2 تَسَلونِيكِي 1:7 - الكتاب المقدس بالعربي الدارجي هنا تشاد

⁷ وَ هُو يَنْطِي الرَّاحَةْ لَيْكُو إِنْتُو الْقَاعِدِينْ تَتْعَبَوْا وَ يَنْطِيهَا لَيْنَا أَنِحْنَ كُلَ مَعَاكُو. هُو يَنْطِيكُو الرَّاحَةْ وَكِتْ الرَّبّ عِيسَى يِبِينْ نَازِلْ مِنْ السَّمَاءْ مَعَ مَلَائِكَتَهْ الْقَادْرِينْ.

2 تَسَلونِيكِي 1:7 Referenca të Kryqëzuara

رُؤية 14:13

وَ سِمِعْت حِسّ جَايِ مِنْ السَّمَاءْ قَالْ: «أَكْتِبْ: ‹مَبْرُوكْ لِلنَّاسْ الْيُمُوتُوا فِي دَرِبْ الرَّبّ مِنْ الْوَكِتْ دَا وَ قِدَّامْ.›» وَ رُوحْ اللّٰهْ رَدَّ لَيَّهْ وَ قَالْ: «آمِينْ، تَعَبْهُمْ يِكَمِّلْ وَ هُمَّنْ يِنْجَمَّوْا وَ أَجُرْ هَنَا خِدْمِتْهُمْ مَاشِي وَرَاهُمْ.»

مَتَّى 16:27

فَكُّرُوا فِي الْكَلَامْ دَا أَشَانْ إِبْن الْإِنْسَانْ يِقَبِّلْ مَعَ قُدْرَةْ مَجِيدَةْ هَنَا اللّٰهْ أَبُوهْ وَ مَعَ مَلَائِكَتَهْ. وَ أَيِّ نَادُمْ السَّوَّى الْفَسِلْ، يِعَاقِبَهْ. وَ أَيِّ نَادُمْ السَّوَّى عَمَلْ عَدِيلْ، يَنْطِيهْ أَجُرْ.

رُؤية 22:16

«وَ أَنَا عِيسَى رَسَّلْت لَيْكُو مَلَكِي أَشَانْ إِنْتُو نَاسْ أُمَّةْ الْمَسِيحْ تَسْمَعَوْا الشَّهَادَةْ دِي. أَنَا بَسْ إِبْن دَاوُدْ وَ الْمَلِكْ الْمِنْ ذُرِّيّتَهْ. وَ أَنَا نَجْمَةْ الصَّبَاحْ التِّدَاوِي نُورْ شَدِيدْ وَ تِوَصِّفْ كَدَرْ النَّهَارْ جَايِ قَرِيبْ.»

تِيطُس 2:13

وَ نَرْجَوْا بِعَشَمْ الْيَوْم الْمُبَارَكْ الْيِبِينْ فَوْقَهْ مَجْد إِلٰـهْنَا وَ مُنَجِّينَا الْعَظِيمْ، عِيسَى الْمَسِيحْ.

2 كُرُنْتُس 4:17

وَ التَّعَبْ الْعِنْدِنَا هَسَّعْ دَا، هُو خَفِيفْ وَ مَا يِطَوِّلْ. لَاكِنْ التَّعَبْ دَا يِجَهِّزْنَا لِلْمَجْد الْعَظِيمْ الْأَبَداً مَا يِكَمِّلْ.

رُؤية 21:4

وَ هُو يُقُشّ مِنْ عُيُونْهُمْ كُلَّ دُمُوعْهُمْ وَ الْمَوْت يَبْقَى مَا فِيهْ. وَ مَا فِي حِزِنْ بَتَّانْ وَ لَا بَكِي وَ لَا تَعَبْ أَشَانْ كُلَّ شَيّءْ الْأَوَّلْ قَاعِدْ بِقِي مَا فِيهْ.»

رَوْمَا 8:17

وَ كَنْ أَنِحْنَ عِيَالَهْ، أَنِحْنَ كُلَ مِثِلْ وُرَّاثَهْ. أَنِحْنَ وُرَّاثْ اللّٰهْ، أَيْوَى، وُرَّاثَهْ مَعَ الْمَسِيحْ. أَشَانْ كَنْ نَتْعَبَوْا مَعَ الْمَسِيحْ، نَدْخُلُوا مَعَ الْمَسِيحْ فِي مَجْدَهْ كُلَ.

