1 بُطْرُس 1:7 - الكتاب المقدس بالعربي الدارجي هنا تشاد

⁷ نَعَرْفُوا كَدَرْ الدَّهَبْ الْبَعَدَيْن يِدَّمَّرْ، يَكْشُفُوهْ بِالنَّارْ. وَ مِثِلْ دَا، إِيمَانْكُو الْقِيمْتَهْ زِيَادَةْ مِنْ الدَّهَبْ، كُلَ يِجَرُّبُوهْ أَشَانْ ثَبَاتَهْ يِنْشَافْ. وَ بَيْدَا، تَلْقَوْا شُكُرْ وَ مَجْد وَ شَرَفْ فِي الْيَوْم الْعِيسَى الْمَسِيحْ يِبِينْ فَوْقَهْ.

1 بُطْرُس 1:7 Referenca të Kryqëzuara

أيُّوب 23:10

وَ لَاكِنْ لِدَرْبِي أَنَا، هُو يَعَرْفَهْ. وَ كَنْ كَشَفْنِي، يَلْقَانِي صَافِي مِثِلْ الدَّهَبْ.

يَعْقُوب 1:12

مَبْرُوكْ لِلنَّادُمْ الْيَصْبُرْ فِي التَّعَبْ الْيِجَرِّبْ إِيمَانَهْ. أَشَانْ وَكِتْ التَّجْرِبَةْ دِي كَمَّلَتْ خَلَاصْ، هُو يَلْقَى تَاجْ الْحَيَاةْ. وَ التَّاجْ دَا، هُو الْحَيَاةْ الْاللّٰهْ وَاعَدْ بَيْهَا النَّاسْ الْيِحِبُّوهْ.

إشَعْيا 48:10

أَنَا صَفَّيْتكُو بِالنَّارْ لَاكِنْ مَا مِثِلْ يِصَفُّوا الْفُضَّةْ. لَا! أَنَا جَرَّبْتُكُو بِنَارْ التَّعَبْ.

1 بُطْرُس 4:12

يَا أَخْوَانِي النِّحِبُّكُو، مَا تِعَجُّبُوا مِنْ التَّعَبْ الشَّدِيدْ الْيَجِي فَوْقكُو أَشَانْ يِجَرِّبْكُو. مَا تُقُولُوا دَا شَيّءْ مَا مَعْرُوفْ جَاءْ فَوْقكُو.

زَكَرِيَّا 13:9

وَ التِّلِتْ الْفَضَّلْ دَا، نُخُطَّهْ فِي النَّارْ وَ نِصَفِّيهْ مِثِلْ يِصَفُّوا الْفُضَّةْ وَ نَكْشِفَهْ مِثِلْ يَكْشُفُوا الدَّهَبْ. وَ هُمَّنْ يِنَادُوا أُسْمِي وَ أَنَا نُرُدّ لَيْهُمْ. وَ أَنَا نُقُولْ لَيْهُمْ: ‹إِنْتُو تَبْقَوْا شَعَبِي.› وَ هُمَّنْ يُقُولُوا: ‹اللّٰهْ بَسْ يَبْقَى إِلٰـهْنَا.›»

رَوْمَا 2:7

هُو يَنْطِي الْحَيَاةْ الْأَبَدِيَّةْ لِلنَّاسْ الْيِسَوُّوا الْخَيْر وَ يِفَتُّشُوا دَايْماً مِنْ اللّٰهْ الْمَجْد وَ الشَّرَفْ وَ الْحَيَاةْ الْمَا عِنْدَهَا حَدّ.

أمْثال 17:3

بِالنَّارْ، الصَّيَّاغِي يِصَفِّي الدَّهَبْ وَ الْفُضَّةْ وَ لَاكِنْ الْفِي قُلُوبْ النَّاسْ، اللّٰهْ بَسْ يَكْشِفَهْ.

مَلاخِـي 3:3

هُو مِثِلْ الصَّيَّاغِي الْيَقْطَعْ وَ يِصَفِّي الْفُضَّةْ. يِطَهِّرْ اللَّاوِيِّينْ مِثِلْ يِصَفِّي الْفُضَّةْ وَ الدَّهَبْ. وَ هُمَّنْ يَبْقَوْا هِنَيْ اللّٰهْ وَ يِقَدُّمُوا لَيَّهْ ضَحَايَا بِالْعَدَالَةْ.

