2 تِمُوتَاوُس 4:8 - الكتاب المقدس بالعربي الدارجي هنا تشاد

⁸ وَ هَسَّعْ الْجَائِزَةْ الْيَنْطُوهَا لِلْغَالِبْ تَرْجَانِي. وَ هِي التَّاجْ الرَّبِّنَا يُخُطَّهْ فِي رَاسْ النَّادُمْ الصَّالِحْ. وَ رَبِّنَا الْحَاكِمْ الْعَادِلْ يَنْطِينِي الطَّاقِيَّةْ دِي فِي الْيَوْم الْأَخِيرْ. وَ مَا يَنْطِيهَا لَيِّ أَنَا وِحَيْدِي لَاكِنْ يَنْطِيهَا لِكُلَّ النَّاسْ الْقَرْمَانِينْ لِيَوْم جَيْتَهْ.

2 تِمُوتَاوُس 4:8 Referenca të Kryqëzuara

يَعْقُوب 1:12

مَبْرُوكْ لِلنَّادُمْ الْيَصْبُرْ فِي التَّعَبْ الْيِجَرِّبْ إِيمَانَهْ. أَشَانْ وَكِتْ التَّجْرِبَةْ دِي كَمَّلَتْ خَلَاصْ، هُو يَلْقَى تَاجْ الْحَيَاةْ. وَ التَّاجْ دَا، هُو الْحَيَاةْ الْاللّٰهْ وَاعَدْ بَيْهَا النَّاسْ الْيِحِبُّوهْ.

رُؤية 2:10

مَا تَخَافْ مِنْ الضِّيقَةْ الْقَرِيبْ تَجِيكْ. خُطُّوا بَالْكُو! إِبْلِيسْ يَكْرُبْ وَاحِدِينْ مِنْكُو فِي السِّجِنْ وَ إِيمَانْكُو يِجَرُّبُوهْ. وَ فِي مُدَّةْ عَشَرَةْ يَوْم، تِضَيُّقُوا ضِيقَةْ شَدِيدَةْ. أَقْعُدُوا ثَابْتِينْ فِي إِيمَانْكُو لَحَدِّي الْمَوْت وَ خَلَاصْ نَنْطِيكُو تَاجْ هَنَا الْحَيَاةْ الْأَبَدِيَّةْ.

1 بُطْرُس 5:4

وَ وَكِتْ الْمَسِيحْ كَبِيرْ الرُّعْيَانْ يِبِينْ، هُو يَنْطِيكُو التَّاجْ الْمَجِيدْ الْجَمَالَهْ أَبَداً مَا يِكَمِّلْ.

1 بُطْرُس 1:4

وَ وَرَثَتْنَا أَبَداً مَا تِدَّمَّرْ وَ لَا تَتْلَفْ وَ لَا تِوَدِّرْ. وَ اللّٰهْ دَمَّهَا لَيْكُو فِي السَّمَاوَاتْ.

2 تِمُوتَاوُس 1:12

وَ أَشَانْ دَا بَسْ، أَنَا قَاعِدْ نَتْعَبْ مِثِلْ دَا. لَاكِنْ الْعَيْب أَبَداً مَا سَوَّانِي أَشَانْ هُو الْأَنَا آمَنْت بَيَّهْ نَعَرْفَهْ تَمَامْ. وَ أَنَا مُؤَكِّدْ كَدَرْ هُو قَادِرْ وَ يَحْفَضْ الْأَمَانَةْ الْأَنْطَيْتهَا لَيَّهْ لَحَدِّي الْيَوْم الْأَخِيرْ.

1 كُرُنْتُس 9:25

وَ نَعَرْفُوا كَنْ نَادُمْ رِيَاضِي، هُو يِثَبِّتْ نَفْسَهْ فِي أَيِّ حَالْ وَ يِجَاهِدْ. وَ الْجَائِزَةْ الْهُو يِدَوْر يَلْقَاهَا دِي، هِي تَتْلَفْ عَجَلَةْ. لَاكِنْ أَنِحْنَ نِجَاهُدُوا أَشَانْ نَلْقَوْا الْجَائِزَةْ الْأَبَداً مَا تَتْلَفْ.