لُوقا 17:30

وَ يَبْقَى مِثِلْ دَا وَكِتْ اللّٰهْ يِبَيِّنْ إِبْن الْإِنْسَانْ.

مَتَّى 25:31

«وَكِتْ إِبْن الْإِنْسَانْ يِقَبِّلْ بِقُدُرْتَهْ الْمَجِيدَةْ مَعَ كُلَّ مَلَائِكَتَهْ، هُو يَقْعُدْ فِي كُرْسِي حَقَّهْ وَ دَا الْكُرْسِي الْمَجِيدْ.

إشَعْيا 57:2

لَاكِنْ الْيَمْشُوا بِالْحَقّ يُمُوتُوا وَ يِنْجَمَّوْا بِالسَّلَامْ.

رُؤية 22:9

وَ لَاكِنْ هُو قَالْ: «لَا، مَا تَسْجُدْ لَيِّ. أَنَا عَبِدْ مِثْلَكْ إِنْتَ وَ مِثِلْ أَخْوَانَكْ الْأَنْبِيَاء وَ مِثِلْ كُلَّ النَّاسْ الْيِتَابُعُوا كَلَامْ الْكِتَابْ دَا. أَعَبُدْ اللّٰهْ.»

رُؤية 22:6

وَ هُو حَجَّى لَيِّ وَ قَالْ: «كُلَّ الْكَلَامْ دَا ثَابِتْ وَ صَحِيحْ. وَ الرَّبّ اللّٰهْ الْيِنَزِّلْ كَلَامَهْ لِلْأَنْبِيَاء بِالرُّوحْ الْقُدُّوسْ، هُو رَسَّلْ لَيْك مَلَكَهْ أَشَانْ يِوَصِّفْ عَبِيدَهْ الشَّيّءْ اللَّابُدَّ يَبْقَى قَرِيبْ.»

رُؤية 20:11

وَ أَنَا شِفْت عَرْش عَظِيمْ أَبْيَضْ وَ الْقَاعِدْ فَوْقَهْ. وَ السَّمَاوَاتْ وَ الْأَرْض عَرَّدَوْا مِنْ قِدَّامَهْ وَ بِقَوْا مَا فِيهُمْ.

رُؤية 1:7

وَ شِيفُوا، هُو جَايِ رَاكِبْ فِي السَّحَابْ وَ أَيِّ نَادُمْ يِشِيفَهْ. أَيْوَى، كُلَّ النَّاسْ الطَّعَنَوْه يِشِيفُوهْ وَ كُلَّ قَبَايِلْ الْأَرْض يَبْكُوا بِسَبَبَهْ. أَيْوَى، مِثِلْ دَا بَسْ يَبْقَى. آمِينْ.

1 بُطْرُس 3:22

وَ الْمَسِيحْ هُو الْمَشَى فَوْق فِي السَّمَاوَاتْ وَ هَسَّعْ قَاعِدْ جَنْب اللّٰهْ فِي نُصَّهْ الزَّيْنَايْ. وَ تِحْتَهْ الْمَلَائِكَةْ وَ حُكَّامْ وَ كُبَارَاتْ الْأَرْوَاحْ.

عِبْرَانِيِّين 9:28

وَ الْمَسِيحْ كُلَ قَدَّمْ نَفْسَهْ مَرَّةْ وَاحِدَةْ أَشَانْ يَمْحَا ذُنُوبْ هَنَا نَاسْ كَتِيرِينْ. وَ هُو يَجِي بَتَّانْ مَرَّةْ تَانِيَةْ مَا أَشَانْ يَمْحَا الذُّنُوبْ وَ لَاكِنْ أَشَانْ يِنَجِّي النَّاسْ الْقَاعِدِينْ يَرْجَوْه.

عِبْرَانِيِّين 4:11

وَ خَلَاصْ، خَلِّي نِجَاهُدُوا لِنَدْخُلُوا فِي الرَّاحَةْ دِي، أَشَانْ نَادُمْ مِنِّنَا مَا يِوَدِّرْ بِسَبَبْ الْعِصْيَانْ مِثِلْ جُدُودْنَا.

عِبْرَانِيِّين 4:9

وَ بَيْدَا، نَعَرْفُوا كَدَرْ رَاحَةْ آخَرَةْ مِثِلْ رَاحَةْ يَوْم السَّبْت تِفَضِّلْ لِشَعَبْ اللّٰهْ.