1 كُرُنْتُس 3:13

وَ الْخِدْمَةْ الْأَيِّ نَادُمْ خَدَمْهَا تِنْعَرِفْ أَشَانْ يَوْم الْحِسَابْ يِوَصِّفْهَا بِنَارْ. وَ النَّارْ تِجَرِّبْ خِدْمَةْ أَيِّ نَادُمْ كَنْ عَدِيلَةْ وَلَّا مَا عَدِيلَةْ.

يَهُوذَا 1:24

اللّٰهْ قَادِرْ وَ يَقْدَرْ يَحْفَضْكُو أَشَانْ مَا تَقَعَوْا. هُو بَسْ يِوَدِّيكُو فِي حَضَرَتَهْ الْمَجِيدَةْ بَلَا أَيِّ عَيْب، فَرْحَانِينْ فَرْحَةْ شَدِيدَةْ.

إرْمِيا 9:7

وَ فِي شَانْ دَا، دَاهُو اللّٰهْ الْقَادِرْ قَالْ: «أَنَا نَكْشِفْهُمْ مِثِلْ الدَّهَبْ وَ نَقْطَعْهُمْ وَ دَا الشَّيّءْ النِّسَوِّيهْ لِأُمَّتِي الْمِثِلْ بِنْت أَمِّي.

2 بُطْرُس 1:4

وَ بَيْدَا، هُو أَنْطَانَا بَرَكَتَهْ الْقِيمِتْهَا كَبِيرَةْ بِلْحَيْن الْأَوَّلْ وَاعَدْ بَيْهَا. أَشَانْ بِالْبَرَكَةْ دِي، إِنْتُو تِشَارُكُوا فِي الطَّبِيعَةْ الْإِلٰـهِيَّةْ وَ تَمُرْقُوا مِنْ الْفَسَادْ الْمَوْجُودْ فِي الدُّنْيَا بِسَبَبْ الشَّهْوَةْ.

1 بُطْرُس 2:4

قَرُّبُوا لَيَّهْ. هُو بَسْ الْحَجَرْ الْحَيّ الْاللّٰهْ عَزَلَهْ الْمُهِمّ بِلْحَيْن لَاكِنْ النَّاسْ مَا دَوَّرَوْه.

مَتَّى 25:21

وَ سِيدَهْ قَالْ لَيَّهْ: ‹تَمَامْ! خِدِمْتَكْ سَمْحَةْ. إِنْتَ خَدَّامْ عَدِيلْ وَ صَادِقْ. أَوَّلْ أَنْطَيْتَكْ أَمَانَةْ شِيَّةْ وَ إِنْتَ خَدَمْت عَدِيلْ. وَ قَرِيبْ نَنْطِيكْ أَمَانَةْ كَتِيرَةْ. تَعَالْ أَنْدَسَّ وَ أَفْرَحْ مَعَ سِيدَكْ.›

رُؤية 3:10

إِنْتَ تَابَعْت كَلَامِي بِصَبُرْ كَتِيرْ. أَشَانْ دَا، نَحْفَضَكْ مِنْ الضِّيقَةْ التَّجِي فِي كُلَّ نَاسْ الدُّنْيَا. الضِّيقَةْ دِي تِجَرِّبْهُمْ لِسُكَّانْ الْأَرْض.

رُؤية 2:10

مَا تَخَافْ مِنْ الضِّيقَةْ الْقَرِيبْ تَجِيكْ. خُطُّوا بَالْكُو! إِبْلِيسْ يَكْرُبْ وَاحِدِينْ مِنْكُو فِي السِّجِنْ وَ إِيمَانْكُو يِجَرُّبُوهْ. وَ فِي مُدَّةْ عَشَرَةْ يَوْم، تِضَيُّقُوا ضِيقَةْ شَدِيدَةْ. أَقْعُدُوا ثَابْتِينْ فِي إِيمَانْكُو لَحَدِّي الْمَوْت وَ خَلَاصْ نَنْطِيكُو تَاجْ هَنَا الْحَيَاةْ الْأَبَدِيَّةْ.

رُؤية 1:7

وَ شِيفُوا، هُو جَايِ رَاكِبْ فِي السَّحَابْ وَ أَيِّ نَادُمْ يِشِيفَهْ. أَيْوَى، كُلَّ النَّاسْ الطَّعَنَوْه يِشِيفُوهْ وَ كُلَّ قَبَايِلْ الْأَرْض يَبْكُوا بِسَبَبَهْ. أَيْوَى، مِثِلْ دَا بَسْ يَبْقَى. آمِينْ.

