1 يُوحَنَّا 3:2 - الكتاب المقدس بالعربي الدارجي هنا تشاد

² يَا الْمَحْبُوبِينْ، هَسَّعْ حَالِيّاً أَنِحْنَ عِيَالْ اللّٰهْ. وَ كِكَّيْف نُكُونُوا بَعَدَيْن دَا، اللّٰهْ لِسَّاعْ مَا بَيَّنَهْ لَيْنَا. لَاكِنْ نَعَرْفُوا كَدَرْ وَكِتْ إِبْن اللّٰهْ يِبِينْ بَتَّانْ، نِشِيفُوهْ هُو ذَاتَهْ بِنَفْسَهْ وَ أَنِحْنَ نَبْقَوْا مِثْلَهْ.

1 يُوحَنَّا 3:2 Referenca të Kryqëzuara

فِلِبِّي 3:21

وَ بِقُدُرْتَهْ الْعَظِيمَةْ الْيُخُطّ بَيْهَا كُلَّ شَيّءْ تِحِتْ حُكْمَهْ، هُو يَجِي يِغَيِّرْ جِسِمْنَا الضَّعِيفْ وَ يَجْعَلَهْ مِثِلْ جِسْمَهْ هُو الْمَجِيدْ.

كُلُوسِي 3:4

الْمَسِيحْ بِقِي لَيْكُو الْحَيَاةْ وَ وَكِتْ هُو يَجِي بَتَّانْ، إِنْتُو تِبِينُوا مَعَايَهْ فِي مَجْدَهْ.

2 كُرُنْتُس 3:18

وَ أَنِحْنَ مَا عِنْدِنَا مِنْدِيلْ الْيِغَطِّي وُجُوهْنَا. وَ كُلِّنَا قَاعِدِينْ نِشِيفُوا نُورْ اللّٰهْ الْمَجِيدْ. وَ النُّورْ دَا يِبِينْ فَوْقنَا وَاضِحْ. وَ النُّورْ الْمَجِيدْ دَا يَجِي مِنْ رُوحْ اللّٰهْ الْقَاعِدْ يِغَيِّرْنَا زِيَادَةْ لَحَدِّي صُورِتْنَا تَبْقَى مِثِلْ صُورَةْ اللّٰهْ الْمَجِيدَةْ.

1 كُرُنْتُس 13:12

أَشَانْ هَسَّعْ فِي زَمَنَّا دَا، نِشِيفُوا الْحَقّ مِثِلْ نِشِيفُوهْ فِي أَمْ شَوَّافَةْ الْوَسْخَانَةْ وَ فِي الْآخِرَةْ، نِشِيفُوهْ عَدِيلْ. هَسَّعْ دَا، أَنَا عِرِفْت شِيَّةْ وَ بَعَدَيْن نَعَرِفْ عَدِيلْ مِثِلْ اللّٰهْ عِرِفْنِي.

رَوْمَا 8:29

أَشَانْ النَّاسْ الْاللّٰهْ عِرِفَاهُمْ مِنْ أَوَّلْ، هُو شَالْ نِيَّةْ أَشَانْ يِسَوِّيهُمْ يِشَابُهُوا إِبْنَهْ عِيسَى الْمَسِيحْ وَ مِثِلْ دَا، إِبْنَهْ عِيسَى الْمَسِيحْ يُكُونْ الْبِكِرْ وَ مَعَايَهْ أَخْوَانْ كَتِيرِينْ.

زَبُور 17:15

كَنْ لَيِّ أَنَا، بِعَدَالْتِي نِشِيفْ وِجْهَكْ وَ وَكِتْ نُقُمّ، نَشْبَعْ مِنْ حَضَرَتَكْ.

1 كُرُنْتُس 15:49

وَ مِثِلْ أَوَّلْ صُورِتْنَا تِشَابِهْ صُورَةْ الْإِنْسَانْ هَنَا التُّرَابْ، بَعَدَيْن صُورِتْنَا تِشَابِهْ صُورَةْ الْإِنْسَانْ هَنَا السَّمَاءْ.

رُؤية 22:4

وَ يِشِيفُوا وِجْهَهْ وَ أُسْمَهْ هُو بَسْ يَقْعُدْ فِي جَبْهَاتْهُمْ.

2 بُطْرُس 1:4

وَ بَيْدَا، هُو أَنْطَانَا بَرَكَتَهْ الْقِيمِتْهَا كَبِيرَةْ بِلْحَيْن الْأَوَّلْ وَاعَدْ بَيْهَا. أَشَانْ بِالْبَرَكَةْ دِي، إِنْتُو تِشَارُكُوا فِي الطَّبِيعَةْ الْإِلٰـهِيَّةْ وَ تَمُرْقُوا مِنْ الْفَسَادْ الْمَوْجُودْ فِي الدُّنْيَا بِسَبَبْ الشَّهْوَةْ.

