2 تِمُوتَاوُس 1:8 - الكتاب المقدس بالعربي الدارجي هنا تشاد

⁸ مَا تَخَافْ وَ مَا تَخْجَلْ. بَشِّرْ النَّاسْ بِأُسُمْ الرَّبّ الْأَنَا مَسْجُونْ فِي شَانَهْ. مَا تِدَنْقِرْ رَاسَكْ بِسَبَبْ سِجْنِي أَنَا. شَارِكْنِي فِي التَّعَبْ فِي شَانْ بِشَارَةْ الْمَسِيحْ وَ اللّٰهْ يَنْطِيكْ الْقُدْرَةْ.

2 تِمُوتَاوُس 1:8 Referenca të Kryqëzuara

رَوْمَا 1:16

أَشَانْ وَكِتْ أَنَا نِبَشِّرْ بِشَارَةْ الْمَسِيحْ، دَا مَا عِنْدَهْ لَيِّ عَيْب. وَ بِشَارَةْ الْمَسِيحْ، هِي قُدْرَةْ اللّٰهْ الْبَيْهَا يِنَجِّي كُلَّ النَّاسْ الْيِآمُنُوا بَيَّهْ، أَوَّلْ كَيْ الْيَهُودْ وَ بَتَّانْ الْمَا يَهُودْ.

مَرْخُوس 8:38

أَكِيدْ نَاسْ الْوَكِتْ الْحَالِي مُذْنِبِينْ وَ خَايْنِينْ. وَ أَيِّ نَادُمْ الْيَنْكُرْنِي بِسَبَبْ الْعَيْب الْيَلْقَاهْ مِنْهُمْ، أَنَا إِبْن الْإِنْسَانْ نَنْكُرَهْ وَكِتْ نِقَبِّلْ بِقُدْرَةْ أَبُويِ اللّٰهْ الْمَجِيدَةْ مَعَ مَلَائِكَتَهْ الْمُقَدَّسِينْ.»

2 تِمُوتَاوُس 4:5

لَاكِنْ إِنْتَ، أَقْعُدْ دَايْماً ثَابِتْ وَ أَحْمَلْ التَّعَبْ وَ بَشِّرْ النَّاسْ بِالْبِشَارَةْ وَ أَخْدِمْ عَدِيلْ الْخِدْمَةْ الْاللّٰهْ أَنْطَاهَا لَيْك.

رُؤية 12:11

وَ هُمَّنْ أَنَّصَرَوْا فَوْقَهْ بِقُدْرَةْ دَمّ الْحَمَلْ وَ بِشَهَادِتْهُمْ لَيَّهْ. وَ هُمَّنْ حَبَّوْا رَبُّهُمْ زِيَادَةْ مِنْ نُفُوسْهُمْ لَحَدِّي أَبَوْا مَا يَجْرُوا مِنْ الْمَوْت.

2 تِمُوتَاوُس 2:9

وَ بِسَبَبْ الْبِشَارَةْ دِي، أَنَا قَاعِدْ فِي التَّعَبْ مَرْبُوطْ بِجَنَازِيرْ مِثِلْ أَنَا مُجْرِمْ. لَاكِنْ كَلَامْ اللّٰهْ أَبَداً مَا يَقْدَرَوْا يَرْبُطُوهْ.

2 تِمُوتَاوُس 1:12

وَ أَشَانْ دَا بَسْ، أَنَا قَاعِدْ نَتْعَبْ مِثِلْ دَا. لَاكِنْ الْعَيْب أَبَداً مَا سَوَّانِي أَشَانْ هُو الْأَنَا آمَنْت بَيَّهْ نَعَرْفَهْ تَمَامْ. وَ أَنَا مُؤَكِّدْ كَدَرْ هُو قَادِرْ وَ يَحْفَضْ الْأَمَانَةْ الْأَنْطَيْتهَا لَيَّهْ لَحَدِّي الْيَوْم الْأَخِيرْ.

أفَسُس 3:1

أَنَا بُولُسْ قَاعِدْ فِي السِّجِنْ أَشَانْ نِتَابِعْ الْمَسِيحْ عِيسَى وَ نِبَلِّغْ بِشَارْتَهْ لَيْكُو إِنْتُو الْمَا يَهُودْ. وَ أَشَانْ دَا، أَنَا نَسْأَلْ لَيْكُو اللّٰهْ.