كُلُوسِي 1:5

وَ إِنْتُو ثَابْتِينْ فِي إِيمَانْكُو وَ مَحَبِّتْكُو أَشَانْ إِنْتُو قَاعِدِينْ تَرْجَوْا بِعَشَمْ الْبَرَكَةْ الْاللّٰهْ حَفَضَاهَا لَيْكُو فِي السَّمَاءْ. وَ سِمِعْتُوا بَيْهَا فِي كَلَامْ الْحَقّ وَ هُو بِشَارَةْ الْمَسِيحْ الْبَلَّغَوْهَا لَيْكُو مِنْ أَوَّلْ.

زَبُور 31:19

يَا اللّٰهْ! خَيْرَكْ كَتِيرْ الْحَفَضْتَهْ لِلنَّاسْ الْيَخَافَوْا مِنَّكْ. وَ تَنْطِيهْ لِلْيَلْجَأَوْا لَيْك قِدَّامْ كُلَّ النَّاسْ.

رُؤية 1:7

وَ شِيفُوا، هُو جَايِ رَاكِبْ فِي السَّحَابْ وَ أَيِّ نَادُمْ يِشِيفَهْ. أَيْوَى، كُلَّ النَّاسْ الطَّعَنَوْه يِشِيفُوهْ وَ كُلَّ قَبَايِلْ الْأَرْض يَبْكُوا بِسَبَبَهْ. أَيْوَى، مِثِلْ دَا بَسْ يَبْقَى. آمِينْ.

تِيطُس 2:13

وَ نَرْجَوْا بِعَشَمْ الْيَوْم الْمُبَارَكْ الْيِبِينْ فَوْقَهْ مَجْد إِلٰـهْنَا وَ مُنَجِّينَا الْعَظِيمْ، عِيسَى الْمَسِيحْ.

رُؤية 19:11

وَ فِي الْبَكَانْ دَا، أَنَا شِفْت السَّمَاءْ فَاتِحْ. وَ شِفْت جُوَادْ أَبْيَضْ. وَ الرَّاكِبْ فَوْقَهْ أُسْمَهْ الْأَمِينْ وَ الصَّادِقْ وَ هُو يِحَارِبْ عَدُوهْ وَ يَحْكِمْ النَّاسْ بِحَالْ صَالْحَةْ.

2 تِمُوتَاوُس 2:5

وَ بِمَثَلْ تَانِي، كَنْ نَادُمْ يَجْرِي فِي مُسَابَقَةْ، مَا يُقُولُوا هُو سَبَقْ إِلَّا كَنْ جَرَى حَسَبْ الشُّرُوطْ.

2 تِمُوتَاوُس 4:1

نِوَصِّيكْ قِدَّامْ اللّٰهْ وَ قِدَّامْ الْمَسِيحْ عِيسَى الْيِشَارِعْ الْحَيِّينْ وَ الْمَيْتِينْ وَ دَا فِي الْيَوْم الْهُو يِبِينْ فَوْقَهْ فِي مَمْلَكَتَهْ.

1 تِمُوتَاوُس 6:19

وَ مِثِلْ دَا، يُضُمُّوا لِنُفُوسْهُمْ رَاسْ مَالْ لِلْآخِرَةْ أَشَانْ يَكُرْبُوا قَوِي الْحَيَاةْ الصَّحِيحَةْ الْهِي الْحَيَاةْ الْأَبَدِيَّةْ.

1 كُرُنْتُس 2:9

وَ خَلَاصْ، دَا مُوَافِقْ مَعَ الْكَلَامْ الْمَكْتُوبْ فِي الْكِتَابْ: <الشَّيّءْ الْاللّٰهْ جَهَّزَهْ لِلنَّاسْ الْيِحِبُّوهْ، مَا شَافَتَهْ عَيْن وَ لَا سِمْعَتَهْ أَدَانْ وَ لَا فَكَّرْ فَوْقَهْ إِنْسَانْ.>

مَلاخِـي 3:17

وَ اللّٰهْ الْقَادِرْ قَالْ: «فِي الْيَوْم النُّقُمّ فَوْقَهْ، هُمَّنْ يَبْقَوْا هِنَيّ أَنَا حَلَالِي. وَ نِحِنّ فَوْقهُمْ مِثِلْ نَادُمْ يِحِنّ فِي وِلَيْدَهْ الْيَخْدِمْ لَيَّهْ.

رُؤية 22:20

وَ عِيسَى الْقَاعِدْ يَشْهَدْ لِكُلَّ الْكَلَامْ دَا قَاعِدْ يُقُولْ: «أَكِيدْ، نَجِي قَرِيبْ.» آمِينْ، يَا رَبِّنَا عِيسَى، تَعَالْ.

