1 تَسَلونِيكِي 4:5 - الكتاب المقدس بالعربي الدارجي هنا تشاد

⁵ مَا تِخَلُّوا شَهْوَاتْكُو يَمُلْكُوا فَوْقكُو. مَا تَبْقَوْا مِثِلْ النَّاسْ الْمَا مُؤمِنِينْ الْمَا يَعَرْفُوا اللّٰهْ.

1 تَسَلونِيكِي 4:5 Referenca të Kryqëzuara

غَلاطِية 4:8

فِي الْوَكِتْ الْفَاتْ، مَا عِرِفْتُوا اللّٰهْ وَ إِنْتُو عَبِيدْ لِلْإِلٰـهَاتْ الْمَا إِلٰـهَاتْ بِالصَّحِيحْ.

2 تَسَلونِيكِي 1:8

هُو يَجِي بِنَارْ أَمّ لَهِيبْ حَامِيَةْ. وَ هُو يِعَاقِبْ النَّاسْ الْمَا يِدَوْرُوا يَعَرْفُوا اللّٰهْ وَ مَا يِتَابُعُوا بِشَارَةْ رَبِّنَا عِيسَى.

كُلُوسِي 3:5

أَشَانْ دَا، قُشُّوا مَرَّةْ وَاحِدْ مِنْ أَفْكَارْكُو كُلَّ شَيّءْ الْمِنْ الْأَرْض مِثِلْ الزِّنَى وَ الْحَالْ الشَّيْنَةْ وَ الشَّهْوَاتْ الْفَسْلِينْ وَ النِّيَّةْ الْفَسْلَةْ وَ الطَّمَعْ. وَ بِالصَّحِيحْ، الطَّمَعْ هُو مِثِلْ عِبَادَةْ الْأَصْنَامْ.

1 بُطْرُس 4:3

كَفَاكُو! أَشَانْ مِنْ زَمَانْ، إِنْتُو قَعَدْتُوا وَكِتْ طَوِيلْ فِي عَمَلْ الْقَاعِدِينْ يِسَوُّوا النَّاسْ الْمَا مُؤمِنِينْ. هُمَّنْ قَاعِدِينْ يِسَوُّوا الْفَسَادْ وَ شَهْوَاتْهُمْ الشَّيْنِينْ وَ السَّكَرْ وَ حَفْلَاتْ الزِّنَى وَ السَّفَاهَةْ. وَ يَعَبُدُوا الْأَصْنَامْ الْاللّٰهْ حَرَّمَاهُمْ.

أفَسُس 2:12

أَوَّلْ إِنْتُو مَا عِنْدُكُو عَلَاقَةْ مَعَ الْمَسِيحْ. إِنْتُو مِنْ قَبَايِلْ شِقْ، مَا مِنْ بَنِي إِسْرَائِيلْ الشَّعَبْ الْاللّٰهْ عَزَلَاهُمْ. الْمُعَاهَدَاتْ الْاللّٰهْ سَوَّاهُمْ مَعَ الْيَهُودْ، هُو مَا سَوَّاهُمْ مَعَاكُو. وَ الْوَعَدْ الْاللّٰهْ أَنْطَاهْ لَيْهُمْ، إِنْتُو مَا عِرِفْتُوهْ. إِنْتُو عَايْشِينْ فِي الدُّنْيَا لَاكِنْ مَا عِرِفْتُوا اللّٰهْ وَ مَا عِنْدُكُو عَشَمْ فَوْقَهْ.

1 كُرُنْتُس 15:34

قَبُّلُوا فِي الدَّرِبْ الْعَدِيلْ التَّعَرْفُوهْ وَ خَلُّوا مِنْكُو الذُّنُوبْ. قُلْت الْكَلَامْ دَا أَشَانْ نَاسْ وَاحِدِينْ مِنْكُو مَا يَعَرْفُوا اللّٰهْ. وَ دَا عَيْب لَيْكُو.

