1 تِمُوتَاوُس 6:17 - الكتاب المقدس بالعربي الدارجي هنا تشاد

¹⁷ وَ الْأَخْوَانْ الْعِنْدُهُمْ مَالْ كَتِيرْ فِي الدُّنْيَا، وَصِّيهُمْ أَشَانْ مَا يَبْقَوْا فَشَّارِينْ وَ مَا يُخُطُّوا بَالْهُمْ فِي الْمَالْ الْيُفُوتْ. خَلِّي يُخُطُّوا بَالْهُمْ فِي اللّٰهْ الْيَنْطِينَا بِزِيَادَةْ وَ يَرْزُقْنَا بِكُلِّ شَيّءْ أَشَانْ نَفْرَحَوْا مِنَّهْ.

1 تِمُوتَاوُس 6:17 Referenca të Kryqëzuara

أعمال الرُسُل 14:17

وَ لَاكِنْ فِي الْوَكِتْ دَا كُلَ، اللّٰهْ أَنْطَى شَهَادَةْ أَشَانْ يَعَرْفُوهْ هُو مَوْجُودْ. هُو سَوَّى لَيْكُو الْخَيْر وَ رَزَقَاكُو بِأَلْمِي مِنْ السَّمَاءْ وَ غَلَّةْ فِي الْخَرِيفْ وَ شَبَّعَاكُو بِأَكِلْ وَ أَنْطَاكُو فَرَحْ فِي قُلُوبْكُو.»

أمْثال 11:28

الْيِنْتَكِلْ فِي مَالَهْ، يَرْمِي نَفْسَهْ وَ لَاكِنْ الصَّالِحِينْ يُقُمُّوا مِثِلْ قَشّ الْخَرِيفْ.

1 تِمُوتَاوُس 4:10

وَ فِي سَبَبْ الْوَعَدْ دَا، نَتْعَبَوْا وَ نِجَاهُدُوا. خَطَّيْنَا عَشَمْنَا ثَابِتْ فِي اللّٰهْ الْحَيّ الْهُو بَسْ مُنَجِّي هَنَا كُلَّ النَّاسْ خَاصَّةً الْمُؤمِنِينْ.

مَتَّى 19:23

وَ عِيسَى قَالْ لِتَلَامِيذَهْ: «نُقُولْ لَيْكُو الْحَقّ، الدَّخُولْ فِي مَمْلَكَةْ اللّٰهْ قَاسِي لِلنَّادُمْ الْعِنْدَهْ مَالْ كَتِيرْ.

أمْثال 27:24

أَشَانْ الْغُنَى مَا يُدُومْ إِلَى الْأَبَدْ وَ التَّاجْ مَا يِنْحَفِضْ مِنْ ذُرِّيَّةْ لِذُرِّيَّةْ.

تِيطُس 2:12

وَ هِي تِدَرِّبْنَا أَشَانْ نِخَلُّوا مِنِّنَا الْكُفُرْ وَ شَهْوَاتْ الدُّنْيَا وَ نِعِيشُوا فِي الدُّنْيَا بِحَالْ عَاقْلَةْ وَ صَالْحَةْ وَ تَقِيَّةْ.

كُلُوسِي 3:16

خَلُّوا كَلَامْ الْمَسِيحْ يَسْكُنْ أَمْبَيْنَاتْكُو بِكُلَّ بَرَكَاتَهْ. عَلُّمُوا بَيَّهْ أَيِّ وَاحِدْ وَ أَشَّاجَعَوْا أَمْبَيْنَاتْكُو بِكُلَّ حِكْمَةْ. غَنُّوا لِلّٰهْ بِكُلَّ قُلُوبْكُو بِغِنَيْ وَ أَنَاشِيدْ وَ شُكُرْ مِنْ الرُّوحْ الْقُدُّوسْ.

لُوقا 19:2

وَ فِي نَادُمْ وَاحِدْ أُسْمَهْ زَكَّا. وَ هُو كَبِيرْ هَنَا نَاسْ الْجَمَارِكْ وَ هُو غَنِيْ بِلْحَيْن.

أمْثال 30:9

أَشَانْ كَنْ غِنِيتْ وَ شِبِعْت، أَكُونْ نَكْفُرْ وَ نُقُولْ: «اللّٰهْ دَا يَاتُو؟» أَوْ كَنْ فِقِرْت وَ تِعِبْت، أَكُونْ نَسْرِقْ وَ نِتَلِّفْ أُسْمَكْ، يَا إِلٰـهِي.

تَثْنِية 8:17

أَنْقَرْعُوا، مَا تُقُولُوا فِي قُلُوبْكُو: «بِجُهُدْنَا وَ قُدْرَةْ دُرَاعْنَا أَنِحْنَ لِقِينَا الْغُنَى دِي.»

