1 بُطْرُس 5:1 - الكتاب المقدس بالعربي الدارجي هنا تشاد

¹ وَ نِدَوْر نِوَصِّي كُبَارَاتْ جَمَاعَةْ الْمُؤمِنِينْ الْمَعَاكُو. أَنَا كُلَ كَبِيرْ مِثِلْهُمْ. وَ أَنَا شَاهِدْ لِتَعَبْ الْمَسِيحْ وَ بَتَّانْ مُشَارِكْ فِي قُدْرَةْ الْمَسِيحْ الْمَجِيدَةْ التِّبِينْ قَرِيبْ.

1 بُطْرُس 5:1 Referenca të Kryqëzuara

لُوقا 24:48

وَ إِنْتُو شُهُودْ فِي كُلَّ الْكَلَامْ دَا.

رُؤية 1:9

وَ أَنَا يُوحَنَّا أَخُوكُو الْقَاعِدْ نِتَابِعْ عِيسَى مِثِلْكُو. أَنَا كُلَ مُشَارِكْ مَعَاكُو فِي التَّعَبْ وَ فِي مَمْلَكَةْ اللّٰهْ وَ نَحْمَلْ التَّعَبْ بِصَبُرْ مِثِلْكُو. وَ كَرَبَوْنِي أَشَانْ بَلَّغْت لِلنَّاسْ كَلَامْ اللّٰهْ وَ شَهَادَةْ عِيسَى الْمَسِيحْ. وَ هَسَّعْ أَنَا مَسْجُونْ فِي الْجَزِيرَةْ الْأُسُمْهَا بَطْمُسْ.

2 يُوحَنَّا 1:1

جَوَابْ مِنِّي أَنَا الشَّيْخ لَيْكِ إِنْتِ السَّيِّدَةْ الْاللّٰهْ عَزَلَاكِ، لَيْكِ إِنْتِ وَ عِيَالْكِ النِّحِبُّكُو فِي الْحَقّ. وَ مَا أَنَا وِحَيْدِي نِحِبُّكُو. كُلَّ النَّاسْ الْيَعَرْفُوا الْحَقّ يِحِبُّوكُو.

1 بُطْرُس 5:4

وَ وَكِتْ الْمَسِيحْ كَبِيرْ الرُّعْيَانْ يِبِينْ، هُو يَنْطِيكُو التَّاجْ الْمَجِيدْ الْجَمَالَهْ أَبَداً مَا يِكَمِّلْ.

1 يُوحَنَّا 3:2

يَا الْمَحْبُوبِينْ، هَسَّعْ حَالِيّاً أَنِحْنَ عِيَالْ اللّٰهْ. وَ كِكَّيْف نُكُونُوا بَعَدَيْن دَا، اللّٰهْ لِسَّاعْ مَا بَيَّنَهْ لَيْنَا. لَاكِنْ نَعَرْفُوا كَدَرْ وَكِتْ إِبْن اللّٰهْ يِبِينْ بَتَّانْ، نِشِيفُوهْ هُو ذَاتَهْ بِنَفْسَهْ وَ أَنِحْنَ نَبْقَوْا مِثْلَهْ.

1 بُطْرُس 1:7

نَعَرْفُوا كَدَرْ الدَّهَبْ الْبَعَدَيْن يِدَّمَّرْ، يَكْشُفُوهْ بِالنَّارْ. وَ مِثِلْ دَا، إِيمَانْكُو الْقِيمْتَهْ زِيَادَةْ مِنْ الدَّهَبْ، كُلَ يِجَرُّبُوهْ أَشَانْ ثَبَاتَهْ يِنْشَافْ. وَ بَيْدَا، تَلْقَوْا شُكُرْ وَ مَجْد وَ شَرَفْ فِي الْيَوْم الْعِيسَى الْمَسِيحْ يِبِينْ فَوْقَهْ.

أعمال الرُسُل 14:23

وَ فِي أَيِّ بَكَانْ، عَزَلَوْا نَاسْ مِنْ جَمَاعَةْ الْمُؤمِنِينْ أَشَانْ يَبْقَوْا لَيْهُمْ كُبَارَاتْ. وَ صَامَوْا وَ سَأَلَوْا اللّٰهْ لَيْهُمْ وَ أَمَّنَوْهُمْ لِلرَّبّ عِيسَى الْهُمَّنْ كُلُّهُمْ آمَنَوْا بَيَّهْ. وَ خَلَاصْ مَشَوْا.

أعمال الرُسُل 11:30

وَ لَمَّوْا كُلَّ الْمُسَاعَدَةْ وَ أَنْطَوْهَا أَمَانَةْ لِبَرْنَابَا وَ شَاوُولْ أَشَانْ يِوَدُّوهَا لِكُبَارَاتْ الْمُؤمِنِينْ الْفِي مَدِينَةْ الْقُدُسْ.

