2 صَمُوِيل 8:6 - الكتاب المقدس بالعربي الدارجي هنا تشاد

⁶ وَ دَاوُدْ خَطَّ مُحَافِظِينْ فِي الْأَرَامِيَّيْن الْقَاعِدِينْ تِحِتْ حُكُمْ مَدِينَةْ دِمَشْق. وَ الْأَرَامِيَّيْن قَعَدَوْا تِحِتْ حُكُمْ دَاوُدْ وَ قَاعِدِينْ يِكَفُّوا مِيرِي. وَ اللّٰهْ أَنْطَى النَّصُرْ لِدَاوُدْ فِي أَيِّ بَكَانْ الْيَمْشِي فَوْقَهْ.

2 صَمُوِيل 8:6 Referenca të Kryqëzuara

2 صَمُوِيل 8:14

وَ دَاوُدْ خَطَّ مُحَافِظِينْ فِي أَيِّ بَكَانْ فِي بَلَدْ أَدَوْم وَ كُلَّ الْأَدَوْمِيِّينْ قَعَدَوْا تِحِتْ حُكْمَهْ. وَ اللّٰهْ أَنْطَى النَّصُرْ لِدَاوُدْ فِي أَيِّ بَكَانْ الْيَمْشِي فَوْقَهْ.

زَبُور 140:7

يَا اللّٰهْ رَبِّي، إِنْتَ قُدُرْتِي وَ نَجَاتِي وَ فِي يَوْم الْحَرِبْ، إِنْتَ حَمَيْتنِي.

2 أخبار 17:2

وَ يَهُوشَفَطْ خَطَّ عَسْكَرْ فِي كُلَّ الْمُدُنْ الْقَوِيِّينْ هَنَا مَمْلَكَةْ يَهُوذَا وَ مُعَسْكَرَاتْ فِي كُلَّ بَلَدْ يَهُوذَا وَ فِي حِلَّالْ أَفْرَايِمْ الشَّالَاهُمْ أَبُوهْ آسَا.

2 صَمُوِيل 7:9

وَ أَنَا كُنْت مَعَاكْ فِي أَيِّ بَكَانْ الْإِنْتَ مَشَيْت فَوْقَهْ وَ قَشَّيْت كُلَّ عُدْوَانَكْ مِنْ قِدَّامَكْ. وَ نِسَوِّي أُسْمَكْ عَالِي مِثِلْ الْأَسَامَيْ هَنَا النَّاسْ الْكُبَارْ فِي الْأَرْض.

أمْثال 21:31

تَقْدَرْ تِجَهِّزْ خَيْلَكْ لِيَوْم الْحَرِبْ وَ لَاكِنْ النَّصُرْ جَايِ مِنْ اللّٰهْ.

1 أخبار 18:13

وَ دَاوُدْ خَطَّ مُحَافِظِينْ فِي بَلَدْ أَدَوْم وَ كُلَّ الْأَدَوْمِيِّينْ قَعَدَوْا تِحِتْ حُكْمَهْ. وَ اللّٰهْ يَنْطِي النَّصُرْ لِدَاوُدْ فِي أَيِّ بَكَانْ الْيَمْشِي فَوْقَهْ.

2 صَمُوِيل 23:14

وَ دَاوُدْ مَشَى لَجَأْ فِي بَكَانَهْ الْقَوِي. وَ فِي الْوَكِتْ دَا، فِلِسْطِيِّينْ وَاحِدِينْ قَاعِدِينْ فِي مُعَسْكَرْهُمْ فِي بَيْت لَحَمْ.

2 صَمُوِيل 8:2

هُو أَنَّصَرْ فِي نَاسْ مُوَابْ وَ رَقَّدَاهُمْ فِي الْأَرْض وَ قَاوَسَاهُمْ بِحَبِلْ. وَ خَطَّاهُمْ بِمَجْمُوعَاتْ وَ فِي أَيِّ تَلَاتَةْ مَجْمُوعَةْ، يَكْتُلْ مَجْمُوعْتَيْن. وَ نَاسْ بَلَدْ مُوَابْ قَعَدَوْا تِحِتْ حُكُمْ دَاوُدْ وَ يِكَفُّوا مِيرِي.

2 صَمُوِيل 3:18

وَ هَسَّعْ دَا، دَرُّجُوهْ! أَشَانْ فِي سَبَبْ دَاوُدْ، اللّٰهْ قَالْ: ‹بِوَاسِطَةْ عَبْدِي دَاوُدْ، أَنَا نِنَجِّي شَعَبِي بَنِي إِسْرَائِيلْ مِنْ إِيدْ الْفِلِسْطِيِّينْ وَ مِنْ كُلَّ عُدْوَانْهُمْ.›»

1 صَمُوِيل 14:15

وَ خَلَاصْ، خَوْف شَدِيدْ وَقَعْ فِي كُلَّ دَيْش الْفِلِسْطِيِّينْ وَ فِي كُلَّ سُكَّانْ الْمَنْطَقَةْ وَ الْقَاعِدِينْ فِي الْمُعَسْكَرْ. وَ الْحُرَّاسْ وَ الْمُخَرِّبِينْ كُلُّهُمْ بَرْجَلَوْا. وَ الْأَرْض كُلَ رَجَفَتْ أَشَانْ الرَّبّ بَسْ نَزَّلْ فَوْقهُمْ الْبَرْجَالْ دَا.