رَوْمَا 11:20

كَلَامَكْ دَا صَحِيحْ. لَاكِنْ مَا تَنْسَى قَطَعَوْهُمْ أَشَانْ هُمَّنْ مَا آمَنَوْا وَ إِنْتَ قَاعِدْ فِي بَكَانْهُمْ بِسَبَبْ إِيمَانَكْ بَسْ. مَا تِسْتَكْبَرْ. أَنْقَرِعْ!

هُوشَع 13:6

أَنَا سَرَّحْتُكُو فِي مَرْعَى عَدِيلْ وَ إِنْتُو رِوِيتُوا وَ شِبِعْتُوا. وَ مِنْ شِبِعْتُوا، الْإِسْتِكْبَارْ دَخَلْ فِي قُلُوبْكُو وَ بَيْدَا، إِنْتُو نِسِيتُونِي.

إرْمِيا 2:31

وَ إِنْتُو نَاسْ الْيَوْم دَوْل، أَسْمَعَوْا كَلَامِي أَنَا اللّٰهْ. يَا بَنِي إِسْرَائِيلْ، هَلْ أَنَا بِقِيتْ لَيْكُو مُخِيفْ مِثِلْ الصَّحَرَاء؟ وَلَّا بِقِيتْ لَيْكُو مِثِلْ الْبَلَدْ الْعِنْدَهَا ضَلَامْ أَزْرَقْ كُرُمْ؟ مَالَا نَاسْ شَعَبِي بُقُولُوا: ‹يَلَّا نَمْشُوا! مَا نِقَبُّلُوا لَيْك أَبَداً!›

أمْثال 23:5

مَا تُخُطّ عَقْلَكْ فِي الْمَالْ، هُو مَا دَايِمْ. هُو يِسَوِّي جَنَاحَيْ مِثِلْ الصَّقُرْ، يِطِيرْ وَ يَمْشِي يِخَلِّيكْ.

زَبُور 104:28

إِنْتَ تَنْطِيهُمْ وَ هُمَّنْ يِلَقُّطُوهْ. إِنْتَ تَفْتَحْ إِيدَكْ وَ هُمَّنْ يَشْبَعَوْا بِالْخَيْر.

زَبُور 62:10

مَا تِتْوَكَّلَوْا عَلَيْ الرَّشْوَةْ وَ مَا تُخُطُّوا عَشَمْكُو فِي مَالْ السِّرْقَةْ بَلَا فَايْدَةْ. وَ كَنْ مَالْكُو يِزِيدْ كُلَ، مَا تُخُطُّوا قُلُوبْكُو فَوْقَهْ.

زَبُور 52:7

«دَاهُو الْفَحَلْ مَا شَافْ الرَّبّ مِثِلْ مَلْجَئَهْ لَاكِنْ هُو أَتْوَكَّلْ عَلَيْ غُنَايَهْ الْكَتِيرْ وَ هُو قَوِي بِفَسَالْتَهْ.»

2 أخبار 26:16

وَ لَاكِنْ وَكِتْ عُزِّيَّا بِقِي شَدِيدْ، هُو بَدَا يِسْتَكْبَرْ لَحَدِّي عِصِي اللّٰهْ إِلٰـهَهْ وَ جَابْ الدَّمَارْ لِنَفْسَهْ. هُو دَخَلْ فِي بَيْت اللّٰهْ وَ حَرَّقْ بَخُورْ فِي مُخْبَرْ الْبَخُورْ.

تَثْنِية 33:15

وَ يَرْحَمْهُمْ بِأَوَّلْ إِنْتَاجْ الْجِبَالْ الْقَدِيمِينْ وَ أَحْسَنْ إِنْتَاجْ الْحُجَارْ إِلَى الْأَبَدْ.

تكوين 13:2

وَ أَبْرَامْ غَنِيْ زِيَادَةْ. عِنْدَهْ بَهَايِمْ كَتِيرِينْ وَ فُضَّةْ وَ دَهَبْ كَتِيرْ.

2 تِمُوتَاوُس 4:10

أَشَانْ أَخُونَا دِيمَاسْ يِحِبّ الدُّنْيَا. هُو فَاتْ خَلَّانِي مَشَى فِي حِلَّةْ تَسَلُونِيكِي. وَ الْآخَرِينْ مَا فِيهُمْ. أَخُونَا كِرِيسْكِي مَشَى فِي بَلَدْ غَلَاطِيَةْ وَ أَخُونَا تِيطُسْ مَشَى فِي بَلَدْ دَلْمَاطِيَةْ.

