1 بُطْرُس 3:8 - الكتاب المقدس بالعربي الدارجي هنا تشاد

⁸ وَ آخِرْ شَيّءْ نُقُولَهْ لَيْكُو كُلُّكُو، خَلِّي قَلِبْكُو يَبْقَى وَاحِدْ وَ خَلِّي رُوحْكُو تَبْقَى طَوِيلَةْ. أَرَّايَدَوْا أَمْبَيْنَاتْكُو بِمَحَبَّةْ أَخَوِيَّةْ وَ بِقَلِبْ حَنُونْ وَ مَسْكُنُوا نُفُوسْكُو.

1 بُطْرُس 3:8 Referenca të Kryqëzuara

رَوْمَا 12:10

أَرَّايَدَوْا أَمْبَيْنَاتْكُو مِثِلْ أَخْوَانْ وَ خَلِّي أَيِّ وَاحِدْ يِشِيلْ نِيَّةْ أَشَانْ يِحِبّ أَخُوهْ بِإِحْتِرَامْ.

1 بُطْرُس 1:22

وَ إِنْتُو طَهَّرْتُوا نُفُوسْكُو وَكِتْ تَابَعْتُوا كَلَامْ الْحَقّ وَ لِقِيتُوا مَحَبَّةْ أَخَوِيَّةْ بَلَا نِفَاقْ. وَ خَلَاصْ، أَرَّايَدَوْا أَمْبَيْنَاتْكُو بِشِدَّةْ وَ بِقَلِبْ وَاحِدْ.

أفَسُس 4:31

خَلِّي الزَّعَلْ وَ الْغَبِينَةْ وَ الْغَضَبْ وَ الْهُرَاجْ وَ الْقَطِيعَةْ يَبْقَوْا مَا فِيهُمْ أَمْبَيْنَاتْكُو وَ خَلُّوا مِنْكُو الْحَسِيفَةْ.

يَعْقُوب 3:17

لَاكِنْ الْحِكْمَةْ الْمِنْ اللّٰهْ أَوَّلاً كَيْ صَافِيَةْ وَ النَّادُمْ الْعِنْدَهْ الْحِكْمَةْ يِرِيدْ السَّلَامْ وَ كَلَامَهْ بَارِدْ وَ رَاسَهْ مَا قَوِي وَ هُو حَنُونْ وَ يِسَوِّي عَمَلْ الْخَيْر وَ هُو مَا عِنْدَهْ تَفْرِقَةْ وَ لَا نِفَاقْ.

أفَسُس 4:2

سَوُّوا كُلَّ شَيّءْ بِنَفَسْ بَارِدْ وَ أَبْقَوْا ضَلُولِينْ وَ صُبُورِينْ وَ أَلْحَمَّلَوْا الْوَاحِدِينْ لِلْآخَرِينْ بِمَحَبَّةْ.

زَكَرِيَّا 7:9

«دَاهُو اللّٰهْ الْقَادِرْ قَالْ: ‹أَحْكُمُوا بِالْحَقّ وَ الْعَدَالَةْ وَ خَلِّي أَيِّ وَاحِدْ يِسَوِّي لِأَخُوهْ الْخَيْر وَ الرَّحْمَةْ.

كُلُوسِي 3:12

يَا النَّاسْ الْاللّٰهْ عَزَلَاكُو، بِقِيتُوا صَالِحِينْ وَ مَحْبُوبِينْ. أَشَانْ دَا، أَلْبَسَوْا الْمَحَنَّةْ وَ خَلِّي قُلُوبْكُو يَبْقَوْا بُيُضْ وَ نَفَسْكُو يَبْقَى بَارِدْ وَ أَبْقَوْا ضَلُولِينْ وَ صُبُورِينْ.

