نشيد 6 - الكتاب المقدس بالعربي الدارجي هنا تشاد

كلام البنات

¹ حَبِيبْكِ وَيْن مَشَى؟ أَوْرِينَا، يَا إِنْتِ الْأَجْمَلْ مِنْ الْعَوِينْ! حَبِيبْكِ فَاتْ بِوَيْن؟ أَوْرِينَا، أَشَانْ نِفَتُّشُوهْ مَعَاكِ.

كلام المحْبوبة

² حَبِيبِي نَزَلْ فَوْقِي أَنَا جِنَيْنِتَهْ الْمَزْرُوعَةْ بِشَدَرْ الدُّخَّانْ. وَ يَسْرَحْ فِي جِنَيْنِتَهْ وَ يَقْطَعْ النُّوَّارْ.

³ حَبِيبِي، أَنَا لَيَّهْ هُو وَ هُو لَيِّ أَنَا. هُو سَارِحْ فِي النُّوَّارْ.

كلام المحْبوب

⁴ إِنْتِ جَمِيلَةْ، يَا حَبِيبْتِي، مِثِلْ حِلَّةْ تِرْصَةْ وَ سَمْحَةْ مِثِلْ مَدِينَةْ الْقُدُسْ. إِنْتِ عَجِيبَةْ مِثِلْ دَيْش عَظِيمْ الْمَاشِي بِرَايْتَهْ!

⁵ دَلِّي عُيُونْكِ مِنِّي أَشَانْ قَاعِدِينْ يِبَرْجُلُونِي. وَ شَعَرْكِ مِثِلْ دَنَبْ الْفَرَسْ النَّازْلَةْ مِنْ جَبَلْ قِلْعَادْ.

⁶ وَ سُنُونْكِ بُيُضْ مِثِلْ لَبَنْ الْغَنَمْ وَ مِثِلْ الرِّهَيْو الْبَرَّدَهْ الْمَطَرْ. أَيِّ سِنّ بِقَبِيلِتْهَا، مَا فِي وَاحِدَةْ كُلَ وَقَعَتْ.

⁷ وَ خُدُودْكِ مِثِلْ الرُّمَّانَاتْ غَادِي لِلَفَّاحِتْكِ.

⁸ مُمْكِنْ مَلِكْ الْبَلَدْ عِنْدَهْ 60 مَلِكَاتْ وَ 80 سِرِّيَّاتْ وَ بَنَاتْ عُدْرِيَّاتْ بَلَا عَدَدْ.

⁹ وَ لَاكِنْ أَنَا، حَمَامْتِي هِي وَاحِدَةْ وَ جَمِيلَةْ. هِي وَاحِدَةْ فِي أَمَّهَا وَ وَالْدِتْهَا تِحِبَّهَا. الْبَنَاتْ شَافَنْهَا وَ قَالَنْ: «مَبْرُوكْ لَيْكِ.» الْمَلِكَاتْ وَ السِّرِّيَّاتْ شَافَنْهَا وَ شَكَرَنْهَا وَ قَالَنْ:

¹⁰ «هِي دِي يَاتِي التِّبِينْ مِثِلْ طَلُوعْ الْحَرَّايْ؟ هِي بَيْضَةْ مِثِلْ الْقَمَرْ وَ تِرَارِي مِثِلْ الْحَرَّايْ. هِي عَجِيبَةْ مِثِلْ دَيْش عَظِيمْ الْمَاشِي بِرَايْتَهْ!»

¹¹ أَنَا نَزَلْت فِي جِنَيْنَةْ الْفَوَاكِهْ لِنِشِيفْ نَبَاتْ الْوَادِي. جِنَيْنَةْ الْعِنَبْ رَمَتْ وَلَّا؟ شَدَرْ الرُّمَّانْ نَوَّرْ وَلَّا؟

¹² وَ مِنْ دُونْ نَعَرْفَهْ، حَسَبْت نَفْسِي أَنَا رَاكِبْ فِي عَرَبَةْ الْمَلِكْ!

كلام الآخرين

¹³ تَعَالِي! تَعَالِي، يَا بِنْت حِلَّةْ شُلَامْ! قَبِّلِي لِنِشِيفُوكِ! مَالَا وَاجِبْ نِشِيفُوا بِنْت حِلَّةْ شُلَامْ التَّلْعَبْ بَيْن صَفّ الْبَنَاتْ وَ صَفّ الصُّبْيَانْ؟