1 كُرُنْتُس 4:5

بِمِثِلْ دَا، مَا تِحَاسُبُوا خِدْمَةْ أَيِّ نَادُمْ قُبَّالْ يَوْم الْحِسَابْ. فِي الْيَوْم دَا، رَبِّنَا يَجِي وَ يِبَيِّنْ كُلَّ شَيّءْ الْمُلَبَّدْ فِي الضَّلَامْ وَ يَكْشِفْ نِيَّةْ النَّاسْ الْقَاعِدَةْ فِي قُلُوبْهُمْ. وَ أَيِّ نَادُمْ يَلْقَى رِضَى، مَا مِنْ النَّاسْ لَاكِنْ مِنْ اللّٰهْ.

أعمال الرُسُل 8:20

وَ بُطْرُسْ رَدَّ لَيَّهْ وَ قَالْ: «إِنْتَ وَ قُرْسَكْ كُلَ حَطَبْ النَّارْ أَشَانْ إِنْتَ فَكَّرْت تَقْدَرْ تَشْرِي بِقُرْسَكْ بَرَكَةْ اللّٰهْ!

يُوحَنَّا 12:26

كَنْ نَادُمْ يِدَوْر يَخْدِمْ لَيِّ، وَاجِبْ يِتَابِعْنِي. وَ فِي الْبَكَانْ الْأَنَا نَقْعُدْ فَوْقَهْ، خَدَّامِي كُلَ يَقْعُدْ فَوْقَهْ. وَ أَيِّ نَادُمْ الْيَخْدِمْ لَيِّ، أَبُويِ يِشَرِّفَهْ.

يُوحَنَّا 5:44

كِكَّيْف تَبْقَوْا مُؤمِنِينْ بِالصَّحِيحْ كَنْ إِنْتُو تِدَوْرُوا شُكُرْ مِنْ أَخْوَانْكُو وَ مَا تِجَاهُدُوا أَشَانْ تَلْقَوْا شُكُرْ مِنْ اللّٰهْ الْوَاحِدْ؟

لُوقا 12:33

بِيعُوا خُمَامْكُو وَ أَنْطُوهْ صَدَقَةْ لِلْمَسَاكِينْ. وَ بَيْدَا، تِسَوُّوا لِنُفُوسْكُو جُزْلَانْ الْأَبَداً مَا يَتْلَفْ. وَ خَلَاصْ، تُضُمُّوا مَالْكُو فِي بَكَانْ اللّٰهْ فِي السَّمَاوَاتْ. الْمَالْ دَا مَا يَفْشُلْ. وَ السَّرَارِيقْ مَا يِقَرُّبُوا لَيَّهْ وَ الْأَرْضَةْ مَا تَاكُلَهْ.

مَتَّى 25:23

وَ سِيدَهْ قَالْ لَيَّهْ: ‹تَمَامْ! خِدِمْتَكْ سَمْحَةْ. إِنْتَ خَدَّامْ عَدِيلْ وَ صَادِقْ. أَوَّلْ أَنْطَيْتَكْ أَمَانَةْ شِيَّةْ وَ إِنْتَ خَدَمْت عَدِيلْ وَ قَرِيبْ نَنْطِيكْ أَمَانَةْ كَتِيرَةْ. تَعَالْ أَنْدَسَّ وَ أَفْرَحْ مَعَ سِيدَكْ.›

مَتَّى 19:28

عِيسَى رَدَّ لَيْهُمْ وَ قَالْ: «نُقُولْ لَيْكُو الْحَقّ، وَكِتْ أَنَا إِبْن الْإِنْسَانْ نَقْعُدْ فِي الْكُرْسِي الْعَظِيمْ فِي الزَّمَنْ الْفَوْقَهْ اللّٰهْ يِسَوِّي كُلَّ شَيّءْ جَدِيدْ، إِنْتُو التَّابَعْتُونِي تَقْعُدُوا فِي كَرَاسِي 12 وَ تَحْكُمُوا قَبَايِلْ بَنِي إِسْرَائِيلْ الْأَتْنَا عَشَرْ.