1 كُرُنْتُس 12:26

وَ كَنْ وَاحِدْ مِنْهُمْ تَعْبَانْ، كُلُّهُمْ تَعْبَانِينْ سَوَا. وَ كَنْ وَاحِدْ يَلْقَى شَرَفْ، كُلُّهُمْ فَرْحَانِينْ سَوَا.

مَتَّى 18:33

مَا وَاجِبْ لَيْك تِحِنّ فِي أَخُوكْ مِثِلْ أَنَا حَنَّيْت فَوْقَكْ إِنْتَ وَلَّا؟›

1 يُوحَنَّا 3:14

كَنْ نِرَّايَدَوْا أَمْبَيْنَاتْنَا، دَا بَسْ الدَّلِيلْ الْيِأَكِّدْ كَدَرْ مَرَقْنَا مِنْ حَالَةْ الْمَوْت وَ دَخَلْنَا فِي حَالَةْ الْحَيَاةْ. أَيِّ نَادُمْ الْمَا يِحِبّ أَخْوَانَهْ يَقْعُدْ فِي الْمَوْت.

1 كُرُنْتُس 1:10

يَا أَخْوَانِي، أَنَا نِوَصِّيكُو بِأُسُمْ رَبِّنَا عِيسَى الْمَسِيحْ أَشَانْ كَلَامْكُو يَبْقَى وَاحِدْ لَحَدِّي مَا تِنْقَسْمُوا. وَ خَلِّي قَلِبْكُو يَبْقَى وَاحِدْ وَ فِكِرْكُو يَبْقَى وَاحِدْ.

أعمال الرُسُل 4:32

وَ كُلَّ الْمُؤمِنِينْ عِنْدُهُمْ قَلِبْ وَاحِدْ وَ فِكِرْ وَاحِدْ. وَ مَا فِي نَادُمْ يُقُولْ خُمَامَهْ حَقَّهْ حَلَالَهْ. وَ أَيِّ نَادُمْ مِنْهُمْ يَجْعَلْ مَالَهْ مِثِلْ مَالْ الْأَخْوَانْ.

1 بُطْرُس 5:5

وَ لَيْكُو إِنْتُو الشَّبَابْ كُلَ، أَسْمَعَوْا عَدِيلْ كَلَامْ كُبَارَاتْكُو. وَ نُقُولْ لَيْكُو كُلُّكُو، مَسْكُنُوا نُفُوسْكُو أَمْبَيْنَاتْكُو الْوَاحِدِينْ لِلْآخَرِينْ. أَشَانْ اللّٰهْ يُقُمّ ضِدّ النَّاسْ الْيِسْتَكْبَرَوْا لَاكِنْ هُو يَنْطِي نِعْمَةْ لِلنَّاسْ الْيِمَسْكُنُوا نُفُوسْهُمْ.

عِبْرَانِيِّين 13:1

أَقْعُدُوا ثَابْتِينْ فِي الْمَحَبَّةْ الْأَخَوِيَّةْ.

2 بُطْرُس 1:7

وَ تِزِيدُوا فِي التَّقْوَى، الْخُوَّةْ. وَ تِزِيدُوا فِي الْخُوَّةْ، الْمَحَبَّةْ.

1 بُطْرُس 2:17

كَرُّمُوا كُلَّ النَّاسْ. حِبُّوا كُلَّ أَخْوَانْكُو الْمُؤمِنِينْ. أَخَافَوْا اللّٰهْ. كَرُّمُوا الْمَلِكْ.

زَبُور 103:13

وَ مِثِلْ الْأَبُو يَرْحَمْ أَوْلَادَهْ، اللّٰهْ يَرْحَمْ الْيَخَافَوْا مِنَّهْ.

يَعْقُوب 5:11

هُمَّنْ صَبَرَوْا فِي التَّعَبْ وَ أَنِحْنَ نُقُولُوا هُمَّنْ نَاسْ مُبَارَكِينْ. إِنْتُو سِمِعْتُوا بِصَبُرْ أَيُّوبْ وَ تَعَرْفُوا كَدَرْ اللّٰهْ أَنْطَاهْ بَرَكَةْ فِي الأَخِيرْ أَشَانْ اللّٰهْ هُو الرَّحْمـٰنْ الرَّحِيمْ.

