زَكَرِيَّا 7 - الكتاب المقدس بالعربي الدارجي هنا تشاد

العدالة مُهِمّة من الصيام

¹ وَ فِي الْيَوْم الرَّابِعْ هَنَا الشَّهَرْ التَّاسِعْ الْأُسْمَهْ كِسْلُو فِي السَّنَةْ الرَّابْعَةْ هَنَا حُكُمْ الْمَلِكْ دَارِيُوسْ، اللّٰهْ حَجَّى لِزَكَرِيَّا.

² وَ بَيْت إِيلْ شَرَاصَرْ قَايِدْ عَسْكَرْ الْمَلِكْ وَ عَسْكَرَهْ رَسَّلَوْا نَاسْ لِيَشْحَدَوْا اللّٰهْ.

³ وَ رَسَّلَوْهُمْ أَشَانْ يَسْأَلَوْا رُجَالْ الدِّينْ فِي بَيْت اللّٰهْ الْقَادِرْ وَ الْأَنْبِيَاء وَ يُقُولُوا: «أَوَّلْ أَنِحْنَ قَاعِدِينْ نُصُومُوا وَ نَبْكُوا فِي الشَّهَرْ الْخَامِسْ أَشَانْ نِذَّكَّرَوْا دَمَارْ هَنَا بَيْت اللّٰهْ. وَ هَسَّعْ دَا، وَاجِبْ نِسَوُّوهْ وَلَّا لَا؟»

⁴ وَ دَاهُو اللّٰهْ الْقَادِرْ حَجَّى لَيِّ وَ قَالْ:

⁵ «قُولْ لِكُلَّ شَعَبْ الْبَلَدْ وَ لِرُجَالْ الدِّينْ: ‹وَكِتْ صُمْتُوا وَ حِزِنْتُوا فِي الشَّهَرْ الْخَامِسْ وَ السَّابِعْ، وَ دَا مِنْ مُدَّةْ 70 سَنَةْ، صِيَامْكُو دَا لَيِّ أَنَا وَلَّا؟

⁶ وَ وَكِتْ أَكَلْتُوا وَ شِرِبْتُوا، مَا لِنُفُوسْكُو بَسْ وَلَّا؟›»

⁷ اللّٰهْ حَجَّى مِثِلْ دَا بِوَاسِطَةْ الْأَنْبِيَاء هَنَا زَمَانْ. وَ دَا وَكِتْ سُكَّانْ مَدِينَةْ الْقُدُسْ وَ حِلَّالْهَا الْمُحَوِّقِينْهَا قَاعِدِينْ فِي رَاحَةْ وَ صَحَرَاءْ نَقَبْ وَ سَهَلَةْ شَفِيلَةْ مَلَانِينْ بِسُكَّانْ.

⁸ وَ اللّٰهْ حَجَّى لَيِّ وَ قَالْ:

⁹ «دَاهُو اللّٰهْ الْقَادِرْ قَالْ: ‹أَحْكُمُوا بِالْحَقّ وَ الْعَدَالَةْ وَ خَلِّي أَيِّ وَاحِدْ يِسَوِّي لِأَخُوهْ الْخَيْر وَ الرَّحْمَةْ.

¹⁰ مَا تَظُلْمُوا الْأَرْمَلَةْ وَ لَا الْأَتِيمْ وَ لَا الْأَجْنَبِي وَ لَا الْمِسْكِينْ. وَ خَلِّي نَادُمْ مَا يِشِيلْ نِيَّةْ لِيِسَوِّي الْفَسَالَةْ لِأَخُوهْ.›»

¹¹ وَ لَاكِنْ هُمَّنْ أَبَوْا مَا يُخُطُّوا بَالْهُمْ. قَوَّوْا رُوسَيْهُمْ وَ سَدَّوْا أُدْنَيْهُمْ أَشَانْ مَا يَسْمَعَوْا.

¹² وَ هُمَّنْ قَوَّوْا قَلِبْهُمْ مِثِلْ حَجَرْ أَشَانْ مَا يَسْمَعَوْا شُرُوطْ التَّوْرَاةْ وَ الْكَلَامْ الْاللّٰهْ الْقَادِرْ رَسَّلَهْ لَيْهُمْ بِوَاسِطَةْ رُوحَهْ وَ بِوَاسِطَةْ الْأَنْبِيَاء هَنَا زَمَانْ. وَ دَا بَسْ سَبَبْ الْغَضَبْ الشَّدِيدْ هَنَا اللّٰهْ الْقَادِرْ.

¹³ وَ فِي شَانْ دَا، اللّٰهْ الْقَادِرْ قَالْ: «مِثِلْ أَنَا نَادَيْتهُمْ وَ هُمَّنْ مَا سِمْعَوْنِي، هُمَّنْ كُلَ يِنَادُونِي وَ أَنَا مَا نَسْمَعْهُمْ.

¹⁴ وَ أَنَا شَتَّتُّهُمْ عَلَيْ كُلَّ الْأُمَمْ الْأَبَداً مَا يَعَرْفُوهُمْ. وَ بَعَدْ شَتَّتُّهُمْ، الْبَلَدْ خِرْبَتْ وَ مَا فِي الْيَمْشِي لَيْهَا وَ لَا الْيَجِي مِنْهَا. وَ بَلَدْهُمْ السَّمْحَةْ دِي، سَوَّوْهَا خَرَابْ.»