الْاللّٰهْ خَطَّاهْ فِي قُلُوبْكُو. الْكَلَامْ دَا عِنْدَهْ قُدْرَةْ أَشَانْ يِنَجِّيكُو.