جامِعة 12:1 - الكتاب المقدس بالعربي الدارجي هنا تشاد

¹ فِي وَكِتْ شَبَابَكْ، أَذَّكَّرَهْ، هُو الْخَلَقَاكْ. أَذَّكَّرَهْ قَبُلْ أَيَّامْ الضِّيقَةْ مَا يَجُوكْ وَ قَبُلْ مَا يَجُوكْ السِّنِينْ الْفَوْقهُمْ إِنْتَ تُقُولْ: «حَيَاتِي مَا عِنْدَهَا طَعَمْ.»

جامِعة 12:1 Referenca të Kryqëzuara

مَراثِي إرْمِيا 3:27

سَمَحْ لِلرَّاجِلْ يُدُوقْ التَّعَبْ فِي صُبَايَهْ.

جامِعة 11:8

كَنْ نَادُمْ يِعِيشْ سِنِينْ كَتِيرِينْ، خَلِّي يَفْرَحْ بِأَيِّ وَاحِدْ مِنْهُمْ. وَ لَاكِنْ خَلِّي يِذَّكَّرْ كَدَرْ أَيَّامْ الْمَوْت أَكْتَرْ. وَ كُلَّ شَيّءْ الْيَجِي زَايِلْ سَاكِتْ.

أمْثال 22:6

أَدِّبْ الصَّغِيرْ وَكِتْ هُو صَغَيَّرْ وَ كَنْ بِقِي شَايِبْ كُلَ، مَا يِخَلِّي أَدَبَهْ.

لُوقا 18:16

لَاكِنْ عِيسَى نَادَى الْعِيَالْ وَ قَالْ لِتَلَامِيذَهْ: «خَلُّوا الْعِيَالْ يَجُوا لَيِّ وَ مَا تَدْحَرَوْهُمْ أَشَانْ مَمْلَكَةْ اللّٰهْ هَنَا النَّاسْ الْمِثِلْهُمْ.

زَبُور 34:11

يَا عِيَالِي، تَعَالُوا وَ أَسْمَعَوْا وَ أَنَا نِعَلِّمْكُو الْخَوْف مِنْ اللّٰهْ.

2 تِمُوتَاوُس 3:15

مِنْ إِنْتَ صَغَيَّرْ، عِرِفْت كِتَابْ اللّٰهْ الْأَنْطَاكْ الْعِلِمْ الْيِوَدِّيكْ لِلنَّجَاةْ بِالْإِيمَانْ بِالْمَسِيحْ عِيسَى.

زَبُور 90:10

مُدَّةْ حَيَاتْنَا 70 سَنَةْ وَ كَنْ عِنْدِنَا قُدْرَةْ، نَمْشُوا لَحَدِّي 80 سَنَةْ. وَ أَكْتَرْ سِنِينَّا، نِعِيشُوهُمْ فِي تَعَبْ وَ ظُلُمْ أَشَانْ حَيَاتْنَا تُفُوتْ عَجَلَةْ وَ أَنِحْنَ نَبْقَوْا مَا فِينَا.

جامِعة 11:10

بَعِّدْ الْحِزِنْ مِنْ قَلْبَكْ وَ بَعِّدْ التَّعَبْ مِنْ جِسْمَكْ. أَشَانْ الصُّبَى وَ الْقُدْرَةْ زَايْلِينْ سَاكِتْ.

أمْثال 8:17

أَنَا نِحِبّ الْيِحِبُّونِي وَ الْيِفَتُّشُونِي، يَلْقَوْنِي.

2 صَمُوِيل 19:35

هَسَّعْ عِنْدِي 80 سَنَةْ. هَلْ نَقْدَرْ نَفْصُلْ بَيْن الْفَسِلْ وَ الزَّيْن وَلَّا؟ وَ هَلْ أَنَا عَبْدَكْ نَقْدَرْ نَفْصُلْ طَعَمْ الْأَكِلْ وَ الشَّرَابْ وَلَّا؟ وَ نَقْدَرْ بَتَّانْ نَسْمَعْ حِسّ الْحَكَّامَاتْ وَ الدَّوَكَةْ وَلَّا؟ وَ مَالَا بَتَّانْ سِيدِي الْمَلِكْ يِلْكَلَّفْ بَيِّ أَنَا عَبْدَهْ؟

1 صَمُوِيل 2:26

وَ لَاكِنْ الْوِلَيْد صَمُوِيلْ قَاعِدْ يَكْبُرْ وَ لِقِي رِضَى اللّٰهْ وَ رِضَى النَّاسْ.

