2 بُطْرُس 1:10 - الكتاب المقدس بالعربي الدارجي هنا تشاد

¹⁰ أَشَانْ دَا، يَا أَخْوَانِي، سَوُّوا جُهُدْ بِزِيَادَةْ أَشَانْ بِحَالْكُو دِي تِأَكُّدُوا كَدَرْ اللّٰهْ عَزَلَاكُو وَ نَادَاكُو فِي دَرْبَهْ. وَ كَنْ تِسَوُّوا مِثِلْ أَنَا قُلْتَهْ، أَبَداً مَا تَمُرْقُوا مِنْ الدَّرِبْ الْعَدِيلْ دَا.

2 بُطْرُس 1:10 Referenca të Kryqëzuara

2 بُطْرُس 3:17

وَ لَيْكُو إِنْتُو يَا أَخْوَانِي النِّحِبُّكُو، تَعَرْفُوا الْكَلَامْ دَا مِنْ أَوَّلْ. وَ أَشَانْ دَا، أَوْعُوا بَالْكُو وَ مَا تِخَلُّوا كِدِبْ الْعَاصِيِينْ يِوَدِّيكُو فِي دَرِبْهُمْ وَ يِتَلِّفْ إِيمَانْكُو الثَّابِتْ.

عِبْرَانِيِّين 6:11

وَ نِدَوْرُوا كَدَرْ أَيِّ وَاحِدْ مِنْكُو يِوَصِّفْ دَايْماً النِّيَّةْ الْعَدِيلَةْ الْمِثِلْ دِي وَ عَشَمْكُو يَبْقَى بَلَا شَكَكْ لَحَدِّي الْأَخِيرْ.

زَبُور 121:3

يَا أَخُويِ، اللّٰهْ يِثَبِّتْ خَطْوَاتْ رِجْلَكْ، هُو حَافِضَكْ مَا يُنُومْ.

مِيخا 7:8

مَا تِشَّمَّتْ لَيِّ، يَا عَدُويِ. كَنْ أَنَا وَقَعْت كُلَ، نُقُمّ. وَ كَنْ أَنَا قَاعِدْ فِي الضَّلَامْ كُلَ، اللّٰهْ هُو نُورِي.

زَبُور 112:6

وَ بَيْدَا، مَا يِتَّرْتَعْ أَبَداً أَيْوَى، الصَّالِحْ يِذَّكَّرَوْه دَايْماً.

2 بُطْرُس 1:5

وَ أَشَانْ دَا، قُمُّوا بِكُلَّ جُهُدْكُو أَشَانْ تِزِيدُوا فِي الْإِيمَانْ، الْخَيْر. وَ تِزِيدُوا فِي الْخَيْر، الْمَعْرَفَةْ.

2 تِمُوتَاوُس 2:19

لَاكِنْ الْأَسَاسْ الْقَوِي الْاللّٰهْ خَطَّاهْ قَاعِدْ ثَابِتْ وَ هُو خَطَّ فَوْقَهْ خِتِمْ وَ دَا الْكَلَامْ الْمَكْتُوبْ فِي الْكِتَابْ الْبُقُولْ: <اللّٰهْ يَعَرِفْ نَاسَهْ> وَ بَتَّانْ: <وَاجِبْ أَيِّ نَادُمْ الْيِكَرِّمْ أُسُمْ اللّٰهْ يِخَلِّي مِنَّهْ الْفَسَالَةْ مَرَّةْ وَاحِدْ.>

زَبُور 62:2

أَيْوَى، هُو مَلْجَئِي الْيِنَجِّينِي وَ مَسْكَنِي الْقَوِي وَ أَبَداً مَا نِتَّرْتَعْ.

رُؤية 22:14

وَ مَبْرُوكْ لِلنَّاسْ الْيِغَسُّلُوا خُلْقَانْهُمْ أَشَانْ كَنْ خُلْقَانْهُمْ نُضَافْ، عِنْدُهُمْ حَقّ يَاكُلُوا مِنْ عِيَالْ شَدَرَةْ الْحَيَاةْ وَ يَمْشُوا لِلْبِيبَانْ وَ يِنْدَسَّوْا فِي الْمَدِينَةْ.

1 بُطْرُس 1:5

وَ قُدْرَةْ اللّٰهْ تَحْفَضْكُو بِإِيمَانْكُو أَشَانْ تَلْقَوْا النَّجَاةْ الْاللّٰهْ جَهَّزَاهَا وَ يِبَيِّنْهَا فِي الْيَوْم الْأَخِيرْ.

