1 بُطْرُس 2:21 - الكتاب المقدس بالعربي الدارجي هنا تشاد

²¹ دَا بَسْ الدَّرِبْ وَ اللّٰهْ نَادَاكُو لِتِشِيلُوهْ. أَشَانْ الْمَسِيحْ كُلَ تِعِبْ فِي شَانْكُو وَ بِقِي لَيْكُو مَثَلْ أَشَانْ تِتَابُعُوهْ.

1 بُطْرُس 2:21 Referenca të Kryqëzuara

1 يُوحَنَّا 2:6

النَّادُمْ الْيُقُولْ هُو ثَابِتْ فَوْقَهْ وَاجِبْ يَمْشِي فِي الدُّنْيَا مِثِلْ عِيسَى الْمَسِيحْ مَشَى فِي الدُّنْيَا.

مَتَّى 16:24

وَ عِيسَى قَالْ لِتَلَامِيذَهْ: «أَيِّ نَادُمْ الْيِدَوْر يِشِيلْ دَرْبِي، خَلِّي يِشِيفْ نَفْسَهْ رَخِيصَةْ لَيَّهْ وَ يِلْحَمَّلْ تَعَبْ الصَّلِيبْ وَ يِتَابِعْنِي لِلْمَوْت.

يُوحَنَّا 13:15

الشَّيّءْ الْأَنَا سَوَّيْتَهْ دَا مَثَلْ لَيْكُو أَشَانْ إِنْتُو كُلَ تِسَوُّوا مِثِلْ أَنَا سَوَّيْتَهْ لَيْكُو.

أفَسُس 5:2

عِيشُوا بِمَحَبَّةْ مِثِلْ مَحَبَّةْ الْمَسِيحْ الْيِحِبِّنَا بَيْهَا لَحَدِّي فَدَانَا بِرُوحَهْ. وَ قَدَّمْ نَفْسَهْ هَدِيَّةْ مِثِلْ ضَحِيَّةْ الْاللّٰهْ يَرْضَى بِرِيحِتْهَا.

1 يُوحَنَّا 3:16

عِيسَى الْمَسِيحْ فَدَانَا بِرُوحَهْ وَ دَا بَسْ وَصَّفْ لَيْنَا مَعَنَى الْمَحَبَّةْ. وَ خَلَاصْ، وَاجِبْ نِحِبُّوا أَخْوَانَّا لَحَدِّي نَفْدَوْهُمْ بِرُوحْنَا.

1 بُطْرُس 2:24

وَ فِي الصَّلِيبْ، هُو بِنَفْسَهْ حَمَلْ ذُنُوبْنَا فِي جِسْمَهْ أَشَانْ نِخَلُّوا الذُّنُوبْ مَرَّةْ وَاحِدْ وَ نِعِيشُوا بِحَالْ صَالْحَةْ. وَ بِوَاسِطَةْ جِرَاحَهْ، إِنْتُو لِقِيتُوا الشِّفَاءْ.

1 كُرُنْتُس 11:1

تَابُعُوا دَرْبِي أَشَانْ أَنَا قَاعِدْ نِتَابِعْ دَرِبْ الْمَسِيحْ.

1 بُطْرُس 4:1

وَ بِمِثِلْ دَا، تَعَرْفُوا كَدَرْ الْمَسِيحْ لِقِي تَعَبْ فِي جِسْمَهْ. وَ قَوُّوا نُفُوسْكُو بِفِكِرْ مِثِلْ فِكْرَهْ أَشَانْ النَّادُمْ الْقِبِلْ تَعَبْ الْجِسِمْ خَلَّى مِنَّهْ الذُّنُوبْ.

فِلِبِّي 2:5

الْفِكِرْ الْإِنْتُو وَاجِبْ تِتَابُعُوهْ، هُو نَفْس الْفِكِرْ الْعِيسَى الْمَسِيحْ تَابَعَهْ.