رُؤية 4:10

الشُّيُوخْ الْعِشْرِينْ وَ أَرْبَعَةْ يَسْجُدُوا قِدَّامْ الْقَاعِدْ فِي الْعَرْش وَ يَعَبُدُوهْ، هُو الْحَيّ إِلَى الْأَبَدْ. وَ أَيِّ وَاحِدْ يَرْمِي تَاجَهْ قِدَّامْ الْعَرْش وَ يُقُولْ:

رُؤية 4:4

وَ أَنَا شِفْت 24 كَرَاسِي مُحَوِّقِينْ الْعَرْش دَا وَ 24 شُيُوخْ قَاعِدِينْ فَوْقهُمْ. وَ أَيِّ وَاحِدْ لَابِسْ خَلَقْ أَبْيَضْ وَ عِنْدَهْ تَاجْ هَنَا دَهَبْ فِي رَاسَهْ.

عِبْرَانِيِّين 9:28

وَ الْمَسِيحْ كُلَ قَدَّمْ نَفْسَهْ مَرَّةْ وَاحِدَةْ أَشَانْ يَمْحَا ذُنُوبْ هَنَا نَاسْ كَتِيرِينْ. وَ هُو يَجِي بَتَّانْ مَرَّةْ تَانِيَةْ مَا أَشَانْ يَمْحَا الذُّنُوبْ وَ لَاكِنْ أَشَانْ يِنَجِّي النَّاسْ الْقَاعِدِينْ يَرْجَوْه.

2 تِمُوتَاوُس 1:18

وَ نَسْأَلْ رَبِّنَا لِوَانِي سِفِرُسْ أَشَانْ يَلْقَى رَحْمَةْ مِنْ اللّٰهْ فِي الْيَوْم الْأَخِيرْ. وَ إِنْتَ تَعَرِفْ هُو سَاعَدَانِي كَتِيرْ وَكِتْ أَنَا قَاعِدْ فِي حِلَّةْ أَفَسُسْ كُلَ.

1 تَسَلونِيكِي 1:10

وَ تَرْجَوْا إِبْنَهْ الْيِقَبِّلْ مِنْ السَّمَاوَاتْ وَ هُو عِيسَى الْاللّٰهْ بَعَثَهْ مِنْ أُسْط الْمَيْتِينْ وَ يَفْزَعْنَا مِنْ الْغَضَبْ الْجَايِ.

رَوْمَا 8:23

وَ الْخَلِيقَةْ مَا تَتْعَبْ وِحَيْدهَا. أَنِحْنَ عِنْدِنَا الرُّوحْ الْقُدُّوسْ وَ دَا مِثِلْ أَوَّلْ إِنْتَاجْ الْاللّٰهْ أَنْطَاهْ لَيْنَا. وَ أَنِحْنَ كُلَ نَقُنْتُوا فِي دَاخِلْنَا أَشَانْ نَرْجَوْا اللّٰهْ يِكَمِّلْ عَمَلَهْ فَوْقنَا وَ يِسَوِّينَا عِيَالَهْ وَكِتْ يَفْدَى أَجْسَامْنَا.

رَوْمَا 2:5

لَاكِنْ رَاسَكْ قَوِي وَ فِي قَلْبَكْ مَا تِدَوْر تُتُوبْ. وَ بَيْدَا، إِنْتَ قَاعِدْ تِزِيدْ الْعِقَابْ الْيَجِي فَوْقَكْ فِي يَوْم غَضَبْ اللّٰهْ. وَ دَا الْيَوْم الْاللّٰهْ يِحَاسِبْ فَوْقَهْ النَّاسْ بِالْحَقّ.

مَتَّى 24:36

«وَ الشَّيّءْ الْيَبْقَى بَعَدَيْن دَا، نَادُمْ وَاحِدْ مَا يَعَرِفْ يَوْمَهْ وَ لَا سَاعْتَهْ. الْمَلَائِكَةْ فِي السَّمَاوَاتْ كُلَ مَا يَعَرْفُوهْ وَ إِبْن اللّٰهْ مَا يَعَرْفَهْ، إِلَّا أَبُوهْ وِحَيْدَهْ يَعَرْفَهْ.

