1 تِمُوتَاوُس 1:3 - الكتاب المقدس بالعربي الدارجي هنا تشاد

³ نُقُولْ لَيْك نَفْس الْكَلَامْ الْقُلْتَهْ لَيْك وَكِتْ خَلَّيْتَكْ وَ سَافَرْت لِبَلَدْ مَقِدُونِيَةْ. وَاجِبْ تَقْعُدْ فِي حِلَّةْ أَفَسُسْ أَشَانْ تِوَصِّيهُمْ لِلنَّاسْ الْقَاعِدِينْ يِشَتُّتُوا التَّعْلِيمْ الْمَا صَحِيحْ. آمُرْهُمْ أَشَانْ يِخَلُّوا مِنْهُمْ الْكَلَامْ دَا.

1 تِمُوتَاوُس 1:3 Referenca të Kryqëzuara

1 تِمُوتَاوُس 6:3

أَيِّ نَادُمْ الْيُقُمّ يِعَلِّمْ كَلَامْ شِقْ مِنْ دَا وَ مَا يِدَوْر الْكَلَامْ الْعَدِيلْ الْجَايِ مِنْ رَبِّنَا عِيسَى الْمَسِيحْ وَ يَابَى التَّعْلِيمْ الْيِوَدِّي النَّاسْ فِي التَّقْوَى،

2 يُوحَنَّا 1:7

غَشَّاشِينْ كَتِيرِينْ قَمَّوْا يُرُوغُوا فِي الدُّنْيَا. هُمَّنْ يَابَوْا مَا يَشْهَدَوْا كَدَرْ عِيسَى الْمَسِيحْ بِقِي إِنْسَانِي وَكِتْ جَاءْ فِي الدُّنْيَا. النَّادُمْ الْيُقُولْ كَلَامْ مِثِلْ دَا، هُو غَشَّاشْ وَ عَدُو الْمَسِيحْ.

1 تِمُوتَاوُس 4:11

آمُرْهُمْ لِلنَّاسْ أَشَانْ يِتَابُعُوا الْكَلَامْ دَا وَ عَلِّمْهُمْ لَيَّهْ.

1 تِمُوتَاوُس 4:6

كَنْ تِعَلِّمْ الْأَخْوَانْ الْوَصَايَا دَوْل، إِنْتَ تَبْقَى خَدَّامْ عَدِيلْ لِلْمَسِيحْ عِيسَى. وَ كَلَامْ الْإِيمَانْ وَ التَّعْلِيمْ الْعَدِيلْ التِّتَابِعَهْ، دَوْل يَبْقَوْا لَيْك مِثِلْ أَكِلْ الْيَنْطِيكْ قُدْرَةْ.

رُؤية 2:20

لَاكِنْ أَنَا لِقِيتْ فَوْقَكْ شَيّءْ وَاحِدْ مَا عَدِيلْ. إِنْتَ خَلَّيْت مَرَةْ مِثِلْ إِزَبِيلْ تِسَوِّي نَفِسْهَا نَبِيَّةْ وَ تِعَلِّمْ عَبِيدِي وَ تُغُشُّهُمْ لَحَدِّي يَزْنَوْا وَ يَاكُلُوا لَحَمْ الْقَدَّمَوْه ضَحِيَّةْ لِلْأَصْنَامْ.

رُؤية 2:14

لَاكِنْ أَنَا لِقِيتْ فَوْقَكْ شَيّءْ وَاحِدْ مَا عَدِيلْ. وَ عِنْدَكْ نَاسْ وَاحِدِينْ يِتَابُعُوا تَعْلِيمْ مِثِلْ تَعْلِيمْ بَلْعَامْ. وَ زَمَانْ بَلْعَامْ عَلَّمْ الْمَلِكْ بَلَاقْ كِكَّيْف يِوَدِّي بَنِي إِسْرَائِيلْ فِي الذُّنُوبْ لَحَدِّي أَكَلَوْا اللَّحَمْ الْأَوَّلْ قَدَّمَهْ ضَحِيَّةْ لِأَصْنَامَهْ وَ هُمَّنْ قَمَّوْا زَنَوْا.

1 تِمُوتَاوُس 6:17

وَ الْأَخْوَانْ الْعِنْدُهُمْ مَالْ كَتِيرْ فِي الدُّنْيَا، وَصِّيهُمْ أَشَانْ مَا يَبْقَوْا فَشَّارِينْ وَ مَا يُخُطُّوا بَالْهُمْ فِي الْمَالْ الْيُفُوتْ. خَلِّي يُخُطُّوا بَالْهُمْ فِي اللّٰهْ الْيَنْطِينَا بِزِيَادَةْ وَ يَرْزُقْنَا بِكُلِّ شَيّءْ أَشَانْ نَفْرَحَوْا مِنَّهْ.