فِلِبِّي 3:10

وَ نِجَاهِدْ أَشَانْ نَعَرِفْ الْمَسِيحْ تَمَامْ وَ نِعِيشْ بِقُدْرَةْ بُعَاثَهْ وَ نِشَارِكْ مَعَايَهْ فِي تَعَبَهْ. وَ نِدَوْر نَبْقَى مِثِلْ هُو بِقِي فِي مَوْتَهْ

لُوقا 9:26

وَ أَيِّ نَادُمْ الْيَنْكُرْنِي بِسَبَبْ الْعَيْب الْيَلْقَى مِنْ النَّاسْ، أَنَا إِبْن الْإِنْسَانْ نَنْكُرَهْ وَكِتْ نِقَبِّلْ بِقُدُرْتِي الْمَجِيدَةْ وَ بِقُدْرَةْ الْمَجِيدَةْ هَنَا أَبُويِ اللّٰهْ وَ مَلَائِكَتَهْ الْمُقَدَّسِينْ.

2 تِمُوتَاوُس 1:16

خَلِّي رَبِّنَا يَرْحَمْ نَاسْ بَيْت أَخُونَا وَانِي سِفِرُسْ أَشَانْ هُو جَاءْ لَيِّ فِي السِّجِنْ وَ شَجَّعَانِي كَتِيرْ. جَنَازِيرِي أَبَداً مَا سَوَّوْا لَيَّهْ عَيْب.

أفَسُس 4:1

أَشَانْ كُلَّ الْكَلَامْ دَا، أَنَا الْمَسْجُونْ هِنِي فِي شَانْ رَبِّنَا، نِوَصِّيكُو. عِيشُوا بِالْحَالْ الْمُوَافْقَةْ لِلنَّاسْ الْاللّٰهْ نَادَاهُمْ.

رُؤية 1:9

وَ أَنَا يُوحَنَّا أَخُوكُو الْقَاعِدْ نِتَابِعْ عِيسَى مِثِلْكُو. أَنَا كُلَ مُشَارِكْ مَعَاكُو فِي التَّعَبْ وَ فِي مَمْلَكَةْ اللّٰهْ وَ نَحْمَلْ التَّعَبْ بِصَبُرْ مِثِلْكُو. وَ كَرَبَوْنِي أَشَانْ بَلَّغْت لِلنَّاسْ كَلَامْ اللّٰهْ وَ شَهَادَةْ عِيسَى الْمَسِيحْ. وَ هَسَّعْ أَنَا مَسْجُونْ فِي الْجَزِيرَةْ الْأُسُمْهَا بَطْمُسْ.

يَهُوذَا 1:24

اللّٰهْ قَادِرْ وَ يَقْدَرْ يَحْفَضْكُو أَشَانْ مَا تَقَعَوْا. هُو بَسْ يِوَدِّيكُو فِي حَضَرَتَهْ الْمَجِيدَةْ بَلَا أَيِّ عَيْب، فَرْحَانِينْ فَرْحَةْ شَدِيدَةْ.

1 بُطْرُس 1:5

وَ قُدْرَةْ اللّٰهْ تَحْفَضْكُو بِإِيمَانْكُو أَشَانْ تَلْقَوْا النَّجَاةْ الْاللّٰهْ جَهَّزَاهَا وَ يِبَيِّنْهَا فِي الْيَوْم الْأَخِيرْ.

2 تِمُوتَاوُس 2:3

أَقْبَلْ التَّعَبْ مِثِلْ عَسْكَرِي عَدِيلْ هَنَا الْمَسِيحْ عِيسَى.

1 تَسَلونِيكِي 3:4

وَ وَكِتْ لِسَّاعْنَا قَاعِدِينْ مَعَاكُو، قُلْنَا لَيْكُو كَدَرْ التَّعَبْ يَجِي فَوْقنَا كُلِّنَا. وَ خَلَاصْ، بِقِي مِثِلْ قُلْنَا وَ دَا تَعَرْفُوهْ.

فِلِبِّي 1:7

وَ وَاجِبْ لَيِّ نِحِسّ بَيْكُو كُلُّكُو مِثِلْ دَا أَشَانْ قَلْبِي دَايْماً مَعَاكُو. وَ نِحِبُّكُو أَشَانْ إِنْتُو كُلُّكُو مُشَارِكِينْ مَعَايِ فِي نِعْمَةْ اللّٰهْ. وَ إِنْتُو دَايْماً مُشَارِكِينْ مَعَايِ وَكِتْ أَنَا قَاعِدْ مُجَنْزَرْ فِي السِّجِنْ وَ وَكِتْ أَنَا قَاعِدْ نِدَافِعْ لِبِشَارَةْ الْمَسِيحْ وَ نِثَبِّتْهَا لِلنَّاسْ.

أفَسُس 3:13

وَ أَشَانْ كُلَّ الْكَلَامْ دَا، نَطْلُبْ مِنْكُو مَا تَحْزَنَوْا لَيِّ فِي تَعَبِي. أَنَا قَاعِدْ نَتْعَبْ مِثِلْ دَا فِي شَانْكُو إِنْتُو وَ دَا يَبْقَى لِفَايْدِتْكُو الْمَجِيدَةْ.

