1 بُطْرُس 1:8 - الكتاب المقدس بالعربي الدارجي هنا تشاد

⁸ وَ الْمَسِيحْ دَا، إِنْتُو تِحِبُّوهْ حَتَّى كَانْ مَا شِفْتُوهْ كُلَ. وَ كَنْ إِنْتُو مَا قَاعِدِينْ تِشِيفُوهْ كُلَ، إِنْتُو مُؤمِنِينْ بَيَّهْ وَ تَفْرَحَوْا بَيَّهْ بِفَرْحَةْ مَجِيدَةْ وَ كَبِيرَةْ الْأَبَداً مَا تِلْوَصَّفْ.

1 بُطْرُس 1:8 Referenca të Kryqëzuara

يُوحَنَّا 20:29

وَ عِيسَى قَالْ: «إِنْتَ آمَنْت أَشَانْ شِفْتِنِي. مَبْرُوكْ لِلنَّاسْ الْيِآمُنُوا بَيِّ كَنْ مَا شَافَوْنِي كُلَ.»

2 كُرُنْتُس 5:7

لَاكِنْ نِعِيشُوا حَسَبْ الشَّيّءْ الْأَنِحْنَ مُؤمِنِينْ بَيَّهْ وَ مَا حَسَبْ النِّشِيفُوهْ بِعَيْنَّا.

رَوْمَا 15:13

وَ اللّٰهْ الْأَنْطَاكُو عَشَمْ يَنْطِيكُو الْفَرْحَةْ وَ السَّلَامْ فِي الْإِيمَانْ أَشَانْ عَشَمْكُو فَوْقَهْ يِزِيدْ بِقُدْرَةْ الرُّوحْ الْقُدُّوسْ.

عِبْرَانِيِّين 11:1

النَّادُمْ الْعِنْدَهْ إِيمَانْ، هُو مُؤَكِّدْ كَدَرْ هُو يَلْقَى الشَّيّءْ الْيَرْجَاهْ وَ مَا عِنْدَهْ شَكَكْ فِي الشَّيّءْ اللِّسَّاعْ مَا بِنْشَافْ.

يُوحَنَّا 16:22

وَ يَبْقَى لَيْكُو مِثِلْ دَا. هَسَّعْ تَتْعَبَوْا لَاكِنْ أَنَا نِقَبِّلْ بَتَّانْ نِشِيفْكُو وَ إِنْتُو تَفْرَحَوْا فَرْحَةْ شَدِيدَةْ وَ مَا فِي نَادُمْ يِشِيلْ مِنْكُو الْفَرْحَةْ دِي.

2 كُرُنْتُس 4:18

وَ مَا نُخُطُّوا بَالْنَا فِي شَيّءْ الْبِنْشَافْ. نُخُطُّوا بَالْنَا فِي شَيّءْ الْمَا بِنْشَافْ. أَشَانْ الْبِنْشَافْ يِكَمِّلْ وَ لَاكِنْ الْمَا بِنْشَافْ يَقْعُدْ إِلَى الْأَبَدْ.

1 بُطْرُس 1:6

وَ أَشَانْ دَا، تَفْرَحَوْا فَرْحَةْ كَبِيرَةْ، حَتَّى كَانْ إِنْتُو قَاعِدِينْ تَتْعَبَوْا لِمُدَّةْ قِصَيْرَةْ كُلَ وَ تَحْزَنَوْا بِسَبَبْ الصُّعُوبَاتْ الشِّقْ شِقْ.

عِبْرَانِيِّين 11:27

وَ بِالْإِيمَانْ، هُو مَرَقْ مِنْ مَصِرْ مَا خَايِفْ مِنْ زَعَلْ الْمَلِكْ. هُو تَابَعْ اللّٰهْ بِصَبُرْ قَوِي مِثِلْ نَادُمْ قَاعِدْ يِشِيفْ اللّٰهْ الْمَا بِنْشَافْ.