مَتَّى 11:29

شِيلُوا التَّقَلَةْ النَّنْطِيهَا لَيْكُو وَ أَبْقَوْا تَلَامِيذِي أَشَانْ أَنَا ضَلُولْ وَ حَنُونْ وَ تَلْقَوْا جُمَّةْ لِنُفُوسْكُو.

رَوْمَا 8:29

أَشَانْ النَّاسْ الْاللّٰهْ عِرِفَاهُمْ مِنْ أَوَّلْ، هُو شَالْ نِيَّةْ أَشَانْ يِسَوِّيهُمْ يِشَابُهُوا إِبْنَهْ عِيسَى الْمَسِيحْ وَ مِثِلْ دَا، إِبْنَهْ عِيسَى الْمَسِيحْ يُكُونْ الْبِكِرْ وَ مَعَايَهْ أَخْوَانْ كَتِيرِينْ.

أعمال الرُسُل 14:22

وَ فِي كُلَّ الْحِلَّالْ دَوْل، شَجَّعَوْا التَّلَامِيذ وَ وَصَّوْهُمْ أَشَانْ يَقْعُدُوا ثَابْتِينْ فِي الْإِيمَانْ. وَ قَالَوْا لَيْهُمْ: «أَكِيدْ، تَعَبْ كَتِيرْ يَجِي فَوْقنَا كُلِّنَا فِي الدَّرِبْ الْيِوَدِّينَا فِي مَمْلَكَةْ اللّٰهْ.»

1 بُطْرُس 3:18

وَ الْمَسِيحْ كُلَ تِعِبْ تَعَبْ وَاحِدْ وَ نِهَائِي فِي شَانْ ذُنُوبْ النَّاسْ. الصَّالِحْ مَاتْ فِي شَانْ الْمُذْنِبِينْ وَ بَيْدَا، يِوَدِّيكُو كُلُّكُو فِي حَضَرَةْ اللّٰهْ. هُو كَتَلَوْه وَ مَاتْ مِثِلْ مَوْت النَّاسْ وَ اللّٰهْ حَيَّاهْ بِالرُّوحْ الْقُدُّوسْ.

مَتَّى 10:38

وَ أَيِّ نَادُمْ الْأَبَى مَا يِشِيلْ تَعَبْ الصَّلِيبْ وَ مَا يِتَابِعْنِي لِلْمَوْت، مَا وَاجِبْ لَيَّهْ يَبْقَى تِلْمِيذِي.

1 بُطْرُس 3:9

كَنْ النَّاسْ يِسَوُّوا فَوْقكُو شُغُلْ فَسِلْ، مَا تُرُدُّوا لَيْهُمْ بِشُغُلْ فَسِلْ. وَ كَنْ يِعَيُّرُوكُو، مَا تُرُدُّوا لَيْهُمْ بِمُعْيَارْ. لَاكِنْ بَارُكُوهُمْ، أَشَانْ اللّٰهْ نَادَاكُو فِي دَرْبَهْ لِتِبَارُكُوا النَّاسْ وَ تَوْرُثُوا بَرَكَةْ مِنْ اللّٰهْ.

يُوحَنَّا 16:33

أَنَا قُلْت لَيْكُو كُلَّ الْكَلَامْ دَا، أَشَانْ تَلْقَوْا السَّلَامْ بَيِّ أَنَا. أَكِيدْ، فِي الدُّنْيَا إِنْتُو تَتْعَبَوْا. لَاكِنْ شِدُّوا حَيْلكُو أَشَانْ أَنَا أَنَّصَرْت فِي الدُّنْيَا.»

رُؤية 12:11

وَ هُمَّنْ أَنَّصَرَوْا فَوْقَهْ بِقُدْرَةْ دَمّ الْحَمَلْ وَ بِشَهَادِتْهُمْ لَيَّهْ. وَ هُمَّنْ حَبَّوْا رَبُّهُمْ زِيَادَةْ مِنْ نُفُوسْهُمْ لَحَدِّي أَبَوْا مَا يَجْرُوا مِنْ الْمَوْت.