1 كُرُنْتُس 2:9

وَ خَلَاصْ، دَا مُوَافِقْ مَعَ الْكَلَامْ الْمَكْتُوبْ فِي الْكِتَابْ: <الشَّيّءْ الْاللّٰهْ جَهَّزَهْ لِلنَّاسْ الْيِحِبُّوهْ، مَا شَافَتَهْ عَيْن وَ لَا سِمْعَتَهْ أَدَانْ وَ لَا فَكَّرْ فَوْقَهْ إِنْسَانْ.>

1 يُوحَنَّا 3:1

شِفْتُوا كِكَّيْف أَبُونَا يِحِبِّنَا؟ مَحَبَّةْ اللّٰهْ لَيْنَا كَبِيرَةْ بِلْحَيْن وَ بِسَبَبْهَا هُو يِنَادِينَا عِيَالَهْ. وَ صَحِيحْ بِقِينَا عِيَالْ اللّٰهْ. نَاسْ الدُّنْيَا مَا عِرْفَوْنَا أَشَانْ مَا عِرْفَوْا اللّٰهْ.

غَلاطِية 4:6

لِيِأَكِّدْ كَدَرْ إِنْتُو كُلَ بِقِيتُوا عِيَالَهْ، اللّٰهْ نَزَّلْ فِي قُلُوبْنَا كُلِّنَا رُوحْ هَنَا إِبْنَهْ الْيَصْرَخْ: «أَبَّ، أَبُونَا!»

رَوْمَا 8:18

تَعَبْ هَنَا وَكِتْنَا دَا، نَحْسِبَهْ شِيَّةْ وَكِتْ نِفَكِّرْ فِي الْمَجْد الْاللّٰهْ يِبَيِّنَهْ لَيْنَا بَعَدَيْن.

غَلاطِية 3:26

أَشَانْ إِنْتُو كُلُّكُو عِيَالْ اللّٰهْ فِي عِيسَى الْمَسِيحْ بِدَرِبْ الْإِيمَانْ.

يُوحَنَّا 17:24

«يَا أَبُويِ، نِدَوْر كَدَرْ النَّاسْ الْأَنْطَيْتهُمْ لَيِّ يَقْعُدُوا مَعَايِ فِي الْبَكَانْ الْأَنَا نَقْعُدْ فَوْقَهْ. أَشَانْ هِنَاكْ يِشِيفُوا الْمَجْد الْإِنْتَ أَنْطَيْتنِي. وَ دَا بِسَبَبْ مَحَبِّتَكْ لَيِّ مِنْ قُبَّالْ بِدَايَةْ الدُّنْيَا.

مَتَّى 5:8

مَبْرُوكْ لِلنَّاسْ الْقَلِبْهُمْ طَاهِرْ أَشَانْ هُمَّنْ يِشِيفُوا اللّٰهْ.

1 يُوحَنَّا 2:28

يَا عِيَالِي، أَقْعُدُوا ثَابْتِينْ فِي الْمَسِيحْ أَشَانْ وَكِتْ هُو يِبِينْ، قُلُوبْنَا يُكُونُوا رَاقْدِينْ وَ مَا نَلْقَوْا عَيْب فِي يَوْم جَيْتَهْ.

عِبْرَانِيِّين 9:28

وَ الْمَسِيحْ كُلَ قَدَّمْ نَفْسَهْ مَرَّةْ وَاحِدَةْ أَشَانْ يَمْحَا ذُنُوبْ هَنَا نَاسْ كَتِيرِينْ. وَ هُو يَجِي بَتَّانْ مَرَّةْ تَانِيَةْ مَا أَشَانْ يَمْحَا الذُّنُوبْ وَ لَاكِنْ أَشَانْ يِنَجِّي النَّاسْ الْقَاعِدِينْ يَرْجَوْه.

2 كُرُنْتُس 4:17

وَ التَّعَبْ الْعِنْدِنَا هَسَّعْ دَا، هُو خَفِيفْ وَ مَا يِطَوِّلْ. لَاكِنْ التَّعَبْ دَا يِجَهِّزْنَا لِلْمَجْد الْعَظِيمْ الْأَبَداً مَا يِكَمِّلْ.

أيُّوب 19:26

وَ بَعَدْ فَرْوِتِي أَدَّمَّرَتْ، أَنَا ذَاتِي نِشِيفْ الرَّبّ.

1 يُوحَنَّا 5:1

أَيِّ نَادُمْ الْآمَنْ كَدَرْ عِيسَى هُو الْمَسِيحْ، النَّادُمْ دَا اللّٰهْ بِقِي أَبُوهْ. وَ أَيِّ نَادُمْ الْيِحِبّ أَبُو الْعِيَالْ، يِحِبّ عِيَالَهْ كُلَ.

زَبُور 31:19

يَا اللّٰهْ! خَيْرَكْ كَتِيرْ الْحَفَضْتَهْ لِلنَّاسْ الْيَخَافَوْا مِنَّكْ. وَ تَنْطِيهْ لِلْيَلْجَأَوْا لَيْك قِدَّامْ كُلَّ النَّاسْ.