إرْمِيا 48:36

وَ بَتَّانْ قَلْبِي يَحْزَنْ وَ يُنُوحْ مِثِلْ الصُّفَّارَةْ لِمُوَابْ وَ لِنَاسْ قِيرْ حَارَسْ أَشَانْ الْغُنَى اللَّمَّوْهَا وَدَّرَتْ.

جامِعة 5:14

وَ الْغُنَى دَا يِوَدِّرْ فِي شَغَلَةْ الْمَا عِنْدَهَا فَايْدَةْ. وَ وِلَيْد الْغَنِيْ مَا يَلْقَى شَيّءْ يَوْرِثَهْ.

أمْثال 16:16

كَنْ تَلْقَى حِكْمَةْ، دَا أَخَيْر مِنْ تَلْقَى دَهَبْ وَ كَنْ تَلْقَى فِهِمْ، دَا أَخَيْر مِنْ تَلْقَى فُضَّةْ.

أمْثال 8:19

وَ نَتِيجْتِي أَخَيْر مِنْ الدَّهَبْ الصَّافِي وَ إِنْتَاجِي أَخَيْر مِنْ الْفُضَّةْ الْمَعْزُولَةْ.

1 صَمُوِيل 2:30

«أَشَانْ دَا، دَاهُو اللّٰهْ إِلٰـهْ بَنِي إِسْرَائِيلْ قَالْ لَيْك: ‹أَكِيدْ أَنَا أَوَّلْ قُلْت بَيْتَكْ وَ بَيْت أَبُوكْ يَقْعُدُوا فِي خِدِمْتِي دَايْماً.› لَاكِنْ هَسَّعْ دَا، دَاهُو كَلَامْ اللّٰهْ: ‹أَبَداً! بَتَّانْ مَا نِسَوِّيهْ! نِشَرِّفْ الْيِشَرُّفُونِي وَ لَاكِنْ الْيَحْقُرُونِي يَبْقَوْا مَحْقُورِينْ.

رُؤية 3:18

وَ أَشَانْ دَا، نِوَصِّيكْ أَشَانْ تَشْرِي مِنِّي دَهَبْ صَافِي وَ بَيَّهْ تَبْقَى غَنِيْ. وَ أَشْرِي مِنِّي لُبَاسْ أَبْيَضْ أَشَانْ تَلْبَسْ وَ تِسِدّ بَيَّهْ عِرَيْك. وَ أَشْرِي مِنِّي قَطْرَةْ أَشَانْ تُصُبَّهَا فِي عُيُونَكْ وَ بَيْدَا، بَتَّانْ تِشِيفْ.

2 بُطْرُس 1:1

جَوَابْ مِنِّي أَنَا سِمْعَانْ بُطْرُسْ عَبِدْ عِيسَى الْمَسِيحْ وَ رَسُولَهْ. وَ نَكْتِبْ لَيْكُو إِنْتُو النَّاسْ اللِّقِيتُوا الْإِيمَانْ بِسَبَبْ عَدَالَةْ عِيسَى الْمَسِيحْ إِلٰـهْنَا وَ مُنَجِّينَا. وَ إِيمَانْكُو عِنْدَهْ نَفْس الْقِيمَةْ مِثِلْ إِيمَانَّا.

1 بُطْرُس 2:7

وَ لَيْكُو إِنْتُو الْمُؤمِنِينْ، الْمَسِيحْ هُو الْحَجَرْ الْعِنْدَهْ قِيمَةْ كَبِيرَةْ. وَ لَاكِنْ لِلنَّاسْ الْمَا مُؤمِنِينْ، هُو بِقِي مِثِلْ الْكَلَامْ الْمَكْتُوبْ فِي الْكِتَابْ الْبُقُولْ: <الْحَجَرْ الْبَنَّايِينْ الْبَيْت أَوَّلْ مَا دَوَّرَوْه بِقِي الْحَجَرْ الْمُهِمّ فِي بُنَى الْبَيْت.>

1 بُطْرُس 1:5

وَ قُدْرَةْ اللّٰهْ تَحْفَضْكُو بِإِيمَانْكُو أَشَانْ تَلْقَوْا النَّجَاةْ الْاللّٰهْ جَهَّزَاهَا وَ يِبَيِّنْهَا فِي الْيَوْم الْأَخِيرْ.

