1 تَسَلونِيكِي 5:8 - الكتاب المقدس بالعربي الدارجي هنا تشاد

⁸ وَ لَاكِنْ أَنِحْنَ نَاسْ النَّهَارْ وَ أَشَانْ دَا، خَلِّي نُخُطُّوا بَالْنَا. وَ خَلِّي الْإِيمَانْ وَ الْمَحَبَّةْ يَبْقَوْا لَيْنَا مِثِلْ خَلَقْنَا هَنَا الْحَرِبْ. وَ خَلِّي الْعَشَمْ الْعِنْدِنَا فِي رَبِّنَا الْيِنَجِّينَا، دَا يَبْقَى طَاقِيِّتْنَا.

1 تَسَلونِيكِي 5:8 Referenca të Kryqëzuara

1 بُطْرُس 1:13

أَشَانْ دَا، خُطُّوا بَالْكُو. أَقْعُدُوا ثَابْتِينْ. خُطُّوا عَشَمْكُو كُلَّ كَيْ فِي النِّعْمَةْ التَّلْقَوْهَا فِي الْيَوْم الْعِيسَى الْمَسِيحْ يِبِينْ فَوْقَهْ.

أفَسُس 6:11

أَلْبَسَوْا سِلَاحْ اللّٰهْ الْكَامِلْ أَشَانْ تَقْعُدُوا بَيَّهْ ثَابْتِينْ وَ نَجَاضَةْ إِبْلِيسْ مَا تِنَّصِرْ فَوْقكُو.

إشَعْيا 59:17

هُو لِبِسْ الْعَدَالَةْ مِثِلْ دِرِعْ وَ خَطَّ طَاقِيَّةْ النَّجَاةْ فِي رَاسَهْ. هُو لِبِسْ خَلَقْ التَّارْ مِثِلْ عِبَايَةْ وَ أَنْكَسَى بِالْغِيرَةْ مِثِلْ جَلَّابِيَّةْ.

عِبْرَانِيِّين 6:19

عَشَمْنَا فِي عِيسَى دَا مِثِلْ وِتِدْ ثَابِتْ الْيِثَبِّتْ نُفُوسْنَا أَشَانْ عِيسَى مَشَى غَادِي لِلسِّتَارْ دَاخَلْ فِي بَيْت اللّٰهْ.

1 كُرُنْتُس 13:13

وَ خَلَاصْ التَّلَاتَةْ الْيَقْعُدُوا دَايْماً، هُمَّنْ الْإِيمَانْ وَ الْعَشَمْ وَ الْمَحَبَّةْ. وَ الْأَكْبَرْ مِنْهُمْ هُو الْمَحَبَّةْ.

1 تَسَلونِيكِي 5:5

أَشَانْ إِنْتُو كُلُّكُو عِيَالْ النُّورْ وَ نَاسْ النَّهَارْ. أَيْوَى، أَنِحْنَ مَا نَاسْ هَنَا اللَّيْل وَ لَا نَاسْ الضَّلَامْ.

1 يُوحَنَّا 1:7

وَ لَاكِنْ كَنْ أَنِحْنَ مَاشِينْ فِي النُّورْ مِثِلْ هُو ذَاتَهْ فِي النُّورْ، نِأَكُّدُوا الْعَلَاقَةْ الْعِنْدِنَا أَمْبَيْنَاتْنَا وَ دَمّ عِيسَى إِبْنَهْ يِطَهِّرْنَا مِنْ كُلَّ الذُّنُوبْ.

1 بُطْرُس 2:9

لَاكِنْ كَنْ لَيْكُو إِنْتُو، بِقِيتُوا الْقَبِيلَةْ الْاللّٰهْ عَزَلَاهَا وَ رُجَالْ دِينْ هَنَا الْمَلِكْ الْكَبِيرْ وَ أُمَّةْ مُخَصَّصَةْ لِلّٰهْ وَ شَعَبْ اللّٰهْ ذَاتَهْ. هُو نَادَاكُو أَشَانْ تَمُرْقُوا مِنْ الضَّلَامْ وَ تَدْخُلُوا فِي نُورَهْ الْعَجِيبْ وَ خَلَاصْ تِبَلُّغُوا خَبَرْ هَنَا أَعْمَالْ اللّٰهْ الْكُبَارْ.

2 كُرُنْتُس 6:7

كَلَامْنَا كَلَامْ الْحَقّ وَ نَخْدُمُوا بِقُدْرَةْ اللّٰهْ. الْحَالْ الصَّالْحَةْ بَسْ سِلَاحْنَا فِي إِيدْنَا الزَّيْنَةْ وَ فِي إِيدْنَا الْإِسْرَةْ.

مَراثِي إرْمِيا 3:26

وَ دَا سَمَحْ كَنْ تَرْجَى بِهُدُوءْ وَ تُخُطّ عَشَمَكْ فِي النَّجَاةْ الْجَايَةْ مِنْ اللّٰهْ.

أفَسُس 6:23

وَ خَلِّي كُلَّ الْأَخْوَانْ يَلْقَوْا السَّلَامْ وَ الْمَحَبَّةْ مَعَ الْإِيمَانْ مِنْ اللّٰهْ أَبُونَا وَ رَبِّنَا عِيسَى الْمَسِيحْ.

غَلاطِية 5:5

لَاكِنْ بِقُدْرَةْ الرُّوحْ الْقُدُّوسْ، أَنِحْنَ نُخُطُّوا عَشَمْنَا فِي اللّٰهْ الْيِسَوِّينَا صَالِحِينْ بِسَبَبْ إِيمَانَّا الْقَاعِدِينْ نِتْمَنَّوْه بِزِيَادَةْ.

زَبُور 43:5

مَالَا تِأَيِّسِي، يَا نَفْسِي؟ وَ مَالَا تَقِنْتِي مِنْ التَّعَبْ الْفَوْقِي؟ خُطِّي عَشَمْكِ فِي اللّٰهْ إِلٰـهِي. أَيْوَى، أَنَا نَشْكُرَهْ بَتَّانْ، هُو إِلٰـهِي الْيِنَجِّينِي.

زَبُور 42:11

مَالَا تِأَيِّسِي، يَا نَفْسِي؟ وَ مَالَا تَقِنْتِي مِنْ التَّعَبْ الْفَوْقِي؟ خُطِّي عَشَمْكِ فِي اللّٰهْ إِلٰـهِي. أَيْوَى، أَنَا نَشْكُرَهْ بَتَّانْ، هُو إِلٰـهِي الْيِنَجِّينِي.

زَبُور 42:5

مَالَا تِأَيِّسِي، يَا نَفْسِي؟ وَ مَالَا تَقِنْتِي مِنْ التَّعَبْ الْفَوْقِي؟ خُطِّي عَشَمْكِ فِي اللّٰهْ إِلٰـهِي. أَيْوَى، أَنَا نَشْكُرَهْ بَتَّانْ، هُو إِلٰـهِي الْيِنَجِّينِي.

2 تَسَلونِيكِي 2:16

وَ خَلَاصْ، نَسْأَلَوْا لَيْكُو رَبِّنَا عِيسَى الْمَسِيحْ ذَاتَهْ وَ اللّٰهْ أَبُونَا الْحَبَّانَا وَ بِرَحْمَتَهْ، أَنْطَانَا شَجَاعَةْ أَبَدِيَّةْ وَ عَشَمْ كَبِيرْ.