2 بُطْرُس 3:16 - الكتاب المقدس بالعربي الدارجي هنا تشاد

¹⁶ وَ هُو يِحَجِّي بِالْكَلَامْ دَا فِي كُلَّ جَوَابَاتَهْ. وَ فِي كَلَامْ قَاعِدْ فِي جَوَابَاتَهْ التَّفْسِيرَهْ مَا هَيِّنْ. وَ نَاسْ وَاحِدِينْ الْمَا قَرَوْا وَ إِيمَانْهُمْ مَا ثَابِتْ يِعَوُّجُوا كَلَامَهْ مِثِلْ يِعَوُّجُوا كَلَامْ الْكُتُبْ الْآخَرِينْ. وَ بَيْدَا، يِجِيبُوا لِنُفُوسْهُمْ الْهَلَاكْ.

2 بُطْرُس 3:16 Referenca të Kryqëzuara

مَتَّى 15:6

خَلَاصْ بَيْدَا، إِنْتُو تُقُولُوا النَّادُمْ دَا مَا وَاجِبْ يِسَاعِدْ أَمَّهْ أَوْ أَبُوهْ. وَ بِمِثِلْ دَا، بَطَّلْتُوا وَصَايَا اللّٰهْ أَشَانْ تِتَابُعُوا عَادَاتْكُو.

عِبْرَانِيِّين 5:11

عِنْدِنَا كَلَامْ كَتِيرْ نِدَوْرُوا نُقُولُوهْ لَيْكُو فِي التَّعْلِيمْ دَا لَاكِنْ تَفْسِيرَهْ لَيْكُو قَاسِي أَشَانْ إِنْتُو بِقِيتُوا مَطَامِيسْ.

2 بُطْرُس 2:14

أَيِّ مَرَةْ الْيِشِيفُوهَا، فِي فِكِرْهُمْ يَزْنَوْا بَيْهَا. يِرِيدُوا الذُّنُوبْ وَ شَهْوِتْهُمْ أَبَداً مَا تَشْبَعْ. وَ يِدِسُّوا مَعَاهُمْ فِي الذُّنُوبْ النَّاسْ الْمَا قَوِيِّينْ فِي الْإِيمَانْ. هُمَّنْ مُدَرَّبِينْ فِي الطَّمَعْ وَ مَلْعُونِينْ.

يَعْقُوب 1:8

أَشَانْ النَّادُمْ دَا قَلْبَهْ إِتْنَيْن وَ هُو مَا ثَابِتْ فِي أَيِّ شَيّءْ الْيِسَوِّيهْ.

فِلِبِّي 3:19

وَ فِي الأَخِيرْ، هُمَّنْ يَمْشُوا فِي الْهَلَاكْ. بُطُونْهُمْ بِقَوْا لَيْهُمْ رَبُّهُمْ وَ أَشَانْ دَا، يِتَابُعُوا شَهْوَاتْهُمْ بَسْ. الشَّيّءْ الْيِعَيِّبْهُمْ، دَا بَسْ الْيِفَاشُرُوا بَيَّهْ. وَ عُقُولْهُمْ ثَابْتِينْ فِي خُمَامْ الدُّنْيَا بَسْ.

إرْمِيا 23:36

وَ لَاكِنْ أَبَداً مَا تَشْكُوا وَ تُقُولُوا: ‹تَقَلَةْ اللّٰهْ فَوْقنَا.› وَ هَلْ كَلَامْ اللّٰهْ تَقِيلْ لِلنَّاسْ وَلَّا؟ لَا! إِنْتُو بَسْ قَاعِدِينْ تِغَيُّرُوا كَلَامْ الْإِلٰـهْ الْحَيّ، اللّٰهْ الْقَادِرْ، إِلٰـهْنَا.

1 بُطْرُس 2:8

وَ بَتَّانْ بُقُولْ: <أَسْمَعَوْا، أَنَا نُخُطّ حَجَرْ فِي صَهْيُون. بِسَبَبَهْ، النَّاسْ يِنْطَقَّوْا وَ يَقَعَوْا.> وَ يِنْطَقَّوْا فَوْقَهْ أَشَانْ أَبَوْا مَا يِتَابُعُوا كَلَامْ اللّٰهْ وَ دَا مُقَدَّرْ لَيْهُمْ.

مَتَّى 22:29

وَ عِيسَى رَدَّ لَيْهُمْ وَ قَالْ: «إِنْتُو مُوَدِّرِينْ أَشَانْ مَا تَعَرْفُوا وَ لَا كِتَابْ اللّٰهْ وَ لَا قُدْرَةْ اللّٰهْ.

حَبَقُوق 1:4

وَ أَشَانْ دَا، مَا طَبَّقَوْا شُرُوطْ التَّوْرَاةْ وَ الْعَدَالَةْ أَبَداً مَا تِنْشَافْ. وَ الْعَاصِي قِدِرْ فِي الصَّالِحْ وَ أَشَانْ دَا بَسْ، الشَّرِيعَةْ بِقَتْ عَوْجَةْ.

زَبُور 56:5

وَ كُلَّ يَوْم يَجْرَحَوْنِي بِكَلَامْهُمْ وَ يِفَكُّرُوا فَوْقِي إِلَّا بِالْفَسَالَةْ.

