1 بُطْرُس 3:9 - الكتاب المقدس بالعربي الدارجي هنا تشاد

⁹ كَنْ النَّاسْ يِسَوُّوا فَوْقكُو شُغُلْ فَسِلْ، مَا تُرُدُّوا لَيْهُمْ بِشُغُلْ فَسِلْ. وَ كَنْ يِعَيُّرُوكُو، مَا تُرُدُّوا لَيْهُمْ بِمُعْيَارْ. لَاكِنْ بَارُكُوهُمْ، أَشَانْ اللّٰهْ نَادَاكُو فِي دَرْبَهْ لِتِبَارُكُوا النَّاسْ وَ تَوْرُثُوا بَرَكَةْ مِنْ اللّٰهْ.

1 بُطْرُس 3:9 Referenca të Kryqëzuara

رَوْمَا 12:17

كَنْ نَادُمْ سَوَّى فَوْقكُو شَيّءْ فَسِلْ، مَا تِسَوُّوا فَوْقَهْ شَيّءْ فَسِلْ. فَكُّرُوا وَ سَوُّوا الشَّيّءْ الْكُلَّ النَّاسْ يَرْضَوْا بَيَّهْ.

أمْثال 20:22

مَا تِلْكَفَّى الْفَسَالَةْ السَّوَّوْهَا لَيْك، أَتْوَكَّلْ عَلَيْ اللّٰهْ وَ هُو يِنَجِّيكْ.

رَوْمَا 12:14

بَارُكُوا النَّاسْ الْيِتَعُّبُوكُو. أَيْوَى، بَارُكُوهُمْ وَ مَا تَلْعَنَوْهُمْ.

1 تَسَلونِيكِي 5:15

أَنْقَرْعُوا، نَادُمْ مِنْكُو مَا يِسَوِّي شَيّءْ فَسِلْ لِلنَّاسْ السَّوَّوْا لَيَّهْ شَيّءْ فَسِلْ. شِيلُوا نِيَّةْ أَشَانْ تِسَوُّوا دَايْماً الْخَيْر أَمْبَيْنَاتْكُو وَ لِكُلَّ النَّاسْ.

مَتَّى 5:44

وَ لَاكِنْ أَنَا نُقُولْ لَيْكُو حِبُّوا عَدُوكُو وَ أَسْأَلَوْا اللّٰهْ بِالْخَيْر لِلنَّاسْ الْيِتَعُّبُوكُو وَ يَطُرْدُوكُو.

أفَسُس 4:32

سَوُّوا الزَّيْن لِأَيِّ نَادُمْ وَ أَلْحَانَنَوْا. وَ أَسَّامَحَوْا أَمْبَيْنَاتْكُو مِثِلْ اللّٰهْ سَامَحَاكُو وَكِتْ رَحَمَاكُو بِالْمَسِيحْ.

مَتَّى 5:39

وَ لَاكِنْ أَنَا نُقُولْ لَيْكُو مَا تِقَبِّلْ الْفَسِلْ لِلنَّادُمْ السَّوَّى لَيْك الْفَسِلْ. وَ كَنْ نَادُمْ دَقَّاكْ فِي شِدْقَكْ الزَّيْنَةْ، أَنْطِيهْ الْإِسْرَةْ كُلَ.

أمْثال 17:13

الْيِبَدِّلْ الْخَيْر بِالشَّرّ، الشَّرّ مَا يِكِسّ مِنْ بَيْتَهْ.

1 بُطْرُس 5:10

تَعَبْكُو يَقْعُدْ بَتَّانْ وَكِتْ شِيَّةْ. وَ لَاكِنْ اللّٰهْ عِنْدَهْ رَحْمَةْ كَبِيرَةْ وَ هُو نَادَاكُو أَشَانْ تِشَارُكُوا فِي مَجْدَهْ الْأَبَدِي بِعَلَاقِتْكُو مَعَ عِيسَى الْمَسِيحْ. وَ اللّٰهْ هُو ذَاتَهْ يِثَبِّتْكُو وَ يِقَوِّيكُو وَ يَنْطِيكُو قُدْرَةْ وَ مَا تَقَعَوْا بَتَّانْ.

رَوْمَا 8:28

وَ نَعَرْفُوا كَدَرْ فِي كُلَّ شَيّءْ، اللّٰهْ يِسَوِّي الْخَيْر لِلنَّاسْ الْيِحِبُّوهْ وَ هُمَّنْ النَّاسْ الْاللّٰهْ نَادَاهُمْ فِي دَرْبَهْ لِيِطَبُّقُوا خِطِّتَهْ.

مَتَّى 25:34

«وَ الْمَلِكْ يِحَجِّي لِلنَّاسْ الْقَاعِدِينْ فِي نُصَّهْ الزَّيْنَايْ وَ يُقُولْ: ‹أَبُويِ بَارَكَاكُو. تَعَالُوا، شِيلُوا وَرَثَتْكُو وَ هِي الْمَمْلَكَةْ الْاللّٰهْ جَهَّزَاهَا لَيْكُو مِنْ هُو خَلَقْ الدُّنْيَا.