رَوْمَا 16:25

وَ خَلَاصْ نَشْكُرُوا اللّٰهْ! أَشَانْ هُو يَقْدَرْ يِقَوِّيكُو فِي الْإِيمَانْ بِبِشَارَةْ الْمَسِيحْ النِّجِيبْهَا لَيْكُو وَكِتْ نِبَلِّغْ بِعِيسَى الْمَسِيحْ. وَ بِالْبِشَارَةْ دِي، اللّٰهْ يِعَرِّفْ السِّرّ الْمُلَبَّدْ مِنْ الزَّمَنْ الْفَاتْ.

1 يُوحَنَّا 4:14

وَ أَنِحْنَ شِفْنَا عَدِيلْ كَدَرْ اللّٰهْ رَسَّلْ إِبْنَهْ فِي الدُّنْيَا أَشَانْ يِنَجِّي نَاسْ الدُّنْيَا وَ أَنِحْنَ قَاعِدِينْ نَشْهَدَوْا لَيَّهْ.

2 تِمُوتَاوُس 4:17

لَاكِنْ رَبِّنَا وَقَفْ مَعَايِ وَ أَنْطَانِي قُدْرَةْ وَ بَيْهَا بَلَّغْت الْبِشَارَةْ كُلَّهَا كَيْ وَ نَاسْ مِنْ كُلَّ الْأُمَمْ سِمْعَوْهَا. وَ فِي الْيَوْم دَا، أَنَا مِثِلْ نَادُمْ الدُّودْ يِدَوْر يَاكُلَهْ لَاكِنْ الرَّبّ نَجَّانِي مِنْ الْمَوْت.

فِلِبِّي 4:13

نَقْدَرْ نِلْحَمَّلْ أَيِّ شَيّءْ بِالْمَسِيحْ وَ هُو يَنْطِينِي قُدْرَةْ.

رَوْمَا 9:33

وَ أَشَانْ دَا بَسْ الْكِتَابْ بُقُولْ: <أَسْمَعَوْا، أَنَا نُخُطّ حَجَرْ فِي صَهْيُون. بِسَبَبَهْ، النَّاسْ يِنْطَقَّوْا وَ يَقَعَوْا. لَاكِنْ أَيِّ نَادُمْ الْيِآمِنْ بَيَّهْ أَبَداً مَا يَخْجَلْ.>

أعمال الرُسُل 5:41

وَ الرُّسُلْ مَرَقَوْا مِنْ بَكَانْ الْمَجْلَسْ فَرْحَانِينْ أَشَانْ اللّٰهْ شَرَّفَاهُمْ بِالتَّعَبْ التِّعِبَوْه فِي شَانْ أُسُمْ عِيسَى.

رُؤية 19:10

وَ عَجَلَةْ كَيْ، أَنَا سَجَدْت قِدَّامْ رِجِلَيْنَهْ أَشَانْ نَعَبُدَهْ لِلْمَلَكْ وَ لَاكِنْ هُو قَالْ: «لَا، مَا تَسْجُدْ لَيِّ أَنَا. أَعَبُدْ اللّٰهْ. أَنَا عَبِدْ مِثْلَكْ إِنْتَ وَ مِثِلْ أَخْوَانَكْ الْيِتَابُعُوا شَهَادَةْ عِيسَى. أَشَانْ شَهَادَةْ عِيسَى، هِي الْكَلَامْ الْيِنَزِّلَهْ الرُّوحْ الْقُدُّوسْ فِي الْأَنْبِيَاء.»

رُؤية 1:2

وَ يُوحَنَّا شَهَدْ بِكُلَّ شَيّءْ الشَّافَهْ الْبُخُصّ كَلَامْ اللّٰهْ وَ شَهَادَةْ عِيسَى الْمَسِيحْ. وَ هُو كَتَبَاهُمْ فِي الْكِتَابْ دَا.

1 كُرُنْتُس 1:6

وَ مِثِلْ دَا، اللّٰهْ ثَبَّتْ أَمْبَيْنَاتْكُو شَهَادِتْنَا الشَّهَدْنَا بَيْهَا لِلْمَسِيحْ.

يُوحَنَّا 19:35

الشَّافَهْ بِعَيْنَهْ شَاهِدْ لَيَّهْ وَ شَهَادْتَهْ صَحِيحَةْ وَ هُو يَعَرِفْ كَلَامَهْ صَحِيحْ وَ هُو يَشْهَدْ أَشَانْ إِنْتُو كُلَ تِآمُنُوا.