1 تِمُوتَاوُس 6:10

أَشَانْ حُبّ الْمَالْ، هُو قَعَرْ كُلَّ الْفَسَالَةْ. بِسَبَبْ الطَّمَعْ، نَاسْ وَاحِدِينْ وَدَّرَوْا. مَرَقَوْا مِنْ دَرِبْ الْإِيمَانْ وَ جَابَوْا فِي رَاسْهُمْ نَدَامَةْ شَدِيدَةْ.

1 تِمُوتَاوُس 5:7

آمُرْهُمْ لِجَمَاعَةْ الْمُؤمِنِينْ بِالْوَصَايَا دَوْل أَشَانْ يَبْقَوْا نَاسْ مَا عِنْدُهُمْ عَيْب.

فِلِبِّي 2:24

وَ عِنْدِي عَشَمْ فَوْق رَبِّنَا كَدَرْ بَعَدْ وَكِتْ شِيَّةْ بَسْ، أَنَا ذَاتِي نَمْشِي لَيْكُو.

أفَسُس 4:14

وَ مِثِلْ دَا، مَا نَبْقَوْا بَتَّانْ مِثِلْ عِيَالْ مَا عِنْدُهُمْ ثَبَاتْ. أَنِحْنَ مَا مِثِلْ مَرَاكِبْ دُقَاقْ فِي الْبَحَرْ الْيِشِيلْهُمْ الشَّلَّالْ وَ التُّسُوقْهُمْ الرِّيحْ. وَ دَا مِثِلْ تَعْلِيمْ الْمَا صَحِيحْ وَ النَّجَاضَةْ الْيُغُشُّوا بَيْهَا النَّاسْ وَ يِوَدُّرُوهُمْ.

أعمال الرُسُل 18:19

وَ وَكِتْ وِصْلَوْا فِي مَدِينَةْ أَفَسُسْ، بُولُسْ خَلَّى بِرِسْكِيلَةْ وَ أَكِيلَا. وَ مَشَى دَخَلْ فِي بَيْت الصَّلَاةْ هَنَا الْيَهُودْ وَ نَاقَشْ مَعَاهُمْ.

أعمال الرُسُل 18:21

وَ مَشَى خَلَّاهُمْ وَ قَالْ: «إِنْ شَاءْ اللّٰهْ، نِقَبِّلْ لَيْكُو يَوْم آخَرْ.» وَ مَرَقْ مِنْ أَفَسُسْ وَ رِكِبْ فِي سَفِينَةْ وَ سَافَرْ.

رَوْمَا 15:26

أَشَانْ الْمُؤمِنِينْ الْفِي مَقِدُونِيَةْ وَ الْيُونَانْ شَالَوْا نِيَّةْ أَمْبَيْنَاتْهُمْ أَشَانْ يِرَسُّلُوا مُسَاعَدَةْ لِلْمَسَاكِينْ الْقَاعِدِينْ أَمْبَيْن الصَّالِحِينْ فِي مَدِينَةْ الْقُدُسْ.

رَوْمَا 16:17

يَا أَخْوَانِي، نِوَصِّيكُو بِشَيّءْ وَاحِدْ. أَنْقَرْعُوا مِنْ النَّاسْ الْيِعَلُّمُوكُو بِتَعْلِيمْ شِقْ مِنْ التَّعْلِيمْ السِّمِعْتُوهْ أَوَّلْ. النَّاسْ دَوْل يِفَرُّقُوا الْمُؤمِنِينْ بِكَلَامْهُمْ وَ يِتَلُّفُوا إِيمَانْهُمْ. كِسُّوا مِنْهُمْ بَعِيدْ.

2 كُرُنْتُس 11:4

أَنَا خَايِفْ أَشَانْ كَنْ نَادُمْ يَمْشِي لَيْكُو وَ يِبَلِّغْ لَيْكُو بِعِيسَى آخَرْ شِقْ مِنْ عِيسَى الْأَنِحْنَ بَلَّغْنَاكُو بَيَّهْ، إِنْتُو تَقْبَلَوْه. أَشَانْ إِنْتُو جَاهِزِينْ لِتَقْبَلَوْا رُوحْ شِقْ مِنْ الرُّوحْ الْقُدُّوسْ الْأَوَّلْ قِبِلْتُوهْ. وَ كَنْ نَادُمْ يِبَلِّغْ لَيْكُو بِشَارَةْ شِقْ مِنْ الْبِشَارَةْ الْأَوَّلْ قِبِلْتُوهَا، أَنَا خَايِفْ إِنْتُو تِتَابُعُوهْ عَجَلَةْ. وَ تَصْبُرُوا لِلنَّادُمْ الْمِثِلْ دَا.

2 تِمُوتَاوُس 1:18

وَ نَسْأَلْ رَبِّنَا لِوَانِي سِفِرُسْ أَشَانْ يَلْقَى رَحْمَةْ مِنْ اللّٰهْ فِي الْيَوْم الْأَخِيرْ. وَ إِنْتَ تَعَرِفْ هُو سَاعَدَانِي كَتِيرْ وَكِتْ أَنَا قَاعِدْ فِي حِلَّةْ أَفَسُسْ كُلَ.