رَوْمَا 1:28

النَّاسْ أَبَوْا مَا يَعَرْفُوا اللّٰهْ وَ أَشَانْ دَا، اللّٰهْ سَلَّمَاهُمْ لِعُقُولْهُمْ الْفَاسْدِينْ وَ قَمَّوْا يِسَوُّوا الشَّيّءْ الْمَا وَاجِبْ يِسَوُّوهْ.

رَوْمَا 1:26

وَ أَشَانْ دَا، اللّٰهْ سَلَّمَاهُمْ لِشَهْوَاتْهُمْ الْيِجِيبُوا فِي رُوسَيْهُمْ الْعَيْب. وَ عَوِينْهُمْ كُلَ خَلَّنْ مِنْهِنْ الرُّجَالْ وَ دَوَّرَنْ عَوِينْ.

رَوْمَا 1:24

وَ أَشَانْ دَا، اللّٰهْ سَلَّمَاهُمْ لِشَهْوَاتْ قُلُوبْهُمْ وَ خَلَّاهُمْ يِسَوُّوا فِعِلْ شَيْن بِأَجْسَامْهُمْ وَ يِتَلُّفُوا شَرَفْهُمْ أَمْبَيْنَاتْهُمْ.

أعمال الرُسُل 17:23

وَ وَكِتْ أَنَا قَاعِدْ نُرُوغْ فِي حِلِّتْكُو، شِفْت مَدَابِحْكُو. وَ لِقِيتْ مَدْبَحْ وَاحِدْ وَ قَرَيْت الْكَلَامْ الْمَكْتُوبْ فَوْقَهْ بُقُولْ: ‹لِلْإِلٰـهْ الْمَا مَعْرُوفْ.› وَ خَلَاصْ، أَنَا نِأَوْرِيكُو بِاللّٰهْ، الْإِلٰـهْ التَّعَبُدُوهْ وَ مَا تَعَرْفُوهْ.

لُوقا 12:30

كُلَّ النَّاسْ الْمَا مُؤمِنِينْ خَاطِّينْ بَالْهُمْ فِي الْأَشْيَاءْ دَوْل وَ أَبُوكُو اللّٰهْ يَعَرِفْ كَدَرْ إِنْتُو تِدَوْرُوهُمْ.

مَتَّى 6:32

كُلَّ النَّاسْ الْمَا مُؤمِنِينْ خَاطِّينْ بَالْهُمْ فِي الْأَشْيَاءْ دَوْل وَ اللّٰهْ أَبُوكُو فِي السَّمَاءْ يَعَرِفْ كُلَّ شَيّءْ الْإِنْتُو تِدَوْرُوهْ.

1 كُرُنْتُس 1:21

أَشَانْ اللّٰهْ سَوَّى كُلَّ شَيّءْ حَسَبْ حِكْمَتَهْ وَ لَاكِنْ نَاسْ الدُّنْيَا مَا أَعْتَرَفَوْا بَيَّهْ. وَ خَلَاصْ اللّٰهْ شَالْ نِيَّةْ أَشَانْ يِنَجِّي النَّاسْ الْيِآمُنُوا بَيَّهْ بِطَرِيقْ الْبِشَارَةْ، حَتَّى كَانْ نَاسْ الدُّنْيَا يِشِيفُوهْ كَلامْ بَاطِلْ كُلَ.

زَبُور 79:6

نَزِّلْ غَضَبَكْ فِي الْأُمَمْ الْمَا يَعَرْفُوكْ وَ ضِدّ الْمَمَالِكْ الْمَا يِنَادُوا أُسْمَكْ.

إرْمِيا 10:25

وَ خَلِّي غَضَبَكْ يَنْزِلْ فِي الْأُمَمْ الْمَا يَعَرْفُوكْ وَ فِي الْقَبَايِلْ الْمَا يِنَادُوا أُسْمَكْ. أَشَانْ هُمَّنْ دَمَّرَوْا ذُرِّيَّةْ يَعْقُوبْ وَ سَوَّوْهُمْ مَا فِيهُمْ وَ خَرَبَوْا مَسَاكِنْهُمْ.