1 بُطْرُس 1:12

وَ اللّٰهْ وَصَّفْ لِلْأَنْبِيَاء كَدَرْ هُمَّنْ يَخْدُمُوا لَيْكُو إِنْتُو وَ مَا لِنُفُوسْهُمْ. هُمَّنْ كَلَّمَوْا بِالْأَشْيَاءْ الْيَبْقَوْا فِي وَكِتْنَا. وَ إِنْتُو سِمِعْتُوا بِخَبَرْهُمْ مِنْ النَّاسْ الْبَلَّغَوْا لَيْكُو الْبِشَارَةْ. وَ دَا، بِقُدْرَةْ الرُّوحْ الْقُدُّوسْ الْاللّٰهْ نَزَّلَهْ مِنْ السَّمَاءْ. وَ الْكَلَامْ دَا، الْمَلَائِكَةْ ذَاتْهُمْ دَوَّرَوْا يَفْهَمَوْه.

فِلِمُون 1:9

وَ لَاكِنْ أَنِحْنَ نِرَّايَدَوْا وَ أَشَانْ دَا، يَبْقَى لَيِّ أَخَيْر كَنْ نِقَدِّمْ لَيْك طَلَبْ وَ إِنْتَ تَفْهَمْنِي. وَ أَنَا النِّحَجِّي لَيْك، أَنَا بُولُسْ سَفِيرْ الْمَسِيحْ عِيسَى الْحَالِيّاً مَسْجُونْ فِي شَانَهْ.

تِيطُس 1:5

أَنَا خَلَّيْتَكْ فِي جَزِيرَةْ كِرِيتْ أَشَانْ تِعَدِّلْ كُلِّ شَيّءْ اللِّسَّاعْ مَا عِنْدَهْ نِظَامْ عَدِيلْ. وَاجِبْ تَعَزِلْ مِنْ الْمُؤمِنِينْ نَاسْ فِي أَيِّ حِلَّةْ أَشَانْ يَبْقَوْا لَيْهُمْ شُيُوخْ مِثِلْ أَنَا أَوَّلْ وَصَّيْتَكْ بَيَّهْ.

2 تِمُوتَاوُس 4:8

وَ هَسَّعْ الْجَائِزَةْ الْيَنْطُوهَا لِلْغَالِبْ تَرْجَانِي. وَ هِي التَّاجْ الرَّبِّنَا يُخُطَّهْ فِي رَاسْ النَّادُمْ الصَّالِحْ. وَ رَبِّنَا الْحَاكِمْ الْعَادِلْ يَنْطِينِي الطَّاقِيَّةْ دِي فِي الْيَوْم الْأَخِيرْ. وَ مَا يَنْطِيهَا لَيِّ أَنَا وِحَيْدِي لَاكِنْ يَنْطِيهَا لِكُلَّ النَّاسْ الْقَرْمَانِينْ لِيَوْم جَيْتَهْ.

1 تِمُوتَاوُس 5:19

وَ كَنْ النَّاسْ يُخُطُّوا تُهْمَةْ فِي أَيِّ شَيْخ، مَا تَقْبَلْ كَلَامْهُمْ إِلَّا كَنْ شُهُودْ إِتْنَيْن أَوْ تَلَاتَةْ يِثَبُّتُوهْ فَوْقَهْ.

1 تِمُوتَاوُس 5:1

مَا تِكِشّ لِأَيِّ شَايِبْ لَاكِنْ حَجِّي لَيَّهْ بِأَدَبْ مِثِلْ هُو أَبُوكْ. وَ حَجِّي لِلصُّبْيَانْ مِثِلْ هُمَّنْ أَخْوَانَكْ.

فِلِبِّي 1:19

أَشَانْ نَعَرِفْ كَدَرْ اللّٰهْ يِنَجِّينِي وَ دَا بِسَبَبْ إِنْتُو قَاعِدِينْ تَسْأَلَوْه لَيِّ وَ رُوحْ عِيسَى الْمَسِيحْ يِعَاوِنِّي.

2 كُرُنْتُس 5:1

وَ الْجِسِمْ الْعِنْدِنَا وَكِتْ قَاعِدِينْ فِي الْأَرْض، هُو مِثِلْ خَيْمَةْ بَسْ. وَ نَعَرْفُوا كَدَرْ وَكِتْ جِسِمْنَا دَا يُمُوتْ، عِنْدِنَا جِسِمْ آخَرْ الْقَاعِدْ فِي السَّمَاوَاتْ. وَ الْجِسِمْ دَا مِثِلْ بَيْت قَوِي الْاللّٰهْ بَسْ بَنَاهْ. وَ يَقْعُدْ إِلَى الْأَبَدْ وَ مَا مِثِلْ بَيْت الْبَنَوْه النَّاسْ.

أعمال الرُسُل 21:18

وَ أَمْبَاكِرْ، بُولُسْ مَشَى لِيَعْقُوبْ فِي بَيْتَهْ أَشَانْ يِسَلِّمَهْ وَ أَنِحْنَ مَشَيْنَا مَعَايَهْ. وَ هِنَاكْ لِقِينَا كُلَّ الْكُبَارَاتْ لَامِّينْ.