عِبْرَانِيِّين 4:1

وَعَدْ اللّٰهْ الْبُخُصّ الدَّخُولْ فِي رَاحْتَهْ لِسَّاعْ قَاعِدْ. أَنْقَرْعُوا! خَلِّي أَيِّ نَادُمْ مِنْكُو يَدْخُلْ فِي الرَّاحَةْ دِي بَلَا فَشَلْ.

2 تِمُوتَاوُس 2:12

وَ كَنْ نَحْمَلَوْا التَّعَبْ فِي شَانَهْ، نَمُلْكُوا مَعَايَهْ. وَ كَنْ نَنْكُرُوهْ، هُو كُلَ يَنْكُرْنَا.

كُلُوسِي 1:16

أَشَانْ بَيَّهْ هُو، اللّٰهْ خَلَقْ كُلَّ شَيّءْ الْفِي السَّمَاوَاتْ وَ فِي الْأَرْض، الْبِنْشَافْ وَ الْمَا بِنْشَافْ، وَ أَيِّ مَخْلُوقْ الْعِنْدَهْ عَرْش أَوْ مُلُكْ وَ كَنْ هُو حَاكِمْ أَوْ كَبِيرْ. اللّٰهْ خَلَقْ كُلَّ شَيّءْ بِوَاسِطَةْ إِبْنَهْ وَ فِي شَانَهْ هُو.

أفَسُس 1:2

عَلَيْكُمْ السَّلَامْ وَ الرَّحْمَةْ مِنْ اللّٰهْ أَبُونَا وَ رَبِّنَا عِيسَى الْمَسِيحْ.

أعمال الرُسُل 1:11

وَ قَالَوْا: «يَا رُجَالْ دَارْ الْجَلِيلْ، مَالْكُو إِنْتُو وَاقْفِينْ تِصَنْقُعُوا فَوْق فِي السَّمَاءْ؟ شِفْتُوا عِيسَى طَالِعْ مِنْكُو وَ فَاتْ فِي السَّمَاءْ. وَ بِنَفْس الطَّرِيقَةْ دِي، هُو يِقَبِّلْ مِنْ السَّمَاءْ فِي الْأَرْض!»

يُوحَنَّا 1:51

وَ عِيسَى قَالْ لَيْهُمْ: «أَسْمَعَوْا نُقُولْ لَيْكُو الْحَقّ، تِشِيفُوا السَّمَاءْ فَاتِحْ وَ مَلَائِكَةْ اللّٰهْ طَالِعِينْ وَ نَازْلِينْ فَوْق إِبْن الْإِنْسَانْ.»

يُوحَنَّا 1:3

وَ كُلَّ شَيّءْ كَانْ بِالْكَلِمَةْ وَ مِنْ كُلَّ الْأَشْيَاءْ الْكَانَوْا، مَا فِي شَيّءْ الْكَانْ بَلَاهَا.

لُوقا 16:25

«وَ إِبْرَاهِيمْ قَالْ: ‹لَا، يَا وِلَيْدِي. فَكِّرْ فِي كِكَّيْف عِشْت فِي الدُّنْيَا. أَوَّلْ إِنْتَ عِشْت فِي الْحَلُو وَ لَعَازَرْ عَاشْ فِي التَّعَبْ. وَ لَاكِنْ هَسَّعْ هُو عِنْدَهْ رَاحَةْ هِنِي وَ إِنْتَ عِنْدَكْ عَذَابْ.

مَرْخُوس 14:62

وَ عِيسَى قَالْ: «أَنَا هُو. وَ تِشِيفُوا إِبْن الْإِنْسَانْ فِي كُرْسِي جَنْب اللّٰهْ الْقَادِرْ فِي نُصَّهْ الزَّيْنَايْ وَ تِشِيفُوهْ جَايِ فِي سَحَابْ السَّمَاءْ.»

مَرْخُوس 8:38

أَكِيدْ نَاسْ الْوَكِتْ الْحَالِي مُذْنِبِينْ وَ خَايْنِينْ. وَ أَيِّ نَادُمْ الْيَنْكُرْنِي بِسَبَبْ الْعَيْب الْيَلْقَاهْ مِنْهُمْ، أَنَا إِبْن الْإِنْسَانْ نَنْكُرَهْ وَكِتْ نِقَبِّلْ بِقُدْرَةْ أَبُويِ اللّٰهْ الْمَجِيدَةْ مَعَ مَلَائِكَتَهْ الْمُقَدَّسِينْ.»