1 تِمُوتَاوُس 6:13

وَ نِوَصِّيكْ قِدَّامْ اللّٰهْ الْيَنْطِي الْحَيَاةْ لِكُلِّ شَيّءْ وَ بِأُسُمْ الْمَسِيحْ عِيسَى الشَّهَدْ لِلْحَقّ قِدَّامْ الْوَالِي بِلَاطُسْ الْبُنْطِي.

1 تِمُوتَاوُس 1:3

نُقُولْ لَيْك نَفْس الْكَلَامْ الْقُلْتَهْ لَيْك وَكِتْ خَلَّيْتَكْ وَ سَافَرْت لِبَلَدْ مَقِدُونِيَةْ. وَاجِبْ تَقْعُدْ فِي حِلَّةْ أَفَسُسْ أَشَانْ تِوَصِّيهُمْ لِلنَّاسْ الْقَاعِدِينْ يِشَتُّتُوا التَّعْلِيمْ الْمَا صَحِيحْ. آمُرْهُمْ أَشَانْ يِخَلُّوا مِنْهُمْ الْكَلَامْ دَا.

1 تَسَلونِيكِي 1:9

فِي أَيِّ بَكَانْ النَّاسْ قَاعِدِينْ يِحَجُّوا بَيْكُو وَ يُقُولُوا كَدَرْ إِنْتُو كَرَبْتُونَا عَدِيلْ وَ تُبْتُوا لِلّٰهْ. وَ يُقُولُوا إِنْتُو خَلَّيْتُوا مِنْكُو الْأَصْنَامْ أَشَانْ تَعَبُدُوا اللّٰهْ الْوَاحِدْ الْحَيّ

أفَسُس 5:5

نِأَكِّدْ لَيْكُو كَنْ نَادُمْ زَنَّايْ وَلَّا نِجِسْ وَلَّا طَمَّاعْ، هُو مَا يَلْقَى شَيّءْ فِي مَمْلَكَةْ اللّٰهْ وَ الْمَسِيحْ. الطَّمَعْ هُو مِثِلْ عِبَادَةْ الْأَصْنَامْ.

أعمال الرُسُل 17:25

هُو مَا حَوْجَانْ خِدْمَةْ النَّاسْ أَشَانْ شَيّءْ مَا مُقَصِّرْ لَيَّهْ. هُو بَسْ الْيَنْطِي الْحَيَاةْ وَ النَّفَسْ لِكُلَّ النَّاسْ وَ هُو بَسْ الْيَنْطِيهُمْ كُلَّ شَيّءْ.

أعمال الرُسُل 14:27

وَ وَكِتْ وِصْلَوْا خَلَاصْ، نَادَوْا كُلَّ جَمَاعَةْ الْمُؤمِنِينْ يِلِمُّوا. وَ أَوْرَوْهُمْ بِكُلَّ شَيّءْ الْاللّٰهْ سَوَّاهْ بَيْهُمْ وَ كِكَّيْف اللّٰهْ فَتَحْ دَرِبْ الْإِيمَانْ لِلنَّاسْ الْمَا يَهُودْ.

مَرْخُوس 10:24

وَ تَلَامِيذَهْ عَجَّبَوْا بِلْحَيْن مِنْ كَلَامَهْ دَا. وَ عِيسَى حَجَّى لَيْهُمْ بَتَّانْ وَ قَالْ: «يَا عِيَالِي، أَكِيدْ الدَّخُولْ فِي مَمْلَكَةْ اللّٰهْ يَبْقَى قَاسِي.

مَتَّى 27:57

وَكِتْ بِقِي عَشِيَّةْ، رَاجِلْ وَاحِدْ جَاءْ وَ هُو سِيدْ الْمَالْ مِنْ حِلَّةْ الرَّامَةْ وَ أُسْمَهْ يُوسُفْ. وَ هُو كُلَ تِلْمِيذْ عِيسَى.

مَتَّى 6:32

كُلَّ النَّاسْ الْمَا مُؤمِنِينْ خَاطِّينْ بَالْهُمْ فِي الْأَشْيَاءْ دَوْل وَ اللّٰهْ أَبُوكُو فِي السَّمَاءْ يَعَرِفْ كُلَّ شَيّءْ الْإِنْتُو تِدَوْرُوهْ.

دَنْيال 4:30

وَ قَالْ: «دِي مَا بَابِلْ الْكَبِيرَةْ الْأَنَا بَنَيْتهَا أَشَانْ تَبْقَى عَاصِمَةْ لِمَمْلَكَتِي وَلَّا؟ وَ أَنَا بَنَيْتهَا بِقُدُرْتِي وَ قُوِّتِي وَ شَرَفِي وَ مَجْدِي.»

حِزْقِيال 16:56

وَ فِي وَكِتْ إِسْتِكْبَارْكِ، إِنْتِ شَمَّتِّ فِي أَخُتْكِ سَدُومْ.

