1 صَمُوِيل 12:2 - الكتاب المقدس بالعربي الدارجي هنا تشاد

² وَ هَسَّعْ دَا، دَاهُو عِنْدُكُو مَلِكْ قَاعِدْ يُقُودْكُو. وَ كَنْ لَيِّ أَنَا كَمَانْ، أَنَا بِقِيتْ شَايِبْ وَ رَاسِي كُلَ بِقِي أَبْيَضْ. وَ دَاهُو عِيَالِي كُلَ قَاعِدِينْ مَعَاكُو وَ تَعَرْفُوا كَدَرْ أَنَا قُدْتُكُو مِنْ صُبَايِ لَحَدِّي الْيَوْم.

1 صَمُوِيل 12:2 Referenca të Kryqëzuara

1 صَمُوِيل 8:5

وَ قَالَوْا لَيَّهْ: «دَاهُو إِنْتَ بِقِيتْ شَايِبْ وَ أَوْلَادَكْ مَا قَاعِدِينْ يِتَابُعُوا دَرْبَكْ. هَسَّعْ دَا، دَرِّجْ لَيْنَا مَلِكْ يَحْكِمْنَا، مِثِلْ الْأُمَمْ الْآخَرِينْ.»

1 صَمُوِيل 8:20

أَشَانْ أَنِحْنَ كُلَ نَبْقَوْا مِثِلْ الْأُمَمْ الْآخَرِينْ. مَلِكْنَا يَحْكِمْ فَوْقنَا وَ يَمْشِي قِدَّامْ عَسْكَرْنَا وَ يِحَارِبْ مَعَانَا.»

1 صَمُوِيل 8:1

وَ وَكِتْ صَمُوِيلْ بِقِي شَايِبْ خَلَاصْ، دَرَّجْ أَوْلَادَهْ حُكَّامْ فِي إِسْرَائِيلْ.

1 صَمُوِيل 8:3

لَاكِنْ الْأَوْلَادْ دَوْل مَا تَابَعَوْا دَرِبْ أَبُوهُمْ. دَوَّرَوْا مَصْلَحَةْ نَفِسْهُمْ وَ يَقْبَلَوْا الرَّشْوَةْ وَ يِدَنْقُسُوا الشَّرِيعَةْ.

عَدد 27:17

وَ النَّادُمْ دَا يُقُودْهُمْ، يَمْرُقْ وَ يَجِي بَيْهُمْ وَ يِمَرِّقْهُمْ وَ يِدَخِّلْهُمْ. وَ بَيْدَا، شَعَبْ اللّٰهْ مَا يَبْقَوْا مِثِلْ الْغَنَمْ الْمَا عِنْدُهُمْ رَاعِي.»

2 بُطْرُس 1:14

نَعَرِفْ أَنَا نُمُوتْ قَرِيبْ أَشَانْ رَبِّنَا عِيسَى الْمَسِيحْ أَوْرَانِي بِكَلَامْ أَكِيدْ.

2 تِمُوتَاوُس 4:6

وَ لَاكِنْ أَنَا بِقِيتْ مِثِلْ هَدِيَّةْ شَرَابْ وَ قَرِيبْ دَمِّي يِدَفِّقْ. وَ أَنَا مَوْتِي قَرَّبْ خَلَاصْ.

زَبُور 71:18

هَسَّعْ، أَنَا شَيَّبْت وَ صُوفِي بِقِي أَبْيَضْ. يَا رَبّ، مَا تِخَلِّينِي لَحَدِّي نِخَبِّرْ الذُّرِّيَّةْ دِي بِقُوَّتَكْ وَ نِخَبِّرْ الْيَجُوا بَعَدْهُمْ بِقُدُرْتَكْ.

1 صَمُوِيل 3:16

لَاكِنْ عَالِي نَادَاهْ وَ قَالْ: «يَا صَمُوِيلْ وِلَيْدِي!» وَ صَمُوِيلْ قَالْ: «نَعَمْ.»

1 صَمُوِيل 3:13

وَ أَنَا قُلْت لَيَّهْ نِعَاقِبْ ذُرِّيّتَهْ عِقَابْ دَايِمْ. وَ دَا، بِسَبَبْ الْحُقْرَةْ الْأَوْلَادَهْ قَاعِدِينْ يِسَوُّوهَا وَ هُو مَا عَاقَبَاهُمْ.

1 صَمُوِيل 2:29

وَ لَاكِنْ مَالَا تَحْقُرُوا الضَّحَايَا وَ الْهَدَايَا الْأَنَا أَمَرْت بَيْهُمْ لِيِقَدُّمُوهُمْ فِي بَيْتِي؟ وَ مَالَا تِكَرِّمْ أَوْلَادَكْ زِيَادَةْ مِنِّي أَنَا اللّٰهْ رَبَّكْ؟ وَ مَالَا إِنْتُو تِسَمُّنُوا نُفُوسْكُو بِأَحْسَنْ لَحَمْ التِّعَزُّلُوهْ مِنْ الضَّحَايَا الْيِقَدُّمُوهُمْ لَيِّ شَعَبِي بَنِي إِسْرَائِيلْ؟ دَا كِكَّيْف!›

1 صَمُوِيل 2:22

وَ عَالِي بِقِي شَايِبْ كَبِيرْ وَ قَاعِدْ يَسْمَعْ بِالشَّيّءْ الْفَسِلْ الْأَوْلَادَهْ قَاعِدِينْ يِسَوُّوهْ فِي جَمِيعْ بَنِي إِسْرَائِيلْ. وَ هُو سِمِعْ كَدَرْ هُمَّنْ يَرُقْدُوا مَعَ الْعَوِينْ الْيَخْدُمُوا فِي مَدَخَلْ خَيْمَةْ الْإِجْتِمَاعْ.

1 صَمُوِيل 3:10

وَ اللّٰهْ جَاءْ وَ نَادَاهْ لِصَمُوِيلْ مِثِلْ أَوَّلْ: «يَا صَمُوِيلْ! يَا صَمُوِيلْ!» وَ صَمُوِيلْ قَالْ: «كَلِّمْ، أَنَا عَبْدَكْ قَاعِدْ نَسْمَعَكْ!»

يَشُوع 23:1

وَ بَعَدْ مُدَّةْ طَوِيلَةْ، اللّٰهْ أَنْطَى الرَّاحَةْ لِبَنِي إِسْرَائِيلْ مِنْ كُلَّ عُدْوَانْهُمْ الْمُجَاوِرِينْهُمْ. وَ يَشُوعْ شَيَّبْ وَ عُمْرَهْ بِقِي طَوِيلْ.

يَشُوع 23:2

وَ هُو نَادَى كُلَّ بَنِي إِسْرَائِيلْ وَ شُيُوخْهُمْ وَ كُبَارَاتْهُمْ وَ قُضْيَاهُمْ وَ مَسَائِيلْهُمْ وَ قَالْ: «أَنَا شَيَّبْت وَ عُمْرِي بِقِي طَوِيلْ.