1 بُطْرُس 2:7

وَ لَيْكُو إِنْتُو الْمُؤمِنِينْ، الْمَسِيحْ هُو الْحَجَرْ الْعِنْدَهْ قِيمَةْ كَبِيرَةْ. وَ لَاكِنْ لِلنَّاسْ الْمَا مُؤمِنِينْ، هُو بِقِي مِثِلْ الْكَلَامْ الْمَكْتُوبْ فِي الْكِتَابْ الْبُقُولْ: <الْحَجَرْ الْبَنَّايِينْ الْبَيْت أَوَّلْ مَا دَوَّرَوْه بِقِي الْحَجَرْ الْمُهِمّ فِي بُنَى الْبَيْت.>

فِلِبِّي 4:4

أَفْرَحَوْا بِرَبِّنَا عِيسَى دَايْماً وَ بَتَّانْ نُقُولْ لَيْكُو، أَفْرَحَوْا!

1 بُطْرُس 5:4

وَ وَكِتْ الْمَسِيحْ كَبِيرْ الرُّعْيَانْ يِبِينْ، هُو يَنْطِيكُو التَّاجْ الْمَجِيدْ الْجَمَالَهْ أَبَداً مَا يِكَمِّلْ.

أفَسُس 6:24

وَ النِّعْمَةْ لِكُلَّ النَّاسْ الْيِحِبُّوا رَبِّنَا عِيسَى الْمَسِيحْ بِالْمَحَبَّةْ الْمَا تِكَمِّلْ أَبَداً.

فِلِبِّي 1:25

وَ دَا، بِقِي لَيِّ وَاضِحْ. كَنْ مَا نُمُوتْ يَبْقَى لَيْكُو أَخَيْر. وَ خَلَاصْ، نَعَرِفْ كَدَرْ نَقْعُدْ حَيّ مَعَاكُو سَوَا أَشَانْ إِنْتُو تَبْقَوْا قَوِيِّينْ وَ فَرْحَانِينْ فِي الْإِيمَانْ بِزِيَادَةْ.

رَوْمَا 14:17

أَشَانْ الْمُهِمّ فِي مَمْلَكَةْ اللّٰهْ مَا الْأَكِلْ وَ الشَّرَابْ، لَاكِنْ هُو الْعَدَالَةْ وَ السَّلَامْ وَ الْفَرْحَةْ فِي الرُّوحْ الْقُدُّوسْ.

يُوحَنَّا 14:24

وَ النَّادُمْ الْمَا يِحِبِّنِي، مَا يِتَابِعْ كَلَامِي. الْكَلَامْ التَّسْمَعَوْه مِنْ خَشْمِي مَا هَنَايِ. الْكَلَامْ دَا جَايِ مِنْ أَبُويِ الرَّسَّلَانِي.

يُوحَنَّا 8:42

وَ عِيسَى قَالْ: «كَنْ صَحِيحْ اللّٰهْ أَبُوكُو، إِنْتُو تِحِبُّونِي أَشَانْ أَنَا جِيتْ مِنَّهْ لَيْكُو. أَنَا مَا جِيتْ بِنِيّتِي أَنَا بَسْ، لَاكِنْ اللّٰهْ رَسَّلَانِي.

فِلِبِّي 3:3

يُقُولُوا هُمَّنْ الْمُطَهَّرِينْ. لَاكِنْ أَنِحْنَ بَسْ النَّاسْ الْمُطَهَّرِينْ بِالصَّحِيحْ، أَنِحْنَ النَّعَبُدُوا اللّٰهْ بِقُدْرَةْ الرُّوحْ الْقُدُّوسْ. وَ نِفَاشُرُوا بِالْمَسِيحْ عِيسَى وَ أَبَداً مَا نِنْتَكْلُوا عَلَيْ جِلِدْنَا.

غَلاطِية 5:22

لَاكِنْ مِثِلْ الشَّدَرْ يَلْدَ عِيَالْ، دَاهُو عِيَالْ الرُّوحْ الْقُدُّوسْ هُمَّنْ الْمَحَبَّةْ وَ الْفَرَحْ وَ السَّلَامْ وَ الصَّبُرْ وَ الْقَلِبْ الْأَبْيَضْ وَ الْخَيْر وَ الْأَمَانْ

غَلاطِية 5:6

أَشَانْ فِي دَرِبْ الْمَسِيحْ عِيسَى، كَنْ نَادُمْ مُطَهَّرْ وَلَّا مَا مُطَهَّرْ كُلَ، دَا مَا مُهِمّ. الشَّيّءْ الْمُهِمّ دَا، هُو الْإِيمَانْ بِالْمَسِيحْ وَ الْمَحَبَّةْ الْجَايَةْ مِنْ الْإِيمَانْ دَا.