تكوين 39:2

وَ اللّٰهْ قَاعِدْ مَعَ يُوسُفْ وَ أَشَانْ دَا بَسْ، كُلَّ شَيّءْ الْيِسَوِّيهْ دَا، يَنْجَحْ. وَ سَكَنْ فِي بَيْت سِيدَهْ الْمَصْرِي.

لُوقا 1:15

وَ هُو يَبْقَى نَادُمْ مُهِمّ قِدَّامْ اللّٰهْ وَ مَا وَاجِبْ يَشْرَبْ خَمَرْ وَ لَا أَيِّ شَرَابْ الْيِسَكِّرْ النَّاسْ. وَ هُو يَبْقَى مَلَانْ بِالرُّوحْ الْقُدُّوسْ مِنْ هُو لِسَّاعْ قَاعِدْ فِي بَطُنْ أَمَّهْ.

1 صَمُوِيل 16:7

وَ لَاكِنْ اللّٰهْ قَالْ لِصَمُوِيلْ: «أَنَا رَفَضْتَهْ. وَ خَلِّي جَمَالَهْ وَ طُولَهْ مَا يَعَجُبُوكْ! أَشَانْ أَنَا مَا نِشِيفْ الْأَشْيَاءْ مِثِلْ الْإِنْسَانْ يِشِيفْهُمْ. الْإِنْسَانْ يِشِيفْ الظَّاهِرْ بَسْ وَ لَاكِنْ أَنَا اللّٰهْ نِشِيفْ الْفِي الْقَلِبْ.»

تكوين 39:23

وَ مَسْؤُولْ السِّجِنْ مَا يِهِمّ بِخِدِمْتَهْ الْأَمَّنَاهَا لِيُوسُفْ أَشَانْ اللّٰهْ قَاعِدْ مَعَايَهْ. وَ اللّٰهْ يَنْطِي النَّجَاحْ لِيُوسُفْ فِي كُلَّ شَيّءْ الْيِسَوِّيهْ.

أفَسُس 6:4

أَسْمَعَوْا، يَا أَبَّهَاتْ الْعِيَالْ، مَا تِزَعُّلُوا عِيَالْكُو لَاكِنْ رَبُّوهُمْ فِي الْأَدَبْ وَ تَعْلِيمْ الرَّبّ.

دَنْيال 1:17

وَ الرَّبّ أَنْطَاهُمْ لِلصُّبْيَانْ الْأَرْبَعَةْ دَوْل مَعْرَفَةْ وَ عَقُلْ فِي كُلَّ الْكُتُبْ وَ الْحِكْمَةْ. وَ دَنْيَالْ يَعَرِفْ يِفَسِّرْ الرُّؤْيَةْ وَ الْحِلِمْ كُلَ.

إشَعْيا 26:8

أَيْوَى فِي طَرِيقْ عَدَالْتَكْ، نُخُطُّوا عَشَمْنَا فَوْقَكْ، يَا اللّٰهْ! أَنِحْنَ مُشْتَاقِينْ لِنِنَادُوا أُسْمَكْ وَ نِذَّكَّرَوْك.

1 صَمُوِيل 2:18

وَ لَاكِنْ فِي الْوَكِتْ دَا، صَمُوِيلْ قَاعِدْ يَخْدِمْ لِلّٰهْ. وَ هُو لِسَّاعْ صَغَيَّرْ وَ لَابِسْ خَلَقْ هَنَا رُجَالْ الدِّينْ.