رَوْمَا 2:29

لَاكِنْ الْيَهُودِي الصَّحِيحْ، هُو يَهُودِي فِي قَلْبَهْ وَ طَهُورْتَهْ، هِي طَهُورَةْ الْقَلِبْ الْجَايَةْ مِنْ رُوحْ اللّٰهْ. وَ طَهُورْتَهْ مَا طَهُورَةْ الْمَكْتُوبَةْ فِي كِتَابْ التَّوْرَاةْ بَسْ. الْيَهُودِي الْمِثِلْ دَا، كَنْ النَّاسْ مَا يَشْكُرُوهْ كُلَ، اللّٰهْ يَرْضَى بَيَّهْ.

زَبُور 17:3

إِنْتَ كَشَفْت قَلْبِي وَ بِاللَّيْل، رَاقَبْتِنِي وَ جَرَّبْتِنِي وَ لَاكِنْ مَا لِقِيتْ فَوْقِي شَيّءْ فَسِلْ. حَتَّى كَنْ أَنَا فَكَّرْت فِي الْفَسَالَةْ كُلَ، مَا مَرَقْتَهَا مِنْ خَشْمِي.

لُوقا 17:30

وَ يَبْقَى مِثِلْ دَا وَكِتْ اللّٰهْ يِبَيِّنْ إِبْن الْإِنْسَانْ.

رَوْمَا 2:10

وَ اللّٰهْ يَنْطِي مَجْد وَ شَرَفْ وَ سَلَامْ لِأَيِّ نَادُمْ الْقَاعِدْ يِسَوِّي الْخَيْر، أَوَّلْ كَيْ لِلْيَهُودْ وَ بَتَّانْ لِلْمَا يَهُودْ كُلَ.

رَوْمَا 8:19

يَوْم وَاحِدْ، اللّٰهْ يِبَيِّنْ مَجْد أَوْلَادَهْ. وَ كُلَّ شَيّءْ الْاللّٰهْ خَلَقَهْ قَاعِدْ يِتْمَنَّى جَيَّةْ الْيَوْم دَا بِلْحَيْن.

1 بُطْرُس 1:13

أَشَانْ دَا، خُطُّوا بَالْكُو. أَقْعُدُوا ثَابْتِينْ. خُطُّوا عَشَمْكُو كُلَّ كَيْ فِي النِّعْمَةْ التَّلْقَوْهَا فِي الْيَوْم الْعِيسَى الْمَسِيحْ يِبِينْ فَوْقَهْ.

1 بُطْرُس 4:13

إِنْتُو قَاعِدِينْ تِشَارُكُوا فِي تَعَبْ الْمَسِيحْ وَ أَشَانْ دَا، أَفْرَحَوْا فِي أُسْط التَّعَبْ. وَ كَنْ شَارَكْتُوا فِي تَعَبْ الْمَسِيحْ دَا، تَفْرَحَوْا فَرْحَةْ شَدِيدَةْ وَكِتْ هُو يِبِينْ فِي مَجْدَهْ.

1 بُطْرُس 5:1

وَ نِدَوْر نِوَصِّي كُبَارَاتْ جَمَاعَةْ الْمُؤمِنِينْ الْمَعَاكُو. أَنَا كُلَ كَبِيرْ مِثِلْهُمْ. وَ أَنَا شَاهِدْ لِتَعَبْ الْمَسِيحْ وَ بَتَّانْ مُشَارِكْ فِي قُدْرَةْ الْمَسِيحْ الْمَجِيدَةْ التِّبِينْ قَرِيبْ.

2 بُطْرُس 3:14

يَا أَخْوَانِي النِّحِبُّكُو، دَا بَسْ الشَّيّءْ التَّرْجَوْه مِنْ اللّٰهْ. وَ أَشَانْ دَا، سَوُّوا جُهُدْ أَشَانْ تِعِيشُوا بِسَلَامْ قِدَّامَهْ بَلَا خَطَا وَ لَا عَيْب.

عَدد 5:28

وَ لَاكِنْ كَنْ هِي مَا نَجَّسَتْ نَفِسْهَا وَ هِي مَرَةْ طَاهِرَةْ خَلَاصْ هِي بَرِيَّةْ وَ تَلْدَ وَ تِجِيبْ عِيَالْ.

أيُّوب 28:1

أَكِيدْ، فِيَّهْ بَكَانَاتْ الْيَمُرْقُوا مِنْهُمْ الْفُضَّةْ وَ بَكَانَاتْ الْيِصَفُّوا فَوْقهُمْ الدَّهَبْ.