زَبُور 119:46

وَ نِحَجِّي بِوَصِيَّاتَكْ قِدَّامْ الْمُلُوكْ وَ نَقْعُدْ بَلَا عَيْب.

كُلُوسِي 1:24

وَ أَنَا فَرْحَانْ بِتَعَبِي أَشَانْ أَنَا قَاعِدْ نَتْعَبْ فِي شَانْكُو. وَ فِي جِسْمِي، نَحْمَلْ كُلَّ التَّعَبْ الْيِقَصِّرْ لِلْمَسِيحْ فِي شَانْ أُمَّتَه الْهِي جِسْمَهْ.

أفَسُس 4:17

وَ دَاهُو نِوَصِّيكُو بِأُسُمْ الرَّبّ، أَسْمَعَوْا كَلَامِي عَدِيلْ. مَا تِعِيشُوا بَتَّانْ مِثِلْ النَّاسْ الْمَا مُؤمِنِينْ. هُمَّنْ يِتَابُعُوا الْفِكِرْ الْبَاطِلْ.

2 كُرُنْتُس 6:7

كَلَامْنَا كَلَامْ الْحَقّ وَ نَخْدُمُوا بِقُدْرَةْ اللّٰهْ. الْحَالْ الصَّالْحَةْ بَسْ سِلَاحْنَا فِي إِيدْنَا الزَّيْنَةْ وَ فِي إِيدْنَا الْإِسْرَةْ.

رَوْمَا 8:36

وَ مَكْتُوبْ فِي الْكِتَابْ: <فِي شَانَكْ إِنْتَ، يَكْتُلُونَا كُلَّ يَوْم وَ يَجْعَلَوْنَا مِثِلْ غَنَمْ الْجُزُرْ.>

يُوحَنَّا 15:27

وَ إِنْتُو كُلَ تَشْهَدَوْا لَيِّ أَشَانْ إِنْتُو قَاعِدِينْ مَعَايِ مِنْ الْبِدَايَةْ.»

إشَعْيا 51:7

أَسْمَعَوْنِي إِنْتُو التَّعَرْفُوا الْعَدَالَةْ، إِنْتُو الشَّعَبْ الْوَصِيَّاتِي قَاعِدِينْ فِي قُلُوبْكُو! مَا تَخَافَوْا وَكِتْ النَّاسْ يِعَيُّبُوكُو وَ مَا تِنْبَهْتُوا وَكِتْ يِعَيُّرُوكُو.

زَبُور 19:7

تَوْرَاةْ اللّٰهْ كَامِلْ، يِقَبِّلْ الرُّوحْ. وَ وَصَايَا اللّٰهْ أَمِينِينْ، يِسَوُّوا الْجَاهِلْ حَكِيمْ.

1 تِمُوتَاوُس 2:6

الْأَنْطَى نَفْسَهْ ضَحِيَّةْ أَشَانْ يَفْدَى كُلَّ النَّاسْ. وَ دِي بَسْ شَهَادَةْ اللّٰهْ الْقَدَّمَاهَا فِي الْوَكِتْ الْمُوَافِقْ.

كُلُوسِي 1:11

وَ فِي كُلِّ وَكِتْ، خَلِّي اللّٰهْ يِقَوِّيكُو بِقُدُرْتَهْ الْمَجِيدَةْ أَشَانْ تَحْمَلَوْا التَّعَبْ وَ تَصْبُرُوا فَوْقَهْ بِفَرَحْ

إشَعْيا 8:20

خَلَاصْ، رُدُّوا لَيْهُمْ وَ قُولُوا: «النَّاسْ الْمَا يِتَابُعُوا التَّعْلِيمْ وَ الشَّهَادَةْ مَا يِشِيفُوا نُورْ الصَّبَاحْ.»

2 تِمُوتَاوُس 1:10

وَ هَسَّعْ فِي الزَّمَنْ الْحَاضِرْ، هُو بَيَّنْ رَحْمَتَهْ بِجَيَّةْ النَّادُمْ الْيِنَجِّينَا وَ هُو الْمَسِيحْ عِيسَى. الْمَسِيحْ بَطَّلْ قُدْرَةْ الْمَوْت وَ فِي بِشَارْتَهْ وَصَّفْ لَيْنَا الْحَيَاةْ الْأَبَدِيَّةْ.

2 تِمُوتَاوُس 2:8

فَكِّرْ فِي عِيسَى الْمَسِيحْ. هُو مِنْ ذُرِّيَّةْ دَاوُدْ وَ بَعَثْ مِنْ أُسْط الْمَيْتِينْ. وَ دِي بَسْ الْبِشَارَةْ الْأَنَا بَلَّغْتَهَا لِلنَّاسْ.