يَعْقُوب 2:13

كَنْ نَادُمْ مَا يَرْحَمْ النَّاسْ، اللّٰهْ كُلَ مَا يَرْحَمَهْ فِي يَوْم الْحِسَابْ. وَ لَاكِنْ النَّادُمْ الْيَرْحَمْ النَّاسْ، مَا يَخَافْ مِنْ يَوْم الْحِسَابْ.

فِلِبِّي 3:16

خَلِّي أَيِّ وَاحِدْ يِعِيشْ حَسَبْ مَعْرَفَةْ الْمَسِيحْ اللِّقِيهَا وَ يَمْشِي قِدَّامْ.

رَوْمَا 15:5

اللّٰهْ يَنْطِي الصَّبُرْ وَ الشَّجَاعَةْ وَ خَلِّي يَنْطِيكُو كُلُّكُو فِكِرْ وَاحِدْ لِتِتَابُعُوا دَرِبْ الْمَسِيحْ عِيسَى

أعمال الرُسُل 28:7

وَ الْبَكَانْ الْأَنِحْنَ قَاعِدِينْ فَوْقَهْ قَرِيبْ لِزِرَاعَةْ نَادُمْ وَاحِدْ أُسْمَهْ بُبْلِيُوسْ وَ هُو كَبِيرْ هَنَا نَاسْ مَالْطَةْ. وَ هُو فَضَّلَانَا وَ ضَيَّفَانَا فِي بَيْتَهْ تَلَاتَةْ يَوْم.

أعمال الرُسُل 27:3

وَ أَمْبَاكِرْ، لِحِقْنَا حِلَّةْ صَيْدَا وَ قَعَدْنَا شِيَّةْ. وَ يُولِيُسْ سَوَّى زَيْن لِبُولُسْ وَ أَنْطَاهْ إِذِنْ أَشَانْ يَمْشِي فِي الْحِلَّةْ وَ يِسَلِّمْ رُفْقَانَهْ وَ يَلْقَى مِنْهُمْ الشَّيّءْ الْبِدَوْرَهْ.

أعمال الرُسُل 2:1

وَ فِي يَوْم هَنَا عِيدْ الْخَمْسِينْ، كُلَّ الْأَخْوَانْ قَاعِدِينْ سَوَا لَامِّينْ فِي بَكَانْ وَاحِدْ.

أمْثال 28:8

الْيَغْنَى بِالرِّبَا الْكَتِيرْ مَالَهْ دَا، اللّٰهْ يَنْطِيهْ لِلْيِحِنّ فِي الْمَسَاكِينْ.

لُوقا 10:33

«لَاكِنْ مُسَافِرْ وَاحِدْ جَاءْ فِي الْبَكَانْ النَّادُمْ قَاعِدْ فَوْقَهْ دَا وَ هُو مِنْ السَّامِرِيِّينْ. وَ الْأَجْنَبِي دَا شَافَهْ وَ حَنَّ فَوْقَهْ.

أفَسُس 4:32

سَوُّوا الزَّيْن لِأَيِّ نَادُمْ وَ أَلْحَانَنَوْا. وَ أَسَّامَحَوْا أَمْبَيْنَاتْكُو مِثِلْ اللّٰهْ سَامَحَاكُو وَكِتْ رَحَمَاكُو بِالْمَسِيحْ.

فِلِبِّي 2:3

وَ مَا تِسَوُّوا شَيّءْ مِنْ الْحُسُدْ وَ الْإِسْتِكْبَارْ. خَلِّي أَيِّ وَاحِدْ يِمَسْكِنْ نَفْسَهْ وَ يِشِيفْ أَخْوَانَهْ أَخَيْر مِنْ نَفْسَهْ.