1 تَسَلونِيكِي 2:17 - الكتاب المقدس بالعربي الدارجي هنا تشاد

¹⁷ يَا أَخْوَانِي، أَنِحْنَ أَنْفَرَقْنَا مِنْكُو لِوَكِتْ شِيَّةْ. وَ كَنْ أَنِحْنَ مَشَيْنَا بَعِيدْ مِنْكُو كُلَ، قُلُوبْنَا قَاعِدِينْ مَعَاكُو. وَ أَنِحْنَ مُشْتَاقِينْ لَيْكُو بِزِيَادَةْ وَ دَوَّرْنَا نِشِيفُوكُو بَتَّانْ.

1 تَسَلونِيكِي 2:17 Referenca të Kryqëzuara

كُلُوسِي 2:5

صَحِيحْ، أَنَا قَاعِدْ فِي بَكَانْ بَعِيدْ مِنْكُو لَاكِنْ فِكْرِي دَايْماً مَعَاكُو وَ قَاعِدْ نِشِيفْ كَدَرْ حَالْكُو عَدِيلَةْ وَ إِيمَانْكُو فِي الْمَسِيحْ قَوِي وَ أَنَا فَرْحَانْ مِنْكُو.

1 كُرُنْتُس 5:3

وَ كَنْ لَيِّ أَنَا، صَحِيحْ أَنَا قَاعِدْ فِي بَكَانْ بَعِيدْ مِنْكُو لَاكِنْ أَنَا مَعَاكُو بِالرُّوحْ الْقُدُّوسْ. وَ أَنَا حَاكَمْت النَّادُمْ دَا خَلَاصْ مِثِلْ أَنَا بِنَفْسِي قَاعِدْ فِي أُسُطْكُو.

1 تَسَلونِيكِي 3:6

لَاكِنْ هَسَّعْ بَسْ، تِمُوتَاوُسْ قَبَّلْ مِنْكُو وَ جَابْ لَيْنَا خَبَرْ حَلُو. أَوْرَانَا بِإِيمَانْكُو وَ مَحَبِّتْكُو وَ قَالْ فِكِرْكُو فَوْقنَا دَايْماً فِكِرْ زَيْن وَ إِنْتُو مُشْتَاقِينْ لَيْنَا مِثِلْ أَنِحْنَ مُشْتَاقِينْ لَيْكُو.

رَوْمَا 1:13

يَا أَخْوَانِي، نِدَوْر إِنْتُو تَعَرْفُوا كَدَرْ أَنَا حَاوَلْت عِدَّةْ مَرَّاتْ نَجِيكُو. نِدَوْر كَدَرْ خِدِمْتِي تَنْطِيكُو نَتِيجَةْ مِثِلْ أَنْطَتْ نَتِيجَةْ لِلنَّاسْ الْآخَرِينْ الْفِي دِيَارْ هَنَا الْمَا يَهُودْ. لَاكِنْ مَا قِدِرْت نَجِيكُو لَحَدِّي الْيَوْم.

رَوْمَا 15:23

لَاكِنْ هَسَّعْ مَا فَضَّلْ لَيِّ بَكَانْ فِي الْمَنَاطِقْ دَوْل النِّبَشِّرْ فَوْقَهْ. وَ مِنْ سِنِينْ كَتِيرِينْ، نِدَوْر نَجِيكُو.

لُوقا 22:15

وَ قَالْ لَيْهُمْ: «أَنَا أَتْمَنَّيْت نَاكُلْ مَعَاكُو عَشَاءْ عِيدْ الْفِصْحَ دَا قُبَّالْ مَا نَتْعَبْ.

زَبُور 63:1

يَا رَبّ! إِنْتَ إِلٰـهِي، أَنَا نِفَتِّشَكْ. وَ نَفْسِي عَطْشَانَةْ لَيْك وَ جِسْمِي مُشْتَاقْ لَيْك مِثِلْ أَرْض جَفَافْ عَطْشَانَةْ لِلْأَلْمِي.

أعمال الرُسُل 17:10

وَ وَكِتْ بِقِي فِي لَيْل، الْأَخْوَانْ رَسَّلَوْا بُولُسْ وَ سِيلَا فِي حِلَّةْ بِرِيَّةْ. وَ وَكِتْ وِصْلَوْا، مَشَوْا فِي بَيْت الصَّلَاةْ هَنَا الْيَهُودْ.

2 مُلوك 5:26

وَ لَاكِنْ أَلْيَسَعْ قَالْ لَيَّهْ: «إِنْتَ مَا تَعَرِفْ كَدَرْ كَنْ أَنَا مَا مَعَاكْ كُلَ، قَلْبِي يِشِيفَكْ؟ وَكِتْ الرَّاجِلْ دَا دَلَّى بِعَجَلَةْ مِنْ عَرَبَتَهْ وَ جَاءْ لَاقَاكْ أَنَا شِفْتَكْ. هَلْ دَا الْوَكِتْ الْوَاجِبْ إِنْتَ تِشِيلْ قُرُسْ وَلَّا خُلْقَانْ وَلَّا زَيْتُونْ وَلَّا عِنَبْ وَلَّا بَقَرْ وَلَّا غَنَمْ وَلَّا عَبِيدْ وَلَّا خَدِيمْ؟

2 صَمُوِيل 13:39

وَ الْمَلِكْ دَاوُدْ خَلَّى مِنَّهْ مُطَارَدَةْ أَبْشَلُومْ أَشَانْ صَبَّرَوْه فِي مَوْت وِلَيْدَهْ أَمْنُونْ.

تكوين 48:11

«أَوَّلْ أَنَا حَسَبْت بَتَّانْ كَيْ مَا نِشِيفْ وِجْهَكْ. وَ خَلَاصْ بِإِذِنْ الرَّبّ، أَنَا شِفْتَكْ وَ شِفْت عِيَالَكْ كُلَ!»

تكوين 45:28

وَ بَعَدْ شِيَّةْ كَيْ، يَعْقُوبْ قَالْ: «وِلَيْدِي يُوسُفْ قَاعِدْ حَيّ! أَنَا بَتَّانْ نَقْدَرْ نُقُولْ شُنُو؟ نَمْشِي نِشِيفَهْ قُبَّالْ أَنَا مَا نُمُوتْ!»

تكوين 31:30

وَ هَسَّعْ إِنْتَ مَاشِي أَشَانْ إِنْتَ قِرِمْت لِبَيْت أَبُوكْ. وَ لَاكِنْ مَالَا سِرِقْت أَصْنَامِي؟»

لُوقا 12:58

كَنْ إِنْتُو مَاشِينْ فِي بَكَانْ الْقَاضِي، جَاهِدْ أَشَانْ تِسَّامَحَوْا مَعَ خَصِيمَكْ وَكِتْ إِنْتُو لِسَّاعْ فِي الدَّرِبْ. وَ دَا كَنْ مَا تِدَوْر هُو يُسُوقَكْ لِلْقَاضِي وَ الْقَاضِي يِسَلِّمَكْ لِلْعَسْكَرْ وَ الْعَسْكَرْ يِدِسُّوكْ فِي السِّجِنْ.