1 صَمُوِيل 4:10 - الكتاب المقدس بالعربي الدارجي هنا تشاد

¹⁰ وَ فِي الْبَكَانْ دَا خَلَاصْ، الْفِلِسْطِيِّينْ هَجَمَوْهُمْ لِبَنِي إِسْرَائِيلْ وَ أَنَّصَرَوْا فَوْقهُمْ. وَ أَيِّ وَاحِدْ مِنْ بَنِي إِسْرَائِيلْ جَرَى قَبَّلْ بَيْتَهْ. وَ الْخَسَارَةْ بِقَتْ كَبِيرَةْ فِي أُسْط بَنِي إِسْرَائِيلْ وَ وَدَّرَوْا فِيهَا 30 000 رَاجِلْ.

1 صَمُوِيل 4:10 Referenca të Kryqëzuara

2 مُلوك 14:12

وَ عَسْكَرْ مَمْلَكَةْ يَهُوذَا أَنْهَزَمَوْا قِدَّامْ عَسْكَرْ مَمْلَكَةْ إِسْرَائِيلْ وَ أَيِّ عَسْكَرِي عَرَّدْ قَبَّلْ بَيْتَهْ.

1 صَمُوِيل 4:2

وَ الْفِلِسْطِيِّينْ رَصَّوْا رُجَالْهُمْ لِلْحَرِبْ قِدَّامْ بَنِي إِسْرَائِيلْ. وَ الْحَرِبْ بَدَا وَ أَلْوَسَّعْ وَ بَنِي إِسْرَائِيلْ أَنْهَزَمَوْا قِدَّامْ الْفِلِسْطِيِّينْ. وَ الْفِلِسْطِيِّينْ كَتَلَوْا مِنْ بَنِي إِسْرَائِيلْ قَرِيبْ 4 000 رَاجِلْ فِي الدُّوَاسْ دَا.

تَثْنِية 28:25

وَ اللّٰهْ يَطْرُدْكُو قِدَّامْ عُدْوَانْكُو وَ إِنْتُو تَمُرْقُوا ضِدُّهُمْ بِدَرِبْ وَاحِدْ وَ لَاكِنْ تَجْرُوا قِدَّامْهُمْ بِسَبْعَةْ دُرُوبْ. وَ اللّٰهْ يِسَوِّيكُو مَثَلْ مُخِيفْ لِكُلَّ مَمَالِكْ الْأَرْض.

لاوِيِّين 26:17

وَ أَنَا نُقُمّ ضِدُّكُو وَ عُدْوَانْكُو يِنَّصُرُوا فَوْقكُو وَ الْيَكْرَهَوْكُو يَحْكُمُوا فَوْقكُو وَ تَجْرُوا كَنْ مَا يِطَارُدُوكُو كُلَ.

2 صَمُوِيل 18:17

وَ شَالَوْا جَنَازَةْ أَبْشَلُومْ وَ زَقَلَوْهَا فِي نُقْرَةْ فِي الْغَابَةْ وَ رَدَمَوْا فَوْقَهْ حُجَارْ. وَ كُلَّ بَنِي إِسْرَائِيلْ عَرَّدَوْا وَ أَيِّ وَاحِدْ قَبَّلْ بَيْتَهْ.

زَبُور 78:9

وَ نَاسْ قَبِيلَةْ أَفْرَايِمْ الْمُسَلَّحِينْ وَ يَعَرْفُوا زَرِقِينْ النُّشَّابْ، هُمَّنْ عَرَّدَوْا فِي يَوْم الْحَرِبْ.

2 أخبار 25:22

وَ عَسْكَرْ مَمْلَكَةْ يَهُوذَا أَنْهَزَمَوْا قِدَّامْ عَسْكَرْ مَمْلَكَةْ إِسْرَائِيلْ وَ أَيِّ عَسْكَرِي عَرَّدْ قَبَّلْ بَيْتَهْ.

2 أخبار 13:17

وَ أَبِيَّا وَ نَاسَهْ أَنَّصَرَوْا فَوْقهُمْ نَصُرْ كَبِيرْ وَ 500 000 رَاجِلْ مِنْ أَحْسَنْ الْمُحَارِبِينْ هَنَا مَمْلَكَةْ إِسْرَائِيلْ مَاتَوْا.

1 مُلوك 22:36

وَ مَعَ وَقُوعْ الْحَرَّايْ، الْعَسْكَرْ كَوْرَكَوْا فِي الْمُعَسْكَرْ وَ قَالَوْا: «خَلِّي أَيِّ وَاحِدْ يَمْشِي لِحِلِّتَهْ وَ لِبَلَدَهْ.»