إشَعْيا 56:5

هُمَّنْ دَوْل، أَنَا نَنْطِيهُمْ فِي بَيْتِي وَ فِي دَرَادِرِي عَلَامَةْ هَنَا ذِكْرَةْ أَحْسَنْ مِنْ الْوُلَادْ وَ الْبَنَاتْ. وَ نَنْطِيهُمْ أُسُمْ دَايِمْ الْأَبَداً مَا يِنْقَشَّ.

زَبُور 16:11

إِنْتَ عَرَّفْتِنِي دَرِبْ الْحَيَاةْ وَ قِدَّامَكْ، الْفَرَحْ قَاعِدْ بِكَتَرَةْ وَ النِّعْمَةْ قَاعِدَةْ دَايْمَةْ فِي زَيْنَايْتَكْ.

مَلاخِـي 3:2

يَاتُو يَقْدَرْ يَحْمَلْ يَوْم جَيْتَهْ؟ وَ يَاتُو يَقْدَرْ يَقِيفْ بِطُولَهْ وَكِتْ يِبِينْ؟ أَشَانْ هُو مِثِلْ نَارْ التَّقْطَعْ الْحَدِيدْ لِيِصَفُّوهْ وَ هُو مِثِلْ الصَّابُونْ الْيِغَسِّلْ نَضِيفْ.

لُوقا 17:30

وَ يَبْقَى مِثِلْ دَا وَكِتْ اللّٰهْ يِبَيِّنْ إِبْن الْإِنْسَانْ.

لُوقا 20:36

هُمَّنْ مَا يُمُوتُوا بَتَّانْ، يَبْقَوْا مِثِلْ الْمَلَائِكَةْ. وَ يَبْقَوْا عِيَالْ اللّٰهْ أَشَانْ بَعَثَاهُمْ مِنْ الْمَوْت.

يُوحَنَّا 1:12

لَاكِنْ لِكُلَّ النَّاسْ الْقِبْلَوْه وَ آمَنَوْا بِأُسْمَهْ، هُو أَنْطَاهُمْ الْحَقّ أَشَانْ يَبْقَوْا عِيَالْ اللّٰهْ.

يُوحَنَّا 11:52

وَ دَا مَا لِأُمَّةْ الْيَهُودْ وِحَيْدهَا. دَا يَبْقَى لِكُلَّ عِيَالْ اللّٰهْ الْمُشَتَّتِينْ لِيِلِمُّوهُمْ أُمَّةْ وَاحِدَةْ.

رَوْمَا 8:16

الرُّوحْ الْقُدُّوسْ ذَاتَهْ يَشْهَدْ فِي نُفُوسْنَا كَدَرْ أَنِحْنَ عِيَالْ اللّٰهْ.

رَوْمَا 8:19

يَوْم وَاحِدْ، اللّٰهْ يِبَيِّنْ مَجْد أَوْلَادَهْ. وَ كُلَّ شَيّءْ الْاللّٰهْ خَلَقَهْ قَاعِدْ يِتْمَنَّى جَيَّةْ الْيَوْم دَا بِلْحَيْن.

1 يُوحَنَّا 2:7

يَا أَخْوَانِي النِّحِبُّكُو، أَنَا مَا قَاعِدْ نَكْتِبْ لَيْكُو وَصِيَّةْ جَدِيدَةْ. لَا. أَنَا نَكْتِبْ لَيْكُو الْوَصِيَّةْ الْقَاعِدَةْ مِنْ زَمَانْ وَ إِنْتُو عِرِفْتُوهَا مِنْ الْأَوَّلْ. وَ الْوَصِيَّةْ دِي، هِي الْكَلَامْ الْإِنْتُو سِمِعْتُوهْ مِنِّنَا.

1 يُوحَنَّا 3:10

وَ نَعَرْفُوا يَاتُمَّنْ عِيَالْ اللّٰهْ وَ يَاتُمَّنْ عِيَالْ إِبْلِيسْ بِالشَّيّءْ الْيِسَوُّوهْ. كُلَّ النَّاسْ الْمَا يِتَابُعُوا الْحَالْ الصَّالْحَةْ، هُمَّنْ مَا عِيَالْ اللّٰهْ مِثِلْ النَّاسْ الْمَا يِحِبُّوا أَخْوَانْهُمْ.

1 يُوحَنَّا 3:21

يَا الْمَحْبُوبِينْ، كَنْ قُلُوبْنَا مَا يُلُومُونَا فِي أَيِّ شَيّءْ، أَنِحْنَ عِنْدِنَا الضَّمَانْ قِدَّامْ اللّٰهْ.

رُؤية 2:28

أَيْوَى، مِثِلْ أَبُويِ اللّٰهْ أَنْطَانِي قُدْرَةْ، أَنَا كُلَ نَنْطِيهْ نَجْمَةْ الصَّبَاحْ.