عِبْرَانِيِّين 6:14

وَ اللّٰهْ قَالْ: <أَكِيدْ أَنَا نِبَارِكَكْ وَ نِكَتِّرْ ذُرِّيّتَكْ.>

لُوقا 18:18

وَ نَادُمْ وَاحِدْ مِنْ الْكُبَارَاتْ سَأَلْ عِيسَى وَ قَالْ: «يَا الْمُعَلِّمْ الْعَدِيلْ، وَاجِبْ نِسَوِّي شُنُو أَشَانْ نَلْقَى الْحَيَاةْ الْأَبَدِيَّةْ؟»

لُوقا 10:25

وَ نَادُمْ وَاحِدْ عَالِمْ فِي التَّوْرَاةْ قَمَّ أَشَانْ يِجَرِّبْ عِيسَى وَ قَالْ: «يَا الْمُعَلِّمْ، شُنُو الشَّيّءْ الْوَاجِبْ نِسَوِّيهْ لِنَوْرِثْ الْحَيَاةْ الْأَبَدِيَّةْ؟»

مَتَّى 19:29

وَ أَيِّ نَادُمْ الْقَمَّ فِي شَانْ أُسْمِي وَ خَلَّى بَيْتَهْ أَوْ أَخْوَانَهْ أَوْ أَخْوَاتَهْ أَوْ أَبُوهْ أَوْ أَمَّهْ أَوْ عِيَالَهْ أَوْ زِرَاعْتَهْ، اللّٰهْ يَنْطِيهْ 100 مَرَّةْ زِيَادَةْ وَ يَنْطِيهْ الْحَيَاةْ الْأَبَدِيَّةْ.

رَوْمَا 8:30

وَ النَّاسْ الْاللّٰهْ عَزَلَاهُمْ، هُو نَادَاهُمْ. وَ النَّاسْ النَّادَاهُمْ دَوْل، هُو سَوَّاهُمْ صَالِحِينْ. وَ السَّوَّاهُمْ صَالِحِينْ دَوْل، هُو أَنْطَاهُمْ مَجْدَهْ.

مَرْخُوس 10:17

وَكِتْ عِيسَى قَمَّ مَاشِي فِي دَرْبَهْ، نَادُمْ وَاحِدْ جَرَى لَيَّهْ وَ سَجَدْ قِدَّامَهْ وَ سَأَلَهْ وَ قَالْ: «يَا الْمُعَلِّمْ الْعَدِيلْ! وَاجِبْ نِسَوِّي شُنُو أَشَانْ نَلْقَى الْحَيَاةْ الْأَبَدِيَّةْ؟»

تكوين 42:25

وَ بَعَدْ دَا، يُوسُفْ أَنْطَى أَمُرْ يَمْلَوْا لَيْهُمْ شُوَالَاتْهُمْ بِقَمَحْ وَ يِدِسُّوا قُرُسْ هَنَا أَيِّ وَاحِدْ فِي شُوَالَهْ وَ يَنْطُوهُمْ زَادْ. وَ سَوَّوْا مِثِلْ يُوسُفْ قَالَهْ.

1 صَمُوِيل 26:11

اللّٰهْ يَسْتُرْنِي مَا نُخُطّ إِيدِي فَوْقَهْ، هُو الْاللّٰهْ مَسَحَهْ وَ دَرَّجَهْ مَلِكْ! هَسَّعْ دَا، خَلِّي نِشِيلُوا حَرِبْتَهْ الْقَاعِدَةْ عَلَيْ رَاسَهْ وَ قِرْبِتَهْ هِنْت الْأَلْمِي وَ نَمْشُوا.»

أمْثال 28:10

الْيُقُودْ النَّاسْ الْعَدِيلِينْ فِي الدَّرِبْ الْفَسِلْ، هُو كُلَ يَقَعْ فِي النُّقْرَةْ النَّكَتْهَا. وَ لَاكِنْ النَّاسْ التَّمَامِينْ يَوْرُثُوا الْخَيْر.

غَلاطِية 3:14

وَ بِقِي مِثِلْ دَا، أَشَانْ بِالْمَسِيحْ عِيسَى الْبَرَكَةْ الْاللّٰهْ وَاعَدْ بَيْهَا إِبْرَاهِيمْ تَجِي فِي النَّاسْ الْمَا يَهُودْ كُلَ. وَ خَلَاصْ بِسَبَبْ الْإِيمَانْ، اللّٰهْ يِنَزِّلْ فَوْقنَا كُلِّنَا الرُّوحْ الْقُدُّوسْ الْهُو وَاعَدْ بَيَّهْ النَّاسْ.

عِبْرَانِيِّين 12:17

وَ تَعَرْفُوا كَدَرْ بَعَدَيْن هُو دَوَّرْ يَلْقَى الْبَرَكَةْ وَ لَاكِنْ أَبُوهْ أَبَاهْ. وَ عِيسُو مَا لِقِي طَرِيقَةْ يِعَدِّلْ بَيْهَا حَالَةْ حَتَّى كَانْ هُو فَتَّشْهَا بِبَكِي كُلَ.