مَتَّى 26:64

وَ عِيسَى رَدَّ لَيَّهْ وَ قَالْ: «مِثِلْ إِنْتَ قُلْتَهْ. وَ نُقُولْ لَيْكُو يَوْم وَاحِدْ يَجِي تِشِيفُوا إِبْن الْإِنْسَانْ فِي كُرْسِي جَنْب اللّٰهْ الْقَادِرْ فِي نُصَّهْ الزَّيْنَايْ وَ تِشِيفُوهْ جَايِ فِي سَحَابْ السَّمَاءْ.»

خُروج 3:2

وَ فِي الْبَكَانْ دَا، مَلَكْ اللّٰهْ بَانْ لَيَّهْ فِي نَارْ فِي لُبّ شِدَيْرَةْ. وَ مُوسَى شَافْ وَ دَاهُو، نَارْ قَمَّتْ فَوْق الشِّدَيْرَةْ دِي لَاكِنْ هِي مَا قَاعِدَةْ تَحْرَقْ.

خُروج 19:18

وَ كُلَّ جَبَلْ سِينَاء مُغَطَّى بِدُخَّانْ أَشَانْ اللّٰهْ نَزَلْ فَوْقَهْ بِنَارْ. الدُّخَّانْ يَطْلَعْ مِنْ الْجَبَلْ مِثِلْ دُخَّانْ الْفُرُنْ وَ كُلَّ الْجَبَلْ رَجَفْ بِشِدَّةْ.

إشَعْيا 66:15

أَشَانْ دَاهُو اللّٰهْ جَايِ فِي النَّارْ وَ عَرَبَاتَهْ هِنْت الْحَرِبْ مِثِلْ أَمْ زَوْبَعَانَةْ. يَجِي لِيِنَزِّلْ غَضَبَهْ بِزَعَلْ شَدِيدْ وَ تَهْدِيدَهْ فِي نَارْ أَمْ لَهِيبْ.

حِزْقِيال 1:13

وَ الْمَخْلُوقِينْ دَوْل يِشَابُهُوا جَمُرْ هَنَا نَارْ التَّحْرِقْ وَ يِشَابُهُوا مَشَاهِيبْ النَّارْ. وَ النَّارْ دِي تَمْشِي أَمْبَيْن الْمَخْلُوقِينْ دَوْل. وَ النَّارْ دِي تِضَوِّي وَ تَمْرُقْ مِنْهَا بَرَّاقَةْ.

دَنْيال 7:9

وَ بَتَّانْ أَنَا شِفْت كَرَاسِي الْخَطَّوْهُمْ لِمَجْلَسْ الْقُضْيَاءْ. وَ شَايِبْ وَاحِدْ كَبِيرْ سِنّ جَاءْ وَ قَعَدْ فِي عَرْشَهْ وَ خَلَقَهْ أَبْيَضْ كَرّ مِثِلْ الْقَمَرْ وَ شَعَرْ رَاسَهْ مِثِلْ قُطُنْ النَّضِيفْ. وَ عَرْشَهْ نَارْ أَمْ لَهِيبْ وَ رِجْلَيْ عَرْشَهْ نَارْ مُقَرْقِرَةْ.

مَتَّى 16:28

وَ نُقُولْ لَيْكُو الْحَقّ. فِي نَاسْ وَاحِدِينْ الْقَاعِدِينْ هِنِي مَا يُمُوتُوا قُبَّالْ مَا يِشِيفُوا إِبْن الْإِنْسَانْ جَايِ فِي مَمْلَكَتَهْ.»

مَتَّى 25:41

«وَ بَتَّانْ، يِحَجِّي لِلنَّاسْ الْقَاعِدِينْ فِي نُصَّهْ الْإِسْرَايْ وَ يُقُولْ: ‹كِسُّوا بَعِيدْ مِنِّي، إِنْتُو الْمَلْعُونِينْ! أَمْشُوا فِي النَّارْ الْأَبَدِيَّةْ الْاللّٰهْ جَهَّزَاهَا لِإِبْلِيسْ وَ خَدَّامِينَهْ.

أعمال الرُسُل 3:19

وَ هَسَّعْ تُوبُوا وَ قَبُّلُوا لِلّٰهْ أَشَانْ هُو يَمْحَا ذُنُوبْكُو!