أعمال الرُسُل 20:28

«فَكُّرُوا فِي نُفُوسْكُو وَ فِي كُلَّ جَمَاعَةْ الْمُؤمِنِينْ هَنَا اللّٰهْ أَشَانْ الرُّوحْ الْقُدُّوسْ خَطَّاكُو فَوْقهُمْ رُعْيَانْ. أَيْوَى، أَسْرَحَوْا بِجَمَاعَةْ الْمُؤمِنِينْ الْاللّٰهْ شَرَاهُمْ بِدَمّ إِبْنَهْ.

أعمال الرُسُل 20:17

وَ مِنْ مِلِيتُسْ، بُولُسْ رَسَّلْ فِي أَفَسُسْ لِكُبَارَاتْ جَمَاعَةْ الْمُؤمِنِينْ أَشَانْ يَجُوا لَيَّهْ.

أعمال الرُسُل 15:6

وَ الرُّسُلْ وَ الْكُبَارَاتْ لَمَّوْا وِحَيْدهُمْ أَشَانْ يِشَّاوَرَوْا فِي الْكَلَامْ دَا.

أعمال الرُسُل 15:4

وَ وَكِتْ وِصْلَوْا فِي مَدِينَةْ الْقُدُسْ، كُلَّ جَمَاعَةْ الْمُؤمِنِينْ وَ الرُّسُلْ وَ الْكُبَارَاتْ لَاقَوْهُمْ عَدِيلْ. وَ الْأَخْوَانْ أَوْرَوْهُمْ بِكُلَّ شَيّءْ الْاللّٰهْ سَوَّاهْ بَيْهُمْ.

أعمال الرُسُل 2:32

«وَ عِيسَى دَا، اللّٰهْ بَعَثَهْ وَ أَنِحْنَ شِفْنَاهْ وَ كُلِّنَا شُهُودْ لَيَّهْ.

أعمال الرُسُل 1:22

مِنْ يَحْيَى غَطَّسَهْ فِي أَلْمِي لَحَدِّي الْيَوْم الْاللّٰهْ رَفَعَهْ مِنِّنَا وَ شَالَهْ فِي السَّمَاءْ. وَ النَّادُمْ النَّعَزُلُوهْ يَبْقَى شَاهِدْ مَعَانَا فِي بُعَاثْ عِيسَى.»

أعمال الرُسُل 1:8

وَ لَاكِنْ وَكِتْ الرُّوحْ الْقُدُّوسْ يَنْزِلْ فَوْقكُو، تَلْقَوْا قُدْرَةْ أَشَانْ تَشْهَدَوْا لَيِّ فِي مَدِينَةْ الْقُدُسْ وَ فِي كُلَّ دَارْ الْيَهُودِيَّةْ وَ فِي دَارْ السَّامِرَةْ وَ لَحَدِّي آخِرْ الْأَرْض.»

2 كُرُنْتُس 5:8

أَيْوَى، عَشَمْنَا قَوِي وَ أَخَيْر لَيْنَا نِخَلُّوا الْجِسِمْ الْأَرْضِي دَا أَشَانْ نَسْكُنُوا مَعَ رَبِّنَا.

أعمال الرُسُل 3:15

وَ خَلَاصْ، كَتَلْتُوا النَّادُمْ الْيَنْطِيكُو الْحَيَاةْ. وَ لَاكِنْ اللّٰهْ بَعَثَهْ مِنْ أُسْط الْمَيْتِينْ وَ أَنِحْنَ شُهُودْ لِبُعَاثَهْ.

عِبْرَانِيِّين 12:1

وَ فِي الْكَلَامْ دَا، عِنْدِنَا شُهُودْ كَتِيرِينْ بِلْحَيْن الْيَشْهَدَوْا لَيْنَا مِنْ أَيِّ جِيهَةْ. أَشَانْ دَا، خَلِّي نِخَلُّوا مِنِّنَا كُلَّ شَيّءْ الْيِوَقِّفْنَا وَ كُلَّ ذَنِبْ الْيِدَوْر يَكْرُبْنَا. وَ خَلِّي نَمْشُوا قِدَّامْ بِجُهُدْ مِثِلْ نَاسْ فِي مُسَابَقَةْ وَ نَجْرُوا لَحَدِّي نِكَمُّلُوا الْمُسَابَقَةْ الْأَنِحْنَ قَاعِدِينْ فَوْقهَا.

1 بُطْرُس 4:13

إِنْتُو قَاعِدِينْ تِشَارُكُوا فِي تَعَبْ الْمَسِيحْ وَ أَشَانْ دَا، أَفْرَحَوْا فِي أُسْط التَّعَبْ. وَ كَنْ شَارَكْتُوا فِي تَعَبْ الْمَسِيحْ دَا، تَفْرَحَوْا فَرْحَةْ شَدِيدَةْ وَكِتْ هُو يِبِينْ فِي مَجْدَهْ.

3 يُوحَنَّا 1:1

جَوَابْ مِنْ الشَّيْخ لِحَبِيبْنَا غَايُسْ النِّحِبَّكْ فِي الْحَقّ.