زَبُور 62:8

يَا الشَّعَبْ! أَتْوَكَّلَوْا عَلَيَّهْ فِي كُلَّ وَكِتْ وَ أَفْتَحَوْا قُلُوبْكُو لَيَّهْ. الرَّبّ هُو مَلْجَئْنَا. وَقْفَةْ.

تِيطُس 3:6

الْهُو نَزَّلَهْ فَوْقنَا بِكُلَّ بَرَكَاتَهْ بِوَاسِطَةْ مُنَجِّينَا عِيسَى الْمَسِيحْ.

1 تِمُوتَاوُس 5:21

أَسْمَعْ كَلَامِي. أَنَا نِوَصِّيكْ قِدَّامْ اللّٰهْ وَ الْمَسِيحْ عِيسَى وَ الْمَلَائِكَةْ الْمُقَرَّبِينْ. تَابِعْ الْوَصَايَا الْأَنْطَيْتهُمْ لَيْك دَوْل وَ مَا تِفَنِّدْ النَّاسْ وَ مَا تِشِيفْ أَيِّ نَادُمْ أَخَيْر مِنْ الْآخَرِينْ.

1 تِمُوتَاوُس 3:15

كَنْ نِأَخِّرْ كُلَ، إِنْتَ تَعَرِفْ الْحَالْ الْوَاجْبَةْ لِأَهَلْ اللّٰهْ. هُمَّنْ نَاسْ اللّٰهْ أُمَّةْ الْمَسِيحْ. وَ أُمَّةْ الْمَسِيحْ، هِي عَمُودْ الْحَقّ وَ أَسَاسَهْ.

جامِعة 2:24

وَ الْعَدِيلْ لِلْإِنْسَانْ يَاكُلْ وَ يَشْرَبْ وَ يِشِيفْ الْحَلُو فِي خِدِمْتَهْ. وَ أَنَا شِفْت دَا كُلَ يَجِي مِنْ الرَّبّ.

إرْمِيا 49:4

يَا بَلَدْ عَمُّونْ، مَالَا تَفْرَحَيْ بِوُدْيَانْكِ، وُدْيَانْكِ الْيِقَوُّمُوا إِنْتَاجْ كَتِيرْ، يَا الْبِنَيَّةْ الْكَافْرَةْ! إِنْتِ تُخُطِّي أَمَانْكِ فِي غُنَاكِ وَ تُقُولِي: ‹يَاتُو يُقُمّ ضِدِّي؟›

مَتَّى 12:32

وَ كَنْ نَادُمْ يُقُولْ كِلْمَةْ ضِدِّي أَنَا، إِبْن الْإِنْسَانْ، اللّٰهْ يَغْفِرْ لَيَّهْ. وَ لَاكِنْ النَّادُمْ الْيُقُولْ كِلْمَةْ ضِدّ الرُّوحْ الْقُدُّوسْ، اللّٰهْ مَا يَغْفِرْ لَيَّهْ وَ لَا فِي الدُّنْيَا وَ لَا فِي الْآخِرَةْ.

لُوقا 3:11

وَ رَدَّ لَيْهُمْ وَ قَالْ: «النَّادُمْ الْعِنْدَهْ خُلْقَانْ إِتْنَيْن، خَلِّي يَنْطِي وَاحِدْ لِلْمَا عِنْدَهْ. وَ النَّادُمْ الْعِنْدَهْ أَكِلْ، خَلِّي يِسَوِّي نَفْس الشَّيّءْ.»

1 تِمُوتَاوُس 6:9

لَاكِنْ النَّاسْ الْيِدَوْرُوا يَبْقَوْا غَنِيِّينْ، طَمَعْهُمْ يِلِزُّهُمْ فِي الذُّنُوبْ وَ يَبْقَى لَيْهُمْ شَرَكْ. وَ كَتَرَةْ شَهْوَاتْهُمْ يِسَبُّبُوا لَيْهُمْ الْأَذَى وَ يِسَوُّوهُمْ عَجَامَا وَ يِوَدُّوهُمْ فِي الدَّمَارْ وَ الْهَلَاكْ.

2 بُطْرُس 1:11

وَ بِمِثِلْ دَا، اللّٰهْ يَفْتَحْ لَيْكُو بَابْ وَسِيعْ لِتَدْخُلُوا فِي الْمَمْلَكَةْ الْأَبَدِيَّةْ وَ هِي مَمْلَكَةْ رَبِّنَا عِيسَى الْمَسِيحْ مُنَجِّينَا.

مَتَّى 25:16

«وَ عَجَلَةْ كَيْ الْخَدَّامْ الْعِنْدَهْ 500 جِنَيْه، شَالَهْ وَ سَاوَقْ بَيَّهْ وَ لِقِي مَكْسَبْ 500 جِنَيْه زِيَادَةْ.