1 بُطْرُس 1:2

اللّٰهْ أَبُوكُو عَزَلَاكُو حَسَبْ النِّظَامْ الْعِنْدَهْ مِنْ زَمَانْ. وَ إِنْتُو بِقِيتُوا النَّاسْ الْخَاصِّيْن لَيَّهْ بِقُدْرَةْ الرُّوحْ الْقُدُّوسْ. وَ دَا، لِتِتَابُعُوا عِيسَى الْمَسِيحْ وَ تَبْقَوْا طَاهِرِينْ بِدَمَّهْ الدَّفَّقْ فِي شَانْكُو. عَلَيْكُمْ السَّلَامْ وَ الرَّحْمَةْ بِكَتَرَةْ.

إشَعْيا 56:2

مَبْرُوكْ لِلنَّادُمْ الْيِطَبِّقْ كَلَامِي وَ لِلْإِنْسَانْ الْيَكُرْبَهْ قَوِي وَ يَحْفَضْ السَّبْت وَ يِحْتَرِمَهْ وَ إِيدَهْ مَا تِسَوِّي أَيِّ فَسَالَةْ.

زَبُور 62:6

أَيْوَى، هُو مَلْجَئِي الْيِنَجِّينِي وَ مَسْكَنِي الْقَوِي وَ أَبَداً مَا نِتَّرْتَعْ.

زَبُور 37:24

وَ كَنْ أَتَّرْتَعْ كُلَ، مَا يَقَعْ أَشَانْ اللّٰهْ كَارِبْ إِيدَهْ.

عِبْرَانِيِّين 6:19

عَشَمْنَا فِي عِيسَى دَا مِثِلْ وِتِدْ ثَابِتْ الْيِثَبِّتْ نُفُوسْنَا أَشَانْ عِيسَى مَشَى غَادِي لِلسِّتَارْ دَاخَلْ فِي بَيْت اللّٰهْ.

زَبُور 15:5

قُرْسَهْ بِرِبَا مَا يِدَيِّنَهْ وَ مَا يِشِيلْ رَشْوَةْ وَ لَا يَظْلُمْ الْبَرِي فِي الشَّرِيعَةْ. النَّادُمْ الْيِسَوِّي مِثِلْ دَا يِعِيشْ دَايْماً بِأَمَانْ.

مَتَّى 22:14

«أَشَانْ اللّٰهْ يِنَادِي نَاسْ كَتِيرِينْ وَ لَاكِنْ يَعَزِلْ نَاسْ شِيَّةْ.»

رَوْمَا 11:29

أَشَانْ كَنْ اللّٰهْ أَنْطَى نَادُمْ عَطِيَّةْ، هُو مَا يَنْدَمْ لَيْهَا. وَ كَنْ نَادَى نَادُمْ، مَا يِبَطِّلْ مُنَادَاتَهْ.

يَعْقُوب 2:10

تَعَرْفُوا كَدَرْ النَّادُمْ التَّابَعْ كُلَّ الشُّرُوطْ وَ لَاكِنْ خَالَفْ شَرْط وَاحِدْ، هُو مِثِلْ خَالَفْ كُلَّ الشُّرُوطْ.

2 بُطْرُس 1:3

وَ أَكِيدْ رَبِّنَا أَنْطَانَا بِقُدُرْتَهْ الْإِلٰـهِيَّةْ كُلَّ شَيّءْ الْأَنِحْنَ حَوْجَانِينْ لَيَّهْ لِنِعِيشُوا بِالتَّقْوَى. وَ دَا يَبْقَى بِعِرْفِتْنَا لَيَّهْ هُو النَّادَانَا فِي دَرْبَهْ بِخَيْرَهْ الْمَجِيدْ.

2 بُطْرُس 3:14

يَا أَخْوَانِي النِّحِبُّكُو، دَا بَسْ الشَّيّءْ التَّرْجَوْه مِنْ اللّٰهْ. وَ أَشَانْ دَا، سَوُّوا جُهُدْ أَشَانْ تِعِيشُوا بِسَلَامْ قِدَّامَهْ بَلَا خَطَا وَ لَا عَيْب.

يَهُوذَا 1:24

اللّٰهْ قَادِرْ وَ يَقْدَرْ يَحْفَضْكُو أَشَانْ مَا تَقَعَوْا. هُو بَسْ يِوَدِّيكُو فِي حَضَرَتَهْ الْمَجِيدَةْ بَلَا أَيِّ عَيْب، فَرْحَانِينْ فَرْحَةْ شَدِيدَةْ.

يَشُوع 7:3

وَ وَكِتْ قَبَّلَوْا، قَالَوْا لِيَشُوعْ: «خَلِّي الشَّعَبْ كُلُّهُمْ مَا يَمْشُوا. خَلِّي نَاسْ مِثِلْ 2 000 أَوْ 3 000 بَسْ يَمْشُوا يَهْجُمُوا حِلَّةْ عَايْ أَشَانْ سُكَّانْهَا شِيَّةْ وَ فِي شَانْ دَا، مَا تِتَعِّبْ الشَّعَبْ كُلُّهُمْ كَيْ.»