زَكَرِيَّا 3 - الكتاب المقدس بالعربي الدارجي هنا تشاد

رُؤية تُخُصّ كبير رجال الدين

¹ وَ بَعَدْ دَا، اللّٰهْ شَوَّفَانِي يَشُوعْ كَبِيرْ رُجَالْ الدِّينْ وَاقِفْ قِدَّامْ مَلَكْ اللّٰهْ. وَ إِبْلِيسْ التَّهَّامْ وَاقِفْ بِنُصّ الزَّيْنَةْ هَنَا يَشُوعْ لِيَتْهَمَهْ.

² وَ مَلَكْ اللّٰهْ قَالْ لِإِبْلِيسْ: «خَلِّي اللّٰهْ يِسَكِّتَكْ، يَا إِبْلِيسْ! أَيْوَى، خَلِّي اللّٰهْ يِسَكِّتَكْ، هُو الْعَزَلْ مَدِينَةْ الْقُدُسْ. وَ كَنْ لِلرَّاجِلْ دَا، هُو مَا مِثِلْ مُشْهَابْ الشَّالَوْه مِنْ النَّارْ وَلَّا؟»

³ وَ يَشُوعْ وَاقِفْ قِدَّامْ الْمَلَكْ وَ لَابِسْ خُلْقَانْ وَسْخَانِينْ.

⁴ وَ الْمَلَكْ أَمَرْ وَ قَالْ لِلْوَاقْفِينْ جَنْبَهْ: «سِلُّوا مِنَّهْ خُلْقَانَهْ الْوَسْخَانِينْ.» وَ بَعَدْ دَا، قَالْ لِيَشُوعْ: «شِيفْ، أَنَا نَجَّيْتَكْ مِنْ ذَنْبَكْ. خَلِّي يِلَبُّسُوكْ خُلْقَانْ هَنَا عِيدْ.»

⁵ وَ قَالْ بَتَّانْ: «خَلِّي يُخُطُّوا فِي رَاسَهْ كَدْمُولْ طَاهِرْ.» وَ خَلَاصْ، لَبَّسَوْه خُلْقَانْ وَ خَطَّوْا كَدْمُولْ طَاهِرْ فِي رَاسَهْ. وَ مَلَكْ اللّٰهْ وَاقِفْ فِي الْبَكَانْ دَا.

⁶ وَ خَلَاصْ، مَلَكْ اللّٰهْ كَلَّمْ لِيَشُوعْ وَ قَالْ:

⁷ «دَاهُو اللّٰهْ الْقَادِرْ قَالْ: ‹كَنْ تِشِيلْ دَرْبِي وَ تَحْفَضْ خِدِمْتِي، إِنْتَ بَسْ تَحْكِمْ فِي بَيْتِي وَ تِرَاقِبْ فِي فَضَايْتِي كُلَ. وَ أَنَا نَنْطِيكْ بَكَانْ أَمْبَيْن الْآخَرِينْ الْوَاقْفِينْ هِنِي.›»

اللّه يرسِّل عبْده البِنادوه بِذْرة

⁸ «أَسْمَعْ، يَا يَشُوعْ كَبِيرْ رُجَالْ الدِّينْ وَ كُلَّ رُجَالْ الدِّينْ التِّحْتَكْ. إِنْتُو ذَاتْكُو عَلَامَةْ هَنَا الشَّيّءْ الْيُكُونْ. دَاهُو قَرِيبْ أَنَا نِرَسِّلْ عَبْدِي الْبِنَادُوهْ بِذْرَةْ.

⁹ شِيفُوا الْحَجَرْ الْغَالِي الْخَطَّيْتَهْ قِدَّامْ يَشُوعْ. وَ فِي الْحَجَرْ، فِي سَبْعَةْ عُيُونْ. وَ دَاهُو أَنَا ذَاتِي نَنْقُشْ فَوْقَهْ نَقِشْ. وَ فِي يَوْم وَاحِدْ بَسْ، نُقُشّ خَطَا الْبَلَدْ دِي. وَ دَا كَلَامْ اللّٰهْ الْقَادِرْ.

¹⁰ وَ فِي الْيَوْم دَا، أَيِّ وَاحِدْ مِنْكُو يَعَزِمْ جَارَهْ لِيَقْعُدْ بِالسَّلَامَةْ فِي لُبّ جِنَيْنِتَهْ هَنَا الْعِنَبْ وَ التِّينْ.» وَ دَا كَلَامْ اللّٰهْ الْقَادِرْ.