1 صَمُوِيل 14:6

وَ يُونَتَانْ قَالْ لِلصَّبِي الشَّايِلْ لَيَّهْ سِلَاحَهْ: «تَعَالْ! نَمْشُوا لِلْمُعَسْكَرْ هَنَا النَّاسْ الْمَا مُطَهَّرِينْ دَوْل. أَكُونْ اللّٰهْ يِسَاعِدْنَا وَ نِنَّصُرُوا فَوْقهُمْ أَشَانْ اللّٰهْ قَادِرْ، يَنْطِي النَّصُرْ لِنَاسْ كَتِيرِينْ أَوْ لِنَاسْ شِيَّةْ كُلَ.»

1 صَمُوِيل 14:1

وَ يَوْم وَاحِدْ، يُونَتَانْ وِلَيْد شَاوُولْ قَالْ لِلصَّبِي الشَّايِلْ لَيَّهْ سِلَاحَهْ: «تَعَالْ، نَمْشُوا لِلْمُعَسْكَرْ هَنَا الْفِلِسْطِيِّينْ الْقَاعِدْ فِي النُّصّ الْهِنَاكْ.» وَ لَاكِنْ يُونَتَانْ مَا خَبَّرْ أَبُوهْ.

1 صَمُوِيل 13:3

وَ يَوْم وَاحِدْ، يُونَتَانْ كَتَلْ قَايِدْ الْفِلِسْطِيِّينْ الْقَاعِدْ فِي قَبَعْ. وَ الْفِلِسْطِيِّينْ كُلَ سِمْعَوْا بِالْخَبَرْ دَا. وَ شَاوُولْ أَمَرْ لِيَضُرْبُوا الْبُوقْ فِي كُلَّ الْبَلَدْ وَ قَالْ: «خَلِّي كُلَّ الْعِبْرَانِيِّينْ يَسْمَعَوْا الْخَبَرْ دَا!»

2 صَمُوِيل 8:7

وَ دَاوُدْ قَلَعْ دَرَقْ هَنَا دَهَبْ مِنْ حُرَّاسْ هَدَدْعَازَرْ وَ وَدَّاهُمْ أُورُشَلِيمْ.

2 صَمُوِيل 10:19

وَ وَكِتْ كُلَّ الْمُلُوكْ الْقَاعِدِينْ تِحِتْ هَدَدْعَازَرْ عِرْفَوْا كَدَرْ بَنِي إِسْرَائِيلْ أَنَّصَرَوْا فَوْقهُمْ خَلَاصْ، هُمَّنْ سَوَّوْا مَعَاهُمْ سَلَامْ وَ قَعَدَوْا تِحِتْ حُكُمْهُمْ. وَ الْأَرَامِيَّيْن خَافَوْا وَ بَتَّانْ مَا جَوْا فَزَعَوْا لِبَنِي عَمُّونْ.

1 مُلوك 4:21

وَ الْمَلِكْ سُلَيْمَانْ حَكَمْ فِي كُلَّ الْمَمَالِكْ مِنْ بَحَرْ الْفُرَاتْ وَ بَلَدْ الْفِلِسْطِيِّينْ لَحَدِّي حُدُودْ بَلَدْ مَصِرْ. وَ هُمَّنْ دَوْل يِكَفُّوا الْمِيرِي وَ يَخْدُمُوا لِلْمَلِكْ سُلَيْمَانْ فِي كُلَّ مُدَّةْ حَيَاتَهْ.

2 صَمُوِيل 5:10

وَ قُدْرَةْ دَاوُدْ قَاعِدَةْ تِزِيدْ بِزِيَادَةْ أَشَانْ اللّٰهْ الْإِلٰـهْ الْقَادِرْ قَاعِدْ مَعَايَهْ.

2 مُلوك 1:1

وَ بَعَدْ مَوْت أَخَابْ، بَلَدْ مُوَابْ أَتْمَرَّدَتْ ضِدّ بَنِي إِسْرَائِيلْ.

2 مُلوك 3:4

وَ مِيشَعْ مَلِكْ بَلَدْ مُوَابْ عِنْدَهْ بَهَايِمْ كَتِيرِينْ وَ قَاعِدْ يِكَفِّي 100 000 حُمْلَانْ وَ 100 000 كُبْشَانْ الْعِنْدُهُمْ صُوفْ طُوَالْ مِثِلْ مِيرِي لِمَلِكْ مَمْلَكَةْ إِسْرَائِيلْ.

2 مُلوك 14:28

وَ الْبَاقِي مِنْ عَمَلْ يَرُبَعَامْ وَ كُلَّ شَيّءْ السَّوَّاهْ وَ فَرَاسِيّتَهْ وَ حُرُوبَهْ وَ كِكَّيْف هُو قَبَّلْ مُدُنْ دِمَشْق وَ حَمَاتْ تِحِتْ حُكُمْ مَمْلَكَةْ إِسْرَائِيلْ وَ دَوْل مُدُنْ الْأَوَّلْ هَنَا مَمْلَكَةْ يَهُوذَا، كُلَّ الشَّيّءْ دَا مَكْتُوبْ فِي كِتَابْ تَارِيخْ مُلُوكْ بَنِي إِسْرَائِيلْ.

2 مُلوك 18:7

وَ اللّٰهْ كَانْ مَعَايَهْ وَ حِزْقِيَّا قَاعِدْ يَنْجَحْ فِي كُلَّ شَيّءْ الْيِسَوِّيهْ. وَ هُو أَتْمَرَّدْ ضِدّ مَلِكْ بَلَدْ أَشُورْ وَ أَبَى مَا يَقْعُدْ تِحِتْ حُكْمَهْ.

زَبُور 60:10

مَا إِنْتَ، الْإِلٰـهْ الطَّرَدْتِنَا وَلَّا؟ مَا إِنْتَ، الرَّبّ، الْأَبَى مَا يَمْرُقْ مَعَ عَسْكَرْنَا وَلَّا؟