2 كُرُنْتُس 9:15

وَ الْحَمْدُ للّٰهْ! الْعَطِيَّةْ الْهُو أَنْطَاهَا، مَا فِي شَيّءْ يِقَادِرْهَا.

2 كُرُنْتُس 1:22

وَ هُو خَطَّ فَوْقنَا خِتْمَهْ وَ نَزَّلْ فِي قُلُوبْنَا الرُّوحْ الْقُدُّوسْ أَشَانْ يَبْقَى الضَّمَانْ الْيِوَصِّفْنَا كَدَرْ اللّٰهْ يِسَوِّي كُلِّ شَيّءْ الْوَاعَدْ بَيَّهْ.

أعمال الرُسُل 16:34

وَ بَعَدْ دَا، الْحَرَسْ وَدَّى بُولُسْ وَ سِيلَا فِي بَيْتَهْ وَ فَضَّلَاهُمْ وَ قَدَّمْ لَيْهُمْ أَكِلْ. وَ هُو وَ كُلَّ نَاسْ بَيْتَهْ فِرْحَوْا بِلْحَيْن أَشَانْ آمَنَوْا بِاللّٰهْ.

يُوحَنَّا 14:21

أَيِّ نَادُمْ السِّمِعْ الْوَصَايَا الْأَنَا أَنْطَيْتهُمْ وَ قَاعِدْ يِتَابِعْهُمْ، دَا بَسْ النَّادُمْ الْيِحِبِّنِي. وَ كَنْ نَادُمْ يِحِبِّنِي، أَبُويِ اللّٰهْ يِحِبَّهْ وَ أَنَا كُلَ نِحِبَّهْ وَ نَجِي لَيَّهْ وَ نِبَيِّنْ نَفْسِي لَيَّهْ.»

يُوحَنَّا 14:15

«كَنْ تِحِبُّونِي، إِنْتُو تِتَابُعُوا الْوَصَايَا الْأَنْطَيْتهُمْ لَيْكُو.

مَتَّى 10:37

«أَيِّ نَادُمْ الْيِحِبّ أَبُوهْ وَلَّا أَمَّهْ زِيَادَةْ مِنِّي، مَا وَاجِبْ لَيَّهْ يَبْقَى تِلْمِيذِي. وَ أَيِّ نَادُمْ الْيِحِبّ وِلَيْدَهْ وَلَّا بِنَيِّتَهْ زِيَادَةْ مِنِّي مَا وَاجِبْ لَيَّهْ يَبْقَى تِلْمِيذِي.

نشيد 5:16

خَشْمَهْ حَلُو وَ جِسْمَهْ كُلَّ كَيْ مَحْبُوبْ. وَ دَا بَسْ، حَبِيبِي وَ دَا بَسْ، رَفِيقِي. أَعَرْفَنَّهْ، يَا بَنَاتْ مَدِينَةْ الْقُدُسْ.

1 كُرُنْتُس 16:22

كَنْ أَيِّ نَادُمْ مَا يِحِبّ رَبِّنَا عِيسَى، خَلِّي اللّٰهْ يَلْعَنَهْ. يَا رَبِّنَا، تَعَالْ!

نشيد 5:9

بِشُنُو حَبِيبْكِ فَاتْ الصُّبْيَانْ الْآخَرِينْ؟ قُولِي لَيْنَا، إِنْتِ الْأَجْمَلْ مِنْ الْعَوِينْ! بِشُنُو حَبِيبْكِ فَاتْ الصُّبْيَانْ الْآخَرِينْ، لَحَدِّي تَحَلِّفِينَا فِي شَانَهْ؟

نشيد 1:7

قُولْ لَيِّ، إِنْتَ الْأَنَا نِحِبَّكْ، وَيْن تِسَرِّحْ غَنَمَكْ؟ وَيْن بَكَانْ تِقَيِّلْ فَوْقَهْ؟ وَصِّفْنِي أَشَانْ مَا نِفَتِّشْ وَ نُرُوحْ وَ نَقَعْ فِي دِيرَانْ جِيرَانَكْ.

أفَسُس 3:19

وَ بِمِثِلْ دَا، تَعَرْفُوا مَحَبِّتَهْ الْفَايْتَةْ كُلَّ الْعِرْفَةْ. وَ بَرَكَةْ اللّٰهْ الْكَامِلَةْ تَمْلَا قُلُوبْكُو مَرَّةْ وَاحِدْ.