1 مُلوك 12:16

وَ وَكِتْ كُلَّ قَبَايِلْ بَنِي إِسْرَائِيلْ شَافَوْا كَدَرْ الْمَلِكْ مَا سِمِعْ كَلَامْهُمْ دَا، قَالَوْا لَيَّهْ: «شُنُو الْيِلِمِّنَا مَعَ ذُرِّيَّةْ دَاوُدْ؟ أَنِحْنَ مَا عِنْدِنَا وَرَثَةْ مَعَ عِيَالْ يَسَّى! يَلَّا، يَا قَبَايِلْ إِسْرَائِيلْ، خَلِّي أَيِّ وَاحِدْ يِقَبِّلْ بَيْتَهْ! وَ هَسَّعْ دَا، يَا ذُرِّيَّةْ دَاوُدْ، هِمُّوا بِنُفُوسْكُو.» وَ بَنِي إِسْرَائِيلْ شَتَّوْا وَ قَبَّلَوْا بُيُوتْهُمْ.

2 صَمُوِيل 20:1

وَ هِنَاكْ فِي قِلْقَالْ، فِيَّهْ رَاجِلْ وَاحِدْ مَا نَافِعْ أُسْمَهْ شَبَعْ وِلَيْد بِكْرِي مِنْ قَبِيلَةْ بَنْيَامِينْ. وَ هُو ضَرَبْ الْبُوقْ وَ قَالْ: «شُنُو الْيِلِمِّنَا مَعَ ذُرِّيَّةْ دَاوُدْ؟ أَنِحْنَ مَا عِنْدِنَا وَرَثَةْ مَعَ عِيَالْ يَسَّى. يَلَّا، يَا بَنِي إِسْرَائِيلْ، خَلِّي أَيِّ وَاحِدْ يِقَبِّلْ بَيْتَهْ!»

2 صَمُوِيل 19:8

وَ خَلَاصْ، الْمَلِكْ قَمَّ مَشَى قَعَدْ فِي خَشُمْ بَابْ الْحِلَّةْ وَ أَوْرَوْهُمْ لِلْعَسْكَرْ وَ قَالَوْا لَيْهُمْ: «دَاهُو الْمَلِكْ مَشَى قَعَدْ فِي خَشُمْ بَابْ الْحِلَّةْ.» وَ كُلَّ الْعَسْكَرْ جَوْا قِدَّامْ الْمَلِكْ. وَ عَسْكَرْ أَبْشَلُومْ كَمَانْ عَرَّدَوْا وَ أَيِّ وَاحِدْ قَبَّلْ بَيْتَهْ.

2 صَمُوِيل 18:7

وَ عَسْكَرْ بَنِي إِسْرَائِيلْ أَنْهَزَمَوْا قِدَّامْ نَاسْ دَاوُدْ. وَ فِي الْيَوْم دَا، الْهَزِيمَةْ بِقَتْ كَبِيرَةْ وَ مَاتَوْا فَوْقهَا 20 000 رَاجِلْ.

تَثْنِية 28:15

وَ لَاكِنْ كَنْ مَا سِمِعْتُوا كَلَامْ اللّٰهْ إِلٰـهْكُو وَ كَنْ مَا حَفَضْتُوا وَ لَا طَبَّقْتُوا وَصِيَّاتَهْ وَ شُرُوطَهْ النَّنْطِيهُمْ لَيْكُو الْيَوْم، دَاهُو كُلَّ نَفَرْ هَنَا اللَّعَنَةْ التَّجِي فَوْقكُو وَ تَلْحَقْكُو.

إرْمِيا 7:12

«‹خَلَاصْ، قُمُّوا أَمْشُوا فِي بَكَانِي الزَّمَانْ قَاعِدْ فِي شِيلَوْه وَ دَا الْبَكَانْ الْأَوَّلْ أَنَا خَطَّيْت فَوْقَهْ أُسْمِي. وَ شِيفُوا الدَّمَارْ الْأَنَا جِبْتَهْ فِي الْبَكَانْ دَا، بِسَبَبْ الْفَسَالَةْ السَّوَّوْهَا شَعَبِي بَنِي إِسْرَائِيلْ.

1 صَمُوِيل 3:11

وَ اللّٰهْ قَالْ لَيَّهْ: «نِسَوِّي شَيّءْ فِي بَنِي إِسْرَائِيلْ الْيَبْهَتْ كُلَّ النَّاسْ الْيَسْمَعَوْه!