يَهُوذَا 1:4

أَشَانْ فِي نَاسْ وَاحِدِينْ فَسْلِينْ أَنْدَسَّوْا أَمْبَيْنَاتْكُو بِعَشِيرْ. وَ هُمَّنْ قَاعِدِينْ يِعَوُّجُوا كَلَامْ رَحْمَةْ اللّٰهْ لِيِحَلُّلُوا بَيَّهْ الْمُحَرَّمَاتْ. وَ بَيْدَا، يَنْكُرُوا عِيسَى الْمَسِيحْ الْهُو بَسْ سَيِّدْنَا وَ رَبِّنَا. وَ مِنْ زَمَانْ، الْكِتَابْ حَجَّى بِالْعَذَابْ الْيَرْجَاهُمْ.

2 بُطْرُس 2:1

لَاكِنْ زَمَانْ، فِي أَنْبِيَاء كَدَّابِينْ وَاحِدِينْ قَمَّوْا فِي أُسُطْ شَعَبْ بَنِي إِسْرَائِيلْ. وَ مِثِلْ دَا، فِي أُسُطْكُو إِنْتُو كُلَ، مُعَلِّمِينْ كَدَّابِينْ يُقُمُّوا. هُمَّنْ يِنْدَسَّوْا أَمْبَيْنَاتْكُو بِغَشّ وَ يِوَزُّعُوا تَعْلِيمْهُمْ الْيِوَدِّي النَّاسْ فِي الْهَلَاكْ لَحَدِّي يَنْكُرُوا سَيِّدْهُمْ الْفَدَاهُمْ كُلَ. وَ بِكَلَامْهُمْ دَا، يِجِيبُوا الْهَلَاكْ فِي نُفُوسْهُمْ بِسُرْعَةْ.

مَتَّى 15:3

وَ عِيسَى رَدَّ لَيْهُمْ وَ قَالْ: «وَ إِنْتُو، مَالَا تَابَوْا وَصَايَا اللّٰهْ لِتِتَابُعُوا عَادَاتْكُو؟

1 بُطْرُس 1:1

جَوَابْ مِنِّي أَنَا بُطْرُسْ رَسُولْ عِيسَى الْمَسِيحْ. أَنَا نَكْتِبْ لَيْكُو إِنْتُو النَّاسْ الْاللّٰهْ عَزَلَاكُو لِتَبْقَوْا شَعَبَهْ. إِنْتُو الْعَايْشِينْ أَجَانِبْ وَ مُشَتَّتِينْ فِي بُلْدَانْ بُنْطُسْ وَ غَلَاطِيَةْ وَ كَبَّدُوكِيَّةْ وَ آسِيَا وَ بِثِنْيَةْ.

1 مُلوك 10:1

وَ مَلِكَةْ بَلَدْ سَبَأ سِمْعَتْ بِالْكَلَامْ الْقَاعِدِينْ يِحَجُّوهْ فِي سُلَيْمَانْ وَ فِي الشَّيّءْ السَّوَّاهْ لَيَّهْ اللّٰهْ. وَ هِي جَاتْ لِتِجَرِّبَهْ بِقَدِّمِينْ سُؤَالَاتْ قَاسِيِينْ.

تَثْنِية 16:19

وَ أَبَداً مَا تِدَنْقُسُوا الشَّرِيعَةْ وَ مَا تِشِيفُوا نَادُمْ أَحْسَنْ مِنْ نَادُمْ وَ مَا تَقْبَلْ رَشْوَةْ أَشَانْ هِي تَعَمِي عُيُونْ الْحَكِيمْ وَ تِعَوِّجْ كَلَامْ الصَّالِحِينْ.

خُروج 23:6

«مَا تَظْلُمْ الْمِسْكِينْ وَ تِدَنْقِسْ الشَّرِيعَةْ.

خُروج 23:2

مَا تِعَاوِنْ الْكَتِيرِينْ كَنْ هُمَّنْ يِدَوْرُوا يِسَوُّوا شَيّءْ فَسِلْ. وَ فِي الشَّرِيعَةْ، مَا تِتَلِّفْ شَهَادْتَكْ لِتِسْتَفِقْ مَعَ الْكَتِيرِينْ.

تكوين 49:4

لَاكِنْ إِنْتَ مَا تَلْقَى الْكُبُورِيَّةْ أَشَانْ إِنْتَ قَمَّيْت مِثِلْ أَلْمِي فَايِرْ. شَهْوَتَكْ غَلَبَتَكْ وَ دَخَلْت فِي مَرْتِي وَ تَلَّفْت شَرَفِي.

2 بُطْرُس 3:2

فَكُّرُوا فِي كَلَامْ الْأَنْبِيَاء الصَّالِحِينْ الْقَالَوْه مِنْ زَمَانْ. وَ فَكُّرُوا فِي وَصِيَّةْ عِيسَى رَبِّنَا وَ مُنَجِّينَا السِّمِعْتُوهَا بِوَاسِطَةْ الرُّسُلْ الْمَشَوْا لَيْكُو.

2 بُطْرُس 3:14

يَا أَخْوَانِي النِّحِبُّكُو، دَا بَسْ الشَّيّءْ التَّرْجَوْه مِنْ اللّٰهْ. وَ أَشَانْ دَا، سَوُّوا جُهُدْ أَشَانْ تِعِيشُوا بِسَلَامْ قِدَّامَهْ بَلَا خَطَا وَ لَا عَيْب.