1 كُرُنْتُس 3:13

وَ الْخِدْمَةْ الْأَيِّ نَادُمْ خَدَمْهَا تِنْعَرِفْ أَشَانْ يَوْم الْحِسَابْ يِوَصِّفْهَا بِنَارْ. وَ النَّارْ تِجَرِّبْ خِدْمَةْ أَيِّ نَادُمْ كَنْ عَدِيلَةْ وَلَّا مَا عَدِيلَةْ.

1 تَسَلونِيكِي 3:13

وَ خَلِّي الرَّبّ يِثَبِّتْ قُلُوبْكُو أَشَانْ تُكُونُوا صَالِحِينْ وَ بَلَا عَيْب قِدَّامْ أَبُونَا اللّٰهْ فِي الْيَوْم الرَّبِّنَا عِيسَى يَجِي فَوْقَهْ مَعَ جَمَاعْتَهْ الصَّالِحِينْ.

عِبْرَانِيِّين 10:27

لَاكِنْ مَا فِي شَيّءْ يِفَضِّلْ لَيْنَا إِلَّا نَرْجَوْا بِخَوْف شَدِيدْ الْحِسَابْ وَ النَّارْ الْمُحْرِقَةْ هَنَا غَضَبْ اللّٰهْ التَّاكُلْ كُلَّ الْعَاصِيِينْ.

عِبْرَانِيِّين 12:29

أَشَانْ اللّٰهْ النَّعَبُدُوهْ دَا، هُو مِثِلْ نَارْ التَّحْرِقْ كُلَّ شَيّءْ.

2 بُطْرُس 3:7

وَ بِكِلْمَةْ اللّٰهْ بَتَّانْ السَّمَاوَاتْ وَ الْأَرْض الْقَاعِدِينْ حَالِيّاً مَضْمُومِينْ أَشَانْ يَرْجَوْا النَّارْ. اللّٰهْ قَاعِدْ يَحْفَضْهُمْ لَحَدِّي يَوْم الْحِسَابْ الْيَهْلَكَوْا فَوْقَهْ النَّاسْ الْفَسْلِينْ.

يَهُوذَا 1:7

وَ بَتَّانْ، فَكُّرُوا فِي حِلَّالْ سَدُومْ وَ عَمُورَةْ وَ الْحِلَّالْ الْجَنْبُهُمْ. سُكَّانْهُمْ كُلَ بِقَوْا مِثِلْ الْمَلَائِكَةْ دَوْل أَشَانْ أَنْكَرَبَوْا فِي الزِّنَى وَ تَابَعَوْا شَهْوَاتْ مُخَالِفِينْ لِلطَّبِيعَةْ. وَ أَشَانْ دَا، اللّٰهْ صَبَّ فَوْقهُمْ النَّارْ الْأَبَدِيَّةْ وَ هُمَّنْ بِقَوْا لَيْنَا مَثَلْ هَنَا عَذَابْ.

رُؤية 6:11

وَ فِي الْبَكَانْ دَا، اللّٰهْ أَنْطَى لِأَيِّ وَاحِدْ مِنْهُمْ خَلَقْ أَبْيَضْ وَ قَالْ لَيْهُمْ: «أَنْجَمَّوْا بَتَّانْ شِيَّةْ. لِسَّاعْ مَا نِعَاقِبْهُمْ أَشَانْ أَخْوَانْكُو عَبِيدْ عِيسَى الْمُقَدَّرْ لَيْهُمْ الْمَوْت وَ يَكْتُلُوهُمْ مِثِلْ كَتَلَوْكُو، لِسَّاعْ عَدَدْهُمْ مَا تَمَّ.»

رُؤية 14:10

هُو يَشْرَبْ خَمَرْ، مَعَنَاتَهْ هُو يَلْقَى غَضَبْ اللّٰهْ. وَ الْخَمَرْ دَا، خَمَرْ تَقِيلْ بِلْحَيْن وَ مَصْبُوبْ فِي كَاسْ هَنَا الْعَذَابْ وَ النَّادُمْ الْيَشْرَبْ مِنَّهْ يِعَذُّبُوهْ بِنَارْ وَ كِبْرِيتْ قِدَّامْ الْمَلَائِكَةْ الْمُخَصَّصِينْ وَ قِدَّامْ الْحَمَلْ.