عِبْرَانِيِّين 2:10

اللّٰهْ الْخَلَقْ كُلَّ شَيّءْ وَ فِي شَانَهْ كُلَّ شَيّءْ مَوْجُودْ، هُو دَوَّرْ نَاسْ كَتِيرِينْ يَبْقَوْا عِيَالَهْ وَ يَدْخُلُوا فِي مَجْدَهْ. وَ أَشَانْ دَا، اللّٰهْ سَوَّى شَيّءْ مُوَافِقْ لَيْهُمْ. هُو رَسَّلْ النَّادُمْ الْيَفْتَحْ لَيْهُمْ دَرِبْ النَّجَاةْ. وَ جَعَلْ لِلْمَسِيحْ التَّعَبْ وَ بِتَعَبَهْ دَا، هُو بِقِي الْمُنَجِّي الْكَامِلْ.

2 تِمُوتَاوُس 3:12

وَ أَكِيدْ أَيِّ نَادُمْ الْيِدَوْر يِنْكَرِبْ فِي التَّقْوَى فِي دَرِبْ الْمَسِيحْ عِيسَى، يِتَعُّبُوهْ.

زَبُور 85:13

الْعَدَالَةْ مَاشَةْ قِدَّامَهْ وَ تِجَهِّزْ لَيَّهْ الدَّرِبْ.

1 بُطْرُس 1:20

وَ قُبَّالْ بِدَايَةْ الدُّنْيَا، اللّٰهْ قَدَّرْ لِلْمَسِيحْ يَبْقَى ضَحِيَّةْ. وَ خَلَاصْ اللّٰهْ بَيَّنَهْ فِي شَانْكُو إِنْتُو، فِي الْوَكِتْ الْأَخِيرْ.

1 تَسَلونِيكِي 4:2

تَعَرْفُوا الْوَصَايَا الْأَنْطَيْنَاهُمْ لَيْكُو بِأُسُمْ رَبِّنَا عِيسَى.

1 تَسَلونِيكِي 3:3

أَشَانْ نَادُمْ وَاحِدْ مِنْكُو مَا يِبَرْجِلْ بِسَبَبْ التَّعَبْ الْقَاعِدْ فَوْقكُو. إِنْتُو ذَاتْكُو تَعَرْفُوا كَدَرْ مُقَدَّرْ لَيْنَا النَّاسْ يِتَعُّبُونَا.

أعمال الرُسُل 17:3

وَ قَاعِدْ يِوَضِّحَهْ وَ يِثَبِّتَهْ لَيْهُمْ كَدَرْ لَابُدَّ الْمَسِيحْ يَتْعَبْ وَ يَبْعَثْ مِنْ أُسْط الْمَيْتِينْ. وَ قَالْ لَيْهُمْ: «عِيسَى النِّبَلِّغْ لَيْكُو بَيَّهْ دَا، هُو بَسْ الْمَسِيحْ الْإِنْتُو قَاعِدِينْ تَرْجَوْه.»

أعمال الرُسُل 9:16

وَ أَنَا بَسْ نِوَصِّفْ لَيَّهْ التَّعَبْ الشَّدِيدْ الْهُو يَتْعَبَهْ فِي شَانِي أَنَا.»

لُوقا 24:26

مَا فِهِمْتُوا كَدَرْ الْمَسِيحْ لَابُدَّ يَتْعَبْ مِثِلْ دَا قُبَّالْ مَا يَدْخُلْ فِي مَجْدَهْ وَلَّا؟»

1 بُطْرُس 4:13

إِنْتُو قَاعِدِينْ تِشَارُكُوا فِي تَعَبْ الْمَسِيحْ وَ أَشَانْ دَا، أَفْرَحَوْا فِي أُسْط التَّعَبْ. وَ كَنْ شَارَكْتُوا فِي تَعَبْ الْمَسِيحْ دَا، تَفْرَحَوْا فَرْحَةْ شَدِيدَةْ وَكِتْ هُو يِبِينْ فِي مَجْدَهْ.