1 مُلوك 18:12

وَ وَكِتْ أَنَا نُفُوتْ مِنَّكْ، رُوحْ اللّٰهْ يِوَدِّيكْ فِي بَكَانْ الْأَنَا مَا نَعَرْفَهْ. وَ كَنْ أَنَا مَشَيْت وَ خَبَّرْتَهْ لِأَخَابْ بَيْك وَ مَا لِقَاكْ، خَلَاصْ يَكْتُلْنِي. وَ لَاكِنْ أَنَا عَبْدَكْ خَايِفْ مِنْ اللّٰهْ مِنْ أَنَا صَبِي.

1 صَمُوِيل 1:28

وَ هَسَّعْ، أَنَا نَنْطِيهْ لِلّٰهْ مُدَّةْ حَيَاتَهْ.» خَلَاصْ فِي الْبَكَانْ دَا، كُلُّهُمْ سَجَدَوْا لِلّٰهْ.

هُوشَع 7:9

الْأَجَانِبْ دَوْل كَمَّلَوْا قُدْرِتْهُمْ وَ هُمَّنْ مَا يَعَرْفُوهْ. أَبْ شِيَّيْب جَاءْ لَيْهُمْ وَ هُمَّنْ مَا يَعَرْفُوهْ.

أيُّوب 30:2

وَ الشِّيَّابْ دَوْل، قُدْرِتْهُمْ تَنْفَعْنِي بِشُنُو؟ أَشَانْ قُوِّتْهُمْ كَمَّلَتْ.

1 مُلوك 14:13

وَ كُلَّ بَنِي إِسْرَائِيلْ يَحْزَنَوْا لَيَّهْ وَ يَدْفُنُوهْ. وَ مِنْ عَايِلَةْ يَرُبَعَامْ، هُو وِحَيْدَهْ بَسْ الْيَدْفُنُوهْ فِي قَبُرْ أَشَانْ هُو وِحَيْدَهْ بَسْ مِنْ عَايِلَةْ يَرُبَعَامْ، اللّٰهْ إِلٰـهْ بَنِي إِسْرَائِيلْ لِقِي فَوْقَهْ شَيّءْ عَدِيلْ.

تَثْنِية 8:18

فَكُّرُوا فِي اللّٰهْ إِلٰـهْكُو أَشَانْ هُو بَسْ الْأَنْطَاكُو الْقُدْرَةْ الْبَيْهَا لِقِيتُوا الْغُنَى دِي. وَ بَيْدَا، لَحَدِّي الْيَوْم هُو أَكَّدْ الْمُعَاهَدَةْ السَّوَّاهَا مَعَ أَبَّهَاتْكُو.

نَحَمْيا 4:14

وَ شِفْت كُلَّ بَكَانَاتْ مُقْعَدْهُمْ وَ قُلْت لِلْكُبَارَاتْ وَ الْمَسَائِيلْ وَ الشَّعَبْ: «مَا تَخَافَوْا مِنْهُمْ! فَكُّرُوا فِي رَبِّنَا الْكَبِيرْ وَ الْعَظِيمْ وَ دَاوُسُوهُمْ أَشَانْ تَحْمُوا أَخْوَانْكُو وَ أَوْلَادْكُو وَ بَنَاتْكُو وَ عَوِينْكُو وَ بُيُوتْكُو.»

زَبُور 63:6

كَنْ فِي سَرِيرِي أَنَا نِفَكِّرْ فَوْقَكْ، نَحْمُدَكْ طُولْ اللَّيْل.

زَبُور 119:55

بِاللَّيْل نِذَّكَّرْ أُسْمَكْ، يَا اللّٰهْ، لِنَحْفَضْ تَوْرَاتَكْ.

جامِعة 11:2

قَسِّمْ مَالَكْ عَلَيْ سَبْعَةْ أَوْ تَمَانَةْ بَكَانْ أَشَانْ إِنْتَ مَا تَعَرِفْ الْفَسَالَةْ التَّجِي فِي الْأَرْض.

2 صَمُوِيل 19:36

وَ أَنَا عَبْدَكْ مَشَيْت مَعَاكْ شِيَّةْ لَحَدِّي قَطَعْنَا بَحَرْ الْأُرْدُنْ بَسْ. وَ مَالَا الْمَلِكْ يِدَوْر يَنْطِينِي مُكَافَاةْ مِثِلْ دِي؟