مَتَّى 7:22

فِي يَوْم الْحِسَابْ، نَاسْ كَتِيرِينْ يُقُولُوا لَيِّ: ‹يَا سَيِّدْنَا، يَا سَيِّدْنَا. أَنِحْنَ مَا أَتْنَبَّأْنَا بِأُسْمَكْ وَلَّا؟ وَ بِأُسْمَكْ مَا طَرَدْنَا الشَّوَاطِينْ وَلَّا؟ وَ بِأُسْمَكْ مَا سَوَّيْنَا عَجَايِبْ كَتِيرِينْ وَلَّا؟›

أمْثال 4:9

الْحِكْمَةْ تُخُطّ فِي رَاسَكْ تَاجْ النِّعْمَةْ وَ تِجَمِّلَكْ بِكَدْمُولْ الشَّرَفْ.»

زَبُور 7:11

اللّٰهْ الرَّبّ هُو قَاضِي صَادِقْ وَ يِوَصِّفْ غَضَبَهْ كُلَّ يَوْم.

1 تَسَلونِيكِي 5:4

وَ لَاكِنْ، يَا أَخْوَانِي، إِنْتُو مَا قَاعِدِينْ فِي الضَّلَامْ مِثِلْهُمْ. وَ الْيَوْم دَا مَا يَجِي فَوْقكُو إِنْتُو بِغَفْلَةْ مِثِلْ جَيَّةْ السَّرَّاقْ

2 كُرُنْتُس 5:2

وَ حَالِيّاً دَا، أَنِحْنَ قَاعِدِينْ نَقُنْتُوا أَشَانْ قَرْمَانِينْ بِلْحَيْن لِبَيْتنَا السَّمَاوِي الْاللّٰهْ يَنْطِيهْ لَيْنَا لِنِعِيشُوا فَوْقَهْ.

لُوقا 10:12

نُقُولْ لَيْكُو الْعَذَابْ الْيَجِي فَوْق نَاسْ الْحِلَّةْ دِي فِي يَوْم الْحِسَابْ يَبْقَى زِيَادَةْ مِنْ الْعَذَابْ الْيَجِي فَوْق نَاسْ حِلَّةْ سَدُومْ.»

تكوين 18:25

أَبَداً مَا تَقْدَرْ تِسَوِّيهْ، يَا رَبّ! إِنْتَ مَا تِدَمِّرْ الْعَدِيلِينْ مَعَ الْفَسْلِينْ! أَشَانْ النَّاسْ الْعَدِيلِينْ مَا مِثِلْ النَّاسْ الْفَسْلِينْ! هَلْ الْحَاكِمْ هَنَا كُلَّ الْأَرْض مَا يِسَوِّي الْعَدَالَةْ وَلَّا؟»

1 كُرُنْتُس 3:13

وَ الْخِدْمَةْ الْأَيِّ نَادُمْ خَدَمْهَا تِنْعَرِفْ أَشَانْ يَوْم الْحِسَابْ يِوَصِّفْهَا بِنَارْ. وَ النَّارْ تِجَرِّبْ خِدْمَةْ أَيِّ نَادُمْ كَنْ عَدِيلَةْ وَلَّا مَا عَدِيلَةْ.

فِلِبِّي 3:11

وَ خَلَاصْ بِأَيِّ دَلِيلْ، نَلْحَقْ فِي الأَخِيرْ بُعَاثْ الْمَيْتِينْ.

2 تَسَلونِيكِي 2:8

وَ فِي الْوَكِتْ دَا بَسْ، نَاكِرْ الْحَقّ يِبِينْ وَ الرَّبّ عِيسَى يَكْتُلَهْ بِنَفْخَةْ وَاحِدَةْ مِنْ خَشْمَهْ وَ يِدَمِّرَهْ بِنُورْ جَيْتَهْ.

2 تِمُوتَاوُس 1:10

وَ هَسَّعْ فِي الزَّمَنْ الْحَاضِرْ، هُو بَيَّنْ رَحْمَتَهْ بِجَيَّةْ النَّادُمْ الْيِنَجِّينَا وَ هُو الْمَسِيحْ عِيسَى. الْمَسِيحْ بَطَّلْ قُدْرَةْ الْمَوْت وَ فِي بِشَارْتَهْ وَصَّفْ لَيْنَا الْحَيَاةْ الْأَبَدِيَّةْ.

عِبْرَانِيِّين 12:11

فِي الْوَكِتْ الْحَالِي، كُلَّ الْأَدَبْ قَاسِي لَيْنَا وَ مَا يَنْطِينَا فَرَحْ. لَاكِنْ بَعَدَيْن، النَّاسْ الضَّرَبَوْهُمْ أَشَانْ الْأَدَبْ يَلْقَوْا مِنَّهْ نَتِيجَةْ وَ هِي السَّلَامْ وَ الْعَدَالَةْ.